ගීගන ගමගේ අමරසේන හෙවත් ජුලම්පිටිය අමරේ කුප්‍රකටව සිටියේ දේශපාලන දඩ බල්ලා ලෙසිනි. දේශපාලන ආශිර්වාදයෙන් වලස්මුල්ල, මිද්දෙණිය, තංගල්ල, වීරකැටිය, ගල්හේන්ගොඩ, තණමල්විල ආදී දකුණේ ගම්මානවල වැසියන් භිෂණයෙන් මුසපත් කරමින් මිනිස් ඝාතන , මංකොල්කෑම් සහ ස්ත්‍රී දූෂණවල නිරතව සිටි අමරේට වැඩ වරදින්නේ 2012 වසරේ ජුනි 15 වැනිදා කටුවන හැඩිවත්තේ පින්නමණ්ඩියේ ගෙවත්තක පැවැති ජනතා විමුක්කි පෙරමුණේ දේශපාලන රැස්වීම් භුමියකට කඩා වැදී කළ වෙඩි තැබීමත් සමඟිනි.
ටී 56 අවියක් කරේ දමාගෙන යතුරු පැදියකින් එම රැස්වීම් භුමියට කඩා වදින ජුලම්පිටියේ අමරේ ඉවක් බවක් නැතිව ජවිපෙ ආධාරකරුවන්ට වෙඩි තබන්නේ පිස්සු බල්ලෙකු ලෙසිනි. කටුවන තල්වත්තේ ගම්බාරේ ගෙදර පදිංචිව සිටි එදිරිමාන්නගේ මාලනී (50) සහ කටුවන හැඩිවත්තේ කීරිපිටිය ගෙදර ජයසේකර පටබැඳිගේ නිමන්ත ග්‍රේෂන් (18) යන ජවිපෙ ආධාරකරුවන් දෙදෙනා අමරේ විසින් එල්ල කරන ලද වෙඩි ප්‍රහාරවලින් මිය යන විට කටුවන මැඩිවත්තේ පදිංචිව සිටි ප්‍රදීප් සාරංග (26) බරපතළ තුවාල ලැබුවේය. 
එම ප්‍රහාරය ජුලම්පිටිය අමරේගෙන් එල්ල වන්නේ ජනතා විමුක්ති පෙරමුණ විසින් ඔහු දැඩිව විවේචනය කරමින් සිටින මොහොතකදීය. ඒ වන විටත් ජුලම්පිටිය අමරේට එරෙහිව මිනිස් ඝාතන 22ක් , ස්ත්‍රී දුෂණ 11ක් සහ කොල්ලකෑම් 13ක් එල්ල වී තිබුණද ඒ කිසිවක ජුලම්පිටිය අමරේගේ නම පොලිස් පොත්වල නොලියැවෙන්නේ ඔහුට එකල පැවැති දේශපාලන හයියේ තරම කියාපාමිනි. යුද හමුදා ඇඳුමට සමාන ඇදුමකින් සැරසී ටී 56 අවියක් කරේ දමාගෙන යතුරු පැදියකින් කටුවන පැත්තේ ඔහු එකල මහා දවාලයේ පවා සැරි සැරුවේ දේශපාලන ආශිර්වාදයෙන් පෝෂණය වූ නිසාය. කටුවන පොලීසිය ඉදිරිපිටින් අමරේ ටී 56 අවිය කරේ දමාගෙන යන විට පොලිස් නිලධාරීන් අහක බලා ගන්නේ ඔවුන්ද අසරණව සිටි බැවිනි.
