ඉකුත් 16 වන දිනය මුළු රටේම ජනතාවගේ විශේෂ අවධානයට යොමුව තිබු දිනයකි. ඒ ජනාධිපති මැතිවරණයක් පැවැත්වීම හා එහි ප්‍රථිඵල භුක්ති විඳීමට රට වැසියා සුදානමින් සිටිම හේතුවෙනි. මේ හේතුව නිසාම රටේ වෙනත් කිසිදු සිදුවීමක් කෙරෙහි ජනතා අවධානයක් නොතිබුණි. 16 වෙනි දින දවස පුරා ම මුළු රට ම මැතිවරණ උණුසුමින් වෙළා ගෙන තිබුණි. වෙනදා වැඩකට පලකට ගොස් නිවසට එන්න පරක්කු වෙන පිරිස ද 16 වෙනි දින කලින් ම ගෙදර ආවේ වේලාසනින් මොනවා හෝ කා බී ඡන්ද ප්‍රථිඵල බලන්නට ඕනෑ නිසා ය.
හම්බන්තොට බඳගිරිය ප්‍රදේශයේ ජනතාව ද මැතිවරණ ප්‍රථිඵල දැනගන්නට තැන තැන එකතු වී සිටියේ සිය අපේක්ෂකයාගේ ජයග්‍රහණය බලාපොරොත්තුවෙනි. එහෙත් පළමු ප්‍රථිඵලය අසන්නටත් කලින් ම බඳගිරියේ ජනතාවට අහන්න ලැබුණේ අහස පොළොව නුහුලන අපාරධයක් පිළිබඳ කතාවකි. ඉන් කියැවුණේ බඳගිරිය මැලේ කොලණිය ප්‍රදේශයේ දී පිරිසක් විසින් තරුණයකු කපා කොටා ඝාතනය කර ඇති බව ය. ඡන්ද ප්‍රථිඵල බලන්න රූපවාහිනිය අබියස සිටි බඳගිරියේ ජනතාව ඡන්ද ප්‍රථිඵල ඇසීම පසෙක ලා ඇඳිවත පිටින්ම අපරාධය වු ස්ථානයට ගියේය. ගම්වැසියන් එහි යන විටත් තරුණයා තුවාල සහිතව බිම වැටී සිටියේය. පිරිසක් ඒ මේ අත යමින් වියරුවෙන් මෙන් යමක් කියවමින් සිටියහ. කිසිවකුටත් තුවාලකරු රෝහලට රැගෙන යාමට ද අවස්ථාවක් නොවුයේ ඒ වන විට එහි සිටි ඇතැමුන්ගේ ආවේගකාරී හැසිරීම් හේතුවෙනි. අවසානයේ දී තරුණයා මිය ගියේය.
 |
| හම්බන්තොට පොලීසියේ අපරාධ අංශයේ ස්ථානාධිපති උප පොලිස් පරීක්ෂක තිළිණ ද සිල්වා |
මෙලෙස පහරකෑමට ලක්ව මියගොස් තිබුණේ බඳගිරියේ පදිංචි 26 හැවිරිදි කේ.එම්.හෂාන් තිවංක නැමති අවිවාහක තරුණයෙකි. මියගිය තරුණයා පිරිසක් අතර ඉතා ජනප්‍රිය චරිතයක් ලෙසත් තවත් පිරිසක් අතර ගමේ චණ්ඩියෙක් ලෙසත් ප්‍රසිද්ධ ව සිටියේ ය.
