අපේ සිතිවිලි, අපේ ක්රියා සියල්ල ම අප දකින්නේ ධර්මයට අනුකූලවයි. ධර්මානුකූලව ගත්තහම වටිනා ම ඉලක්කය වශයෙන් පෙන්වා දිය හැක්කේ නිවන් දැකීමයි. නිවන් දැකීම සඳහා බුදුරජාණන් වහන්සේ අපට කණ්ඩායම් දෙකක් පෙන්වා දී තිබෙනවා. ඒ භික්ෂු භික්ෂුණී, උපාසක උපාසිකා කණ්ඩායම් දෙකයි. එතකොට මේ භික්ෂු භික්ෂුණීලාගේ ඉලක්කය නිවන් දැකීම වුණාට පසුකාලීනව ග්රාමවාසී, ආරණ්යවාසී කියන සංකල්පය පැමිණෙන්නේ මේ සමඟයි. ස්වාමීන් වහන්සේලා තමන්ගේ විමුක්ති මාර්ගයේ ලබන අත්දැකීම් ගිහි ජනතාවට ලබා දෙනවා. විශේෂයෙන් ම දම්පහන් සිව් පසය ලබා දෙන නිසා ඒ අයට කළ ගුණ සැලකීමක් වශයෙන් මේවා ලබා දෙනවා. මේ ක්රියාව තව ටිකක් ඉදිරියට ගෙන ගොස් මිහිඳු හාමුදුරුවෝ දියුණු කළා.
උන්වහන්සේ ඒ සඳහා වෙනම ක්රමයක් භාවිත කළා. බුදුන්වහන්සේ ලෝකයේ රටවලට වැඩම කරලා ප්රතිස්ථාපනය කළ ධර්මයට එහා ගිය ක්රියාවලියක් මිහිඳු මහරහතන් වහන්සේ සිදු කළා. උන්වහන්සේ ශ්රී ලංකාවටත් වැඩම කළා. කෙළින් ම ධර්මය දේශනා කළේ නැහැ. බුදුන් වහන්සේ ධම්මචක්ක සූත්රය කෙළින්ම දේශනා කළාට මිහිඳු හිමියන් ධර්මය ම පමණක් නොවෙයි දේශනා කළේ.
විශේෂයෙන් ම අපේ පරිසරය තුළ, අපේ සමාජය තුළ සියලු ශිල්ප වර්ධනය කළා. කෘෂිකර්මය, ආරක්ෂක සංකල්පය මේ සියල්ල වර්ධනය කළා.
ආරක්ෂාව කියන සංකල්පය බිහි වෙන්නේ ඈත අතීතයේ සිට. විශේෂයෙන්ම ජය සිරි මහා බෝධින් වහන්සේට තමයි මුලින් ම ආරක්ෂාව ලබා දෙන්නේ. එකල රජවරුන්ට යුද හමුදා සිටියා; ඔවුන් යුද්ධවලට ගියා. ඒ වගේම වෙනම පිරිසක් ජයසිරි මහා බෝධින් වහන්සේ රැකීම සඳහා දිවා රාත්රී යෙදෙව්වා.
කෘෂිකර්මාන්තයට, කලා කටයුතුවලට, නොයෙක් ක්රියා සඳහා වෙන වෙනම කණ්ඩායම් හිටියා.
දේවානම්පියතිස්ස රජ්ජුරුවෝ අනුබුදු මිහිඳු හමුදුරුවන්ගෙන් අහනවා එක් අවස්ථාවකදී; නැවෙන් වඩම්මවන බුදුන්වහන්සේගේ ධාතු කොහොමද ගෙනියන්නේ කියලා. ඒ අවස්ථාවේදී මිහිඳු මහරහතන් වහන්සේ දේශනා කරනවා; හස්ති රාජයකු පිට පෙරහරෙන් වැඩමවන ලෙස. මෙය මහාවංශයේ සඳහන් වෙනවා. අන්න ඒ අවස්ථාවේදී තමයි අලි ඇතුන් සම්බන්ධ වෙන්නේ. එහිදී පෙරහැර සංකල්පය බිහි වෙනවා. එය අපගේ සංස්කෘතියේ කොටසක් බවට පත් වුණා. මිහිඳු හිමියන් මෙරට ස්ථාපිත කළ බුදු දහම සාමාන්ය බුදු දහම නොවෙයි; එය ශ්රී ලංකිකකරණය කළ ශ්රී ලාංකික බුදු දහම ලෙස නම් කළ හැකියි.