ගෙයි මුල්ලක බැඳ තැබිය යුතු දඩ බල්ලා ලිහා දැමීමේ පල විපාක අදටත් එකී දේශපාලනඥයන්ගේ පස්සෙන් එන්නේ එම බල්ලා පෝෂණය කරනු ලැබුවේ ඔවුන් වන බැවිනි. එම නරුමයා වරක් සුදු වෑන් රථයකින් පැහැර ගනු ලබන්නේ ආරක්ෂක අංශයකින් යැයි කියාගත් පිරිසක් විසිනි. එහෙත් ඒ අයට ජුලම්පිටය අමරේව නොඑන ගමන් යවන්නට ඉඩක් නොවීය. සිදු වන්නේ අතරමඟ ඔහු අතහැර යන්නටය. කටුවන ජවිපෙ රැස්වීම් භුමියට කඩා වැදී අහිංසක ජීවිත දෙකක් බිලි ගන්නේ සුදුවෑන් රථයෙන් රවුමක් ගසා දිවි ගලවාගෙන පැමිණ සති දෙකක් ඉක්ම යන්නට මත්තෙනි.
එවරත් ජුලම්පිටියේ අමරේ උත්සහ දරන්නේ දේශපාලන ආශිර්වාදයෙන් එම ද්විත්ව ඝාතනයෙන් ගැලවෙන්නටය. එහෙත් ඊට ඉඩක් නොලැබෙන්නේ ජනතා විමුක්ති පෙරමුණ සිය සගයන්ට තැබූ වෙඩි ප්‍රහාරයට එරෙහිව රටේ දැවැන්ත හඬක් නගමින් සිටි බැවිනි. ඒ නිසාම ජුලම්පිටය අමරේට තවදුරටත් රැකවරණයක් ලබාදීමට දේශපාලන අධිකාරියට ඉඩක් නොවීය. නීතීඥයෙකු මාර්ගයෙන් තංගල්ල මහාධිකරණයට ඔහුට භාරවෙන්නට සිදු වන්නේ එබැවිනි. ඒ එම ද්විත්ව ඝාතනයෙන් දින පහකට පසුවය.
තංගල්ල මහාධිකරණයේ විනිසුරුවරයා ලෙස එවකට සේවයේ නිරතව සිටියේ චන්ද්‍රසේන රාජපක්ෂ මහතාය. ජුලම්පිටියේ අමරේ අධිකරණයට භාරවීමෙන් පසු පොලීසියට දැඩි වාග් ප්‍රහාරයක් එල්ල විය. ඒ විවිධ අපරාධ සම්බන්ධයෙන් විවෘත වරෙන්තු 100කට වැඩි ප්‍රමාණයක් තිබියදීත් ජුලම්පිටිය අමරෙට එරෙහිව ඒ වන තුරුත් පොලීසිය නීතිය ක්‍රියාත්මක නොකිරීම ගැනය.
“සැකකරුට එරෙහිව නඩු හතරක් මහාධිකරණයේත් තිබෙනවා. තවත් අධිකරණවල නඩු තියෙනවා. විවෘත වරෙන්තු එකසිය ගණනක් සැකකරුට නිකුත් කළා. සැකකරු අත්අඩංගුවට ගන්නා ලෙස පොලිසි කැඳවා මම නියෝග කළා. පොලිසි ඒ දේ කළේ නැහැ. එහෙම කළා නම් සැකකරු අද මේ තත්ත්වයට පත් වෙන්නේ නැහැ. පොලිසිය වග කියන්න ඕනේ සැකකරු මේ තත්ත්වයට පත් වීම ගැන.“ මහාධිකරණ විනිසුරු චන්ද්‍රසේන රාජපක්ෂ මහතා එදා පොලීසියට තදින්ම දොස් නඟන්නේ එසේය. 
ජුලම්පිටියේ අමරෙට ඇති සිය ගණනක් වරෙන්තු ගැන පොලිස් ලොක්කන්ගේ දෑස් ඇරෙන්නේ ද විනිසුරුවරයා කී එම ප්‍රකාශය ජනමාධ්‍යවල පොල්ගෙඩි අකුරෙන් ලියැවෙන විටය. රටපුරා වරෙන්තුකරුවන් අත්අඩංගුවට ගැනීමේ මෙහෙයුම් පවා පොලීසිය ක්‍රියාත්මක කරන්නේ ඒත් එක්කමය. එහිදී හෙළි වන්නේ දහස් ගණනක් වරෙන්තුකරුවන් ඒ වන විටත් නිදැල්ලේ සිටින බවය.
