ජයන්ත හේවාමාන්නට සමෘද්ධි ප්‍රතිලාභ ලැබීමට සුදුසු වුවත් ඔහුට එය කිසි විටෙකත් ලැබී නැත. ඔහු වකුගඩු අකර්මණ්‍ය වීම හේතුවෙන් වසර ගණනාවක් හම්බන්තොට මහ රෝහලට නිතර පැමිණෙන අයෙකි. සිව් දරු පියෙකු වන ඔහු, තැලසීමියා රෝගයෙන් පෙළෙන අවුරුදු එකහමාරක් වයසැති සිය නිවුන් දරුවන් සඳහා මාසිකව රුපියල් අටදහසක් වැය කරයි.
“මමත් රෝගී තත්වයෙන් පෙළෙන නිසා රස්සාවක්වත් කරන්න බැරිවෙලා ඉන්නේ. ඒ නිසා මම සමෘද්ධි ආධාර ලබාගන්න හම්බන්තොට ප්‍රාදේශීය ලේකම් කාර්යාලයේ අවශ්‍ය නිලධාරීන්ට ඉල්ලුම්පත් බාරදුන්නා. නමුත් මට සමෘද්ධි ආධාර ලබාදුන්නේ නැති නිසා මිට මාස 4 කට පමණ පෙර අභියාචනයකුත් බාරදුන්නා. ඒත් මට තාම සමෘද්ධි ආධාර ලබාදුන්නේ නෑ. නමුත් ඇති හැකි අයට සමෘද්ධි ආධාර ලබාදී තිබෙනවා.” හම්බන්තොට සිරිබෝපුර 12 කොටසේ පදිංචි ජයන්ත හේවාමාන්න (38) කියා සිටී.
හේවාමාන්න වැනි සමෘද්ධි ප්‍රතිලාභ හිමි විය යුතු දුගී ශ්‍රී ලාංකිකයන් දහස් ගණනක් සමෘද්ධි ප්‍රතිලාභවලින් බැහැර කර ඇත. සමෘද්ධි වියදම් සම්බන්ධයෙන් සිදු කළ විමර්ශනයේ දී අනාවරණය වුයේ බලධාරීන් 2019 මුල් මාස නවය තුළ සමෘද්ධි ආධාර බෙදාදීමේ උත්සව සහ ඒ හා සම්බන්ධ ප්‍රවර්ධන කටයුතු වෙනුවෙන් මෙන්ම උත්සව සඳහා පැමිණෙන ප්‍රතිලාභීන්ට ටී ෂර්ට් ලබාදීම සඳහා සමස්ත සමෘද්ධිලාභීන්ට මාස තුනක සමෘද්ධි ප්‍රතිලාභ ලබාදීමට තරම් ප්‍රමාණවත් මුදලක් වියදම් කර ඇති බවය.
පසුගිය රජයේ ප්‍රාථමික කර්මාන්ත සහ සමාජ සවිබලගැන්වීමේ අමාත්‍යාංශය යටතේ පැවති සමෘද්ධි සංවර්ධන දෙපාර්තමේන්තුව මඟින් දුප්පත්කම තුරන් කිරීම වෙනුවෙන් යැයි පවසමින් රටේ මහජනතාවට අයත් රුපියල් එකසිය හැත්තෑනව කෝටි අනු ලක්ෂ දෙදහස් පන්සීය පහළොවක (1,799,002,515.76) මුදලක් 2019 වර්ෂයේ ජනවාරි සිට සැප්තැම්බර් මස දක්වා පමණක් සමෘද්ධි ආධාර ලබාදීම සඳහා වෙන් කර ඇත. ඉන් උත්සව සඳහා පැමිණෙන ප්‍රතිලාභීන්ට ටී ෂර්ට් ලබාදීම සඳහා රුපියල් එකසිය හතලිස් නව කෝටි දහනව ලක්ෂ අනූහත්දහස් පන්සීයක මුදලක් (1,499,197,500.00) ද උත්සව පැවැත්වීම සඳහා රුපියල් විසිනව කෝටි අනු අටලක්ෂ පන්දහස් දාසයක මුදලක් (299,805,016) වැය කර තිබෙන බව තොරතුරු දැනගැනීමේ පනතට අනුව සමෘද්ධි සංවර්ධන දෙපාර්තමේන්තුවෙන් ලබාගත් තොරතුරු මඟින් අනාවරණ වේ.
