මෙවර ජනපතිවරණය කරට කර තරගයක් කියා කිව්වත්, අවසානයේ ගෝඨාභය රාජපක්ෂ මහතා ලක්ෂ දා හතරකට ආසන්න විශාල වැඩි ඡන්ද ප්රමාණයකින් ජයගත්තා. සජිත් ප්රේමදාස මහතා ලැබූ පරාජය ගැන ඔබේ විග්රහය මොකක්ද?
ඇත්තෙන්ම අපි බලාපොරොත්තු වුණේ සජිත් ප්රේමදාස මහතාට මේ ලැබුණු සිංහල බෞද්ධ ඡන්දවලට වඩා විශාල ප්රමාණයක් ලැබෙයි කියලයි. මැතිවරණ ව්යාපාරයේ ආරම්භයේදී ම අපි දැනගෙන හිටියා කිසියම් ප්රමාණයකින් අපි පහළ ඉන්නේ කියලා. ඒක කවුරුත් දැනගෙන හිටියා. අපේ විශ්වාසය තිබුණේ සාර්ථක මැතිවරණ ව්යාපාරයක් මඟින් එ.ජා.ප. යට හානිකර විදියට ඉදිරිපත් වී තිබූ මතවාදය මැතිවරණ ව්යාපාරය හරහා බිඳ දමන්න හැකියාව ලැබෙයි කියලා. අපිට ඒක කරගන්න බැරි වුණා. ඒක තමයි මේ පරාජයට මූලික හේතුව.
හැබැයි මේ පරාජය සජිත් ප්රේමදාසගේ පරාජයක් ලෙස මා දකින්නේ නෑ. එ.ජා.ප. නායකත්වයේ සිටම කලක් තිබුණු පෙනුම, සිංහල බෞද්ධ ජනතාවගේ හදවතේ තිබුණු ප්රශ්න හරියට තේරුම් ගත්තේ නැති එක තමයි පරාජයට හේතුව. ඒක කාලයක සිට හැදුණු එකක්. එජාපයට අසාධාරණ ලෙස අලවා තිබූ ලේබල් ටික මාසයක පමණ කෙටි කලකින් ගලවන්න අපිට බැරි වුණා. එජාපය පෙනී සිටින්නේ කා වෙනුවෙන්ද කියන එක ජනතාවට තහවුරු කරන්න ඕනෑ. ඒ සඳහා සජිත්ගේ නායකත්වයෙන් අලුත්වැඩ පිළිවෙළක් අරඹන්න ඕනෑ,
නාම යෝජනා ලබා දීමටත් පෙර ඔබ සජිත් 58%ක් ලබාගෙන ජයග්රහණය කරන බවට සමීක්ෂණ වාර්තා මඟින් පෙන්නුම් කළ බවක් කියනවා. ඔබට එවැනි සමීක්ෂණ වාර්තා ලැබුණේ කොහොමද? කොහෙන්ද?
ඒක අමූලික බොරුවක්. සජිත් ප්රේමදාස මහතාගෙන් හෝ රනිල් වික්රමසිංහ මහතාගෙන් ඇහුවොත් ඇත්ත සමීක්ෂණ වාර්තාවලින් පිළිබිඹු වුණේ මොනවද කියලා කවුරුත් දන්නවා. ඒ චෝදනාවට කිසිම පදනමක් නෑ. ඒක කාගෙ හරි මනඃකල්පිත කියවීමක්. මේ සමීක්ෂණ වාර්තා රනිල් වික්රමසිංහ මහතා කැඳෙව්වේ වසර ගණනක සිටයි. ඒවට මං සම්බන්ධ වෙලා නෑ. එක සමීක්ෂණයකට පමණක් මං සම්බන්ධ වුණා. ඊට කලින් කරපු සමීක්ෂණ අගමැතිවරයාගේ මූලිකත්වයෙන් තමයි කළේ. සජිතුත් අගමැතිවරයත් දැනෙගන හිටියා අපිට තිබුණු ප්රශ්නය මොකක්ද කියලා. මං මුකුත් කියලා තිබුණේ නෑ. මං මාධ්යයෙන් කියපුවා දැක්කනම් ඒක තේරුම් යාවි.
ඔබ කිව්වා ගෝඨාභය රාජපක්ෂ මහතා අභියෝගයක් නෙවෙයි කියන්න බැහැ. අභියෝගයක් තමයි කියලා.
අන්න හරි. ඒක තමයි ඇත්ත කතාව. ඒක මම කිව්වේ ජනාධිපතිවරණයට මාස දෙකක් තිබියදීයි. අපි සජිත් වෙනුවෙන් පෙනී සිටින නිසා අපේ පක්ෂයේම සමහර පුද්ගලයන් මේ විදියට බොරු ප්රචාරයක් ගෙනියන්න හදනවා. ඒත් රනිල් වික්රමසිංහ මහත්තයත් සජිත් ප්රේමදාස මහත්තයාත් දෙන්නම දන්නවා මැතිවරණ ව්යාපාරයේ හිටපු හැමෝම දන්නවා ඇත්තටම අපි හිටපු තත්ත්වය මොකක්ද කියලා.
