ඉකුත් ජනාධිපතිවරණයෙන් ගෝඨාභය රාජපක්ෂ මහතා හත් වැනි විධායක ජනාධිපතිවරයා ලෙස ජනවරම ලද්දේ ශ්රී ලංකා පොදු ජන පෙරමුණේ අපේක්ෂකයා ලෙස තරග කිරීමෙනි. ඔහු ජනාධිපතිවරයා වීමෙන් පසු ශ්රී ලංකා පොදුජන පෙරමුණේ නායක මහින්ද රාජපක්ෂ මහතා තෙවැනි වරටත් අගමැතිවරයා සේ පදවිය ලැබී ය. නව අග්රාමාත්ය මහින්ද රාජපක්ෂ මහතා ඉකුත් දා සිළුමිණ සමඟ විශේෂ සම්මුඛ සාකච්ඡාවකට එක් විය. එම සම්මුඛ සාකච්ඡාවේ දී සිළුමිණ නියෝජිතයා යොමු කළ ප්රශ්නවලට අග්රාමාත්යවරයා දුන් පිළිතුරු මෙසේ සටහන් කරමු.
ඔබත් ඔබේ සහෝදර වත්මන් ජනාධිපති ගෝඨාභය රාජපක්ෂ මහතාත් රාජ්ය බලය අතට ගත්තා විතරයි මතු වී ඇත්තේ ඉතා බරපතළ චෝදනාවක්. ස්විට්සර්ලන්ත තානාපති කාර්යාලයේ සේවයේ නියුතු නිලධාරිනියක, ඒ තානාපති කාර්යාලයීය තොරතුරු අනාවරණය කරගන්න කිසියම් පිරිසක් විසින් පැහැරගෙන ගොස් ඇතැයි කියන සිද්ධිය බරපතළ චෝදනාවක් නේද?
★ ඔව්. එල්ල වී ඇති චෝදනාව සත්යයක් නම් ඒක බොහොම බරපතළ එකක්. ඇති වූවා යැයි කියන සිද්ධිය එහෙම වූ බවට කිසිම නිවැරදි තොරතුරක් ලැබී නැහැ. ස්විට්සර්ලන්ත තානාපති කාර්යාලයෙන් ලද පැමිණිල්ලක් අනුව වහාම ක්රියාත්මක වූ ආරක්ෂක ලේකම්වරයාත් විදේශ සේවා අමාත්යාංශයේ ලේකම්වරයාත් අපරාධ පරීක්ෂණ දෙපාර්තමේන්තුවේ දක්ෂ නිලධාරීන් යොදවා පරීක්ෂණ අරඹා තිබෙනවා.
පොලිසියේ විශේෂ විමර්ශන කණ්ඩායමක් කරගෙන යන පරීක්ෂණවලට අනුව ඒ කාන්තාව පැහැර ගත් බවට කිසිදු ඉඟියක් නෑ. ඔය කියන කාන්තාව 25 වැනිදා හවස පාසලක් අසල දී පැහැර ගත් බවට තමා චෝදනාව. හැබැයි තානාපතිවරයා ඒ නිලධාරිනිය ගැන නිවැරදි තොරතුරක් අනාවරණය කරන්නට තරම් සදාචාර සම්පන්න වෙලා නෑ. ඒ වගේ බරපතළ චෝදනාවක් නැඟෙද්දි පැහැරගැනීමට ලක් වුණු නිලධාරිනියගේ නමවත් කියලා නෑ.
ගෝඨාභය රාජපක්ෂ මහතා අති විශාල වැඩි ඡන්ද සංඛ්යාවකින් නව ජනාධිපතිවරයා සේ ජනවරම ලබා දවස් අටකින් තමයි මේ බරපතළ චෝදනාව එල්ල කරන්න ස්විට්සර්ලන්ත තානාපති කාර්යාලය පියවර ගත්තෙ. ඉකුත් දෙසතිය පුරා සෑහෙන කරුණු මාධ්ය ඔස්සේ කියැවුණා. එයින් අනාවරණය වෙලා තියෙන්නෙ එහෙම දෙයක් සිද්ධ වුණු බවක් නොවෙයි.