පසුගිය 2018 වර්ෂ තුළ සමෘද්ධි ආධාර ලබාදීමේ උත්සව සහ මාධ්‍ය ප්‍රචාරණ කටයුතු වෙනුවෙන් එක්කෝටි හය ලක්ෂයකට අධික ( 10,672,695.5) මුදලක් වැය කර තිබේ. එමෙන්ම 2017 වර්ෂයේ හා 2016 වර්ෂය තුළ කිසිදු මුදලක් උත්සව සඳහා වැය නොකර දුප්පත් ජනතාවට අවශ්‍ය සමෘද්ධි ආධාර ලබාදී ඇති බව ද තොරතුරු දැනගැනීමේ පනත මඟින් ලබාගත් තොරතුරු මඟින් අනාවරණය කරගැනීමට හැකි විය.
හුදෙක් එම මුදල තෝරාගත් ප්‍රතිලාභීන්ට මාස 03ක පමණ කාලයක් සමෘද්ධි ප්‍රතිලාබ ලබාදීමට තරම් ප්‍රමාණවත් මුදලක් වන අතර එය ලබාදුන් සමෘද්ධි සහනාධාර වටිනාකමින් 5% ක මුදලක් ද වේ. සමෘද්ධි ප්‍රතිලාභ ලෙස රජය එක් පවුලකට මසකට රුපියල් 1500 සිට 3500 දක්වා වූ මුදලක් ලබා දෙන අතර එය තීරණය වන්නේ ප්‍රතිලාභී පවුලේ සිටින සාමාජික සංඛ්‍යාව අනුව ය.
ටී ෂර්ට් ඇන්දවීම
2019 වර්ෂයේ සමෘද්ධි ආධාර ලබාදීමේ උත්සව අවස්ථා වෙනුවෙන් වැඩි මුදලක් වැය කර ඇත්තේ එම උත්සව අවස්ථාවන්ට පැමිණෙන ජනතාවට ටී ෂර්ට් සම්පාදනය කිරීම සඳහාය. එම කොන්ත්‍රාත් ලබාදී ඇත්තේ comfort International Lanka(Pvt) Ltd යන පෞද්ගලික ආයතනයකට බව සමෘද්ධි සංවර්ධන දෙපාර්තමේන්තුවෙන් ලබාගත් තොරතුරුවලින් අනාවරණය විය.
කෙසේ නමුත් ටී ෂර්ට් සඳහා කොන්ත්‍රාත් ලබාදුන්නා යැයි පවසන රත්මලාන ප්‍රදේශයේ comfort international Lanka(Pvt) Ltd යන පෞද්ගලික ආයතනය සම්බන්ධයෙන් අප කළ සොයා බැලීමේ දී එවැනි ආයතනයක් සම්බන්ධයෙන් තොරතුරු අනාවරණය කර ගැනීමට නොහැකි වූ අතර පසුව අන්තර්ජාලයෙන් ලබාගත් තොරතුරු අනුව එහි සඳහන් වී තිබු දුරකතන අංකයක් ලබාගනිමින් එම ආයතනයට ඇමතුවත් එය භාවිතයේ නැති විය. මේ සම්බන්ධයෙන් කරුණු අනාවරණය කරගැනීම සඳහා අප සමෘද්ධි සංවර්ධන දෙපාර්තමෙන්තුවේ ගිණුම් අංශයෙන් කළ වීමසිමක දී එහි සිටි නිලිධරිනියක කියා සිටියේ එම ටී ෂර්ට් සම්බන්ධයෙන් සහ තවත් කාරණා කීපයක් සම්බන්ධයෙන් විගණනයක් පැවැත්වීමට අදාළ ලේඛන රැගෙන ගොස් ඇති බැවින් එම ආයතනය සම්බන්ධයෙන් සමෘද්ධි සංවර්ධන දෙපාර්තමෙන්තුව සතුව තොරතුරු නැති බවය.
විගණකාධිපති දෙපාර්තමේන්තුවේ සමෘද්ධි සංවර්ධන දෙපාර්තමේන්තුව භාරව කටයුතු කරනු ලබන විගණක අධිකාරීවරිය පවසා සිටියේ සමෘද්ධි සංවර්ධන දෙපාර්තමේන්තුව මඟින් පසුගිය ආණ්ඩුව සමයේ සිදු කළ ටී ෂර්ට් ලබාදීම ඇතුළු කාරණා කීපයක් සම්බන්ධයෙන් විගණනයක් පවත්වන බවත් ඒ සම්බන්ධයෙන් සිදු කළ විගණන කටයුතු මේ වන විට අවසන් වෙමින් තිබෙන බවත් ය. නමුත් එහි රහස්‍යභාවය සුරැකිය යුතු බැවින් තමන්ට එම තොරතුරු ලබාදීමට නොහැකි බව ද විගණක අධිකාරිවරිය කියා සිටියා ය.
