වගකිවයුතු අමාත්යාංශ කිහිපයක කැබිනට් ඇමැති ධූරය ඔබට ලැබී තිබෙනවා. ඒ අමාත්යාංශ වල ඉදිරි වැඩ කටයුතු සම්බන්ධයෙන් කතා කළොත් ?
අපි ඉතා හොඳින් සහයෝගයෙන් ක්රියා කරනවා. පසුගිය රජය යටතේ සිදුවී තියන අක්රමිකතා අකාර්යක්ෂමතා මඟහරවා ගෙන කටයුතු කරනවා. ඒ සඳහා ජනාධිපති තුමාගේ සහ අගමැතිතුමාගේ පූර්ණ අනුමැතිය සහ වැඩකටයුතු සඳහා පුර්ණ අනුග්රහය තියෙනවා.
පහුගිය ආණ්ඩුව යටතේ ආන්දෝලනයකට ලක්වූ කරුණක් වන වසර කිහිපයක් කල් දමා ඇති පළාත් සභා මැතිවරණය ඉදිරියේදි පැවැත්වීමට කටයුතු කරනවාද ? පළාත්සභා සහ පළාත් පාලන මැතිවරණය සම්බන්ධයෙන් වගකීම පැවරී ඇති ඇමැතිවරයා ලෙසත් එ් ඇමැති ධූරයේ මින් පෙර කටයුතු කළ පළපුරුදු ඇමැතිවරයෙක් ලෙස මැතිවරණ කල් දැමීම ප්රජාතන්ත්රවාදී රටක් ලෙස කෙබදු ආකාරයකට බලපාන්නේ ද යන්න ඔබේ අදහස?
මහමැතිවරණයට පෙර පළාත් සභා මැතිවරණයක් පැවැත්වීමට ඉඩ කඩ ලැබෙන එකක් නැහැ මේ වෙලාවේ. මේවන විට ජනතාව අතර උණුසුමට ලක්වෙලා තියන වැදගත් ම ඡන්දය මහමැතිවරණය. පළාත් පාලන ඡන්දය තියන්නේ නැහැ කියලා කියන්නේ නැහැ. නමුත් එයට මේ වෙලාව නොවෙයි. මහ මැතිවරණයෙන් අනතුරුව අපිට පළාත් පලාන මැතිවරණයට යන්න පුළුවන්. ඉතිහාසයේ පලමුවැනි වතාවටය පළාත් පාලන ඇමැතිවරයා ඉදිරිපත් කරපු යෝජනාවලට පළාත් පාලන ඇමැතිවරයා ට විරුද්ධ ව ඡන්දය ලබා දුන්නා. අපි එහෙම දෙයක් ලෝකයේ කොහේවත් දැකලා නැහැ. අපි තුෂ්ණිම්භූතවෙලා පාර්ලිමේන්තුවෙ බලාගෙන හිටියා. එදා පසුගිය රජය යටතේ මැතිවරණ කල් දැමීම පුරුද්දක් විදිහට ඒ අය කරගෙන ගියා. ඡන්දයකට යන්න ඒ අය බය වුණා. නමුත් ජනතාව පෙළගැසිලා ඉන්නේ අපේ පක්ෂය වටා.
පසුගිය පාර්ලිමේන්තුව කාලකණ්ණි පාර්ලිමේන්තුවක්. පැරදුණු අයට ම මන්ත්රීකම්, ඇමැති කම් දුන්නා. ඒ අයට අැමැතිකම් දුන්නා නම් ඇයි ඡන්දයක් තියලා අපි ජනතා කැමැත්ත විමසන්නේ. ප්රජාන්ත්රවාදය විනාශ වෙලා තිබුණේ. ඒ කාලයේ සිමා නීර්ණය ගැටලුවක් මතු කරගෙන ඡන්දය පවත්වන මැතිවරණ ක්රමයක් මතු කරගෙන ඡන්දය කල් දැම්මා. කිසිම ලෙසකින් මැතිවරණ කල් දැමීමක් ඉදිරියේදි සිදුවෙන්නේ නැහැ. පළාත් පාලන අමාත්යාංශයට තිබුණේ කුඩම්මාගේ සැලකිලි. අපි ඒක වෙනස් කළා. අපි එය බලගතු අමාත්යාංශයක් බවට පත් කරලා තියෙනවා. අපි එයින් ජනතා මෙහෙවරක් ඉටුකරන්නයි උත්සාහ ගන්නේ. පළාත්පලාන ඇමැති ධූරය මම කලින් දරපු ඇමැති ධූරයක්. මට එය හොඳින් හුරුපුරුදුයි.