පහුගිය යහපාලන ආණ්ඩුවේ උවමනාවලට අනුව අපරාධ පරීක්ෂණ දෙපාර්තමේන්තුවේ සේවය කරමින් බුද්ධි අංශ නිලධාරීන් දඩයම් කරන ලද පොලිස් පරීක්ෂකවරයාට රටින් පැන යන්නටත් රැකවරණය දෙන්නටත් ස්විට්සර්ලන්තය මුල් වීමේ සිද්ධිය අනාවරණය වීමත් එක්ක ඇති වුණු අවමානයෙන් මිදෙන්න ඔවුන් විසින් සීතාම්බර පටය වැනි නාට්යයක් නිර්මාණය කරන ලද බව තමයි පොදු මහජන මතය.
ස්විට්සර්ලන්ත තානාපති කාර්යාලය නඟා ඇති ඔය කියන චෝදනාව පිළිබඳ සෑහෙන්න කරුණු අප සතුව ඇතත් අධිකරණය හමුවේ යම් ක්රියාදාමයක් සිද්ධ වෙන නිසා මං ඒ ගැන වැඩි යමක් පැවසීම ඒ කටයුතුවලට බාධාවක් විය හැකියි. එකක් පැහැදිලිව කිව යුුතුයි. අපේ ජනාධිපතිවරයාටත් අපේ ආණ්ඩුවටත් එරෙහිව දෙස් විදෙස්හි පවතින පසමිතුරුකම එළිපිට ප්රකාශ කිරීමක් බව මේ අභූත චෝදනාවෙන් සක්සුදක් සේ ලෝකයා ඉදිරියේ පිළිඹිබු වෙනවා. කොහොම වුණත් අපේ නිර්දෝෂීභාවය අප පෙන්වා සිටිය යුතුයි. එහෙයින් අප මෙහි සත්යාසත්යතාව රට හමුවේත් ලෝකයා හමුවේත් තබන්නට අවශ්ය විමර්ශන ඉදිරියටත් ක්රියාත්මක කරනවා. මන්ද මෙයින් හානි වන්නේ අපේ මවුබිමට. අපේ රටට.
2015 ජනවාරි 08 වැනිදා බලයට පත් යහපාලනය විසින් ගෙවුණු අවුරුදු හතර හමාරක කාලය තුළ ජනතාව මත අනේක විධ බදු බර පැටවූවා. නව ආණ්ඩුව සෑහෙන සහන තොගයක් දෙමින් වැට් බද්ද ඇතුළු බදු අඩු කිරීමක් කළා. ජනතාවගේ පැත්තෙන් ඒක ඔවුන්ට ලොකු සහනයක්. ඒත් මෙහෙම බදු බර අඩු කිරීමත් එක්ක රුපියල් මිලියන ගණනක පාඩුවක් ඇති වෙනවා නේ ද?
★ ආණ්ඩුවට මුල්යමය වශයෙන් මිලියන ගණනක පාඩුවක් සිදු වන බව ඇත්ත. ඒත් එහෙම බදු බර වැඩි කරමින් උපයාගත් මුදල්වලින් එහෙම නම් රටේ ආර්ථිකයේ කිසියම් උන්නතියක් තියෙන්න ඕනැ නේද. ඒත් සිද්ධ වුණේ ජනතාව පීඩනයෙන් පීඩනයට පත් කරමින් යහපාලනයේ ආණ්ඩුව රටේ දේශීය දළ නිෂ්පාදනය පවා පහතට හෙළීම නේද?
එහෙම ජනතාව අසීරුතාවට පත් කරමින් ආණ්ඩුව ධනය රැස් කරමින් කරපු දේවලින් මොන යම් හෝ සංවර්ධනයක් වුණාද? අපේ කාලයේ රටම වැඩබිමක් වෙලා තිබුණා. එහෙම මුළු රටම වැඩබිමක් ව තිබුණු රට මුඩුබිමක් වුණේ මන්ද කියන කාරණාව මෙහිදී සලකා බලන්න.
