ඒ 2005 වසරේ ජූනි 30 වැනි දිනය. පසුදින එළි වන යාමයේ දිනපතා පුවත්පත්වල පිටු ගණන් පිරවුණේ රාජගිරිය රෝයල් පාක් නම් සුපිරි නිවාස සංකීර්ණයේ සිදු වූ විදේශිය තරුණියකගේ මහ පොළොව නූහුලන අමානුෂික ඝාතනයෙනි. ස්වීඩන් ජාතික පියකුගේ හා ශ්රී ලාංකික මවකගේ දියණියක වූ ඇය ඉවොන් ජොන්සන් නම් 19 හැවිරිදි රූමත් තරුණියකි. ඉවොන් ජොන්සන්ගේ මරණය ඉතා සැහැසි ආකාරයෙන් සිදු කර තිබුණේ ඇඟලා සිටි ඇඳුමකින් ගෙල සිර කිරීමෙන් හා හිස සිමෙන්ති පොළොවේ ගැසීමෙනි. ඇයගේ හිස් කබලේ බිඳීම් 64ක් තිබූ බව මරණ පරීක්ෂණ වාර්තාවෙන් පසු අනාවරණය විය. ඇයගේ ඝාතනයට ඍජුවම සම්බන්ධ වූයේ ඇයගේ පෙම්වතා වශයෙන් පෙනී සිටි ශ්රී ලාංකික තරුණයකු වූ අවුරුදු 19ක් වයසැති ජූඩ් ශ්රමන්ත ඇන්තනි ජයමහ නම් තරුණයෙකි. ඔහු ඒ වසරේදීම අත්අඩංගුවට ගැනුණු අතර, ඉන් පසු කොළඹ මහාධිකරණයේ පැවති දීර්ඝ නඩු විභාගයකින් පසු 2012 වර්ෂයේදී ඔහුට 12 වසරක සිර දඬුවමක් නියම කෙරිණි.
සිර දඬුවම ඇපෑලෙන් මරණීය දඬුවමකට
ධනවත් පවුලක දරුවකු වූ මේ සැකකරුගේ හැසිරීම් රටාව පිළිබඳ එකල විවිධ අදහස් මතු විය. ඒ ඔහුගේ සෙල්ලක්කාර චරිතය සම්බන්ධයෙනි. කෙසේ වෙතත් ඒ් වර්ෂයේදීම මහාධිකරණය දුන් තීන්දුව අභියෝගයට ලක් කරමින් අභියාචනාධිකරණයට ඇපෑලක් යොමු විය. මේ අභියාචනය විනිශ්චය කළ විනිසුරු මඬුල්ල සිය අවසන් තීන්දුව ප්රකාශයට පත් කරමින් අභියාචනාධිකරණයෙන් දුන් තීන්දුව යළිත් සහතික කරමින් නැවතත් මරණීය දඬුවම දීම ස්ථිර කරමින් නියෝගයක් දුන්නේය. ඉන් අනතුරුව විත්තිකාර පාර්ශ්වය ඒ අභියාචනාධිකරණ තීන්දුවද අභියෝගයට ලක්කරමින් ශ්රේෂ්ඨාධිකරණයට යොමු වූ අතර, අවසානයේ මේ මරණයේ සියලු චෝදනා ජූඩ් ශ්රමන්ත නම් විත්තිකරු වෙත පවරමින් මහාධිකරණයට පමණක් නොව අභියාචනාධිකරණයටද මරණ දඬුවම පැනවිය හැකි බවට 2014 වර්ෂයේදී ශ්රේෂ්ඨාධිකරණය ඓතිහාසික තීන්දුවක් දුන්නේය.
විශේෂ ජනාධිපති සමාවක්
කෙසේ වෙතත්, ජූඩ් ශ්රමන්ත ඇන්තනිට 2016 වර්ෂයේදී විශේෂ ජනාධිපති සමාවක් යටතේ ජීවිත සමාව හිමි වෙමින් ඔහුගේ දඬුවම ජීවිතාන්තය දක්වා සිර දඬුවමක් ලෙස ලිහිල් කර තිබේ. මෙය බොහෝ දෙනකු නොදන්නා කතාවකි. වින්දිතයන් හා සාක්ෂිකරුවන් ආරක්ෂා කිරීම සඳහා වූ ජාතික අධිකාරිය ආරම්භ කරන්නේද ඒ වසරේමය.