රනිල් වික්රමසිංහ මහතාට හිතවාදි අය නම් කියන්නේ රනිල්ට ඡන්දේ කරන්න පවරලා තිබුණේ උතුරු නැගෙනහිර පළාත්. ඒ පළාත්වලින් ඉහළින්ම ජයගත්තා. නමුත් අනෙක් පළාත් පරාජයවීම නිසයි මේ පරාජය ලැබුවේ කියලා. ඒ අදහස ඔබ පිළිගන්නවාද?
නෑ. ඒක මෙහෙමයි රනිල් වික්රමසිංහ මහතා උතුරු නැගෙනහිර සෑහෙන කාර්යභාරයක් කළ බව ඇත්ත. ඒක අහක දාන්න බෑ. ඔහුට ඒ ගෞරවය ලබා දෙන්න ඕනෑ. ඒත් ජනතාව ඡන්දේ දුන්නේ සජිත්ට මිස රනිල්ට නොවේ. යම් කිසි විදියකින් සජිත් ගැන උතුරු නැගෙනහිර ජනයාට යම් සැකයක් තිබුණා නම් මෙලෙස ඡන්දය ලබා දෙන්නේ නෑ. වික්රමසිංහ මහතා පක්ෂයේ නායකයා විදියට පළාත් දෙකක වගකීම පමණක් අරන් අනිත් පළාත්වල වගකීමෙන් බැහැර වෙන්න බෑ. මං මේ පරාජය එක පුද්ගලයකු වෙත පමණක් පවරන්න සූදානම් නෑ. උතුරු නැගෙනහිර ඡන්ද කොහොමත් අපිට ලැබෙනවා. පරාජයට හේතුව එජායේ ඒ වනවිට පැවැති මුහුණුවර පිළිබඳ ගැටලුවයි. කාලයක් තිස්සේ සිංහල බෞද්ධ ජනතාවගේ ස්ථාවරය සම්බන්ධයෙන් එජාපයේ මතය මොකක්ද කියා ඒ ජනතාවගේ හදවත් තුළ කැකෑරෙමින් තිබුණා. ඒ ලෙබල් එක ඇලවිලා තිබුණේ සජිත් ප්රේමදාසට නොවේ. එජාපයේ ඒ වනවිට තිබූ මුහුණුවරටයි. ඒක මාධ්ය හරහා ඔඩු දුවන්න දී දිනපතා ජනතාව අතරට ගෙනිච්චා. ඉන් සමහර දේ අමූලික බොරු. වසර ගණනාවක් තිස්සේ එජාප නායකත්වයට මාධ්ය හරහා සමාජ මාධ්ය හරහා ඉතාමත් අසාධාරණ ලෙස අසත්ය කතා ගොතලා එජාපය ගැන ජනතා මනස හෝදපු නිසයි අපි පරාජය වුණේ.
ඔබ එජාපයේ බෞද්ධ පදනම ගැන කතා කළා. ශ්රී ලංකාව සිංහල බෞද්ධ රාජ්ය නොවේ කියා මංගල සමරවීර මහතා කළ ප්රකාශත් රන්ජන් රාමනායක ගේ බෞද්ධ විරෝධී සමහර කතාත් පරාජයට හේතු වුණේ නැතිද?
මම පුද්ගලයන් හැටියට නම් කරන්න සූදානම් නෑ. ඒත් සිංහල බෞද්ධ ජනතාවට අප ගැන සැක හිතුණා. සැක මතු වුණා. එවැනි සැක සංකා මාධ්ය මඟින් විශාල කර උළුප්පා පෙන්නුවා. ඒත් අපි එහෙම නෙවෙයි කියන එක අපිට ඔප්පුකරගන්න බැරි වුණා. සිංහල බෞද්ධ ජනතාවට කවදාවත් එජාපයෙන් ගැටලුවක් තිබුණේ නෑ. අනික මේක සිංහල බෞද්ධ රටක් කියන එක අමුතුවෙන් කියන්න ඕනෑ නෑ. මේක වසර 2500ක සිට සිංහල බෞද්ධ රටක්. එජාපය හා පොහොට්ටුව අතර තියන වෙනස තමයි අපි සිංහල බෞද්ධ ජනතාවට වගේම අනෙක් සියලු පුරවැසියන්ට ශ්රී ලාංකිකයන් ලෙස සලකන පක්ෂයක්.
සජිත් ප්රේමදාස මහතා මැතිවරණ සටන ගෙනගියේ වොක්ෂෝල් වීදියේ කාර්යාලයේ සිටයි. රනිල් වික්රමසිංහ මහතා සිරිකොතේ සිට මැතිවරණ සටන ගෙන ගියා. මේ දෙපාර්ශ්වය අතර ඒකමිතියක් අවබෝධයක් නොතිබීම මේ පරාජයට හේතුවක් නෙවෙයිද?