ජුලම්පිටියේ අමරේ අධිකරණයට භාරවීමෙන් පසු තමාට ජීවිත තර්ජනයක් ඇතැයි අධිකරණයට පවසමින් නිසි ආරක්ෂාවක්ද ඉල්ලා සිටියේ අහිංසක චරිතයක් රඟපාමිනි. එම ද්විත්ව ඝාතනයට පෙර වරක් ඔහු වෙනත් නඩුවත් සඳහා අධිකරණයට ඉදිරිපත් විය. එහිදී විනිසුරුවරයා අමරෙට දැනුම් දී තිබෙන්නේ ඔහු සතුව ඇති ගිනි අවි භාරදෙන ලෙසය.
“අධිකරණයේ ආරක්ෂාව ඉල්ලන ඕනෑම අයෙකුට ආරක්ෂාව ලබා දෙන්න ඕනෑ. මා කී දේවල් තමුන් කළේ නෑ. ටී-56 ගිනි අවි දෙක ගෙනැවිත් බාර දුන්නේ නැහැ. ජීවිත ආරක්ෂාව ඉල්ලන නිසා මම ආරක්ෂාව සලසනවා. තමුන්ට මරණ බය ඇති වෙලා තියෙනවා. වෙඩි තියලා මරාපු මනුෂ්‍යයන්ටත් ඒ බය ඇති වෙන්න ඇති. මේ වගේ දේවලින් ජාත්‍යන්තර වශයෙන් රට අපකිර්තියට පත් වෙනවා. ආධාර නොලැබී යනවා.“ විනිසුරු චන්ද්‍රෙස්න රාජපක්ෂ මහතා ඒ බව පවසන්නේ එසේය.
එදා අධිකරණයට භාර වන ජුලම්පිටිය අමරෙට නැවතත් එළියට යන්නට ඉඩක් නොවීය. ඔහු සම්බන්ධයෙන් ඇති වන සමාජ විරෝධය හේතු කොටගෙනම ඔහුට සිදු වන්නේ ඇප නැතිව දීර්ඝ කාලයක් හිරේ රැඳෙන්නටය.
හිරේ හිටියත් ගෙදර හිටියත් අමරෙට වෙනසක් නොවීය. තංගල්ල බන්ධනාගාරය ඔහුට රජ මාලිගාවක් විය. සියලු සැප පහසුකම් ඔහුට අඩුවක් නැතිව හිමි විය. දේශපාලනඥයන් ඔහුගේ සුව දුක් විමසීමටද හොර රහසේ බන්ධනාගාරයට පවා රිංගුවේය. බන්ධනාගර නිලධාරීන් පවා සිටියේ ජුලම්පිටිය අමරේ කියන ඕනෑම දෙයක් කිරීමට සූදානමිනි. ඒ ඔහු තරහා කරගතහොත් 2002 වසරේදී මෙන් සිරකරුවන්ගේ කැරැල්ලක් ඇතිවේවි යැයි ඇති වූ බිය නිසාද නැති නම් දේශපාලන උදහසට ලක්වේවියැයි කියාද යන්න දැන සිටියේ එවකට තංගල්ල බන්ධනාගාරයේ සේවයේ නිරතව සිටි ලොක්කෝ කිහිප දෙනාය.
තංගල්ල බන්ධනාගාරයේ සිරකරු කැරැල්ල 2002 ජුනි මාසයේ අග සිදුවූවකි. අවි ගබඩා පවා බිද සිරකරුවෝ සන්නද්ධව සිටියහ. මහා විනාශයකට මුල පිරෙමින් තිබුණු කැරැල්ල මැඬලීමට එදා ඉදිරිපත් වන්නේ එවකටද විපක්ෂ නායකවරයාව සිටි මහින්ද රාජපක්ෂ මහතාය. ඒ 2002 ජූලි 01 වැනිදා ඔහු තංගල්ල බන්ධනාගාරයට යමිනි. එදා ඔහු තංගල්ල බන්ධනාගාරයේ ගේට්ටුව අසලට ගොස් සුවිශේෂි පුද්ගලයෙකු අමතනු ලැබුවේය.