කාර්යක්ෂම සේවාවක් සම්බන්ධයෙන් ඔබ කතා කළත් ඉදිරි මැතිවරණයට පෙර ආයතනයන්හි කාර්යක්ෂමතාව ඇති කරන්නට එහි ප්රධානීන්ගේ ක්රියාකාරීත්වය වැදගත්. ඔබගේ අමාත්යංශවලට අදාළ ආයතනයන්ට සභාපතිවරුන්, අධ්යක්ෂකවරුන්, නිලධාරීන් තවමත් පත්කරලා නැහැ නේද? එසේ නම් කාර්යක්ෂම සේවයක් ජනතාව වෙනුවෙන් ඉටු කරන්නේ කොහොමද?
පත්කළ යුතු අය පත් කරගෙන යනවා. දැන් මේ වන විටත් පත් කිරීම කරගෙන යනවා. ඒ පත්කර තියෙන අය දිහා බැලුවාම අපිට පේනවා; ඒ විෂය සම්බන්ධයෙන් දැනුවත් අය තමයි පත් කර තියෙන්නේ කියලා; එයයි වෙනස.
සුදුසු අය තමයි පත් කරන්නේ නුසුදුසු අය කිසි කෙනෙක් පත් කරන්නේ නැහැ. සුදුසු අයට සුදුසු තැන ලබාදෙනවා. තෝරා පත් කරගැනීම සිදු කිරීම ප්රමාද වුවත් කඩිමුඩියේ පත් කරලා අනවශ්ය ප්රශ්න ඇති කර නොගත යුතුයි. කල් ගියත් සුදුසු මිනිහා තෝර ගත යුතුයි. නුසුදුසු අය පත් කරන්නේ නැහැ.
ඉදිරි මහ මැතිවරනයේදි තුනෙන් දෙක ජනවරමක් ලබා ගන්නට පුළුවන් කියලා ඔබ හිතනවා ද ?
මේ රටේ සිංහල බෞද්ධ ජනතාව පමණක් නොවෙයි; අද වන විට ජනාධිපතිතුමාගේ වැඩපිළිවෙල ගැන සියලු ජනතාව ප්රසාදයෙන් ඉන්නේ. ඒ නිසා අපි අනිවාර්යෙන් ම විශිෂ්ට ජයක් ලබනවා. අනිවාර්යෙන්ම එය අපිට කරන්න පුළුවන්. මාතලේ දිස්ත්රික්කයේ අපි ආසන හතරක් දිනනවා. අපි අනිවාර්යෙන් ම තුනෙන් දෙකක බලයක් ගන්නවා.
මේ ජනාධිපතිතුමාගේ ඔබ කියන ඒ වෙනස් ගමනට; කැබිනට් ඇමැතිවරයෙක් හැටියට ඔබතුමාත් යන්න සුදානම්ද?
අනිවාර්යෙන් ඒ වෙනසට තමයි අපි කැමැති වුණේ. ඒ ගමනට අපි අනිවාර්යෙන් ම සුදානම්. හොඳ ගමනක් යන්න සුදානම්; මේ රටේ ජනතාවගේ සුබසිද්ධිය වෙනුවෙන්.
යුද හමුදා නිලධාරින් ආයතනවල සභාපතිවරුන් ලෙස පත් කරලා තියනවා; මෙය මිල්ටරිකරණයක් කරා යෑමක් ද කියලා ඇතැම් අය කියනවා?