මැතිවරණ සටන මීට වඩා සංවිධානාත්මකව සම්බන්ධීකරණයකින් යුතුව කළ යුතුව තිබුණා කියා මා පිළිගන්නවා. ඒකට ප්රධාන හේතුව සජිත්ට අපේක්ෂකත්වය දුන්නේ නෑනේ. සජිත් ඉතාම උනන්දුවෙන් හිටියා මේ අපේක්ෂකත්වය අරන් එජාපයේ අපේක්ෂකයා විදියට ඉදිරිපත් වෙන්න. ඒ අපේක්ෂකත්වය ප්රමාදවීම නිසා තමයි වොක්ෂෝල් වීදියේ කාර්යාලය ඔහුට ගන්න සිද්ධ වෙන්නේ. අපේක්ෂකත්වය කලින් ලැබුණා නම් එවැනි කාර්යාලයක් අවශ්ය නෑ. සිරිකොතේ සිටම මැතිවරණ සටන කළහැකිව තිබුණා. අන්තිමට ඇදලා ඇදලා හිරකරලා අවසාන මොහොතේ තමයි අපේක්ෂකත්වය දුන්නේ. ඒ නිසා තමයි වොක්ෂෝල්වීදියේ කාර්යාලය අරින්න සිදු වුණේ.
එක්සත් ජාතික පක්ෂයට නායකත්ව මණ්ඩලයක් ගෙනෙනවා කියා පසුගියදා මාධ්ය වාර්තා කර තිබුණා. එහි ඇත්තක් තියනවද?
එජාපයට නායකත්ව මණ්ඩලයක් අවශ්ය නෑ. එජාපයට අවශ්ය ඇත්ත එජාපයේ සැබෑ මුහුණුවර ජනතාවට පෙන්නිය හැකි නායකයෙකුයි. ඒ නායක වටේ එවැනි අදහස් තියන පුද්ගලයන් පක්ෂය හරි මඟට යොමු කරන එකයි. මේක කොමිටිවලින් කරන්න පුළුවන් දේවල් නෙමේ. අපේ පක්ෂයට එක නායකයෙක් ඕනෑ. ඒ නායකයාට සහාය දෙන කණ්ඩායමක් ඕනෑ.
මෙවැනි මනඃකල්පිත අදහස් මාධ්ය මඟින් කොහොමද ජනතාවගේ ඔළුවලට දෙන්නේ?
ඒකම තමයි ප්රශ්නය. අද ඇත්ත මොකක්ද බොරුව මොකක්ද කියලා මිනිස්සු දන්නේ නෑනේ. සමහර වෙලාවට ප්රධාන ධාරාවේ පුවත්පත් ෆේස්බුක් එකෙන් ගත්තා කියලා ප්රවෘත්ති පළ කරනවා. ෆේස්බුක් එකට ඕනෑ කෙනෙකුට ඕනෑම දෙයක් දාන්න පුළුවන්. මාධ්යට ලොකු වගකීමක් තියනවා වගකීමකින් යුතුව ප්රවෘත්ති ජනතාවට ලබාදීමට.
විපක්ෂ නායක ධුරයත් එජාප නායක ධුරයත් යන දෙකම සජිත් ප්රේමදාස මහතාට ලබාදිය යුතු බවට සමහර එජාප මන්ත්රිවරුන් කියනවා. ඔබ ඉන්නේ කවර ස්ථාවරයේද?
මා ඉන්නෙත් ඒ ස්ථාවරයේ තමයි. මොකද එජාප නායකත්වය නැතිව ඊළඟ මැතිවරණය මෙහෙයවන්න සජිත්ට හැකියාවක් නෑ. එජාපයේ නායකත්වය අගමැතිධුර අපේක්ෂකයාට ලබා දිය යුතුයි. දැන් සජිත් ප්රේමදාස මහතා විපක්ෂ නායක ධුරයට පත්වෙලා. රනිල් වික්රමසිංහ මහතා එතුමා විපක්ෂ නායක ධුරයට පත්කිරීමේ යෝජනාව කළා. දෙවනුව තව සති කීපයකින් එජාප නායක ධුරයත් සජිත් ප්රේමදාස මහතාට ලබාදිය යුතුයි කියන ස්ථාවරයේ අපි ඉන්නවා.
ඉදිරි මහ මැතිවරණයට එජාපය මුහුණ දෙන්නේ කොහොමද?
මං හිතන්නේ නෑ මේ රටේ ජනතාව එක පවුලකටම සියලුම බලතල ලබා දේවි කියලා. අලුත් නායකත්වයක් සමඟින් අපි ඉදිරියට එනවා. මහඡන්දයේදී ආසන 113ක් ලබාගතහොත් රජයක් පිහිටුවන්න පුළුවන්. නැතිනම් ශක්තිමත් විපක්ෂයක් වෙන්න පුළුවන්. අපිට දැඩි විශ්වාසයක් තියනවා හවුල් ආණ්ඩුවක් හෝ පිහිටුවාගෙන ආණ්ඩු බලය ලබාගත හැකියැයි කියා.