යුද්ධයේදී ‘රණක්ෂිතයට’ හෙවත් ආබාධවලට පත් රණවිරුවන්ගේ දිරිය වැඩීම පිණිස ශ්‍රී ලංකා යුද්ධ හමුදාව විසින් ව්‍යාපෘති රැසක් ක්‍රියාවට නංවමින් තිබේ. යුද හමුදාපති ලුතිනන් ජනරාල් ශවේන්ද්‍ර සිල්වා මහතාගේ සංකල්පයකට අනුව පසුගිය 12 සහ 13 දෙදින කොළඹ සෞන්දර්යය විශ්වවිද්‍යාලයේ ජේ.ඩී.ඒ. පෙරේරා කලාගාරයේදී උත්කර්ෂවත්ව පැවැත්වුණු, රණක්ෂිතයට පත් රණවිරුවන් 62 දෙනකු අතින් නිමැවුණු සිතුවම් 172ක්, මූර්ති 15ක්, ලී කැටයම් 34ක් හා අත්කම් 203කින් සමන්විත ‘උට්ඨාන වීර්යය’ නිමැවුම් දැක්ම එහි තවත් පියවරකි.
මෙහිදී රණක්ෂිතයට පත්ව නේවාසිකව සිටින අය සහ වත්තල රණවිරු සම්පත් කේන්ද්‍රයේ පුහුණුව ලබන්නන් විසින් ඉදිරිපත් කරන ලද මේ නිර්මාණ බොහෝ දෙනාගේ ඇගයුමට පාත්‍ර වූ අතර, මේ අවස්ථාවට එක් වූ යුද හමුදාපතිවරයා පැවසූයේ රණක්ෂිතයට පත් හමුදා සාමාජිකයන්ගේ මෙවන් දස්කම් ජාතික තලයේ මීටත් වඩා ස්ථානයක් කරා ගෙන යෑමට යුද හමුදාව හැකි සියලු පියවර ගන්නා බවයි. 
මේ ප්‍රදර්ශනයට එක් කළ නිර්මාණ බිහි කිරීමට දායක වූ ඇතැම් රණවිරුවකුගේ පාදයක් නැත. ඇතැමකුගේ පා දෙකම නැත. තවත් අයකුගේ අතක් නැත. දෑතම නැති අය මෙන්ම දෑසම නොපෙනෙන අයද ඒ අතර වෙති.
ඔවුන් මේ තත්ත්වයට පත් වූයේ අපට බියක්-සැකක් නැතිව ජීවත් වන්නට හැකි රටක් නිර්මාණය කරන්න ගොසිනි.
අද මේ බොහෝ අයට තනිවම තම කටුයතු කරගන්න අපහසුය. චිත්‍ර අඳින්නන්ට අවැසි වර්ණ සංයෝජනය කරගන්න වතුර ටික පවා තවෙකකු ළඟට ගෙනැවිත් දිය යුතුය. අනෙකුත් නිර්මාණ කරන්නන්ටද අවශ්‍ය බොහෝ දෑ ඔවුන් ළඟට සැපයිය යුතුය. ඇතැම් විට මූර්ති හා කැටයම් නිර්මාණ කරන්න යද්දී දෙපාවලින් දෑතට ගත යුතු වාරුව ගන්න ඔවුන්ට හැකියාවක් නැත. ඒ දෙපා නැති නිසාය. එසේ වුවද කලවාවලින් ඒ වාරුව ගනිමින් ඔවුහු තම නිර්මාණ සරසති. රෝද පුටුවේ හිඳ, ඇඳක් මත හිඳ, එසේත් නැත් නම් බිත්ති බාගයක හිඳ ඔවුහු තම නිර්මාණ කරති. හමුදාවේදී ලත් ධෛර්ය සම්පන්න භාවය මත කෙසේ හෝ තම කාර්යය ඉහළින් නිම කර මිස ඔවුන් පස්ස බලන්නේ නැත.
මෙහිදී යුද හමුදාව විසින් පත් කර ඇති උපදේශකවරුන් මෙන්ම මඟ පෙන්වන්නෝද විසින් මේ නිර්මාණවල අගය ඉහළ නංවාගැනීමට අවශ්‍ය උපෙදස් සපයති. ස්වාභාවික ද්‍රව්‍ය උපයෝගි කරගනිමින් සකස් කර ඇති නිර්මාණවලට ඔවුන් ලබා දී ඇත්තේ ඉහළ වටිනාකමකි. වෙසෙසින් පොල් කටු ඇසුරෙන් තනන ලද නිර්මාණ කාලයක් අපට තබා ගෙන භාවිත කළ හැකි සෞඛ්‍ය සම්පන්න මුළුතැන්ගෙයි නිර්මාණ ලෙස හඳුන්වා දීමට පිළිවන. එමෙන්ම මූර්ති කැටයම් මෙන්ම චිත්‍ර නිර්මාණද අන්තර්ජාතික තලයේ ඒවාය. ඔවුන් විසින් ලබා ගන්නා දැනුම අනුව ඉදිරියේදී මීටත් වඩා ප්‍රමිතියෙන් හා අගයකින් යුක්ත නිර්මාණ එළි දකිනු ඇත.
මොවුන්ගේ ඒ නිමැවුම් ජනතා ඇසට යොමු කරන්න යුද හමුදාව ගත් පියවර අගය කළ යුතුය. ‘උට්ඨාන වීර්යය’ ප්‍රදර්ශනයේදී රණවිරු නිමැවුම් රැසක්ම ජනතාව විසින් මිල දී ගැනීමද අගය කළ යුතුය. ඒ අලෙවියෙන් සැලකිය යුතු මුදලක් රණවිරුවන්ටද ලබා දීමට යුද හමුදාව කටයුතු කර තිබේ. එයද පැසසිය යුතුය.
‘රණක්ෂිතයට’ පත් මේ රණවිරුවන් ඒ තත්ත්වයට පත්ව ඇත්තේ අපගේ ජීවිත සුරක්ෂිත කරන්න ගොසිනි. එය හුදු රැකියාවක තත්ත්වයෙහි ලා ලඝු කොට සලකන්න සිහි-බුද්ධිය ඇති කිසිවකුටත් හැකියාවක් නැත.
අත පය හතරම යහතින් ඇති අපට වඩා ඔවුන් බොහෝ දේ කර ඇත. ඔවුන්ගේ මේ වෑයම අප ඉහළින්ම අගය කළ යුත්තේ ඒ නිසාය. අදද ඔවුන් තම නිර්මාණවලින් බොහෝ දේ කරති. එහෙයින් රටට ණය නැති ඔවුන් වෙනුවෙන් අපද යමක් හෝ කළ යුතුය. යුද හමුදා පුනරුත්ථාපන අධ්‍යක්ෂ බ්‍රිගේඩියර් ශිරාන් අමරසේකර අපට පැවසූයේ අවැසි අයකුට මෙවන් නිමැවුම් ඇණවුම් කර, සාදවාගත හැකි බවයි. ඉහළ වටිනාකමක් මෙන්ම ඉහළ ප්‍රමිතියක් ඇති මේ නිර්මාණ ඇණවුම් කර, ඔවුන්ට යම් වටිනාකමක් දීම කළගුණ දත් මිනිසුන්ගේ යුතුකමයි.
සේයාරූ - නිශ්ශංක ද සිල්වා
