• කොළඹ ව්‍යාපාරික සංගමය පිළිබඳ යම් හැඳින්වීමක් කළ හැකිද?
අප කොළඹ තොග සහ සිල්ලර වෙළෙඳාම ඇතුළු සමස්ත ආර්ථික ක්‍රියාකාරකම්වල නිරත වී සිටින සුළු හා මධ්‍ය පරිමාණ ව්‍යාපාරිකයන්ගේ එකමුතුවකින් සැදුම් ලත් සංගමයක්. අපේ සංගමය අද වන විට රටේ දිස්ත්‍රික්ක 25ම නියෝජනයක් සහිතව සුළු හා මධ්‍ය පරිමාණ විවිධ සංවිධාන 39ක සාමාජිකයන් සමඟ අවබෝධතා ගිවිසුමකට එළඹ කටයුතු කරනවා. ඒ නිසා දැන් අපේ සංගමයේ සාමාජිකයන් ප්‍රමාණාත්මකව 2,65,000ක් විතර වෙනවා.
• ඔවුන් වෙනුවෙන් ඉදිරියේදී ක්‍රියාත්මක කරන විශේෂ වැඩසටහන් තිබෙනවාද?
ඔව්. අප දැනටමත් ව්‍යාපාරික ක්ෂේත්‍රයේ බිඳවැටීම් වළක්වා ඉදිරියට ඒමට ව්‍යාපාරිකයන්ට අවශ්‍ය වටාපිටාව සැකසීමට, ඒ වගේම ව්‍යාපාරිකයන්ගේ දියුණුව උදා කිරීමට, ඔවුන්ගේ සුබසාධනය ඉහළ නැංවීමට පමණක් නොවේ; ව්‍යාපාරිකයන්ට ඉහළ පිළිගැනීමක් ලැබීමට හැකි තත්ත්වයක් රටේ ඇති කිරීමට කටයුතු කරමින් සිටිනවා.
• ඔබ සංගමය විශාල අරමුණු සංඛ්‍යාවක් ජය ගැනීමට සූදානම් බව යි පෙනෙන්නේ...
ඇත්තටම අපේ රටේ ආර්ථිකයේ කොඳුනාරටිය සුළු හා මධ්‍ය පරිමාණ ව්‍යාපාරික ප්‍රජාව කියා කතාවක් තිබෙනවා. එය ඇත්ත කතාවක්. ඒත් සුළු හා මධ්‍ය පරිමාණ ව්‍යවසායක ප්‍රජාව බලගැන්වීමට ලැබෙන ප්‍රමුඛතාව කියන තරම් සුන්දර නැහැ. ඒ නිසා අප වචනයේ පරිසමාප්ත අර්ථයෙන්ම සුළු හා මධ්‍ය පරිමාණ ව්‍යවසායක අංශය රටේ ආර්ථිකයේ කොඳුනාරටිය බවට පත් කිරීමට පියවර ගනිමින් ඉන්නේ. මෙහිදී ඉතා වැදගත් කරුණක් වන්නේ රජයත්, ව්‍යාපාරික අංශයත් එකට එක්කොට වැඩපිළිවෙළ ක්‍රියාවට නැංවීමයි.
• දැනට එසේ ක්‍රමවේදයක් රටේ ක්‍රියාත්මක වන්නේ නැද්ද?
නැහැ කියන්න බෑ. ඒත් සැලකිය යුතු මට්ටමක ඉහළ පිළිගැනීමක් ඇතිව රජයත්, ව්‍යාපාරික අංශත් එකට බැඳුණු වැඩපිළිවෙළක් නැති බවයි අපට පෙනෙන්නේ. මං උදාහරණයක් කියන්නද? අපේ රටේ කොතරම් ප්‍රමාණයක් සුළු හා මධ්‍ය පරිමාණ ව්‍යවසායකයන් සිටිනවාදැයි රජයේ සංඛ්‍යාලේඛන නැහැ. ව්‍යවසායක අංශවල සංඛ්‍යාලේඛනයක් නැහැ. මේක විශාල අඩුපාඩුවක්. ඒ නිසා පළමුව අප රජයේ අනුග්‍රහය යටතේ මේ රටේ දැනට සුළු හා මධ්‍ය පරිමාණ ව්‍යවසායකයන් කොපමණ සිටිනවාදැයි සොයා බැලීමට, ඔවුන්ගේ ලේඛනයක් සකස් කිරීමට කටයුතු කරනවා.
• එය කරන්නේ කෙසේද?