ජනාධිපතිවරණයක ආරම්භයත් සමඟ යළිත් රෝයල් පාක් මිනීමැරුම පිළිබඳ කතිකාව අලුත් වී ඇත්තේ මෙවර ඔහුට පූර්ණ ජනාධිපති සමාව හිමි වීමත් සමඟය. ජනාධිපති මෛත්රීපාල සිරිසේන මහතා සිය ධුර කාලය අවසන් කරන්නට ඔන්න-මෙන්න තිබියදී මෙසේ ජනාධිපති සමාව දීම පිළිබඳ මේ වන විට විවිධ විවේචන මතු වන්නට පටන් ගෙන ඇත.
ජනාධිපති සමාවේ නෛතික වගන්ති
ආණ්ඩුක්රම ව්යවස්ථානුකුලව ජනාධිපතිවරයකුට ජනාධිපති සමාව ප්රදානය කිරීම පිළිබඳ නෛතික වගන්ති අර්ථ නිරූපණය කර ඇත්තේ ආණ්ඩුක්රම ව්යවස්ථාවේ 34 වැනි වගන්තිය අනුවය. ඒ අනුව 34 වගන්තියේ (1) අනුවගන්තිය යටතේ ශ්රී ලංකාවේ කවර හෝ අධිකරණයක තීන්දුවක් යටතේ වරදකරු කරන ලද පුද්ගලයකුට සමාවක් ලබා දීමට ජනාධිපතිවරයාට බලය පැවරෙන අතර, ලබා දෙන්නේ සම්පූර්ණ සමාවක්ද නැති නම් කොන්දේසි සහිත සමාවක්ද යන්න තීරණය කිරීමේ අයිතිය ජනාධිපතිවරයා සතුවෙයි. ඒ ව්යවස්ථාපිත බලය අනුව වරදකරුට නියම කර ඇති දඬුවම වෙනුවට ලිහිල් දඬුවමක් නියම කිරීමට හෝ නියම කරන ලද දඬුවම මුළුමනින්ම නිෂ්ප්රභ කිරීමටද ජනාධිපතිවරයාට බලය හිමි වෙයි. ඒ අනුව ජනධිපතිවරයා විසින් මේ රෝයල් පාක් ඝාතන නඩුවේ වරදකරු සම්පූර්ණයෙන්ම නිදොස් කොට නිදහස ලබා දී ඇති අතර, ජනාධිපති මාධ්ය ඒකකය විසින්ද ඒ පිළිබඳ තහවුරු කිරීම් කර ඇත්තේ ජනධිපතිවරයා ගත් ඒ ක්රියාමාර්ග හේතු සාධක ඇතිව සනාථ කරමිනි.
ඉවෝන්ගේ පාර්ශ්වයෙන් දැඩි විරෝධතා
ජනධිපතිවරයාගේ මේ ක්රියාකලාපය මුලින්ම දැඩිව විවේචනයට ලක් කරන්නට වූයේ ඝාතනයට ලක් වූ ඉවොන් ජොන්සන්ගේ නැඟණියයි. ජනාධිපති සමාව දීමට පෙර හා දීමෙන් පසුවත් ඇය මේ ක්රියා කලාපයට දැඩිව විවේචන ඉදිරිපත් කළේ සිය ෆේස් බුක් පිටුවෙනි. මියගිය ඉවෝන්ගේ නැගණිය වන කැරොලයින් ජොන්සන් නොවැම්බර් 10 වැනිදා සිය ෆේස් බුක් පිටුවෙන් ජනාධිපතිවරයාට දිගු ලිපියක් ලියා ඇත්තේ මේ අයුරිනි:
“මම දන්නවා ඔබ කෙදිනකවත් මෙය කියවා නොබලන බව. දියණියන් දෙදෙනකුගේ පියකු වශයෙන් මේ වරදකරු නිදහස් කිරීමට ඔබ ගත් තීරණය මට තේරුම් ගැනීමට අපහසුයි. ඝාතනයක් වූ විට පවුලකට එමඟින් ඇති වන බලපෑම කිසිවකු කිසි දිනෙක සත්ය වශයෙන්ම තේරුම් නොගනු ඇති. අවසානයේ ජනාධිපතිතුමනි! ඔබ නැවතත් මේ දරාගත නොහැකි වේදනාව මගේ පවුලේ සාමාජිකයන්ට හිමි කර දී තිබේ,” යනුවෙන් දීර්ඝ සටහනක් තබා ඇති අතර, ඇය අවසානයේ සඳහන් කර ඇත්තේ තමා ඇතුළු තම පවුලේ උදවිය සිය සොහොයුරියගේ ඝාතනය වෙනුවෙන් වසර 15ක් පුරා සටන් කරද්දී ලේ තැවරුණු මුදල් වෙනුවෙන් සියල්ල යටපත් කරන්නට කළ වෑයම ගැන තමන් ඇතුළු පවුලේ උදවිය අතිශයින් කණගාටුවට පත් වන බවයි.