ශ්රී ලාංකීය බුදු දහම තුළ සියලු උපාසක උපාසිකාවන්ගේ ආරක්ෂාව, රැකවරණය, දියුණුව මේ සියල්ල ඇති කිරීම අප සතු වගකීමක්. අන්න ඒ ක්රියාවලිය දිගට රැගෙන ඒම ශ්රී ලාංකික භික්ෂුවගේ වගකීමක්.
මිහිඳු හිමියන්ගේ දේශනය තුළ ඇත්තේ ධර්මය පමණක් නොවෙයි. ඊට එහා ගිය සංකල්පයක් තිබෙනවා. ඒ තුළ ධර්මය රැකගැනීම පමණක් සිදු කිරීමට එහා ගිය ක්රියාවලියක් භික්ෂූන් වහන්සේලාට තිබෙනවා. රටක ආරක්ෂාව, රටේ පැවැත්ම කියන එක භික්ෂුන් වහන්සේට නිවන් දැකීම සඳහා අත්යවශ්ය දෙයක්. එය අතීතයේ සිදු වුණා. ඉතිහාස කතා රැසක එය කියැවෙනවා.
තමන් තමන්ගේ ජීවිත තුළ සැප සතුට ගොඩනගා ගන්න. තමන් ණය වෙලා, දුක් විඳලා නිවනට යන්න බෑ. අපගේ ක්රමය මෙහිදී වැරදිලා තිබෙනවා. අපි අන්න ඒ වැරදුණු තැන් හදාගන්නට ක්රියා කළ යුතුයි. මෙන්න මේ සංකල්පය දෙස බලන විට සෝම හාමුදුරුවන් ඉතා ප්රසිද්ධියේ සිහිපත් කළා, අපගේ රටට විශාල අභියෝගයක් තිබෙනවා කියන එක.
ශ්රී වික්රමරාජසිංහ රජුන් විනාශ කිරීමට විදේශ කුමන්ත්රණයක් තිබුණා. එතැන් සිට වර්තමානය දක්වා ම මේ බෞද්ධ රාජ්යය විනාශ කිරීමට නොයෙක් බලවේග ක්රියාත්මක වෙනවා. මේ බලවේග වසර 50 ඉලක්ක කරමින් තමයි නොයෙකුත් ක්රම වලින් ක්රියාත්මක වන්නේ. බෞද්ධ දර්ශනය විනාශ කිරීම සඳහා නොයෙක් දේවල් ඔවුන් විසින් සිදු කරනවා. වර්තමානයේ පෙරහැර සංකල්පයට ප්රහාර එල්ල කරමින් පෙරහැර නැවැත්වීමේ උත්සාහයක් ප්රබල ලෙස ක්රියාත්මක වෙනවා.
උදේ, සවස මේ රටේ ගම් දනව්වල නගරවල පිරිත් දේශනා ඇසෙනවා. මේ ක්රියාවලිය නවතාලීම සඳහා මූලධර්මවාදීන් ඉකුත් කාලය තුළ දැඩි ලෙස ක්රියාත්මක වුණා.
මේ තත්ත්වය අවුරුදු දහයක් පහළොවක් දැඩි ලෙස ක්රියාත්මක වෙනකොට මහා සංඝයා වහන්සේ ඊට එරෙහිව ක්රියාත්මක වෙමින් ඉදිරිපත් වුණා. එහි ප්රමුඛත්වයක් ගෙන ක්රියා කළේ සෝම හාමුදුරුවෝ. උන්වහන්සේ ප්රකාශ කළා; මම නිවන් දකින එක පැත්තක තියලා රට බේරා ගැනීම සඳහා ක්රියා කරනවා; රට බේරා ගෙන ඉන් පස්සේ මම නිවන් දකිනවා කියලා උන් වහන්සේ ප්රකාශ කළා. එහි දිගුවක් හැටියට තමයි වර්තමාන භික්ෂූන් වහන්සේ ක්රියා කරන්නේ.