මියගිය හෂාන් තිවංක බඳගිරියේ පදිංචිකරුවෙකි. 26 හැවිරිදි වියේ පසු වු ඔහු ගමේ බොහෝ දෙනෙකු අතර ඔහු ප්‍රසිද්ධ චරිතයකි. ගමේ සිදුවෙන සැම කටයුත්තක දී ම ඔහු ද පෙරමුණ ගත්තේය. බඳගිරිය යනු සිංහල හා මුස්ලිම් වැසියන්ගෙන් සමන්විත ප්‍රදේශයකි. බඳගිරිය මැලේකොලණියේ පදිංචි 25 හැවිරිදි විවාහකයකු වු මොහොමඩ් ෂිවාස් ද තිවංකගේ ළඟ ම යහළුවකු විය. දෙදෙනා අතර පැවති යහළුකම නිසා තිවංක ද සිය මුස්ලිම් යාළුවාගේ නිවසට නිතර නිතර ආවේය. තිවංකගේ මේ යාළුකමට මොහොමඩ් ෂිවාස්ගේ ඥාතීහු එතරම් කැමැත්තක් නොදැක්වූහ.
කෙසේ හෝ දිනක් මොහොමඩ් ෂිවාස්ට සිය බිරියගේ පාර්ශ්වයේ කිහිප දෙනෙකු තිවංක පිළිබඳව යමක් පවසා තිබිණි. ඉන් කියැවුණේ තිවංක හා ෂිවාස් ගේ බිරිය අතර අනියම් සම්බන්ධකමක් ඇති බව ය. එය එක හෙළාම පිළිනොගත් ෂිවාස් ඒ පිළිබඳ ව සිය යහළුවා වු තිවංකට ද පැවසුවේය. මින් කෝපයට පත් තිවංක ෂිවාස්ගේ බිරියගේ ඥාතීන්ට දොස් පැවරුවේය. සිද්ධියේ ආරම්භය එසේ විය.
මැතිවරණය වු 16 දිනය උදා විය. වෙලාව සවස 5ට පමණ ඇත. තිංවක සිය වෙනත් යහළුවකු සමඟ මදුවිත තොලගාමින් සිටියේය.
මේ අතර මොහොමඩ් ෂිවාස්ගෙන් තිවංකට දුරකතන ඇමතුමක් ලැබිණි.
“තිවංක කොහෙද ඉන්නේ” ෂිවාස් විමසුවේය.
“ මම යාළුවෙකුගේ ගෙදර... එතනට වරෙන්” තිවංක පැවසුවේය.
 |
| දේහය අවසන් කටයුතු සඳහා |
ෂිවාස් ද තිවංක හා යාළුවන් පිරිස සිටි තැනට ආවේය. ෂිවාස්ට ද මධුවිතට එක්වන්නට ආරාධනා ලැබිණි. නමුත් ඔහු එය ප්‍රතික්ෂේප කළේය. ෂිවාස් සිටියේ තරමක නොසන්සුන් සිතිනි. ෂිවාස්ගේ බිරිය හා තිවංක අතර අනියම් සබඳතාවක් ඇති බව ෂිවාස්ගේ ඥාතීහු යළිත් ඔහුට දන්වා තිබිණි. ෂිවාස් පැමිණ සිටියේ තිවංකට පැමිණ මෙම ගැටලුව නිරාකරණය කර දෙන ලෙස ඉල්ලා සිටින්නට ය.
ඒ අනුව තිවංක හා ෂිවාස් දෙදෙනා එක්ව ෂිවාස්ගේ බිරියගේ ගෙදරය ගියේය. ඒ වන විට වේලාව රාත්‍රි 09 පසු වී තිබුණි. නිවසට ඇතුළු වූ තිවංක හා ෂිවාගේ බිරියගේ ඥාතින් අතර ගැටුමක් ඇතිවිය. ගැටුම උත්සන්න වන විට අවට සිටි මුස්ලිම් පිරිස් ද ඊට එකතු වී තිබිණි. අනතුරුව එතැනට එක් වු පිරිස එක්ව ෂිවාස්ට හා තිවංකට පහර දෙන්නට සුදානම් වූහ. එහිදී ෂිවාස් කෙසේ හෝ එතැනින් පැන ගන්නේය; ඒ තිවංකට ද හොරෙනි. තිවංක ෂිවාස්ගේ බිරියගේ ඥාතින්ගේ ග්‍රහණයට හසුවිය. එකට එකතු වු පිරිස එක්ව තිවංකට දිගට හරහට පහර දි තිබුණි. පහර කෑමෙන් බිම වැටුණු තිවංකට තියුණු ආයුදයකින් ප්‍රහාරයක් එල්ල විය. ඒ මුහුණ හා දෙපා කැපෙන පරිදිය.
