ජාතික ජන බලවේගයේ අපේක්ෂකයාට මෙවර ජනාධිපතිවරණයේදී ඇප මුදල පවා ආපසු ලබාගත නොහැකි විය. ඊට හේතුව කුමක්ද යන්න මෙන්ම ජනතා විමුක්ති පෙරමුණ හෝ ජාතිත ජන බලවේගයේ හෝ ඉදිරි ගමන්මඟ පිළිබඳ අද කතාබහට එක් වන්නේ එහි ප්‍රචාරක ලේකම්, පාර්ලිමේන්තු මන්ත්‍රී විජිත හේරත් මහතාය.
ජනාධිපතිවරණයේදී ජාතික ජන බලවේගයේ අපේක්ෂකයාට ඇපත් නැති වන තත්ත්වයකට ආවා නේද? මොකද වුණේ?
ප්‍රධාන අපේක්ෂකයන් දෙදෙනා අතර තරගය තීව්‍ර වුණා. දෙදෙනා එකිනෙකා පරයා තරග කිරීමත් නිසා 3 වැනිව ඡන්දය දෙන්න කිසිවෙක් පෙලඹෙන්නේ නැහැ.
ඒත් විශාල ලෙස පසුබැස්මක් ඔබේ අපේක්ෂකයාට ලැබුණේ. ඒ තත්ත්වය වෙනස් වෙයි කියා හිතනවාද?
ජනාධිපතිවරණයේදී සිදු වන දේ අනෙක් මැතිවරණවලදී වෙනස් වනවා. උදාහරණයක් ලෙස පෙන්වා දෙනවා නම්, 1999 ජනාධිපතිවරණයේදී අපට ඡන්ද 3,43,000ක් ලැබුණා. එහෙත් ඊට අවුරුද්දකට පස්සේ පැවති මහ මැතිවරණයෙන් අපට ඡන්ද 518000ක් ලැබුණා. මන්ත්‍රී ධුර 10ක් ලැබුණා. ඒ නිසා ජනාධිපතිවරණයේදී තිබුණු බල අරගලය හේතුවෙන් 3 වැනියාට එන්න තිබෙන ඉඩ-කඩ අඩුයි. ඒත් මේ තත්ත්වය හෙට දවසේ වෙනස් වනවා. ඒක ස්ථිරයි.
මිල වැඩි වීම් කොයි රජය යටතේත් සිදු වනවා. ඒත් බැනර්, කටවුට් නොගසන අලුත් සංස්කෘතියක් කරා ගෙනයන්න ජනාධිපතිවරයා කටයුතු යොදන බවක් පේන්නේ නැතිද?
බැනර්, කටවුට් නොගසන සංස්කෘතියක් තිබීම වැදගත්. ඒත් කල්පනා කළ යුත්තේ කවුද ඒ සංස්කෘතිය පටන් ගත්තේ කියන එකයි.
ඒ කොහොම වුණත් ඔබ පක්ෂයට ජනතාවගේ විශාල සහායක් නැහැ නේද? පුළුවන් වෙයි කියල හිතනවාද මේ ප්‍රධාන පක්ෂ බල කණු දෙක හොල්ලන්න?
අනිවාර්යයෙන්ම ජනතාව ඉතා කෙටි කාලයකින් මේ සියල්ල තේරුම් ගනියි. අලුතින් පත් වුණහම කොයි කවුරුත් පොඩි පොඩි වැඩ කරනවා. ජනතා සේවය කරන බව පෙන්වනවා. මෛත්‍රීපාල සිරිසේන මහතාත් බලයට ඇවිත් කිවුවෙ මොනවාද? මම හරිම සරලයි, කෙහෙල් කොළේ බත් කන කෙනෙක් කිවුවා. මෙවර ජනාධිපතිවරණය අවසන් වුණාම ගෙදර ගිහින් කුඹුරු කොටනවා කිවුවා. අන්තිමට යන යකා කොරහත් බිඳගෙන ගියා.
ජාතික ජන බලවේගයේ සංවිධාන 32ක් තිබිලත් ඉස්සරහට එන්න බැරි වුණා නෙ. ඊළඟ පියවර කුමක්ද?
ජාතික ජන බලවේගය කියන්නේ ජනාධිපතිවරණය, එහෙමත් නැත් නම් මැතිවරණයක් ඉලක්ක කරගත් ජනතා ව්‍යාපාරයක් නොවෙයි. අප උපරිම මට්ටමින් පිරිස් ඒ සඳහා එකතු කරගන්නවා. විවිධ සංවිධාන වගේම වෘත්තීය මට්ටමේ අය ප්‍රගතිශීලි ජනතා ව්‍යාපාර එක්ක අප යන මේ ගමනට තවත් පිරිස් එකතු කරගෙනයි අපි ඊළඟ පියවර තබන්නේ. අපි මේ ජනතා බලවේගය උපරිම ශක්තිමත් කරනවා.
ගම් මට්ටමින් ජනතා සහයෝගය ලැබීමේ අඩුවක් පෙනෙන්න තිබෙනවා නේද?
නැහැ අපට නගරයේ වගේම ගම් මට්ටමේත් හොඳ ජනතා සහයෝගයක් තිබෙනවා. ජනාධිපතිවරණයේ ප්‍රතිඵල අනුව එය මනින්න එපා.