ජනතාව වෙත පනවා තිබුණු විවිධාකාර බදු වලින් කිසියම් ප්රමාණයක් ඉවත් කිරීම නිසා ජනතාවට සහන රැසක් අත්වී ඇති බව හැම දෙනාම කියන කතාවක්. ව්යාපාරික ප්රජාව බැංකු ණය නිසි පරිදි ගෙවාගන්න බැරිව අසාදු ලේඛනගතව හුන්නා. ඔවුන් පීඩාවට පත් කළ යම් යම් බදු ඉවත් කිරීම නිසා රටේ ඉදිරි සංවර්ධන ක්රියාවලිය යහපත් අතට එසවෙන බව කර්මාන්තකරුවන්, ප්රමුඛ සෙසු ව්යාපාරික අංශවලින් කියැවෙනවා. බදු අය කරගත යුත්තේ මල නොතළා රොන් උරා ගන්නා සේ ය කියන කියමන අපේ මුල්ය ප්රතිපත්තියයි. ඒ ඔස්සේ ව්යාපාරික ප්රජාව පෙළෙන්නා වූ ආර්ථික අපහසුතාවලින් ඔවුන් ලබන නිදහස ඔස්සේ රට ඉදිරියට ගෙන යා හැකියි කියන විශ්වාසය අපට තියෙනවා.
අපි ලෝක බැංකුව හෝ ජගත් මුල්ය අරමුදල හෝ නැති නම් මුල්යාධාර දෙන වෙනත් ආයතන හෝ කියන කියන පදේට නැටුවොත් තමා අපට ජනතාව පීඩාවට පත් කරමින් ඔවුන් සූරා පෙරා භාණ්ඩාගාරය ශක්තිමත් කරන්න වෙන්නෙ. නමුත් අපි සෞභාග්යමත් රටක් ගොඩනැංවීමේ ප්රතිපත්තියේ පිහිටා ලාංකේය ජන සමාජය ශක්තිමත්ව ඔසවා තබන්නට අවශ්ය පියවර ගන්නේ ජාතික ආර්ථිකය නංවන්නට අපේ ආර්ථික විශේෂඥවරුන්ගේ මඟ පෙන්වීම අනුව මිස විදෙස් මුල්ය කළමනාකරණයට ඕනෑ විදියට නෙවෙයි.
ඒ සඳහා අපේ ම වූ ආර්ථික පිළිවෙතක පිහිටා රටට අවශ්ය සංවර්ධනය ඔසවා තබන්නේ ලංකාව සිංගප්පූරුවක් හෝ මලයාසියාවක් හෝ කරන්නට නොවේ. ලංකාව ලංකාව සේ ඉහළට ඔසවා තැබීමයි අපේ ආර්ථික ප්රතිපත්තිය.
ඉකුත් ජනාධිපතිවරණයෙන් ශ්රී ලංකා පොදුජන පෙරමුණේ අපේක්ෂක ගෝඨාභය රාජපක්ෂ මහතා ජනාධිපති ධුරයට පත් වීමත් එක්ක කොටස් වෙළඳපොළේ ලොකු පිබිදීමක් ඇති වුණා. ඇත්තටම එහෙම වුණේ කොහොම ද?
★කොටස් වෙළඳපොළේ ගනුදෙනුකරුවන් ආයෝජනය කරන්න පෙලඹෙන්නෙ ශක්තිමත් ස්ථාවර පාලනයක් රට තුළ ඇත්නම් විතරයි. ගෝඨාභය රාජපක්ෂ ජනාධිපතිතුමා ලද දැවැන්ත ජන වරමත් එක්ක කොටස් වෙළඳ පොළේ ගනුදෙනු කරන්නන්ට විශාල විශ්වාසයක් ඇති වුණා. ඔහු ආරක්ෂක අමාත්යාංශයේ ලේකම්වරයා සේ මෙන්ම නාගරික සංවර්ධන අමාත්යාංශයේ ලේකම් ධුරය හොබවද්දීත් කරන ලද වැඩසටහන් ඔස්සේ ඔහු යමක් සාර්ථකව කරන්නට තරම් නිපුණතාවක් දක්ෂතාවක් බුද්ධිමත් බවෙකින් පරිපූර්ණ පුද්ගලයකු බව විශ්වාසයක් ඇති වුණා. ඔහු කොළඹ නගරය ලෝකයේ ලස්සන ම නගර අතරට එක් කළා. සංචාරක ආකර්ෂණය දිනාගත් අංක එකේ නගරය සේ කොළඹ ඔසවා තබන්නට ඔහු කළ දේවල් ජනතාව දුටුවා. ඉතින් එහෙම කෙනෙක් රටේ ජනාධිපතිවරයා සේ පත් වීමත් එක්ක ඔවුන් කරන්නා වූ ආයෝජනවලට ඇති සුරක්ෂාව ගැන කිසිදු සැකයක් අද ඔවුන්ට නැහැ. ඒකයි ප්රධානතම කාරණාව.