මේ සිදුවීම මුළු බඳගිරිය පුරාම පැතිරී ගොස් තිබුණි. ගම්මුන් එහි ගියත් කිසිවකුටත් තිවංකගේ සිරුර රෝහලට රැගෙන යෑමට අවස්ථාවක් හිමිවී නොතිබුණි. ඒ අවට සිටි ඇතැම් පිරිස් ආවේගකාරී අයුරින් හැසිරීම නිසා ය.
රාත්‍රි 10ට ආසන්න වෙමින් තිබියදී පොලිස් හදිසි දුරකතන අංකයට ලද පණිවිඩයකට අනුව එම අංශයේ නිලධාරීහු වහාම මේ අපරාධ පිළිබඳව හම්බන්තොට පොලිස් ස්ථානය දැනුවත් කළහ. ඒ අනුව පොලිස් නිළධාරීන් කණ්ඩායමක් වහාම බඳගිරිය වෙත පිටත් කර යැවිමට කටයුතු කෙරුණි. පොලිස් නිලධාරීන් එහි යනවිටත් දරුණු කැපුම් තුවාල සහිතව තරුණයකු බිම ඇද වැටී සිටියේය. පොලිසියේ මැදිහත්වීමෙන් තුවාලකරු හම්බන්තොට මහ රෝහලට ඇතුළත් කෙරිණි. නමුත් ඒ වන විටත් ඔහු මියගොස් සිටියේ ය. හම්බන්තොට මුලස්ථාන පොලිස් පරීක්ෂක ප්‍රියන්ත මහතාගේ උපදෙස් පරිදි අපරාධ ප්‍රදේශය අවට විශේෂ පොලිස් ආරක්ෂාවක් යෙදවිණි.
සිද්ධිය වු 16 වෙනි දින මධ්‍ය රාත්‍රියට ඔන්න මෙන්න තිබියදී මොහොමඩ් ෂිවාස් ද හම්බන්තොට පොලීසියට ආවේය.
“ සර් මට පැමිණිල්ලක් කරන්න ඕනෑ...” ඔහු කීවේය.
ඒ අනුව පොලිස් නිළධාරියකු විසින් ෂිවාස්ගේ පැමිණිල්ල සටහන් කරගැනීමට කටයුතු කෙරුණි. පැමිණිල්ල සිදුකළ මොහොමඩ් ෂිවාස් පොලිසියට පවසා තිබුනේ තමන්ගේ බිරියගේ ඥාතීන් විසින් තිවංකට පහර දී මරා දැමූ බව ය.
මේ අපරාධය පිළිබඳව පරීක්ෂණ කටයුතු පැවරුණේ හම්බන්තොට පොලීසියේ අපරාධ අංශයේ ස්ථානාධිපති උප පොලිස් පරීක්ෂක තිළිණ ද සිල්වා මහතා ඇතුළු නිළධාරීන් කණ්ඩායමකට ය. පරීක්ෂණ ආරම්භ කළ නිලධාරී කණ්ඩායමට තිබු පළමු අභියෝගය වුයේ මේ ඝාතනයේ සැකකරුවන් නිවැරදිව හඳුනා ගැනීම හා අත්අඩංගුවට ගැනීමය. පරීක්ෂණ පවත්වන නිලධාරීන්ට ද මේ ඝාතනය හා එහි සිදුවීම් ජාලය පිළිබඳව තිබුණේ මහා පැටළිලි සහිත භාවයකි.