අපටත් නිදහස ඕනෑ ඇය ඇතුළු පවුලේ අයගේ මේ විරෝධතා හේතුවෙන් මේ සමාව දීම බොහෝ දෙනා පිළිකුලින් යුතුව අදහස් දක්වා තිබූ අතර, ලංකාවේ බන්ධනාගාරවල මරණීය දඩුවම ලබා සිටින වැරදිකරුවන් අතරද දැඩි නොසන්සුන්තාවක් මතු වන්නට පටන් ගැනිණි. මේ තත්ත්වය කොතරම් උත්සන්න වීද යත්: අවසානයේ මේ විරෝධතා සමනය කරන්නට මරණීය දඩුවමට ලක් වූ ඇතැම් වැරුදිකරුවන්ට සමාව දීම කෙරෙහි අවධානය යොමු කරන්න පවා සිදු විය.
වැරුදිකරුගෙන් ප්රකාශයක්
මේ අතර ජනාධිපති සමාව හිමි වූ ජූඩ් ශ්රමන්ත ඇන්තනි ජයමහ නම් තරුණයාද එක්තරා නිවේදනයක් නිකුත් කරමින් කියා සිටියේ තමන්ට ලැබුණු මේ අවස්ථාව ගැන අනුකම්පා සහගතව සිතා බලන මෙනි. ඒ ලිපියේ වැඩිදුරටත් මෙසේ සඳහන්ව ඇත:
“මගේ දෙමාපියන් දික්කසාද වූ නිසා මම කැඩුණු භාණ්ඩයක් වුණා. මම තනිවමයි හැදී-වැඩුණේ. පවුලක සමීපතමයකු වීම කුමනාකාරයේ කරුණක්ද යන්න ගැන මම දැනගෙන සිටියේ නෑ. ඒ වන විට මගේ වයස අවුරුදු 16යි. දැන් මට අවුරුදු 34ක්. මගේ තරුණ කාලයම මම ගත කළේ අඩි 6X8 කාමරයක. මට හිරු එළිය ලැබුණේ දිනකට විනාඩි 30ක් පමණයි. ඒක මගේ ජීවිතයේ අඳුරුතම කාලයක්. මම නිදාගත්තේ බිමයි. දවසකට පැය 12ක් මාව හිර කරලා තිබුණේ. මම දන්නවා ඔබගේ වෛරය හා තරහා මා කෙරෙහි බව. ඒත් අවුරුදු 19දී හිරගත වූ කෙනා නොවෙයි දැන් මම. ජොන්සන් පවුලට සිදු වූ දේ ගැන කනගාටුව ප්රකාශ කරන්න මට වචන නෑ. කාට වත් නපුරක් කිරීමේ අදහසක් මට තිබුණේ නෑ. මේ වේදනාව පිටතට ගන්න වචන මට නෑ. ඔබ වෙනුවෙන් සිදු වූ දේ නැවත නිවැරදි කිරීම වෙනුවෙන් මට කරන්න හෝ කියන්න හා්ෙ දෙයක් නෑ. ඔබ මා දරුවකු ලෙස දන්නවා. සිදු වූ දේ ගැන මම මහත් සේ ලජ්ජාවට පත් වනවා. මේ සිදු වූ දෙයෙහි වේදනාව ඔබ සියලු දෙනාට මෙන්ම මගේ පවුලටත් තිබෙනවා. පසුගිය වසර 15 සෑම දෙනකුටම දුක, අහිමී වීම් තිබූ කාලයක්. මම කීප අවස්ථාවක්ම ඔබ සම්බන්ධ කරගෙන මගේ කණගාටුව හදවතින්ම ප්රකාශ කිරීමට උත්සාහ කළා. ඒත් එය සාර්ථක වුණේ නෑ. මට ඉවොන්ව නැවත දෙන්න බෑ.