“අමරේ මම ඇවිත් ඉන්නේ, බය නැතුව එළියට එන්න" යැයි කියමිනි.
කටහඬින් ඒ කවුදැයි හඳුනාගත් අමරේ එළියට ආවේ ය. සිරකරු කැරැල්ලට ඒත් එක්කම නැවතීමේ තිත තැබෙන්නේ මහින්ද රාජපක්ෂ මහතාගේ අණට ඔහු කීකරුවූ බැවිනි.
ජුලම්පිටියේ පින්නකොරටුවේ පදිංචිව සිටි ජුලම්පිටියෙ අමෙරෙගේ නම ඉදිරියෙන් ලියැවෙන මිලේච්ඡතම ඝාතනය වන්නේ ජුලම්පිටිය අන්දිරිස්වත්තේ පදිංචිව සිටි ශ්‍රී ලංකා කාල තුවක්කු රෙජිමේන්තුවේ සේවය කළ අබේවර්ධන කංකානම්ගේ කීර්ති නැමැති සෙබළා 1998 වසරේ ජුනි 08 දා නිවසට නුදුරින් මහපාරේදී මරා හිස කඳින් වෙන් කර මහ මඟ දැමීමය. ඔහු එතැනින් සීමා වූයේ නැත. මළ ගෙදරටද පහු වැනිදා බොම්බ ගැසුවේය. සිය පුතාගේ ඝාතනයට යුක්තිය ඉල්ලා ජුලම්පිටිය අමරෙට එරෙහිව සාක්ෂි දුන් අබේවර්ධන කම්කානන්ලාගේ සිරිසේන නම් එම හමුදා සෙබළාගේ පියාද වෙඩි තබා මරා දැම්මේය. 2008 වසරේ පෙබරවාරි 24 වැනිදා ඔහුට වෙඩි තබා මරා දමන්නේ තමන්ට එරෙහිව සාක්ෂි දුන්නොත් මරා දමන බවට කල්තියා තර්ජනය කිරීමෙන් අනතුරුවය. එම වෙඩි තැබීමෙන් එදා එම සෙබළාගේ මවද තුවාල ලැබුවාය. ඒ ඇය සදාකාලික අබ්බඝාතකයෙකු බවට පත් කරමිනි. අනතුරුව ඔවුන් ජීවත්වූ නිවසටද ගිනි තබා විනාශ කළද එකල ඒවාට නීතිය ක්‍රියාත්මක නොවීය.
ජුලම්පිටිය අමරෙගේ අපරාධ ලැයිස්තුව සුළුපටු නැත. එය පොත් පිරෙන තරම්ය. රාජපක්ෂගේ මංජුල ක්‍රිෂාන්ත (28) නැමැති තරුණයාගේ ඝාතනයද ඒ අතර ලියැවෙයි. 2005 වසරේ පෙබරවාරි 28 වැනිදා ඔහු ඝාතනය කෙරෙන්නේ පැහැරගෙන ගොසිනි. මුරුවෙල වැව අසලදී මරා දමන එම තරුණයාගේ මළ සිරුර ගෙනවිත් දමන්නේ මිද්දෙණිය බෝකැන්ද යායටය. එම ඝාතනයද සඳහන් වන්නේ අමරෙට එරෙහිව පොලිස් පොත්වල නොලියැවුණු අපරධයක් ලෙසිනි. ඔහු ජුලම්පිටිය පැත්තේ ඉඩම්ද අත්පත් කර ගත්තේ අහිංසක ගොවීන් පන්නා දමාය. එසේ ඔහු බලහත්කාරයෙන් අල්ලාගත්තේ යැයි කියැවෙන ඉඩම් ප්‍රමාණය අක්කර සිය ගණනකි. 2011 වසරේදී ඔහු ජුලම්පිටිය පොල්කොරටුවේ නිවසට පැන වෙඩි තබා නිවෙස් හිමියාව මරා දැම්මේය. එදා ඔහු ඒ තැබූ වෙඩිල්ලක් අවුරුදු 9ක දරුවෙකුටද වැදිණි.
