ත්‍රිවිධ හමුදාව, පොලීසිය සහ විශ්වවිද්‍යාලයීය උපකුලපතිවරුන් විසින් පසුගිය බ්‍රහස්පතින්දා හා සිකුරාදා ජනාධිපති මෛත්‍රීපාල සිරිසේන මහතා වෙත උපහාර පුද දෙනු ලැබීය. ජනාධිපති සහ සේනාධිනායක ලෙස යුද, නාවික, ගුවන් ත්‍රිවිධ හමුදා ශක්තිමත් කරමින් රටේ ජාතික ආරක්ෂාව තහවුරු කිරීම වෙනුවෙන් හා ශ්‍රී ලාංකේය ත්‍රිවිධ හමුදාවන්ගේ අභිමානය සුරැකීම උදෙසා ඉකුත් පස් වසර පුරා ජනපති ගත් පියවර අගයමින් මෙහිදී උපහාර පිළිගැන්විණි.
ආරක්ෂක අමාත්‍යාංශයේ ලේකම්, ආරක්ෂක මාණ්ඩලික ප්‍රධානී, ත්‍රිවිධ හමුදාපතිවරුන් ප්‍රමුඛ ත්‍රිවිධ හමුදා ජ්‍යෙෂ්ඨ නිලධාරිහු මේ අවස්ථාවලට එක්ව සිටියහ.
එමෙන් ම සියලු විශ්වවිද්‍යාලයීය උපකුලපතිවරුද ජනාධිපති කාර්යාලයේදී ජනාධිපතිතුමා හමු වූහ. විශ්වවිද්‍යාලය පද්ධතියට නව අරුතක් දෙමින් එහි උන්නතිය උදෙසා මෙන්ම විශ්වවිද්‍යාලයීය සිසුන්ගේ ශුභසාධනය වෙනුවෙන්ද, මෙරට උසස් අධ්‍යාපනයේ ගුණාත්මකභාවය ඉහළ නැංවීම වෙනුවෙන්ද ඉකුත් පස් වසර පුරා ජනපති ගත් තීන්දු තීරණ ඇගයීමට ලක් කරමින් ස්තුතිය පළ කිරීම එහිදී සිදු විය.