මීට පෙර වාරියපොළ හාමුදුරුවන්, සුමංගල හාමුදුරුවන් මේ ආකාරයටම ක්රියා කළා. වල්පොළ හාමුදුරුවන් වගේ භික්ෂූන් වහන්සේගේ නැගිටීම ක්රමයෙන් අදත් වුණා. ඒත් ඉන්පසුව පක්ෂ දේශපාලනයට භික්ෂුන් වහන්සේ හසු වුණා. භික්ෂුන් වහන්සේලා රට වෙනුවෙන් ක්රියාත්මක වන ක්රියාවලිය කඩා වැටී තිබුණේ. මේ ක්රියාවලිය ගොඩනැගීම සඳහා සෝම හාමුදුරුවන් ඉදිරිපත් වුණා. ඒ වෙඩි මුරය ආරම්භ කළේ උන්වහන්සේ. උන්වහන්සේ දිගින් දිගටම දේශනා කළේ මේ රට බේරා ගන්නේ නැතිව අපට කවදාවත් නිවන් දකින්න බෑ කියන කාරණයයි.
අපේ රටේ මවුපියන් ලෙස අප සලකන; අපේ රටේ ගෞරවයෙන් අප මුල් තැනට ගන්නා පාලකයන් බෞද්ධ සංස්කෘතිය විනාශ කරන්න, මෙරට විනාශ කරන්න වැඩකටයුතු ක්රියාත්මක කරන කොට ස්වාමීන් වහන්සේලා වෙච්ච අපට සිදු වුණා; එයට විරුද්ධව නැගී සිටිමින් රට බේරාගැනීම සඳහා කටයුතු ක්රියාත්මක කරමින් මේ තැනට එන්නට. පක්ෂ දේශපාලනය, මඩ ගොහොරුවක් වෙච්ච මේ ක්රියාදාමයෙන් රට බේරා ගැනීමට එම භික්ෂුවන්සේට බැරි වුණ තැන. බණ භාවනා කරමින් ආරණ්යවල සිටි ස්වාමීන්සේලාත් ඉන් එළියට පැමිණ මේ ක්රියාවලියට සම්බන්ධ වුණා. අපේ රටේ ඉතිහාසය තුළ ආරණ්යවල සිටි භික්ෂුන් වහන්සේලා ඉන් එළියට පැමිණියේ නෑ මෙවැනි ක්රියා සඳහා. නමුත් මේ අවස්ථාවේ එසේ ක්රියා කිරීමට සිදු වුණා.
මේ ක්රියාවලියේ ප්රතිඵලයක් ලෙස අද මේ රටට යහපත් දේශපාලනයක් උදා කිරීමේ කර්තව්ය භික්ෂුන්වහන්සේ විසින් මූලිකත්වය ගෙන සිදු කර තිබෙනවා.
අද රටට හිතැති දේශපාලන නායකයන් දෙදෙනෙක් බිහි කර තිබෙනවා. ජනාධිපති ගෝඨාභය රාජපක්ෂ මහතා සහ අගමැති මහින්ද රාජපක්ෂ මහතා. මේ දෙදෙනාම බෞද්ධ භික්ෂුවට මෙන් ම අනෙකුත් ආගම්වලට ගෞරව කරන නායකයන් දෙදෙනෙක්. ඔවුන් අපට නිදහසේ බණ භාවනා කරගෙන ඉන්නට හැකි වාතාවරණය ගොඩනඟන බව අපට විශ්වාසයි.