අනෙක අපි 2005 යුද්ධයකට මුහුණ දෙමින් ද යුද්ධය අවුරුදු දෙක හමාරකින් අහවරයක් කර උතුරේ මෙන් ම දකුණේ ද නැඟෙනහිර මෙන් ම බටහිර ද රටේ සිව් කොනේ ම එක විදියට ආරම්භ කරපු සංවර්ධන ක්රියාදාමය නිසා ඔවුන් අප කෙරෙහි ලොකු බලාපොරොත්තුවක් ඇතිව තමන්ගේ ආයෝජන යොදවන්නට දෙවරක් හිතන්නෙ නෑ.
2005 දී අපි ආණ්ඩුව මෙහෙයවන්න ජනවරම ඉල්ලද්දි ජනතාව කීවේ බයක් සැකක් නැතිව ජීවත්වන්න පුළුවන් තැනකට රට පත් කරන්න කියා. අපි මානුෂීය මෙහෙයුම ක්රියාත්මක කරද්දි එක එක තාලේ දේශපාලන විචාරකයන් යුද විශ්ලේෂකයන්, යුද විශේෂඥයන් පුන පුනා කීවේ එල්ටීටීඊ ය යුදමය වශයෙන් පරාද කරන්න බැරිය කියන කතාව. හැබැයි ඉතින් අපි මානුෂීය මෙහෙයුම ඔස්සේ උතුරේ මෙන්ම නැඟෙනහිර ජනතාව ද කොටි සංවිධානයෙන් මුදාගෙන ඒ යුද විශ්ලේෂකයන්ගේ විශේෂඥයන්ගේ මතය පුහු එකක් බව රටට විතරක් නෙවෙයි ලෝකයටම පෙන්නුවා. එයින් අපේ ත්රිවිධ හමුදාවම ඉතාම නිර්භිත ශක්තිමත් ම හමුදාවක් බව ඔවුන් හොඳින් අත්දැක්කා. අපි යුද්ධය පවතිද්දී වගේම අවසන් කළ පසුත් රටේ තොටේ සංවර්ධන ක්රියාවලිය ඉතා ශීඝ්රයෙන් ඇරඹුවා.
මත්තල ජාත්යන්තර ගුවන්තොට, මාගම්පුර ජාත්යන්තර වරාය නිර්මාණය කළා. අධිවේගී මාර්ග පද්ධතියක් ස්ථාපිත කරන්නට පියවර ගත්තා. දකුණු අධිවේගී මාර්ගය අහවර කළා. කොළඹ වටරවුම් පාර, නොරොච්චෝලෙ, කෙරවලපිටිය, කොත්මලේ විදුලි බලාගාර නිර්මාණය කළා. ජනතාවගේ ආර්ථිකය ශක්තිමත් කරන්නට අවශ්ය යටිතල පහසුකම් බොහෝ සංඛ්යාවක් ක්රියාත්මක කළා. ග්රාමීය සංවර්ධනය උදෙසා අපි මෙහෙම ක්රියාත්මකව සිටින විට ඒක දරා ගන්නට බැරි නරුම මිනිසුන් අපට විරුද්ධව ඇරඹූ මෙහෙයුම නිසා අවුරුදු කීයකට නම් රට ආපස්සට ගියා ද? අපි මේ සියල්ලක් ම කළේ අපට හොඳ සැලසුම් කිරීමේ දක්ෂයන් හිටිය නිසා.
අපේ මුල්ය කළමනාකරණය බොහොම වගකීමකින් හසුරුවන ලද නිසා සාමාන්ය ආර්ථික වේගය 6.8% ක් ලෙස පවත්වා ගන්න පුළුවන්කමක් ලැබුණා. දළ දේශිය නිෂ්පාදන ඩොලර් බිලියන 69ක් දක්වා වර්ධනය කරගන්න හැකිවුණා 2014 අවසන් වෙන කොට. 2005 දී අප සතු වුණේ ඩොලර් බිලියන 24යි. උද්දමනය 3. 5කින් පවත්වාගන්න අපට පුළුවන් වුණේ අපේ ආර්ථික උපාය මාර්ග හින්දා.