හමුදාවේ එක්කෙනෙක් දෙන්නෙක් ආයතනවලට දැම්මා කියලා මුළු හමුදාව ම දැම්මා වගේ මිල්ටරිකරණය කියලා කියනවා. ඒ හමුදා නිලධාරීන් කොතරම් සුදුසුකම් තියෙන අයද? ඒ අය වගේ අපි හොඳ නිලධාරීන් සිරගත කළේ නැහැ. මේ විපක්ෂයට දැන් කරන්න දෙයක් නැහැ; කියන්න දෙයක් නැහැ; මොනවා හරි කියනවා. කියන්න දෙයක් නැතුව; මොනවා හරි ඕන මිනිස්සු ගෙනල්ලා ජනතාව රවට්ටලා ඇතැම් හිටපු ඇමැතිවරුන් කරන දේ අපි දැකලා තියනවානේ. මුළු රටක් රවට්ටලා, මුළු රටක් හිනැස්සුව මිනිහෙක් කරපුවා අපි දැක්කා. මේ අයට ආත්ම ගෞරවයක් නැහැ.
මේ වනවිට ජනතාවට පාරිභෝගික භාණ්ඩවල මිල ඉහළ ගිහින් තියෙනවා.
වැස්සෙන් ජනතාව අධික පීඩාවට පත් වෙලා තියනවා.බෝගවලට හානි වුණා; ජනතාව පිඩාවට පත් වුණා. පිළියම් යොදන්න ඕන. මේ තරම් පොඩි කාලෙකට කොහොමද එකපාරට කඩාවැටුණු ආර්ථිකයක් ගොඩ ගන්නෙ. හැබැයි අපි මේ කඩාවැටුණු ආර්ථිකය කොහොමහරි ගොඩගන්නවා.
ජනාධිපති ගෝඨාභය රාජපක්ෂ මහතා බලයට පත්වීමත් සමඟ බදු සහන ලබා දුන්නත්, එහි ප්රතිලාභ සමාන්ය ජනතාවට ලැබිලා නැහැ කියලා චෝදනාවක් තියෙනවා.
මොනතරම් ජනතාව අපිට කෘතවේදි වෙනවාද බදු සහන ලබා දීම ගැන. පොඩි මිනිහාගේ හඬ යටපත් වෙලා තියෙන්නේ. අපි එය මතු කරගන්නට ඕන. ලොකු මිනිහාගේ හඬ විතරයිනේ ඉදිරියට එන්නේ. අපි යන්තම් බේරුණා; අපි බදු ගෙව ගෙවා හිටියේ කියලා අපිට ජනතාව කියනවා.
නමුත් මේවා සමාජයට යන්නේ නැහැ. අපි ඇවිත් තවම පොඩි කාලයයි; අපි මේ රටේ ජනතාවගේ ආර්ථිකය ගොඩ නඟනවාමයි. මේ බදු සහනය යම් ආකාරයට නොලැබෙනවා නම් එය ලබා දෙන්නට අපි කටයුතු කරනවා; ඒ ගැන අපි කැප වෙනවා. අපි පොදු ජනතාව වෙනුවෙන් ඉන්නවා .අපි ඉන්නේ ඒ මිනිස්සුත් එක්ක. පොළොවේ පය ගහලා ඒ මිනිස්සුන්ගේ දුක සැප බලන එක තමයි අපේ යුතුකම.
පසුගිය ආණ්ඩුව කාලයේ ඔබ බොහෝ නිහඬ පිළිවෙතක් අනුගමනය කළා. එයට හේතුව කුමක්ද?
පසුගිය කාලයේ කතා කරපු අපේ මිනිස්සුන්ට මොකද වුණේ. කතා නොකළ යුතු තැන කතා නොකළ යුතුයි; අපි කතාකළ යුතු තැන කතා කරනවා.