සුළු හා මධ්‍ය පරිමාණ ව්‍යවසායකයන් සියලු දෙනාට හැඳුනුම්පතක් හඳුන්වාදීමට පියවර ගන්නවා. මේ සඳහා රජයේ පූර්ණ අනුග්‍රහය අප බලාපොරොත්තු වනවා. අපට ව්‍යාපාරිකයකු හඳුනාගැනීමට නම් එක්කො ලියාපදිංචි ව්‍යාපාර සහතික අවශ්‍ය කරනවා; නැත්නම් බැංකු ගිණුම් පරීක්ෂා කරන්න සිදු වනවා. ඒවා ඉදිරිපත් කිරීමෙන් පමණයි දැනට සුළු හා මධ්‍ය පරිමාණ ව්‍යවසායකයකු ලෙස කෙනකු හඳුනාගැනීමට පුළුවන්කම තිබෙන්නේ. මේ තත්ත්වය වෙනස් කළ යුතුයි.
අප අපේ රටේ සුළු හා මධ්‍ය පරිමාණ ව්‍යවසායකයන්ට අලුතෙන්ම CBA Rewards නමින් කාඩ්පතක් හඳුන්වාදීමට සූදානම්. මෙම කාඩ්පතින් අපේ රටේ ඉහළ පෙළේ සමාගම් සහ තවත් ව්‍යාපාරික ආයතන ගොන්නකින් භාණ්ඩ මිල දී ගැනීමේදී 10% සිට 30% දක්වා වට්ටම් හිමි වන විශේෂ වරප්‍රසාදයක් අප සංගමයේ සාමාජිකයන්ට සලසා දීමට සූදානම්. දැනට අප සාකච්ඡා කරගෙන යන පරිදි ආයතන 230ක ප්‍රමාණයකින් භාණ්ඩ මිල දී ගැනීමේදී මේ වට්ටම් පිරිනැමීමට සූදානම්ව සිටිනවා.
• ඊට අමතරව තවත් විශේෂ වැඩපිළිවෙළක් ක්‍රියාත්මකද?
ඔව්. අප අපේ සංගමයේ සාමාජිකයන්ට රක්ෂණාවරණයක් හඳුන්වාදීමට පියවර ගන්නවා. අපේ සංගමයේ සාමාජිකයන්ට රු. ලක්ෂ 10ක ජීවිතාවරණයක් එයින් දීමට බලාපොරොත්තු වනවා. හදිසි අනතුරකදී යම් කරදරයක් වුණොත් ලක්ෂ 17 1/2ක වන්දියක් දීමටත්, ආබාධිත තත්ත්වයක් ඇති වුණොත් ලක්ෂ 5ක රක්ෂණාවරණයක් හා මුළු පවුලටම රෝහල් ගාස්තු වශයෙන් රු. ලක්ෂයක රක්ෂණාවරණයක් සැලසීමටත් සැලසුම් කොට තිබෙනවා. විශේෂයෙන්ම සාමාජික අවමඟුලකදී රු. ලක්ෂයක මුදලක් දීමට සූදානම්.
• මේ සඳහා සාමාජිකයන්ගෙන් රක්ෂණ වාරික මුදල් අය කිරීමක් සිදු කරනවාද?
නැහැ. ඇත්තටම රක්ෂණයට කියා මුදල් අය කිරීමක් කරන්නේ නැහැ. වසරකට අපේ සාමාජිකයන්ගේ සාමාජික ගාස්තු වශයෙන් රු. 5,000ක් එකතු කරනවා. එයින් තමයි මේ සියලු පහසුකම් අපේ සාමාජිකයන්ට සලසන්නට බලාපොරොත්තු වන්නේ.
• කවරදාද මේ වැඩපිළිවෙළ ක්‍රියාවට නැංවෙන්නේ?
ඇත්තටම අප මේ වැඩපිළිවෙළ පිළිබඳ දැනටමත් අග්‍රාමාත්‍ය හා මුදල් ඇමැති මහින්ද රාජපක්ෂ මහතා සමඟ ඒ වගේම සුළු හා මධ්‍ය පරිමාණ ව්‍යවසායන් නඟා සිටුවීම සහ කර්මාන්ත ඇමැති විමල් වීරවංශ මහතා වාගේම පාර්ලිමේන්තු මන්ත්‍රී නාමල් රාජපක්ෂ මහතා සමඟත් සාකච්ඡා කොට තිබෙනවා. ඒ අනුව දෙසැම්බර් මස මැද සතියේදී මේ වැඩපිළිවෙළ ජාතියට තිළිණ කිරීමට අප සූදානම්. මේ ජාතික වැඩපිළිවෙළ වටිනා එකක්. අප ඊටත් වඩා වටිනා තව දෙයක් සිදු කිරීමට සූදානම්.