මේ දෙපළ නිසි ආකාරව මෙය සිදු කළහොත් ස්වාමීන් වහන්සේට නැවත දේශපාලනයක් කතා කිරීමට හෝ ඒ වෙනුවෙන් ක්රියාත්මක වීමට අවශ්ය වන්නේ නෑ. දහම වෙනුවෙන් ම පමණක් ක්රියාත්මක විය හැකියි. පාඩුවේ පන්සලේ වැඩ කරමින් සිටිය හැකියි. හැබැයි මේ දෙපළ ඒ කාර්යය නිසි ආකාරව කරන්නේ නැත්නම් අපිට නැවත දේශපාලනයට අවතීර්ණ වන්නට සිද්ධ වෙනවා. ඒකට කරන්න දෙයක් නෑ. අපි ඒ වෙනුවෙන් දැඩි කම්පනයට කනගාටුවට පත්වේවි. නමුත් අපට ලොකු විශ්වාසයක් තිබෙනවා එහෙම වෙන්නේ නැහැ කියන එක. මහින්ද රාජපක්ෂ මහතා ජනාධිපතිව සිටි සමයේ මේ රටේ භික්ෂුවට, බෞද්ධ ශාසනයට නිසි තැන ලැබුණා; නිසි ගෞරවය ලැබුණා. ඒ නිසා වර්තමානයේ ඒ පිළිබඳ ව බලාපොරොත්තු තබා ගත හැකියි.
මේ රජය පත්වෙලා තවම ඉතා කෙටි කාලයයි. මේ කෙටි කාලය තුළ රටට බොහොම යහපත් තීන්දු තීරණ රැසක් ගත්තා. ඒවා ක්රියාත්මක වුණා. හැබැයි අප යමක් මතක් කරන්නට ඕන. පොදුජන පෙරමුණ වෙනුවෙන් මෙන් ම මේ ජයග්රහණ ක්රියාවලිය වෙනුවෙන් දර දිය ඇද්ද; ඒ වෙනුවෙන් අතිමහත් කැප කිරීම් සිදු කළ පිරිසක් සිටිනවා. ඔවුන් පිළිබඳ ව සොයා බලා ඔවුන් අසහනයට පත් නොවෙන්නට ද ක්රියා කළ යුතුයි. මොකද ඉතිහාසය පුරාවටම සිදු වුණේ වැඩ කළ පිරිස පැත්තකට විසි වෙලා වෙනත් පිරිසක් ලාභ ප්රයෝජන වෙනුවෙන් එකතු වීමයි. ඒ කණ්ඩායම හරිම ආක්රමණශීලීයි.
සැබෑ ආදරවන්තයන් කවුද යන්න මෙතුමන්ලා දෙපළ ප්රමුඛ රජය තේරුම් ගත යුතුයි. බලය තිබෙන අවස්ථාෙව් ළඟට පැමිණිලා ඉතාම සූක්ෂ්ම ආකාරයෙන් ළංවෙන පිරිස වෛරක්කාරයන්. මෙන්න මේ දේ තේරුම් ගත යුතුයි කියන එක සිහිපත් කළ යුතුයි.
රටයි, බුද්ධ ශාසනයයි, රාජපක්ෂ පවුලයි කියන්නේ වර්තමානයේ එකක්. රටට ප්රහාර එල්ල කරනවා කියන්නේ බුද්ධශාසනයට ප්රහාර එල්ල කිරීමයි. වර්තමාන රජයට ප්රහාර එල්ල කරනවා කියන්නේ රටට සහ බුද්ධ ශාසනයට ප්රහාර එල්ල කිරීමක් හැටියට මා දකිනවා.මේ නිසා මේ නායකයන් දෙදෙනා ඉතා පරිස්සම් විය යුතුයි.
මූලධර්මවාදීන් අද අපේ රටේ ප්රධාන ආගම් හතරට ම විශාල අභියෝගයක්. බෞද්ධයන්ට විතරක් නොවෙයි; කතෝලික අයට පමණක් නොවෙයි; හින්දු අයට; මුස්ලිම් අයට මේ සියලු ආගම්වලට ලොකු අභියෝගයක්. අපේ සහජීවනය මොවුන් නැති කරනවා.