ඒ ආණ්ඩුව ගෙන ගියේ කොයිවගේ පිළිවෙතක් ද කියලා අපි දැක්කා. කතා කරපු අයට මොනවද ලැබුණේ; වචන නිරපරාදේ ගියා විතරයි. ඒකාධිපති පාලනයක් ඒ අය ගෙන ගියේ. ආණ්ඩුව ඇතුළේ අර්බුද තිබුණා. ඒ අයට ඒ දේවල් විසද ගන්න බැරිව ඒ අය විපක්ෂයට චෝදනා නඟ නඟා බොරු පැමිණිලි දාලා හිරේ දැම්මා. ඒ වගේ ආණ්ඩුවකට කතා කරලා වැඩක් නැහැ.
අද වන විට වැඩිපුරම කතා බහට ලක්වෙලා තියන ආන්දොලනාත්මක සිදුවීම ස්විස් තානාපති කාර්යාලයේ නිලධාරිණිය සම්බන්ධවයි. එය සම්පුර්ණයෙන් ගොතන ලද කතාවක් ලෙස ආණ්ඩු පක්ෂය හුවා දැක්වුවත් එය සනාත කර තිබුණත් එහි යම් සත්යතාවක් තියෙනවා කියලා විපක්ෂය තවමත් කියනවා.?
විපක්ෂය හදන්නේ ඒ අයගේ කළු පැල්ලම් අපිට දාන්නයි. ඒ නිසා අපි ඒවාට සැලෙන්නේ නැහැ. අපි අපේ ගමන යනවා. මේ රටට පැහැදිලි දෙයක් කළේ අපි. මෙවරත් එය කරලා පෙන්නනවා. විපක්ෂයේ ඉන්නේ හරක් ටිකක්. ඒ අයට උම්බෑ කියනවාට වඩා දෙයක් කරන්න බැහැ. මේ විපක්ෂයේ ඉන්නේ ඒ ආණ්ඩුවේ සිටිය හරක් රැළමයි. ඒ අයට කිව්වාට තේරෙන්නේ නැහැ.
බැදුම්කර වංචාව සම්බන්ධයෙන් චෝදනා ලබා ඉන්න අර්ජුන් මහේන්ද්රන් ව ලංකාවට ගෙන්වීම සම්බන්ධයෙන් විපක්ෂයේ සිටියදී ආණ්ඩු පක්ෂයට බල කළත් ඒ සම්බන්ධයෙන් මේ වනවිට කිසිදු පියවරක් අරගෙන නැහැ කියලා ඇතැම් අය ආණ්ඩුවට චෝදනා කරනවා.?
අපි එ් පුද්ගලයා ලංකාවට ගේනවා. දැනුත් අර්ජුන් මහේන්ද්රන් ලංකාවට ගේනවා කියලා අපි කියනවා. ඒ සම්බ්න්ධයෙන් වැඩපිළිවෙල ක්රියාත්මක කරමින් පවතිනවා. ලංකාවේ ඒ අයට උල්පන්දම් දුන්න හොරු ටිකත් හොයලා අල්ලනවා.
පාඨලී චම්පික හිටපු අමාත්යවරයාගේ අත්අඩංගුවට ගැනීම දේශපාලන පළිගැනිමක් බව විපක්ෂය සඳහන් කරනවා.
මම වෙනම සාකච්ඡාවක් දෙන්නම්; මාව අත්අඩංගුවට ගත්තේ උසාවි නියෝගයක් නැතුව. එය නීත්යනුකූල ද කියලා මම අහනවා? දවස් පනස් අටක් මාව හිරභාරයේ තියා ගත්තා. මේ අය දැන් සාධාරණත්වය ගැන කතා කරනවා. ගිය ආණ්ඩුව නීතිය එයාලගේ වාසියට පාවිච්චි කරපු හැටි අපි දැක්කා.
යුඑන්පි එකේ විපක්ෂ නායක ධූරයට සජිත් ප්රේමදාස මහතා පත් කරන්නට සූදානමක් තිෙයනවා. විපක්ෂනායක ධූරයට සජිත් මහතාට ලැබීමත් සමඟ විපක්ෂයේ වෙනසක් සිදු වෙයිද?
මොන වෙනසක් ද; ඔහොම තමයි හැමදාම. ආයේ නැගිටීමක් නැහැ; සදාසොත්ති තමයි. ආයේ ගොඩ ඒමක් නැහැ.