සැකකරුවන් සොයා පරීක්ෂණ ආරම්භ කළ පොලිස් නිළධාරීන් කණ්ඩායමට මෙහි එකින් එක ලිහාගත යුතුව තිබු කරුණු ගණනාවක් විය. පැටළිලි සහගත තත්ත්වයකින් පරීක්ෂණ ආරම්භ කළ පොලිස් නිලධාරින් ගැටලු එකින් එක ලිහා ගනිමින් පරීක්ෂණ මෙහෙය වූයේය. පොලිස් නිළධාරීහු ඝාතකයන් සොයා බඳගිරිය, මැලේ කොළණිය, හම්බන්තොට, පල්ලෙමලල ඇතුළු ප්‍රදේශ රැසක් පීරා සිදධියට ඍජු ලෙස සම්බන්ධ බවට සැක කළ සැක කරුවන් 05 දෙනෙකුගෙන් සිව් දෙනෙකු පසුදිනම (17) අත් අඩංගුවට ගත්තේය. එක් සැකකරුවකු ඒ වන විටත් ප්‍රදේශයෙන් පලාගොස් තිබුණි.
අත්අඩංගුවට පත් වු සැකකරුවන් සිව් දෙනා 18 වන දින හම්බන්තොට මහේස්ත්‍රාත් අධිකරණයට ඉදිරිපත් කළහ. එහිදී සිව් දෙනා මේ මස 27 වන දින දක්වා රක්ෂිත බන්ධනාගාර ගත කරන ලෙස හම්බන්තොට මහේස්ත්‍රාත් හා අතිරේක දිසා විනිසුරු ජේ.ඒ.නාලක සංජිව ජයසුරිය මහතා නියෝග කළේය.
මෙලෙස රක්ෂිත බන්ධනාගාර ගත කෙරුණේ අංක 19, සදළුගම, මැලේකොලණිය, බදගිරිය පදිංචි 29 හැවිරිදි හකීම් මොහොමඩ් ඉම්ෂාඩ්, අංක 67/1, බඳගිරිය පදිංචි 21 හැවිරිදි බබාරිල්වාන් දූල්, අංක 663, කුඩාගම්මාන 08, වැලිගත්ත පදිංචි 27 හැවිරිදි මුසල්හිම් අහමඩ් උසව්වීර් හා මැලේ කොලණිය බදගිරිය පදිංචි 40 හැවිරිදි ස්ලේදීන් මොහොමඩ් රාත්දීන් නැමති සැකකරුවන් සිව් දෙනෙකි.
පරීක්ෂණ පවත්වන පොලිස් නිලධාරීන් විසින් මේ ගැටුමට මුල් වු බව කියන ෂිවාස්ගේ බිරියගෙන් කට උත්තරයක් ගැනීමට පොලිසියට කැඳවන්නට සොයන විට දැනගන්නට ලැබුණේ ඇය සිය සැමියා සමඟ ගමෙන් පිටවී ගොස් ඇති බව ය.
මියගිය තරුණයාගේ සිරුර බඳගිරියේ පිහිටි නිවසේ තැන්පත් විය. දැන් ප්‍රදේශය රත් වෙමිනි. මුස්ලිම් පිරිසකගෙන් පහර කා සිංහල තරුණයෙක් මිය ගොස් ඇත. ගැටුම ජාතිවාදී ගැටුමක් දක්වා දික්ගැස්සෙමින් තිබුණි. මැලේ කොලණියට ප්‍රහාරයක් එල්ල වන බවට කටකතා පැතිරිණි. සමහර මුස්ලිම් ජාතිකයෝ සිය නිවෙස් හැරපියා ආරක්ෂිත යැයි සිතෙන තැන් සොයා යන්නට වූහ. ප්‍රදේශය පමණක් නොව රටම දැන් අනතුරකය.