“සමාජයට- ඔබගේ තරහව මට දැනෙනවා. මම දැන් වෙනස් මනුස්සයෙක්. මට මීට පෙර රතන හමුදුරුවෝ මුණගැහුනේ මගේ ජීවිතයේ පහළම ස්ථානයක සිටින විටයි. ඒ වසර පහකට පමණ පෙර. උන් වහන්සේ අපට භාවනාව පිළිබඳ උපදෙස් දුන්නා; නැවතත් මට මාව විශ්වාස කරන්න ඉගැන්වූවා. මම ආර්ථික විද්යාව පිළිබඳව විශේෂ උපාධියක් හැදෑරුවා.
“ලන්ඩන් ව්යාපාරික පාසලෙන් මම මේ උපාධිය ලබාගත්තේ මට අන්තර්ජාලය සඳහා ප්රවේශ වීමට පරිගණකයක්වත් නැති විටයි. අඩුම තරමේ මට මේසයක් වත් තිබුනේ නෑ. මම වැසිකිළිය මත වාඩි වී මගේ කොට්ටය මේසයක් කරගත්තා. මම මේක කළේ මම වෙනස් වී ඇති බව පෙන්වීමටයි. මම විවෘත විශ්වවිද්යාලයේ පශ්චාත් කළමනාකරණ උපාධිය හදාරනවා,” යැයි ජූඩ් ශ්රමන්ත ඇන්තනි ජයමහ නම් තරුණයා මේ විරෝධතා හමුවේ දුක්ගැනවිල්ලක් ඉදිරිපත් කර ඇත්තේ වසර 13ක සිරදඬුවම් විඳි කාලයේ තමා බොහෝ සෙයින් යහපත් පුද්ගලයකු වී ඇති බව පවසමිනි.
ජනාධිපතිවරණ ප්රචාරක කටයුතු වඩාත් උණුසුම් වූ පසුගිය සතියේ දේශපාලන වේදිකා රැසක විවිධ පාර්ශ්ව විසින්ද මේ සම්බන්ධයෙන් අදහස් මතු කරන්නට විය. කැබිනට් නොවන ඇමැති අජිත් පී. පෙරේරා මහතා මේ සම්බන්ධ විවේචන ඉදිරිපත් කරමින් පවසා සිටියේ යම් චූදිතයකුට ජනාධිපති සමාව දීමේදී අනුගමනය කළ යුතු ක්රියා පිළිවෙළක් ඇති බවත්, මේ සමාව දීමේදී ඒ ක්රියා පිළිවෙළ අනුගමනය කළේද යන්න පැහැදිලි කළ යුතු බවත්ය. එනම්: ආණ්ඩුක්රම ව්යවස්ථාවට අනුව වැරදිකරුවකුට ජනාධිපතිවරයා විසින් සමාව ප්රදානය කරද්දී ඒ නඩුව විභාග කළ විනිසුරුවරයාගේත්, නීතිපතිවරයාගෙන් හා අධිකරණ ඇමැතිවරයාගෙන් වාර්තාවක් කැඳවිය යුතු වුවත් එෙලෙස නොකළේ නම් එය අනාගතයට වැරුදි පූර්වාදර්ශයක් වන බවත්ය.