ඔබ එසේ කිවුවත් රාජ්‍ය අංශයේ දැවැන්තම වෘත්තීය සමිති ජාලය තිබෙන්නේ ජනතා විමුක්ති පෙරමුණ සතුවයි. එවන් තත්ත්වයකදී ඔවුන් පවා තම අපේක්ෂකයා නොලසකා හැර ඇති බවක් නේද පෙනෙන්නේ?
ඔවුනුත් මේ රටේ පුරවැසියො නෙ. රටේ ගමන් මාර්ගය අනුව එක් අපේක්ෂකයෙක් ප්‍රවර්ධනය කරන්න නැත් නම් අනෙක් අපේක්ෂකයාට එරෙහිව ඡන්දය භාවිත කරන්න ඔවුනුත් කටයුතු කළා. එහිදී වෘත්තීය සමිති, ගොවි, කම්කරු හෝ වෙනත් වෘත්තිකයන් කියා වෙනසක් නැහැ. එහෙත් මේ තත්ත්වය මහ මැතිවරණයේදී වෙනස් වෙනවා.
තමන්ගේ අපේක්ෂකයාට මනාපය නොදී මොකක්ද ඔවුන් බලාපොරොත්තු වන දේශපාලන දර්ශනය?
මා කලින් කිවුවා වගේ මේ අවස්ථාවේ ප්‍රධාන අපේක්ෂකයන් දෙදෙනා අතර තිබූ තරගය නිසායි ඒ සියල්ල සිදු වුණේ. එසේ අනෙක් අයට ඡන්දය දුන් අය පවා අපටත් මනාප ලකුණු කර තිබුණා. ඒ වගේම ඒ අයුරින් ප්‍රධාන අපේක්ෂකයා බලයට ගේන්න කටයුතු කළ අය අපට පවසා තිබෙනවා මහ මැතිවරණයේදී අපට ශක්තියක් වන බව.
ඔබ පවසන්නේ එක්සත් ජාතික පක්ෂ අපේක්ෂකයා බලයට ඒම වළක්වන්න ජනතාව කටයුතු කළා කියන එකද?
ඒක එක් පැත්තකින් පමණක් නොවෙයි; දෙපැත්තෙන්ම වුණා. ඒත් එය ජනාධිපතිවරණයට පමණක් සීමා වෙයි. ඉදිරියේදී මේ සියලු ජනතා අදහස් වෙනස් වනවා. ඒ හරහා අපට විශාල ජන බලයක් උරුම වනවා.
ඔබ එසේ පවසන්නේ කෙසේද? ජනතාවගේ ආකල්ප වෙනස් වෙයිද මාස කිහිපයකදී?
ජනතාව ඇත්තතෙන්ම අපට ආදරෙයි. අපේ ප්‍රතිපත්තිවලට ඔවුන් ගරු කරනවා. ඒ විශ්වාසය, හදගැස්ම අපට තේරෙනවා. ඔවුන් ආදරය කරන්නේ ජනතා විමුක්ති පෙරමුණේ, එහෙමත් නැත් නම් ජාතික ජන බලවේගයේ ප්‍රතිපත්තිවලට, ආදරය කරන නායකයා වන්නේ අනුර කුමාර දිසානායක මහතායි. ඒ බව මහ මැතිවරණයේදී ඔවුන් තහවුරු කරාවි.
ඒත් දැන් පත්ව ඉන්නා ජනාධිපතිවරයා ජනතාව වෙනුවෙන් කටයුතු කිරීම අරඹා තිබෙනවා. ඔහුටත් යම් සාධාරණ කාලයක් දිය යුතුයි නේද තමාගේ කටයුතු සිදු කරන්න, විවේචනය කරන්න කලින්...
රටක් වෙනස් වෙන්න ප්‍රතිපත්තිමය වෙනසක් අවශ්‍යයි. මේ ඉන්න පිරිසත් එක්ක අප හිතන්නේ නැහැ .
මහ මැතිවරණයට සූදානමින් ඉන්නවද?
මා කලින් පැවසුවා වගේ අප මැතිවරණ ඉලක්ක කරගෙන වැඩ කරන පක්ෂයක් නොවෙයි. ඒත් ඕනෑම වෙලාවක අප මැතිවරණයකට සූදානම්. කොහොමත් 2020 මාර්තු 1න් පසු මහ මැතිවරණයක් පවත්වන්න පුළුවන්. එහිදී අප ප්‍රතිපත්තිමය වශයෙන්ම පාර්ලිමේන්තුව තුළ බලයක් ගොඩනඟනවා.
ඔබට හිතෙන්නේ නැද්ද මේ අඩාළ වීම්, එහෙමත් නැත් නම් පරාජයන් හමුවේ පක්ෂයේ ප්‍රතිපත්ති හෝ ක්‍රියා මාර්ගවල යම් වෙනසක් කළ යුතු බවක් තිබෙනවා කියා?
නැහැ, කිසිසේත්ම නැහැ. අප පමණයි ප්‍රතිපත්ති දේශපාලනයේ නිරත වන්නේ. අපේ පොරොන්දු දේශපාලනයක් නැහැ. ඇයි අප ප්‍රතිපත්ති වෙනස් කර, හොරකම කොල්ලකෑම ඉස්සරහට ගන්නද? සුපිළිපන් දේශපාලනයක් කරා යන ප්‍රතිපත්ති මාලාවක් පමණයි අපට ඇත්තේ.