අපේ ජනතාවට මතක ඇති 2014 අවසන් වෙන කොට ඩොලරයක වටිනාකම රුපියල් 130ක මට්ටමින් පවත්වා ගත්තෙ මුල්ය කළමනාකරණයේ නිපුණ ආර්ථික විශේෂඥයන්ගේ සහාය නොඅඩුව අප ලද නිසා. මෙහෙම දියුණුවක් ලැබුවේ රට තුළ මුදල් සංසරණය හොඳින් සිද්ධ වෙච්ච නිසා.
ගමනැඟුම, දිවිනැඟුම වැනි වැඩසටහන් ඔස්සේ හැම ගමකම පාහේ පැවති දියුණුව යහපාලන ආණ්ඩුවේ මුග්ධ ක්රියාපිළිවෙත් නිසා ආපස්සට ගියා අවුරුදු පනහක තරම් දුරකට.
එදා අප කෙරෙහි පැවති දැවැන්ත මහජන විශ්වාසය නිසයි රට ශීඝ්ර සංවර්ධනයක් කරා හැම අංශයකින් ම එක වගේ ඉහළට ගමන් කළේ. ඒත් 2015 ජනවාරි 08 වැනි දාට පස්සෙ මොකක් ද රටට වුණේ. ඒ ගැන මං අමුතුවෙන් විස්තර කරන්න ඕනැ නෑ කියලත් මට හිතෙනවා.
එදා 2005 දි අපි රට භාරගන්න කොට අප ලද්දේ ශක්තිමත් ආර්ථිකයක් තිබුණු රටක් නෙවෙයි. ඒත් අපි යහපාලකයන් සේ අඬ අඬා දොඩ දොඩා වැලපුණේ නෑ. අපි නිසි සේ ආර්ථික කළමනාකරණයක් යොදාගත් නිසා උපාය මාර්ග මැනවින් හඳුනාගෙන ක්රියාත්මක කළ නිසා ලෝකයේ බලවත් රාජ්ය පවා ආර්ථික වශයෙන් කඩා වැටෙද්දී ඒ ලෝක ආර්ථික අර්බුදය හමුවේ වුව නොසැලී දෙපයින් නැඟී සිටින්නට හැකි වාරුවක් අපි අපේ ජනතාවට ලබාදෙන්නට අවශ්ය පියවර ගත්තා.
එහෙව් රටක් තමා යහපාලනයක් මේ පොළොවේ ස්ථාපිත කරන වග කියමින් ආණ්ඩුව කඩා බිඳ දමන්නට කුමන්ත්රණ කළ උදවිය අද රට ආපස්සට හරවා අගාධයකට හෙළා ඇත්තේ.
අපට අද මුහුණ පාන්නට වෙලා තියෙන්නෙ ණය බරින් නොපෙනෙන තරමේ අගාධයකට ඇද දමා තිබෙන රටක් සහ ජනතාවක් නඟා සිටුවන්නට. මේක එසේ මෙසේ අභියෝගයක් නෙවෙයි. ඒත් අපි මේ වැටී තිබෙන මාතෘ භූමිය කෙසේ හෝ ඔසවා ලිය යුතු යි. එය ලේසි පහසු කාර්යක් නෙවෙයි. ජනතාව අපට ඒ කාර්ය කරන්නට භාරදීලා තියෙනවා. ඉතින් ඒ දුෂ්කරවූත් කටුකවූත් කටයුත්ත කෙසේ හෝ සාර්ථක කොට මතු පරම්පරාවට යහපත් රටක් නිර්මාණය කරන්නට ඇපකැප විය යුතුයි. ඒ සඳහා ජනාධිපති ගෝඨාභය රාජපක්ෂ මහතා ගෙවී ගිය සති දෙක තුන තුළ ආදර්ශයෙන් පෙන්වා තිබෙනවා ආර්ථික අතින් අපි ශක්තිමත් වන්නට ගත යුතු ක්රියා මාර්ග කවරේද කියා.
