දිනය - නොවැම්බර් 03 වැනිදා
වේලාව - අලුයම
ප්රදේශය - දකුණු වෙරළ තීරයේ ගාල්ලට නුදුරුවයි.
නාවික හමුදා සෝදිසි මෙහෙයුම් ක්රියාත්මක වෙමින් පැවතියේ ධීවරයින්ගේ මුවාවෙන් මත් ද්රව්ය ප්රවාහනය කරන හෙයිනි. බහු දින ධීවර යාත්රා කිහිපයක් වරින් වර ගමන් කළද එක් යාත්රාවක් දෙස නාවික නිලධාරීන්ගේ අවධානය වැඩි වශයෙන් යොමු වුණි. ඔවුහු එයට නවත්වන ලෙස අණ කළහ. නොනවත්වා ගියහොත් වෙන දේ දන්නා හෙයින් බහු දින යාත්රාව නැවතුණි. ධීවරයින් සේ පෙනී සිටියද ඔවුන් ගැන නාවික හමුදාවට සැකයක් ඇති වුණි.
‘ඇයි සර්, අපි මාළු අල්ලන්න ගියේ..‘
ධීවර කර්මාන්තයේ නියැළීමට අවශ්ය දැල් ආම්පන්න, දැවැන්ත බිලී කොකු ඇතුළු සියල්ල එම යාත්රාවේ විය. කිසිදු ආකාරයක සැකයක් පෙනෙන්නට නම් නැත. එහෙත් බහු දින යාත්රාවම දැඩි සෝදිසියකට ලක් කරන ලදී.
නාවික නිලධාරීන්ගේ සැකය තහවුරු විය. මත්කුඩු යැයි සැලකිය හැකි පැකට් විශාල සංඛ්යාවක් එහි විය. නාවික නිලධාරීන් ඒ ගැන ඔවුන්ගෙන් විමසන්නට විය. ඇත්ත එළිවීම නිසා ඔවුහු සත්යය නොවලහා පවසන්නට වූහ.
මත් ද්රව්ය තොගය තමන්ට ගැඹුරු මුහුදේදී ලැබුණු බවත් ඒවා පාකිස්ථානයේ සිට එවන ලද බව දැනගන්නට තිබෙන බවත් ඔවුහු පැවසූහ. ගොඩ බිමට බහුදින යාත්රාවේ ඒවා ගෙන නොයන බවත් ඒ සඳහා ඩිංගි බෝට්ටු භාවිත කරන බව ද ඔවුහු පැවසූහ.
ඒ සියලු දෙනා අත් අඩංගුවට ගත් නාවික නිලධාරීන් කිහිප දෙනකු බහු දින යාත්රාවේ සිටියදී සෙසු නාවික නිලධාරීන් සහ සෙබළුන් නාවික සෝදිසි යාත්රාවේ නැඟී එතැනින් පිටව ගියහ. බහුදින යාත්රාව ගොඩබිම සමීපයට ගෙන ඒමට පෙර ඔවුන්ගේ ක්රියාදාමය ගැන පූර්ණ විස්තරයක් දැන ගන්නට නාවික නිලධාරීන් විසින් කටයුතු කරන ලදී. ඒ අනුව ගොඩ බිම පෙනෙන මානයෙදී ඩිංගි බෝට්ටුවට පණිවිඩයක් දිය යුතු විය.
නාවික නිලධාරීන්ගේ අණ පරිදි සැකකරුවෝ පණිවිඩය ලබා දුන්හ. ඩිංගි බෝට්ටුව දෙදෙනකුද සමඟ බහු දින යාත්රාව වෙතට ආවේය.නාවික නිලධාරීන් සහ බහු දින යාත්රාවේ සිටි කිහිප දෙනෙක්ද නොපෙනෙන ලෙස සැඟවී සිටියහ.
බෝට්ටුව සමීපයට පැමිණි ඩිංගි බෝට්ටුවේ පැමිණි දෙදෙනා සතුටින් ඉපිල ගොස් තිබුණි.
‘‘හැම තැනම සර්ච් කරනව නේද බං, හොඳ වෙලාවට උඹලා ආවෙ, බොසා කිව්වා පරිස්සමින් බඩු ගේන්න කියලා‘ ඔහු දිගටම කියා ගෙන ගියේය.