කෙසේ නමුත් මේ තරම් මුදලක් සමෘද්ධි ප්‍රතිලාභ ලබාදීමේ උත්සව හා ඒ වෙනුවෙන් සිදු කළ විවිධ කටයුතු සඳහා වැය කිරීම සම්බන්ධයෙන් පසුගිය රජයේ ප්‍රාථමික කර්මාන්ත සහ සමාජ සවිබලගැන්වීමේ අමාත්‍යාංශය භාරව සිටි හිටපු අමාත්‍ය දයා ගමගේ මහතාගෙන් කළ විමසීමකදී ඔහු කියා සිටියේ එම ටී ෂර්ට් එකක් රුපියල් 450ක පමණ අඩු මුදලකට ලබාගෙන එය සමෘද්ධි ලාභීන්ටම ලබාදීමට කටයුතු කළ බවයි.
නමුත් හිටපු අමාත්‍යවරයා කියා සිටි පරිදි ටී ෂර්ට් මුද්‍රණය කර ඇත්තේ එක් දිස්ත්‍රික්කයකින් පුද්ගලයන් පන්දහස ( 5,000 ) බැගින් දිස්ත්‍රික්ක 25ක සමෘද්ධි ලාභීන් 1 25,000ක් දෙනා දැනුවත් කිරීමටය. ඔහුට අනුව ඒ සඳහා වැය කර ඇත්තේ රුපියල් පන්කෝටි හැට දෙලක්ෂ පනස්දහසක් (56,250,000 ) පමණකි. නමුත් ඒ වෙනුවෙන් රුපියල් කෝටි 149ක් පමණ වැය කිරීම සම්බධයෙන් තමා දැනුවත්වීමක් නැති බව ද ඔහු කියා සිටියේය.
ටී-ෂර්ට් කොන්ත්‍රාත්කරු, comfort international (Pvt) Ltd යන පෞද්ගලික ආයතනය තෝරාගත්තේ කෙසේ ද සහ ඔවුන්ට ගෙවනු ලැබුවේ කෙසේ ද යන්න පිළිබඳ තමා නොදන්නා බව ද හිටපු අමාත්‍ය දයා ගමගේ පැවසීය. ඒ සම්බන්ධයෙන් තොරතුරු දැනගැනීම සඳහා සමෘද්ධි සංවර්ධන දෙපාර්තමේන්තුවේ නිලධාරීන් සම්බන්ධ කරගත්ත ද ඔවුන් මේ සම්බන්ධයෙන් පිළිතුරු දීම ප්‍රතික්ෂේප කරන ලදී .
කෝටි 29ක උත්සව
එමෙන්ම එම 2019 වර්ෂයේ අදාළ කාලයේ අනෙකුත් මුදල් වැය කර ඇති ආකාරය පිළිබඳ කරුණු විමසීමේ දී සමෘද්ධිලාභීන්ට සමෘද්ධි ආධාර ලබාදීමේ උත්සව වෙනුවෙන් රුපියල් විසිනව කෝටි දොළොස් ලක්ෂ දස දහස් හාරසිය තිස් හතරක මුදලක් (291,210,434) ද ඒ වෙනුවෙන් පෝස්ටර්, කටවුට් ගැසීම සඳහා අසූ එක්ලක්ෂ අනුදාහක (8,190,000.00) මුදලක් ද වියදම් කර තිබෙන බව අනාවරණය වේ. එමෙන්ම එම උත්සව වෙනුවෙන් පුවත්පත් දැන්වීම් ඇතුළු මාධ්‍ය දැන්වීම් සඳහා හාර ලක්ෂ හාරදහස් පන්සියයක (404,581.50) මුදලක් ද වැය කර තිබේ .
මෙවන් විශාල මුදලක් පසුගිය රජය මගින් සමෘද්ධි ප්‍රතිලාභ ලබා දීමේ උත්සව වෙනුවෙන් වැය කරනු ලැබුවත් පෙර වර්ෂවල ප්‍රතිලාභ ලබාදුන් පවුල් සංඛ්‍යාව සම්බන්ධයෙ සහ ඒ වෙනුවෙන් ලබාදුන් මුදල් වටිනාකම් සම්බන්ධයෙන් සලකා බැලූ විට පෙනී යන්නේ පෙර වර්ෂවල සමෘද්ධි ප්‍රතිලාභ ලබාදීම වෙනුවෙන් වැය කර ඇති මුදලට වඩා අඩු මුදලක්එම කාලය තුළ දී යොදවා ඇති බවය.