ඔබ එසේ කීවත් ශක්තිමත් ආර්ථිකයක් ගොඩනංවන්නට නම් රාජ්ය සේවක සහාය නොඅඩුව ලැබිය යුතුයි නේ ද? ඒත් පහුගිය කාලේ ඔබේ නියෝග ක්රියාත්මක කළ ජනාධිපති ලේකම්වරයා මෙන් ම තවත් රාජ්ය නිලධාරීන් ගණනාවක් විවිධ චෝදනාවලට ලක් වීම නිසා ඔවුන් ජනතාවගේ යහපත වෙනුවෙන් කටයුතු කරනවා වෙනුවට තමන් ආරක්ෂා වීමේ පිළිවෙතක පිහිටා වැඩ කළොත් ගෝඨාභය රාජපක්ෂ ජනාධිපතිවරයාණන් මෙන් ම ඔබත් ඔබේ ආණ්ඩුවත් අපේක්ෂා කරන ඉලක්ක කරා ගමන් කළ හැකි ද?
★2015 බලය ලබාගත් යහපාලනය කළේ මටත් මගේ පවුලේ අයටත්, රාජ්ය සේවයේ යෙදෙමින් මේ රටේ ඉදිරි අනාගතය යහපත් ලෙස සංවර්ධනය කරන්නට වගකීමක් ඇතිව තමන්ගේ සේවය ඕනෑවටත් වඩා වැඩියෙන් ඉටු කරන ලද වගකීම් දැරූ ලලිත් වීරතුංග ජනාධිපති ලේකම්වරයා ඇතුළු රාජ්ය නිලධාරීන්ටත් අභූත චෝදනා නඟමින් ඔවුන්ට එරෙහිව අධිකරණ ක්රියාවලියක් ඔස්සේ දුර්මුඛ කිරීමට නිර්ලජ්ජිත උත්සාහයක යෙදීම යි.
තිස් අවුරුදු යුද්ධයක් පැවති මේ රටේ ජනතාවට බියෙන් සැකෙන් තොරව ජීවත් වන්නට සුදුසු පරිසරය නිර්මාණය කරන්නට දිවි හිමියෙන් ඇප කැප වූ ත්රිවිධ හමුදාවේ විවිධ අංශයන් හි නිලධාරීන් විශේෂයෙන් ම බුද්ධි නිලධාරීන්ට සහ ඔවුන්ගේ පවුල්වල උදවියට මොන තරම් කරදර හිංසා කළා ද කියන කාරණාව රට ම දන්නවා. ජනාධිපති ලේකම්වරයා සේ සේවය කළ ලලිත් වීරතුංග හා විදුලි සංදේශ නියාමන කොමිසමේ අධ්යක්ෂ ජනරාල් අනූෂ පැල්පිට යන මහත්වරුන්ට චෝදනා නඟා ඔවුන් වැරදිකරුවන් කළේ දහස් ගණනක් වූ උපාසක උපාසිකාවන්ට අටසිල් සමාදන් වෙන්නට සිල් රෙදි ලබා දෙන සේ ගරුතර මහා සංඝරත්නයෙන් ඉදිරිපත් කෙරුණු යෝජනාවක් මගේ නියමයට අනුව ක්රියාත්මක කිරීමේ හේතුවෙන්. ඒ චෝදනාවට ඔවුන් ලක් වුණේ යහපත් චේතනාවෙන් කළ දෙයකට දායාදයක් හැටියට. රටක ප්රධානතම රාජ්ය නිලධාරියාට එහෙම චෝදනා කර ඔවුන්ගේ මෙහෙය නිසා හිරගෙවල තපින්නට සිද්ධ වූ විට රජයේ සෙසු නිලධාරීන් ද තමන් වෙත පැවරෙන කාර්ය ඒ අයුරින් කරන්නට කැමැත්තක් දක්වන්නෙ නෑ ලිස්සා යෑමේ න්යාය පිළිපැදීම හැර. යහපාලන අණ්ඩුව එහෙම කළේ සමස්ත රාජ්ය තන්ත්රයම කඩා බිමදැමීමේ දුෂ්ට චේතනාවෙන්.