• ඒ කුමක්ද?
රටේ වත්මන් ජනාධිපති ගෝඨාභය රාජපක්ෂ මැතිතුමා සිය මැතිවරණ ප්‍රතිපත්ති ප්‍රකාශනයෙන් එළිදැක්වූ සෞභාග්‍ය දැක්ම වැඩපිළිවෙළ පිළිබඳ අප කරුණු අධ්‍යයනය කළා. එය අපේ රටට ගැළපෙන රටේ ආර්ථිකය දියුණු කිරීමට අත්‍යවශ්‍ය මඟපෙන්වීමක් සලසන ප්‍රායෝගික වැඩපිළිවෙළක්.
ඒ නිසා එය සාර්ථක කරගැනීමට අපට හැකි අයුරින් උදවු කිරීමට අප තීරණය කළා වැඩපිළිවෙළේ අන්තර්ගත රැකියා කේන්ද්‍රීය තරුණ ව්‍යවසායක පරපුරක් බිහි කිරීමට පාසල් අධ්‍යාපනය ලබන කාලයේ පටන් අපේ රටේ දූදරුවන් සූදානම් කිරීම, ඊළඟට උසස් අධ්‍යාපනය ලබන විට හා ඉන් පසු නව ව්‍යවසායකයන් ලෙස ව්‍යවසායකයන් හඳුන්වාදීම කළ යුතු යැයි කියා තිබෙනවා. එය ඉතා වටිනා දෙයක්. ඒ සඳහා අපත් රජයට සහාය දීමට සූදානම්. නව තාක්ෂණය, නවෝත්පාදන ආර්ථික ක්‍රියාකාරකම්, රජය හා පෞද්ගලික මැදිහත් වීම මත හවුල්කාරිත්ව ව්‍යාපෘති ලෙස වැඩිවැඩියෙන් කළ යුතුයි.
• මේ වන විට රටේ ව්‍යාපාර හා ආර්ථික ක්ෂේත්‍රවල යම් බිඳවැටීමක් තිබෙනවා නේද?
ඔව්, එය සම්පූර්ණ ඇත්ත කථාවක්. ඒත් අපට නව ජනපතිවරයා සමඟ පිබිදුණු මනසකින් ඉදිරියට යෑමට අවස්ථාව උදා වී තිබෙනවා. මේ වන විට නව ජනාධිපතිවරයාගේ ආර්ථික ප්‍රතිපත්ති පිළිබඳ විශ්වාසය තබා කොළඹ කොටස් වෙළෙඳපොළ නැඟීමක් සිදුව තිබෙනවා. අලුතින් ආයෝජන පැමිණේයැයි විශ්වාසයක් ගොඩනැඟී තිබෙනවා. උදාහරණයක් වශයෙන් ගත හොත් කොළඹ කොටුව පා වන වෙළෙඳ සංකීර්ණයේ කඩකාමර 105ක් තිබුණා. ඉන් 96ක්ම වැහිලා. කොළඹ ගෝල්ඩ් සෙන්ටර්හි ව්‍යාපාර බිඳවැටිලා. ලෝක වෙළෙඳපොළ තුළ ව්‍යාපාර බිඳවැටිලා. මේවායේ පුනර්ජීවයක් ඇතිව නැඟී සිටීමට ඇරඹී තිබෙන බවක් පෙනෙනවා. අද වන විට කොළඹ කොටුව - පිටකොටුව ව්‍යාපාර සියට සියකින් වෙළෙඳාම වැඩි කරගෙන තිබෙනවා. සැම අංශයකම ව්‍යාපාරික කටයුතු නැඟීමක් දක්නට ලැබෙනවා. අප මේ තත්ත්වය තවදුරටත් වැඩිදියුණු කරගත යුතුයි.
• රට පුරා ව්‍යාපාරිකයන් සමඟ සම්බන්ධ වීමට නව තාක්ෂණය යොදාගැනීමට වැඩපිළිවෙළක් සකස් කරනවාද?
ඔව්. අප ඇත්තටම CBA APP එකක් අලුතෙන් හඳුන්වා දෙනවා. කොළඹ අද දවසේ තොග වෙළෙඳාමේ දත්ත සැණින් රට පුරා ඕනෑම ව්‍යාපාරිකයකුට දැනගැනීමට මේ ඇප් එක මඟින් කටයුතු සූදානම් කර තිබෙනවා. එය ඉතාම සාධනීය ලක්ෂණයක්. පැය 24 පුරා අවදියෙන් සිටි නගරයක් ලෙස වෙළෙඳාමට කොළඹ සූදානම් කිරීම නව රජයේ බලාපොරොත්තුවයි. එය සාර්ථක වන්නට නම් ව්‍යාපාරිකයන් ද නව තාක්ෂණයෙන් නව දැනුමෙන් සන්නද්ධ විය යුතුයි. ඒ සඳහා අවශ්‍ය මූලික යටිතල පහසුකම් අප මනාව සම්බන්ධීකරණය කර ලබාදෙනවා.