ප්‍රතිලාභ අඩු වෙලා
2018 ට සාපේක්ෂව මේ වසරේ එක් පවුලකට සමෘද්ධි ප්‍රතිලාභය 10.6%කින් අඩු වී ඇති බව නිල දත්ත වාර්තා සඳහන් කරයි. එහිදී 2018 වසරේදී සමෘද්ධි ප්‍රතිලාභී එක් පවුලක් සඳහා මසකට සාපේක්ෂ වශයෙන් රුපියල් 2363 පමණ ලබාදී ඇති අතර සමෘද්ධි ආධාර මුදල 2019 වර්ෂයේදී 2114 දක්වා අඩු වී තිබේ .
2019 වර්ෂයේ මාස නවයක කාලයකට සාපේක්ෂව පසුගිය 2016 වර්ෂයේ සිට පිළිවෙළින් 2018 වර්ෂය දක්වා සමෘද්ධි සංවර්ධන දෙපාර්තමේන්තුව මගින් මේ ආකාරයෙන් සමෘද්ධි ආධාර ලබාදීම සිදු කර ඇති නමුත් 2019 වර්ෂයේ ජනවාරි සිට සැප්තැම්බර් මස දක්වා සමෘද්ධි ආධාර ලබා දුන් ජනතාවගේ වැඩි වීමක් තිබුණත් එහි දී ලබාදුන් මුදල අනෙකුත් වර්ෂයන්ට සාපේක්ෂව අඩු මුදලක් වේ. (තොරතරු දැනගැනීමේ පනත මඟින් සමෘද්ධි සංවර්ධන දෙපාර්ත මේන්තුවෙන් ලබාගත් තොරතුරු)
දුප්පත්කම තුරන් කිරීමේ මානව අයිතිය සුරැකීමේ අරමුණින් ක්‍රියාත්මක වන සමෘද්ධි ආධාර ලබාදීමේ ක්‍රියාවලිය තුළ තමන්ගේ බලය ප්‍රවර්ධනය වෙනුවෙන් රටේ ජනතාවගේ බදු මුදල් මේ ආකාරයෙන් විනාශ කිරීමෙන් සිදු වන්නේ රටේ පොදු මහත් ජනතාවම තව දුරටත් ණය බරිත කර දුප්පත් කිරීමකි.
'' තමන්ගේ සල්ලි තමන් වියදම් කිරීම සහ අනුන්ගේ සල්ලි වියදම් කිරීම අතර ගැටලුව මෙතුළ තිබෙන දෙයක්. රටක ආණ්ඩුවක ආදායම් වියදම් තත්ත්වයත් සමඟ ගත් විට නාස්තිකාරී සහ ඵලදායි නොවන වියදම් අවම කරගැනීමේ උත්සාහයක් මෙන්ම වියදම් කරන සෑම රුපියලකටම ඒ රුපියලට වඩා වැඩි වටිනාකමක් ලැබෙන විදියට වියදම් සකස් විය යුතුයි.’’ යනුවෙන් කොළඹ විශ්වවිද්‍යාලයේ ආර්ථික විද්‍යාව පිළිබද මහාචාර්ය සිරිමල් අබේරත්න මහතා කියා සිටි .
''නමුත් මේ වියදම් කරන අරමුණු බොහෝ විට ආර්ථික අරමුණුම වෙන්නේ නැහැ. එය වෙනත් අරමුණු සඳහා ද යොදාගැනීමෙන් ඕනෑම රටක ආර්ථිකයට බලපෑමක් සිදු විය හැකියි.’’ මහාචාර්ය සිරිමල් අබේරත්න මහතා කියයි.
මේ ආකාරයෙන් විශාල මුදලක් වැය කරමින් සමෘද්ධි ආධාර ලබාදීමේ උත්සව පවත්වනු ලැබුවත් එදිනට එම ආධාර ලබාදීම සිදු කෙරුණේ සංකේතයක් වශයෙන් පමණි. පසුව ප්‍රාදේශීය මට්ටමින් දේශපාලනඥයන් නැවත සමෘද්ධිලාභී ජනතාව ප්‍රාදේශීය ලේකම් කාර්යාල සඳහා ගෙන්වා එම සමෘද්ධි ආධාර ලබාදීම සිදු කරනු ලැබීම දක්නට ලැබිණි. සමෘද්ධි ප්‍රතිලාභීන්ට ප්‍රධාන උත්සවවලින් පසු මුදල් ලබාගැනීම සඳහා නැවත නැවත උත්සවවලට සහභාගී විය යුතු බව, සමෘද්ධිලාභි ජනතාව පවසයි.