මීට පස්සෙ එවන් දුක් කරදරවලට ගැහැටට කිසිදු රාජ්ය සේවකයෙකු පත් නොවන තත්ත්වයක් අපි නිර්මාණය කරන බව බොහොම ගැඹුරින් අවධාරණය කරනවා. රාජ්ය නිලධාරීන් සිය රාජකාරිය ඉටු කරන විට මින් මතු එවන් දෙයක් නොවන්නට අවශ්ය අණපනත් සම්මත කරන්නට පසුබට වෙන්නෙ නෑ, එහෙම නොවුණොත් මේ රට කිසිදු අන්දමකින් සාර්ථක රටක් බවට පත් වෙන්නෙ නෑ.
අපට එරෙහිව මොන තරම් දූෂණ චෝදනා යහපාලකයන් යැයි කියා ගත් අණ්ඩුව කළා ද? ඒත් අපට එහෙම චෝදනා නැඟූ උදවිය බලයට පත් වෙලා මාසයක් යන කොට මහබැංකුව මහ දහවල් බිඳලා මොන තරම් ධනස්කන්ධයක් හොරකම් කළා ද? එයින් සිද්ධ වෙච්චි පාඩුව කවදා කොහොම ආවරණය කරගන්නවා ද යන්නත් ඉතා බරපතළ ගැටලුවක්. අදත් මහ බැංකු හොරකමේ ලොකුම හොරුන් බොහොම නිදැල්ලෙ හැසිරෙනවා. එක හොරෙක් රටෙත් නෑ. හැබැයි අපි ඒ හොරා උදර්පණ නීතිය ප්රකාරව මේ රටට ගෙන්වා ගත්තහම තව කී දෙනෙක් ඒකට හවුල්ද කියන කාරණාවත් අනාවරණය වේවි. ඒ හොර කල්ලිය විසින් කරන ලද රුපියල් බිලියන ගණනක සොරකම නිසා රටේ පොලී අනුපාතය 30% වැඩි ප්රමාණයකින් ඉහළ ගියා. කෝටි සියයක මුල්ය අවශ්යතාව වෙනුවෙන් රුපියල් කෝටි දහසක බැඳුම්කර ලංසු පිළිගැනීම ඔස්සේ මාමයි, බෑනයි සහ තවත් අයයි මොන තරම් වංචාවක්, දූෂණයක් රටට සිද්ධ කර ඇත්දැයි හිතන්න. මේ භාණ්ඩාගාර සුරැකුම් පත් වංචාවට සම්බන්ධ හැම දෙනාට ම නීතියෙන් දඬුවම් ලබාදීමත් එදා සිට අද දක්වා රටේ ආර්ථිකයට සිදු වී ඇති පාඩුවත් පියවාගන්නට අවශ්යයි.
හත් වැනි ජනාධිපතිවරයා සේ ඔබ සොයුරා ජනවරම ලබන්නේ මේ රටේ අති බහුතර සිංහල බෞද්ධ ජනතාව දුන් කතිරයේ බලයෙන්. ඒක ගෝඨාභය රාජපක්ෂ ජනාධිපතිවරයා ජාතිය අමතා කළ කතාවේ දී ද සඳහන් කළා. ඔබ හා මේ සම්මුඛ සාකච්ඡාවට පැමිණ සිටිය දී හමු වුණා මඩකලපුව බදුල්ල පාරේ පදිංචිව සිටින වයෝවෘද්ධ අඹු සැමි යුවළක්. ඔවුන්ගේ දුක්ගැනවිල්ල කියන්නට අගමැති මහජන අංශය වෙතයි ඒ යුවළ පැමිණ සිටියේ.