වහා ක්‍රියාත්මක වු හම්බන්තොට මුලස්ථාන පොලිස් පරික්ෂකවරයා හා අපරාධ අංශයේ ස්ථානාධිපතිවරයා හම්බන්තොට මහේස්ත්‍රාත් අධිකරණයට කරුණු වාර්තා කරමින් 18 දින වාරණ නියෝගයක් ලබා ගත්තේය. එහිදී මහේස්ත්‍රාත්වරයා නියෝග කළේ මියගිය තරුණයාගේ අවසන් කටයුතු සිදු කෙරෙන 19 දින ඒ අවට කිසිදු අයුතු ජන රාශියක් සිදු නොකරන ලෙසත්, ප්‍රදේශයේ සාමය කඩවන පරිදි කටයුතු නොකරන ලෙසත් හා උද්ඝෝෂණ හෝ වෙනත් කල කෝලාහල නොපවත්වන ලෙසත් ය. මිට අමතරව ප්‍රදේශයේ කුමන හෝ කෝලාහල තත්වයක් සංවිධානය කරනු ඇතැයි සැක සිතිය හැකි පුද්ගලයන් 05 දෙනෙකුට ද 19 දින පෙරවරු 9.00ට හම්බන්තොට මහේස්ත්‍රාත් අධිකරණයේ පෙනී සිටින ලෙසට මහේස්ත්‍රාත් වරයා නොතීසි නිකුත් කළේය.
මියගිය තිවංකගේ පවුලේ උදවියට ද අධිකරණය නියෝග කර තිබුනේ දේහය රැගෙන වෙනත් කිසිදු ස්ථානයකට නොයන ලෙසය. නිවසේ සිට ඇති ළඟම පාරෙන් දේහය රැගෙන ගොස් නිවස ආසන්නයේම ඇති ස්ථානයක සිරුර මිහිදන් කරන ලෙස ය.
18 වන දින හා 19 දෙදින බදගිරිය, මැලේකොළණිය හා ඒ අවට යුධ හමුදාව, පොලිස් විශේෂ කාර්ය බළකාය හා පොලිස් නිලධාරීන් යොදා ආරක්ෂාව තර කළේය. ලිපිය ලියන 21 වන දිනය වන විටත් බදගිරිය ඇත්තේ විශේෂ පොලිස් ආරක්ෂාව යටතේය.
මේ වන විට සිද්ධියට අදාලව සැකකරුවන් සිව් දෙනෙකු අත්අඩගුවට ගෙන රක්ෂිත බන්ධනාගාර ගත කර ඇත. පලා ගිය අනෙක් සැකකරු සෙවීමට පොලීසිය පුළුල් මෙහෙයුමක් අරඹා ඇත. ජාතීන් දෙකක් අතර සිදුවන්නට ගිය මහා ගැටුමක් ආරක්ෂක අංශ නිළධාරින්ගේ දැඩි විමසිල්ල හේතුවෙන් වළක්වා ගැනිමට සමත් වු බව කිවයුතුය. එමෙන්ම මෙම සිදුවීමේදී අදාළ පාර්ශ්වයට සම්බන්ධ ඥාතීන්ද වගකීමෙන් ක්‍රියා කර ඇත.
මාතර හම්බන්තොට බාර නියෝජ්‍ය පොලිස් පති විජිත ගුණරත්න, තංගල්ල කොට්ඨාස බාර පොලිස් අධිකාරී ලක්සිරි ගීතාල් යන මහත්වරුන්ගේ උපදෙස් පරිදි හම්බන්තොට සහකාර පොලිස් අධිකාරී ජයශාන්ත ද සිල්වා, හම්බන්තොට මුලස්ථාන පොලිස් පරික්ෂක කේ.එම්.ජී.එස්.ප්‍රියන්ත යන මහත්වරුන්ගේ මෙහෙයවීමෙන් හම්බන්තොට පොලීසියේ අපරාධ අංශයේ ස්ථානාධිපති උප පොලිස් පරීක්ෂක තිළින ද සිල්වා, පොලිස් සැරයන් (56701)ප්‍රේමදාස, පොලිස් කොස්තාපල් වරුන් වන (45002)අජන්ත, (50598)මහින්ද, (68663) මධුෂාන්, (19134) රාජපක්ෂ හා කාන්තා පොලිස් කොස්තාපල් (6598) දිලානි යන නිලධාරින් එක්ව සිද්ධිය සම්බන්ධයෙන් පරීක්ෂණ පවත්වයි.
