සීමාසහිත ලංකා විදුලි (පෞද්ගලික) සමාගම (LECO), නූතන ජංගම දුරකතන සන්නිවේදන තාක්ෂණයට අනුරූපවන ලෙස තම පාරිභෝගික සේවා පහසුකම් පුළුල් කරමින් “මයි ලෙකෝ යෙදවුම” (myLECO app) සහ ඇමතුම් මධ්‍යස්ථානය (Call Centre) හඳුන්වාදීම පසුගිය දා උත්සවාකාරයෙන් සිදු කෙරිණ.
Android හා IOS යන සුහුරු දුරකතන (Smart Phones) මාදිලි දෙවර්ගය සඳහාම ගැලපෙන ආකාරයට නිර්මාණය කර ඇති මෙම myLECO app බාගත කර ඕනෑම විටෙක ලංකා විදුලි (පෞද්ගලික) සමාගම සමග සම්බන්ධ වී තම පාරිභෝගික සේවා අවශ්‍යතා ඉටුකර ගැනීමේ අවස්ථාව මෙම LECO බල ප්‍රදේශයට අයත් පාරිභෝගිකයින්ට ලැබී ඇත. මෙම යෙදවුම මගින් පාරිභෝගිකයින්ට ලැබෙන පහසුකම් අතර, විදුලි බිල්පත් ගෙවීම, විදුලිය අත්හිටුවීම් සම්බන්ධ තොරතුරු ලබාගත හැකිවීම, කෙටි පණිවිඩ (SMS) මගින් සිදු කරන දැනුම්දීම්, සිය බිල්පත් ඉතිහාසය, ගෙවීම් හා හිඟ මුදල් සම්බන්ධ තොරතුරු සහ මනු කියවීම් දැනගතහැකි වීම ආදිය වෙයි.