ඔවුන් පදිංචිව සිටි නිවස කොටි ත්රස්තවාදීන් විසින් විනාශ කර දමා මඩකලපුවෙන් පන්නා දැමූ පසු ගම්පහ ප්රදේශයට ඇවිත් ඥාති නිවසක පදිංචිව හුන් බවත් දැන් දරුවන් ගම්පහ පැත්තෙ කුලී නිවාස වල ජීවත් වන බවත් කී මේ වයෝවෘද්ධයන් කීවේ පහුගිය කාලයේ රජය ඒ ප්රදේශයේ පදිංචි දෙමළ උදවියට නිවෙස් ඉදි කර දුන්නත් තමන් වෙනුවෙන් ගේ කෑල්ලක් තනා දීමට හෝ තනා ගැනීමට කිසිදු අන්දමක උදව්වක් උපකාරයක් මේ දක්වා නොකළ වග යි. දෙමළ ඇත්තන් වෙනුවෙන් ඉදි කර ඔවුනට ලබාදුන් නිවෙස්වල ඒ දෙමළ උදවියගෙන් සෑහෙන පිරිසක් පදිංචි නැති බව කී ඔවුන් ඒ ප්රදේශයේ ජීවත් වන කිසිදු සිංහල පවුලකට කිසිදු ආකාරයක සහනයක් නැති වගක් ද සඳහන් කළා. ඔවුන්ගේ නිවෙස් තනා දීමට මැළිකමක් දක්වන්නේ වගකිවයුතු අංශවලින් ක්රියාත්මක නොවන්නේ ජාතිවාදය යළිත් හටගනීවිය යන හේතුව නිසා බවයි ඒ යුවළ කියන්නෙ. තත්ත්වය මේක නම් මොවුන් මව්බිමේ ම අනාථයන් වී සිටිනවා නොවේ ද? මෙවන් උදවිය වෙනුවෙන් ගන්නා ක්රියාමාර්ගය පැහැදිලි කළොත්?
★මේ බිමේ උපන් සිංහල වේවා, දෙමළ වේවා, මුස්ලිම් වේවා ඒ හැම කෙනකුට ම ඇත්තේ සමාන අයිතියක්. ඔය කියන කතාව හොයා බලන්නම්. එවන් හැම කෙනකුට ම යුක්තිය සාධාරණය ඉටු විය යුතුයි. දෙමළ ජනයා බහුලව වෙසෙන ගම්බිම්වල සිංහල හෝ මුස්ලිම් හෝ වේවා සිංහල ජනයා බහුලව වාසය කරන ගම් දනව්වල දෙමළ හෝ මුස්ලිම් හෝ වේවා මුස්ලිම් ප්රජාව බහුතරයක් ජීවත්වන පරිසරයක දෙමළ හෝ සිංහල හෝ වේවා ඒ හැම දෙනා ම මේ රටේ පුරවැසියන්. ඔවුන්ගේ භාෂාව හෝ ආගම හෝ ජන වර්ගය හෝ සලකා වෙන් වෙන් වශයෙන් සැලකීමට කිසිදු පාලන තන්ත්රයකට බැහැ. අපි ජන වර්ග අතර සාමය සහයෝගීතාව සහෝදරත්වය වැඩීම අරමුණු කරගෙන යි අපේ පාලනය සිද්ධ කරන්නෙ. අපි කිසිවකු අතර ජාතිභේදය වපුරන්නෙ නෑ. ජාතිභේදය තුරන් කර හැම දෙනාට එකට ජීවත් විය හැකි රටක් ඇති කිරීමේ පරමාර්ථය පෙරදැරිවයි ක්රියා කරන්නෙ.
මේ වගේ ගැටලු නිරාකරණය කිරීමේ අභිලාෂයෙන් තමා අගමැති මහජන සම්බන්ධතා අංශය ආරම්භ කළේ. මිනිසුන්ට මිනිසුන් සේ සාමයෙන් සමාදානයෙන් සහයෝගීතාවෙන් එකට ජීවත් වීමට හැකි පරිසරයක් නිර්මාණය කිරීමට අපි ඇප කැප වී හිඳින වග අවධාරණය කළ යුතු යි. ඔවුන් පෙළෙන්නා වූ දුක්ඛ දෝමනස්සයන්ගෙන් සමස්ත ජනතාවම මුදාගැනීමේ පරම චේතනාවෙන් ආණ්ඩුවක් හැටියට පියවර ගැනීමයි අපේ පරමාර්ථය. ඒ පරමාර්ථයෙන් අප කටයුතු කළත් අපට දෙස් විදෙස් ප්රතිගාමීත්වය නඟනා අභූත චෝදනා සියල්ල බැහැර කරන්නට නිසි සේ රිසි සේ පියවරගැනීම අපේ ප්රතිපත්තියයි. සෞභාග්යමත් රටක් බිහි කිරීමට නම් ජාතික සමඟිය අංක එක බව මා යළි යළිත් අවධාරණය කරන්න කැමතියි.