මූලධර්මවාදීන් බෞද්ධයන්ට පමණක් නොවෙයි ප්රහාර එල්ල කරන්නේ. නොයෙක් ක්රම වලින් නොයෙක් ක්රියාවලින් විවිධාකාර වූ රඟපෑම්වලින් මූලධර්මවාදීන් සියලුම ආගම් වලට දැඩි ආක්රමණයක් සිදු කරමින් සිටිනවා.
සහරාන්ලා ප්රහාර එල්ල කරන්නෙත් මෙහි ප්රතිඵලයක් ලෙස. අගරදගුරුතුමන් මේ පිළිබඳ ව ප්රකාශ කරනවා; උන්වහන්සේ ඉතා ප්රසිද්ධියේ මේ පිළිබඳ ව කියනවා.
මේ ගැන වර්තමාන දේශපාලන නායකයන්, රජය දැඩි විමසිල්ලකින් සිටිය යුතුයි කියලා අප මතක් කරනවා. එපමණක් නොවෙයි මේ ආක්රමණය ඉතා ඉක්මණින් නවත්වා දැමිය යුතුයි. මේ සඳහා ක්රියාත්මක නොවන්නේ නම් රට දැඩි අර්බුදයකට පත්වන බව අප ප්රකාශ කරන්නට කැමැතියි.
අද සැබෑ සතුරා වන්නේ මූලධර්මවාදීන් කියන එක අපට පෙන්වා දෙන්නට පුළුවන්. ඔවුන් කණ්ඩායම් කිහිපයක් ලෙස සිටින්නේ. ගහන්න ඕන වෙලාවට ඔවුන් එකතුවෙලා සැබෑ ජන නායකයන්ට, ආගමික නායකයන්ට, සංස්කෘතියට, ඉතිහාසයට ප්රහාර එල්ල කරනවා. යළි යළි සිහිපත් කරන්නේ වර්තමාන දේශපාලන නායකයන් මෙය අවබෝධ කර ගත යුතු නිසයි.
අද මේ රට ආර්ථික සමාජීය දේශපාලන මේ සෑම අංශයකින් ම කඩා වැටිලා. මේවා ගොඩ නඟන්න අප සියලු දෙනා එකාවන්ව කටයුතු කළ යුතුයි.
අපිට තිබෙන්නේ කෘෂි ආර්ථිකයක්. මේ කෘෂි ආර්ථිකය ගොඩ නඟන්නට, නංවන්නට අපට පුළුවන්. මම ජනාධිපති ගෝඨාභය රාජපක්ෂ මහතාට යෝජනා කරන්නට කැමැතියි; රටේ කොහේ තැනක එක පර්චස් එකක් හරි වගා නොකර තිබේ නම් එය වහාම රජයට පවරා ගන්න. වගා නොකර තිබෙන සියලු ඉඩම් පවරා ගන්න ඕන. ඒවා වගා කරන අයට ලබාදීමේ ක්රමවේදයක් සකස් කළ යුතුයි.නීතියක් දැමිය යුතුයි; සෑම ගෙවත්තකම ඉඩකඩ තිබෙන සෑම ස්ථානයකම වගා කරන්න ඕන කියන එක.
කුමන රැකියාව, කුමන ව්යාපාරයක සිදු කරන අයකුට වුවත් තමන්ගේ ගෙවත්තේ වගා කරන්නට පැයක් දෙකක් ගත හැකියි කියන එක අප සිහිපත් කරන්නට කැමැතියි. සමහර රටවල්වල ඉඩම් මදි නිසා වගා කිරීමට ඔවුන් වෙනස් ක්රම සොයා ගෙන තිබෙනවා.
වනාන්තර සංරක්ෂණය සඳහා අප රට තුළ නීතියක් තිබෙනවා. ඒවා ක්රියාත්මක වන්නේ නැහැ. අප ඒවා ක්රියාත්මක කරන්නැයි රජයට අවධාරණය කරනවා. අද දිනපතා අලි මැරෙනවා. අසීමිත ලෙස කැලෑ කැපීම නිසා වල් අලි ගම් වදිනවා. මේවාට අප විසඳුම් සෙවිය යුතුයි. ඉතා ඉක්මනින් ක්රියාත්මක විය යුතුයි.