විවිධ විරෝධතා මැද රෝයල් පාක් වැරැදිකරුට ජනාධිපති සමාව දීම සම්බන්ධයෙන් ජනතා විමුක්ති පෙරමුණේ නායක අනුර කුමාර දිසානායක මහතාද සිය විරෝධතාව දක්වා ඇත. “මෙසේ නිදහස ලබා දීම නීති විරෝධි, අසාධාරණ හා අයුක්ති සහගත දෙයක්. අධිකරණයක් විසින් නිසි පරිදි සිදු කරන ලද දීර්ඝ නඩු විභාගයකින් අනතුරුව දෙන ලද දඬුවමක් මෙසේ එක පෑන් පහරින් කපාදැමීම අධිකරණයේ ස්වාධීනත්වයට, නීතියේ ආධිපත්යට කරන බලවත් පහරක්...”
ජනාධිපති මෛත්රීපාල සිරිසේන මහතාගේ අවසන් කැබිනට් හමුවේදීද මේ පිළිබඳ ඔහුගෙන් විමසීම් කළේ ඇමැති මණ්ඩලයේ කිහිප දෙනෙකි. එසේ ප්රශ්න මතු කරද්දී ජනාධිපතිවරයා පවසා ඇත්තේ ජූඩ් ශ්රමන්ත ඇන්තනි ජයමහ නම් තරුණයා එසේ නිදහස් කළේ වසර 13ක් බන්ධනාගාරගතව සිටි කාලයේ ඔහුගේ යහපත් කල්කිරියාව හේතුවෙන් බවත්, තමා කළ වරදක් හේතුවෙන් බන්ධනාගාරගතව සිටි කාලයේ ඔහු උපාධි 2ක් ලබාගත් බවත්, මේ වන විට ආචාර්ය උපාධියටද සූදානමින් සිටින බවත් යන කරුණු ඉවහල් වූ බවත්ය. එසේම මේ සම්බන්ධයෙන් ජනාධිපති මාධ්ය අංශයෙන්ද දිගු පැහැදිලි කිරීමක් කර ඇති අතර, එහි සඳහන් වූයේ මොහුට නිදහස ප්රදානය කිරීම පිටුපස මන්ත්රී අතුරලියේ රතන හිමි ඇතුළු පිරිසක් ඉදිරිපත්ව සිටි බවයි. අතුරලියේ රතන හිමි මේ තරුණයාගේ මවුපියන් සහ ඥාතීන් ජනාධිපතිතුමාට මුණගස්වා මේ පිළිබඳ දීර්ඝ කරුණු දැක්වීමක්ද සිදු කර තිබූ බව වාර්තා වෙයි. අතුරලියේ රතන හිමි, බද්දේගම සමිත හිමි, කෙරදේවල පුඤ්ඤරතන හිමි, බළන්ගොඩ බුද්ධඝෝෂ හිමි, රදගුරු රේමන්ඩ් වික්රමසිංහ, නීතිඥ මහේෂ් මඩවල, නීතිඥ නාලනී මනතුංග, නීතිඥ නිල්රුක් ඉහළකත්රිගේ, නීතිඥ කුමුදු නානායක්කාර යන අයද ගාල්ල වැලිවත්ත විජයානන්ද විහාරයේ විජයානන්ද සමාජ සේවා සංවර්ධන පදනම, උණවටුන රූමස්සල නව ජීවන අමද්යප සංගමය යනාදි සිවිල් සංවිධානද ශ්රමන්ත ජූඩ්ට සමාව ප්රදානය කරන ලෙස ජනාධිපතිතුමාගෙන් ඉල්ලා සිටි බව ඒ නිවේදනයේ දක්වා තිබිණි.
