වෙළෙඳපොළේ තිරිඟු පිටි මිල වැඩි කර ඇතැයි ඇතැම් විද්යුත් මාධ්‍ය ඔස්සේ පළ වන වාර්තා අසත්‍ය බව ප්‍රීමා සිලෝන් ප්‍රයිවට් ලිමිටඩ් සමාගමේ සමූහ සාමාන්‍යාධිකාරි ටැන් බෙන් චුවාන් මහතා තමා වෙත දුරකතනයෙන් දැනුම් දුන්නේ යැයි ආර්ථික ප්‍රතිසංස්කරණ සහ පොදු සැපයීම් අමාත්‍යාංශයේ ලේකම් චාන්දනී විජයවර්ධන මහත්මිය නිවේදනයක් නිකුත් කරමින් කියා සිටී. මේ සම්බන්ධයෙන් මුදල් අමාත්‍යාංශයෙන් නිකුත් කළ නිවේදනයක දැක්වෙන්නේද පිටි මිල වැඩි කිරීම සඳහා කැබිනට් මණ්ඩලය විසින් පත් කරනා ලද ජීවන වියදම් කමිටුවේ නිර්දේශ අවශ්‍ය බවයි. එමෙන්ම පාරිභෝගික අධිකාරියේ නිර්දේශයද අවශ්‍ය බව එහි දක්වා ඇත.