දියුණු වන රටකට දියුණු වෙන්න කැලෑ හෙළි පෙහෙළි කරන්නට ඕන නැහැ; තිබෙන ඉඩම් ඇති. ලංකාවට ඉඩම් මදි නම් අප සෑම නගරයක ම තට්ටු නිවාස ක්රමයට යා යුතුයි; ඒ අපගේ පරිසරය රැක ගැනීම සඳහායි. අප ඒ වෙනුවෙන් කැපකිරීම් සිදු කළ යුතුයි.
තවත් කරුණු රාශියක් අපි මේ රජයට සිහිපත් කිරීමට කැමැතියි. අද ලෝකයේ ප්රබල රටවල් සියල්ල ම අපේ රටේ සම්පත් ඩැහැ ගැනීමට බලාගෙන සිටිනවා. ලෝකයේ වෙනත් කිසිදු රටක නොමැති මේ පරිසරය මේ භූමිය ඔවුන්ගේ කර ගන්නට බලාපොරාත්තු වෙනවා. නොයෙක් අයුරින් ක්රියාත්මක වෙනවා ඒ සඳහා. මේ බැව් අපගේ වර්තමාන රජය තේරුම් ගත යුතුයි.
විශේෂයෙන් ම මෙරට තානාපති සේවය මීට වඩා ක්රමවත් විය යුතුයි. ශ්රී ලංකාවේ නියෝජිතයා; ලංකාවේ හඬ තමයි තානාපති කෙනෙක් කියන්නේ. ඒ නිසා උගත් බුද්ධිමත් රටට ආදරය කරන පිරිසක් මේ රැකියාවට යැවිය යුතුයි.
ඉතිහාසය පුරාවටම තානාපති සේවයේ සිටියේ දේශපාලන පත්වීම් ලද පිරිස්. ඔවුන් මේ රටේ කීර්තිය වෙනුවෙන් නොවෙයි ක්රියා කළේ. ඔවුන් තමන්ගේ වාසිය වෙනුවෙන් පමණයි ක්රියා කළේ. ඒ නිසා තානාපති සේවයට යෑමට පෙර ලංකාවේ විශේෂ පුහුණුවක් ලබාදිය යුතුයි කියන යෝජනාව මම සිහිපත් කරන්නට කැමැතියි.
අද මේ රට අවුරුදු ගණනාවක් පස්සට ගිහින් තිබෙන්නේ .මේ රට අපි ඉස්සරහට ගන්නව නම් දේශපාලන භේදයකින් තොරව එකිනෙකා අත්වැල් බැදගෙන පෙළ ගැසිය යුතුයි. එක්සත් ජාතික පක්ෂය ප්රමුඛ යහපාලන රජය විසින් ඉකුත් වසර පහ තුළදී මෙරටට දැඩි හානියක් සිදු කළා. එහිදී ආර්ථික සමාජීය සංස්කෘතික වශයෙන් මේ රට දැඩි සේ පිරිහුණා. පුරාවිද්යා ස්ථාන විනාශ කළා; වනාන්තර හෙළි පෙහෙළි කළා. බෞද්ධ භික්ෂූන් අපවත් වුණාට ආදාහනය කරන්න බැරි වුණා. පන්සල්, බෞද්ධ භූමි වෙනත් පුද්ගලයන්ට අයිති කළා. සිංහල ජාතියට, ආගමට එළව එළවා පහර දුන්නා.
නොයෙක් රාජ්ය නොවන සංවිධානවල අවශ්යතාවන්ට ඉඩ ලබා දෙමින් සිංහල, දෙමළ, මුස්ලිම්, බර්ගර් මේ සෑම ජන කොට්ඨාසයකට ම සෑම පැත්තකින් ම පහර දෙමින් අන්තර්ජාතික කුමන්ත්රණකාරයන්ගේ ඕනෑ එපා කම් ඉටු කළා.