සමෘද්ධි සහනාධාරය යම් අයෙකු විසින් ඉල්ලුම් කරන්නේ නම් ඒ සඳහා යම් ක්‍රමවේදයක් පවතී. එහිදී අදාළ ඉල්ලුම්කරු සිය ඉල්ලීම වසම බාරව කටයුතු කරනු ලබන සමෘද්ධි සංවර්ධන නිලධාරියාට, ප්‍රාදේශීය ලේකම් කාර්යාලයට, දිස්ත්‍රික් ලේකම් කාර්යාලයට හෝ සමෘද්ධි සංවර්ධන දෙපාර්තමේන්තුවේ ප්‍රධාන කාර්යාලයට ඉදිරිපත් කළ හැකිය. ඒ අනුව එකී ඉල්ලීම සම්බන්ධයෙන් කමිටුවක් මඟින් විශ්ලේෂණය කර ප්‍රාදේශීය ලේකම්ගේ නිර්දේශය මත සමෘද්ධි සංවර්ධන දෙපාර්තමේන්තුවේ අධ්‍යක්ෂ ජනරාල්වරයාගේ අනුමැතිය මත සමෘද්ධි සහනාධාරය ලබාදීමට කටයුතු කරනු ලබයි.
සමෘද්ධිලාභීන් තෝරාගැනීමේ දී දේශපාලන බලපෑම්
එහි දී සමෘද්ධි සහනාධාරයක් ලබාදීමට සුදුසුකම් මොනවා ද යන්න සම්බන්ධයෙන් සිදු කළ සොයා බැලීමේ දී, අවධානය යොමු කළ කරුණු ලෙස පවුලේ සාමාජික සංඛ්‍යාව, කාන්තා මූලික පවුල්, මවුපියන් අහිමි වීම, ආපදා තත්ත්වයට නිරන්තරවම ලක් වීම ආදී කරුණු සඳහා මුලික අවධානය කළ යුතු බව දැකගත හැකි විය. ඒ සඳහා ප්‍රාදේශීය ලේකම්, සහකාර ප්‍රාදේශීය ලේකම් හෝ බලය පැවරු නිලධාරියෙකු කමිටු සභාපති, සමෘද්ධි මුලස්ථාන කළමනාකරු, සමෘද්ධි ප්‍රාදේශීය සංවිධාන සඳහා අධ්‍යක්ෂක ජනරාල්වරයා විසින් නම් කරන ලද සාමාජිකයන් තිදෙනා ද සමන්විත ප්‍රාදේශීය කමිටු මඟින් මෙන්ම වසම් කමිටු මඟින් එම තෝරාගැනීම සිදු කරනු ලබන බව සමෘද්ධි සංවර්ධන දෙපාර්තමේන්තුවෙන් ලබාගත් තොරතුරුවල පැහැදිලිව දක්වා තිබේ.
නමුත් මේ සම්බන්ධනේ සිදු කළ සොයාබැලීමේදී අනාවරණය වූයේ සමෘද්ධි සහනාධාරය ලැබිය යුතු පවුල් සඳහා ද එම ආධාර නොලැබී ඇති බවය. ඒ සඳහා ප්‍රධාන හේතුව වී ඇත්තේ, අදාළ ප්‍රදේශයේ සමෘද්ධිලාභීන් තෝරාගැනීමේ දී ආණ්ඩු පක්ෂය නියෝජනය කරන නියෝජිතයන් විසින් සමෘද්ධි සහනාධාර ලබාදීම සඳහා සකස් කරන ලද ලේඛනයක් ද ඉදිරිපත් කර ඇති බවය. එහි දී ඉහත කමිටුවල සහ දේශපාලන නියෝජිතයන් විසින් තෝරා නම් කරන ලද ලැයිස්තු දෙකේම සිටින පුද්ගලයන්ට පමණක් සමෘද්ධි ආධාර ලබා දීමට කටයුතු කර තිබේ. එහිදී සිදු වන්නේ තම දේශපාලන පක්ෂයට හිතැති පිරිසට පමණක් සමෘද්ධි ආධාරය ලබාදීම පමණි. මේ සම්බන්ධයෙන් දිවයිනේ දිස්ත්‍රික්ක කීපයක ප්‍රාදේශීය ලේකම්වරුන් කීපදෙනෙකු මෙන්ම ග්‍රාම නිලධාරීන් කීප දෙනෙකුගෙන් කළ විමසීමේදී කියා සිටියේ ඔවුන් විසින් සකස් කරන කමිටුවල නොසිටිය පුද්ගලයන්ට සමෘද්ධි ලැබී ඇති බවත් එහි සිටි බොහෝ දෙනෙකුට සමෘද්ධි අහිමි වී ඇති බවත් ය.