• අපේ රටේ නිෂ්පාදකයන්ට තම නිෂ්පාදන අන්තර්ජාතික වෙළෙඳපොළට යොමු කිරීමට ඔබ සංගමයට මඟ පෙන්වාදීමක් කළ හැකිද?
අපි අපේ රටේ නිෂ්පාදකයන්ට කෘෂිකාර්මික වේවා, කාර්මික වේවා, සේවා අංශයේ වේවා ඕනෑම අයකුට තමන්ගේ නිෂ්පාදන පළාත්වලින් කොළඹටත් කොළඹින් ලෝකයේ සෙසු වෙළෙඳපොළ වෙතටත් යොමු කිරීමට හැකි අන්තර්ජාතික වැඩපිළිවෙළක් වෙ‍ළෙඳපොළක් ලබාදීමට කටයුතු කළ යුතුයි. එහිදී අප අපේ නිෂ්පාදකයන් ලෝකය සමඟ සම්බන්ධ කිරීමට රජයේ අමාත්‍යාංශ ආයතන සමඟ පෙර නොතිබුණටත් වඩා සම්බන්ධීකරණයක් ගොඩනැඟීමට මුල් වෙනවා. මෙහිදී තවත් එක් දෙයක් කිව යුතුයි.
• ඒ මොකක්ද?
අප අපේ රටේ ව්‍යාපාරිකයන් රටින් පිට වෙළෙඳපොළ වෙත යොමු කළ යුතුයි. ඒ වගේම ඔවුන්ට ලෝකය පෙන්වා දිය යුතුයි.
ඒ අරමුණින් ලංකා බැංකුව හා එක්ව අපේ ව්‍යාපාරිකයින්ට ට්‍රැවල් කාඩ් පතක් හඳුන්වාදීමට කටයුතු කරනවා. මේ තුළින් බැංකුවටත් අපේ ව්‍යාපාරිකයාටත් දෙදෙනාටම සම-සම ජයග්‍රහණ ලැබෙන ලෙස පියවර ගැනීමට හැකි වනවා.
• ඔබ සංගමයේ නායකත්වය දරන්නේ කවුරුද?
නවලෝක සමූහ ව්‍යාපාරයේ සභාපති ආචාර්ය ජයන්ත ධර්මදාස, ජනශක්ති සමාගම් සමූහයේ චන්ද්‍රා ෂාෆ්ටර්, ඊශ්වරන් බ්‍රදර්ස්හි ගනේෂ් මැතිතුමා, ජෙෆ්රි ජෙම්ස් සමාගම් සමූහයේ ජෙෆ්රි මහතා අපේ අනුශාසකයන්. ඒ වගේම අපේ සංගමයේ සභාපති ආචාර්ය වෙන්කතීශ්වරන්, භාණ්ඩාගාරික මහේෂ් අලවත්ත. සියලු ජාතීන්, ආගමිකයන් අපේ සංගමයේ සාමාජිකයන්. එය අපට ලොකු ශක්තියක්. මෙය තවත් පුළුල් කිරීමට අප බලාපොරොත්තු වනවා.
• එය කරන්නේ කෙසේද?
දැනට අප රටේ ව්‍යාපාර සඳහා වැඩි-වශයෙන් තරුණ ප්‍රජාව එක් කරගත යුතුයි. ඒ වගේම උතුරු, නැඟෙනහිර ප්‍රදේශවල ව්‍යවසායකයන් හා ව්‍යාපාරිකයන් දකුණේ ව්‍යවසායකයන් හා ව්‍යාපාරිකයන් සමඟ සම්බන්ධ කරගැනීමට අන්‍යෝන්‍ය වශයෙන් ඒකාබද්ධව, සමඟියෙන් ව්‍යාපාර සිදු කිරීමට කටයුතු කරන තැනට පෙළගැස්සවීමට අප බලාපොරොත්තු වනවා.
එමඟින් උතුරු, නැඟෙනහිර, දකු‍ණු, බටහිර කියා කිසිදු වෙනසක් නැතිව, ආර්ථිකව දියුණු, සෞභාග්‍ය සම්පන්න රටක්, ජනතාවක් බිහි කිරීමට අඩිතාලම දැමීම අපේ වෑයමයි.