වැවිලිකරුවා අන්ත අසරණ කරමින් පිටරටින් මේවා ගෙන්වීමට කතා කළා. මුළුමහත් ලෝකයක් ම රස විඳින අගයන සිලොන් ටී නැමැති නාමය; අපේ තේ කර්මාන්තය; ගොඩ ගැනීමට අපහසු තරම් අඩියකට ඇද දැම්මා.ජනාධිපතිවරණය පැවැත්වූයේ ශ්රී ලාංකිකයන් සහ ශ්රී ලංකාව විනාශ කරන, දෙකඩ කරන පිරිස් අතර බව මැතිවරණයෙන් පෙනී ගියා.
මෙය ඉතා හොඳින් වටහාගත් සැබෑ ශ්රී ලාංකිකයන් තමන්ගේ ඡන්ද අයිතිය මගින් ගෝඨාභය රාජපක්ෂ මහතා ජනාධිපති වශයෙන් පත් කළේ මේ රට රැක ගැනීමට අවශ්ය වූ නිසා බව අප සිහිපත් කරනවා.උතුරු නැගෙනහිර හැර සෙසු සෑම පළාතකම ජනතාව සිංහල, මුස්ලිම්, දෙමළ මේ සියලු දෙනා ගෝඨාභය මහතා සමඟ අත්වැල් බැදගත් බව අපට පෙනී යනවා.
දැනට ඔහු මේ රටට කරන සේවය මෙන් ම ගනු ලැබූ යහපත් තීරණ නිසා මේ රට සංවර්ධනය කිරීම මෙන් ම ඉතා සුරක්ෂිත රටක් බවට පත් කිරීමට ඉතා කෙටි කාලයකින් සිදු වනු ඇති බව පෙනී යනවා. ඔහු පිළිබඳ ව සැබෑ ලෙස පැහැදීමකට ලක්වන උතුරු නැගෙනහිර ජනතාව අන්තවාදී දේශපාලන නායකයන් ඉවත්කර ඔවුන් ප්රතික්ෂේප කර ගෝඨාභය මහතාට සහය පළ කිරීම ඉතා ඉක්මනින් සිදු වන බව අපට පෙනී යන කරුණක්.
ජනාධිපතිවරයා හැටියට ගෝඨාභය රාජපක්ෂ මහතා මෙන් ම වර්තමාන රජයේ අගමැති මහින්ද රාජපක්ෂ මහතා ප්රමුඛ රජයට අභියෝග රැසකට මුහුණදීමට සිදු වී තිබෙනවා. කෝටි ගණනකින් මුදල් විනාශ කර දැමූ යහපාලන රජය සිදු කළ ආර්ථික විනාශය ගොඩ ගැනීම දැඩි පීඩාකාරී තත්ත්වයකට පත්ව සිටින රටවැසියන්ට ආර්ථික සාමාජීය දේශපාලන ස්ථාවර තත්ත්වයක් ඇති කිරීම ඉක්මණින් කළ යුතු කාරයයන්.
මේ රටේ විකුණා දැමූ සම්පත් නැවත මේ රට තුළ ගොඩනැගීම; නොයෙක් අයුරින් ක්රියාත්මක වන විදේශ කුමන්ත්රණ හඳුනාගෙන ඒවායෙන් ශ්රී ලංකා මාතෘ භූමිය රැක ගැනීම ඇතුළු තවත් අභියෝග රැසක් ඔවුනට ජයග්රහණය කිරීමට තිබෙනවා.
විශේෂයෙන් ම ආරක්ෂාව බිඳ වැටී ඇති සිවිල් සමාජයේ ආරක්ෂාව ස්ථාපිත කරමින් මේ රට ඉතා උසස් මට්ටමේ රටක් ලෙසත් දේශීය සංස්කෘතිය, ශ්රී ලාංකිකත්වය රැක ගනිමින් මහජනතාවට යහපත් රටක් ගොඩනැගීමට ගෝඨාභය රාජපක්ෂ මහතාට හැකි බව අප විශ්වාස කරනවා.