ආණ්ඩුක්රම ව්යවස්ථාවේ බලය
සිරකරුවන්ට සමාව දීමට ජනාධිපතිවරයාට බලය හිමි වන්නේ ආණ්ඩුක්රම ව්යවස්ථාවේ 34 වගන්තියට අනුකූලවය. 34 වගන්තියේ (1) අනුවගන්තිය යටතේ ශ්රී ලංකාවේ කවර හෝ අධිකරණයක තීන්දුවක් යටතේ වරදකරු කරන ලද පුද්ගලයකුට සමාවක් දීමට ජනාධිපතිවරයාට බලය පැවරෙන අතර වරදකරුට දෙන්නේ සම්පූර්ණ සමාවක්ද නැත හොත් කොන්දේසි සහිත සමාවක්ද යන්න තීරණය කරන්නේ ජනාධිපතිවරයාය. අදාළ වරදකරුට නියම කර ඇති දඬුවම ලිහිල් කිරීමට හෝ නියම කරන ලද දඬුවම මුළුමනින්ම නිෂ්ප්රභ කිරීමට මෙහිදී ජනාධිපතිවරයෙකුට ව්යවස්ථාවෙන් බලය හිමි වන්නේය. මේ කරුණු කොයි ආකාරයෙන් පැවැසුවද අධිකරණයකින් මරණ දඬුවම නියම වූ පුද්ගලයෙකුට සමාව ලබා දීමේ දී 34 (ඈ) වගන්තිය යටතේ ජනාධිපතිවරයාට යම් සීමා පනවා තිබේ. එවන් පුද්ගලයකු නිදහස් කිරීමට පෙර අදාළ නඩුව විභාග කළ විනිසුරුගෙන් වාර්තාවක් ගත යුතු අතර, ඒ සම්බන්ධයෙන් නීතිපතිවරයාගෙන්ද අධිකරණ අමාත්යාංශයෙන්ද යම් යම් උපදෙස් ගත යුතු බව සඳහන් කර ඇත.
මෙසේ ජනාධිපති සමාව දීම පිළිබඳ ආණ්ඩුක්රම ව්යවස්ථාවේ සඳහන් වුවද එසේ සමාව දීමේදී සැලකිය යුතු කරුණු මොනවාදැයි නීතියේ සඳහන්ව නැත. ඒත් නීති ක්ෂේත්රයේ විශාරදයන් සිය අත්දැකීම් ඔස්සේ පවසන්නේ මෙසේ නිදහස් කිරීම් කරන්නේ බරපතළ නොවන වැරැදිවලට සම්බන්ධ අය බවයි.
ජනාධිපති සමාවේ ඉතිහාසය
ඉතිහාසයේ මිනීමැරුම් වැරදිකරුවන්ට සමාව දුන් ප්රථම අවස්ථාවද මෙය නොවන්නේය. හිටපු ජනාධිපති ජේ ආර් ජයවර්ධන මහතාගේ සමයේ මිනීමැරුම් හා ස්ත්රී දූෂණ චෝදනාවලට ලක්ව සිර දඬුවම් විඳිමින් සිටි ගෝනවල සුනිල්ට ජනාධිපති සමාව ලැබිණි. එසේම හිටපු ජනාධිපති මහින්ද රාජපක්ෂ මහතා විසින් මිනීමැරුම් චෝදනා ලබා සිර දඬුවම් විඳිමින් සිටි හිටපු ඇමැති බිරියක වූ මොනිකා ප්රනාන්දුට ජනධිපති සමාව ප්රදානය කෙරිණි.
ජනාධිපති සමාව සමාජයේ කතාබහට ලක් වූ අවස්ථා කිහිපයක් තිබිණි.
2004 වර්ෂයේ පොදුජන එක්සත් පෙරමුණේ පාර්ලිමේන්තු මන්ත්රී එස් බී දිසානායකද අධිකරණයට අපහාස කිරීමේ වරදට සිරගත කෙරිණි. හිටපු ජනාධිපතිනි චන්ද්රිකා බණ්ඩාරනායක කුමාරණතුංග පාලන සමයේ රජයේ ප්රබල ඇමැතිවරයකුව සිටි එස් බී දිසානායක කලක් ශ්රී ලංකා නිදහස් පක්ෂයේ මහ ලේකම් ලෙසද කටයුතු කළේය. මහින්ද රාජපක්ෂ ජනාධිපතිවරයා 2006දී එස් බී දිසානායකට ජනාධිපති සමාව දුනි. හිටපු හමුදාපතිවරයකු වන ෆීල්ඩ් මාෂල් ජනරාල් සරත් ෆොන්සේකාට එරෙහිව තිබු සියලු චෝදනාවලින් ඔහු නිදොස් කොට නිදහස් කිරීමට ජනාධිපති මෛත්රීපාල සිරිසේන ක්රියා කළේය.
