වසර 14කට පසු බොරැල්ල ආයුර්වේද ශික්ෂණ රෝහලේ සැත්කම් කටයුතු නැවතත් ආරම්භ කර තිබේ. ඒ කටයුතු ඇරඹුණු දෙසැම්බර් 31 දින එහි සුළු සැත්කම් 2ක් සිදු කෙරුණු අතර එය සිදු කරනු ලැබුවේ මහාචාර්ය මනෝරංජන් රාහු සහ ආයුර්වේද වෛද්ය ඒ.කේ.එස්. වීරසේකර, ආයුර්වේද වෛද්ය ධම්මික ලොකුගමගේ යන අයගේ දායකත්වයෙනි.
2006 වසරේ සිට වසා-දමා තිබුණු බොරැල්ල ආයුර්වේද ශික්ෂණ රෝහලේ ශල්යාගාරය දේශීය වෛද්ය විද්යායතනයේ අධ්යක්ෂ, ජ්යෙෂ්ඨ මහාචාර්ය ප්රියානි පරණගමගේ උපදෙස් පරිදි පිළිසකර කිරීමෙන් අනතුරුව, මෙවර යළි විවෘත කළේ ඉන්දියාවේ වරණසි විශ්වවිද්යාලයේ ආයුර්වේද වෛද්ය පීඨයේ හිටපු පීඨාධිපති මහාචාර්ය මනෝරංජන් රාහු සහ බටහිර ශල්ය වෛද්ය විශේෂඥ මහාචාර්ය ඒ.එන්. ගංගෝපාධ්ය යන අයගේ ප්රධානත්වයෙනි.
දේශීය වෛද්ය විද්යායතනයේ ඉගෙනුම ලබන ආයුර්වේද වෛද්ය සිසුන්ට අධ්යයන කටයුතු විධිමත් අන්දමින් කරගෙන යෑමට සැත්කම් පුහුණුව අවශ්ය බැවින් ශල්ය අධ්යයන අංශයේ ආචාර්ය එල්.පී.ඒ. කරුණාතිලක, වෛද්ය මනෝරි අමරජීව සහ වෛද්ය පේෂලා කාරියවසම් යන ජ්යෙෂ්ඨ කථිකාචාර්යවරුන් විසින් අධ්යක්ෂවරියට මේ ශල්යාගාරය විවෘත කිරීමේ වැදගත්කම පෙන්වා දී තිබේ.