2001 දී ජුලම්පිටිය පන්සල පාරේදී නිශාන්ත කුමාර නමැති තරුණයකුට වෙඩි තබා ඝාතනය කිරීමක් ද ජුලම්පිටිය අමරෙගේ ඝාතන ලැයිස්තුවේ ලියැවී ඇත. අමරෙගේ ඝාතන ලැයිස්තුවද දිගය. පහරදීම් නිවෙස් සහ වාහන ගිනිබත් කිරීමේ ලැයිස්තුව ඊටත් වඩා දිගය. ඉවක් බවක් නොමැතිව මිනී මරමින් මේ තරම් අපරාධ ගොන්නක් කරන්නට ඔහුට ඉඩක් ලැබෙන්නේ වෙන කිසිවක් නිසා නොව, දේශපාලන ආශිර්වාදය නිසාය.
“ඒ කාලේ මේ මිනිහා ගමේ සංගීත සංදර්ශන පැවැත්වෙන කොට, හමුදා ඇඳුමක් ඇඳගෙන ටී 56 කරේ දාගෙන ස්ටේජ් එකට ගොඩවෙනවා. කරටි කැඩෙන්න බීලයි ඒ වේලාවට එන්නේ. මිනිහට ඒ වේලාවට සින්දු කියන්න ඕනේ. ටී 56 පෙන්නා සංගීත කණ්ඩායම බිය ගන්නලා ඔහු සිංදු කියන්න ගන්නවා. අනෙක් අයට සිංදු කියන්න ඉඩ ලැබෙන්නේ මිනිහ සිංදු කියල ඇති වුණාමයි. මිනිහට තියෙන දේශපාලන හයිය නිසා පොලීසියත් මිනිහට විරුද්ධව මුකුත් කරන්න යන්නේ නැහැ. බීල ඉන්න වේලාවට මිනිසා අමුම අමු තිරිසනෙක්“ ඒ කතාව කියන්නේ හම්බන්තොට පැත්තේ සේවයේ නිරතව සිටි උසස් පොලිස් නිලධාරියෙකි.
තවමත් පොලිස් සේවයේ නිරතව සිටි එම නිලධාරියා ජුලම්පිටියේ අමාරෙව පාලනය කිරීමට ඔහුව අල්ලා හිරේ දාන්න කිහිප විටක්ම උත්සහ ගත්තෙකි. එහෙත් සිදු වන්නේ ඔහුව පැත්තකට විසි වී උසස්වීම් පවා අහිමිවීමය. එම නිලධාරියාගේ බාධාව ඉවත්වීමත් සමඟ ජුලම්පිටියේ අමරේ දකින්නට ලැබෙන්නේ දේශපාලන වේදිකාවලදීය. ඔහු පෙනී සිටින්නේ මන්ත්‍රී ආරක්ෂකයෙකු ලෙසිනි. කටුවන ජවිපෙ රැස්වීමට වෙඩි තැබෙන්නේද එකලය.
එම ද්විත්ව ඝාතනයට බන්ධනාගාරගත වන ජුලම්පිටිය අමරෙට වසර 28ක සිරදඬුවමක්ද හිමි වන්නේ මොනරාගල පැත්තේ පුද්ගලයෙකුට පහරදී දේපොළවලට හානි කිරීමකටය. 2011 වසරේ අප්‍රේල් 08 වෙනිදා හම්බෙගමුවේදී පනාමුල්ල පතිරණගේ රංජිත් නැමැත්තාට පහරදී ලක්ෂ ගණනක දේපොළ හානි කිරීමට ජුලම්පිටිය අමරෙට එරෙහි 2014 වසරේ දෙසැම්බර් 12 වෙනිදා එම තීන්දුව ලබාදෙන්නේ එකල මොනරාගල මහාධිකරණ විනිසුරුවරයාව සිටි ගිහාන් කුලතුංග මහතාය. ජුලම්පිටිය අමරෙට එරෙහිව මරණිය දණ්ඩනය නියම වන්නේද ඔහු වසර 28 ක සිරදඬුවමක් ලැබ සිටියදීමය.