ජනාධිපති පොදු සමාව යටතේ 71 කැරැල්ලේ ප්රධාන විත්තිකරු වූ ජනතා විමුක්ති පෙරමුණේ නායක රෝහණ විජේවීරට ජනාධිපති සමාව ලැබීමත් සුවිශේෂ සිදුවීමකි. නැක්සලයිට් චෝදනාව යටතේ සිරගත කෙරුණු විජය කුමාරණතුංග ජේ ආර් ජයවර්ධන ජනාධිපති සමාව යටතේ නිදහස් කිරීමත් එකල සමාජයේ බොහෝ කතා බහට ලක් විය.
රෝයල් පාක් ඝාතන සිද්ධියේ වරදකරුවන්ට ජනාධිපති සමාව ලැබීමට ප්රථම ජනාධිපති මෛත්රීපාල සිරිසේන මහතා මීට පෙර අවස්ථා දෙකකදී එම බලය භාවිත කර තිබිණි. එයින් එක් අවස්ථාවක් වන්නේ තමන් ඝාතනය කිරීමට පැමිණි බව කියන කොටි සාමාජිකයකු නිදහස් කිරීමය. එය ඔහුට විශාල ජනතා ප්රසාදයක් අත් කර දුන් කරුණක් විය. දෙවැන්න අධිකරණයට අපහාස කිරීමේ චෝදනාවට වරදකරු වූ ගලගොඩඅත්තේ ඥානසාර හිමියන්ට සමාව දීමය. ඒ අවස්ථාවේ විවිධ අය විවිධ මත ප්රකාශ කළද ජනාධිපති සමාව හිමි වීමෙන් පසුව ගලගොඩඅත්තේ ඥානසාර හිමි ජනාධිපතිවරයා මුණගැසුණු ආකාරය මාධ්ය මඟින් දකින්නට හැකි විය.
මූලික අයිතිවාසිකම්
ජනාධිපති සමාව අභියෝගයට ලක් කළ හැකිද යන්න නීති ක්ෂෙත්රයට සම්බන්ධ බොහෝ දෙනා විවිධ මත පළ කරති.
ආණ්ඩුක්රම ව්යවස්ථාවේ 35 වැනි වගන්තිය අනුව ජනාධිපති ධූරය දරන තැනැත්තා/ තැනැත්තියට එරෙහිව කිසිදු ආකාරයක සිවිල් හෝ අපරාධ නඩු පැවරිය නොහැකි ලෙස සඳහන් වී තිබේ. ඒත්, එම ප්රතිපාදන සහ මුක්තිය ඉවත් කරමින්, ජනාධිපතිවරයාට එරෙහිව නීතිපතිවරයා වග උත්තරකරු කරමින් මූලික අයිතිවාසිකම් කඩවීමේ නඩු පැවරීමේ හැකියාව 19 වැනි සංශෝධනයෙන් ලැබී ඇත. ගලගොඩඅත්තේ ඥානසාර හිමි නිදහස් කිරීමෙන් සන්ධ්යා එක්නැළිගොඩගේ මූලික අයිතිවාසිකම් කඩ වූ බවට ශ්රේෂ්ඨාධිකරණයේ නඩුවක් ගොනු කිරීමට හැකියාව ලැබී ඇත්තේ මේ හේතුවෙනි. ජනාධිපති සමාව දීම වරදක් යැයි පවසමින් ඍජුව නඩු පැවරීමට නීතියක් නැති බව සඳහන් වෙයි. ඒත් 19 වැනි ව්යවස්ථා සංශෝධනය යටතේ යම් වරදකරුවකු නිදහස් කිරීම මඟින් තවත් පුද්ගලයකුගේ මූලික අයිතිවාසිකම් කඩ වී තිබෙන බව සඳහන් කරමින් නඩු පැවැරීමේ හැකියාව ගැනද සඳහන් වෙයි.