ඩිංගි බෝට්ටුව බහුදින යාත්රාව අසලටම ගෙන ආවේය. ඒ සමඟම ඔවුන්ට නොපෙනෙන ලෙස සැඟව සිටි නාවික හමුදා නිලධාරීන් එළියට ආහ. වටපිට බැලූ ඩිංගි බෝට්ටුවේ සිටි දෙදෙනාට පෙනුණේ මේ දක්වා සාමාන්ය බෝට්ටු ලෙසින් මුහුදේ සැරිසරමින් තිබූ බෝට්ටු කිහිපයක්ද තම ඩිංගි බෝට්ටුව වට කර තිබෙන බවකි. ඒ සිවිල් ඇඳුමින් සිටි නාවිකයින් බවද ඔවුහු වටහා ගත්හ. දැන්නම් පැන යන්නට මඟක් නොමැති බව දැනගත් ඔවුහු නිහඬ වූහ. ඩිංගියෙන් ආ පුද්ගලයින් දෙදෙනා ගොඩ දැමු මාළුවන් සේ ගැහෙන්නට විය.
‘‘යංකො කට්ටියම එක්ක ගොඩට...‘‘ බහුදින යාත්රාව බාර ගත් නාවික නිලධාරීන් එය ගොඩ බිම කරා ගෙන එන්නට කටයුතු කළ අතර ඩිංගි බෝට්ටුවේ සිටි දෙදෙනාද නාවික ආරක්ෂාව මැද ගොඩ බිමට එම බෝට්ටුවද සමඟ ගෙන එන්නට විය. එසේ එද්දී සිදු වූ පමාව නිසා එය බාර ගැනීමට ගොඩ බිම සිටි තවත් අයෙක් පැන ගොස් තිබුණි.
බහුදින යාත්රාවේ පැමිණි 5 දෙනාත් ඩිංගි බෝට්ටුවේ පැමිණි දෙදෙනාත් ගාලු ධීවර වරායට රැගෙන ඒමෙන් පසුව ඔවුන් පොලිස් මත් ද්රව්ය නාශක අංශයට භාර කරන ලදී. ඔවුන් සමඟ අත් අඩංගුවට ගත් හෙරොයින් කිලෝග්රෑම් 224ක පැකට් 200ද පොලිස් මත් ද්රව්ය අංශයට යොමු කරන ලදී. ඒ සමඟම චන්ද්රිකා දුරකතනයක්, ජංගම දුරකතන 7ක්, ජීපීඑස් තාක්ෂණික උපකරණ 3ක්. ඇතුළු උපකරණද බහු දින යාත්රාවද ඩිංගි බෝට්ටුවද පොලිසිය වෙත බාර දෙන ලදි. අත්අඩංගුවට ගන්නා ලද හෙරොයින් තොගයේ වටිනාකම රුපියල් කෝටි 200කට අධික බවට මේ වන විට ගණන් බලා ඇත. කිලෝග්රෑම් 224ක් මත් කුඩු තොගය කිලෝ එකට ආසන්න පැකට් වල අසුරා ගෙනවිත් තිබුණේ ගෙන යෑමේ පහසුව තකාය. එසේම ඒවා වෙනත් පොලිතින් පැකට් 8ක දමා තිබුණේ හදිසියකදී මුහුදට දැමුවද හානියක් නොවන සේ අසුරමිනි.
ඒ අනුව මෙම වසර තුළ පමණක් නාවික හමුදාව විසින් සිදු කළ මෙහෙයුම්වලදි හෙරොයින් කිලෝග්රෑම් 763 ක ප්රමාණයක් අත්අඩංගුවට ගැනීමට සමත්ව ඇත.
මේ වන විට නාවික හමුදාව විසින් අත්අඩංගුවට ගත් හෙරොයින් තොගයට අමතරව පොලිස් මත්ද්රව්ය නාශක අංශයද සමඟින් මේ වසරේ පමණක් කිලෝග්රෑම් 1638 ග්රෑම් 397ක හෙරොයින් අත් අඩංගුවට ගෙන ඇත. අත් අඩංගුවට ගත් සැකකරුවන් සංඛ්යාව 35702කි.
තවද, මෙම වසර තුළදී පමණක් මෙරටට රැගෙන ඒමට උත්සාහ කළ සහ රට තුළ තිබූ තහනම් මත්ද්රව්ය වන කේරළ ගංජා ටොන් 3ක් (කිලෝග්රෑම් 3263 ක්), දේශිය ගංජා කිලෝග්රෑම් 08 ක්, බීඩි කොළ ටොන් 42ක් (කිලෝග්රෑම් 42851 ක්), ඇතුළු මත්ද්රව්ය විශාල ප්රමාණයක් නීතියේ රැහැනට හසුකර දෙමින් නාවික හමුදාව මත්ද්රව්ය නිවාරණ ජාතික වැඩසටහනට විශාල දායකත්වයක් ලබා දී ඇත
මේ මත් කුඩු ගෙන්වීම සම්බන්ධව තවත් ප්රධානීන් තිදෙනකු හා එතෙර අයෙක්ද අත් අඩංගුවට ගැනීමට නියමිතය.
මේ මත් කුඩු තොගය අන්නාසි මොරිල් නැමැති තැනැත්තා විසින් පාකිස්ථානය හරහා මෙරටට එවන්නට ඇති බවට සැක පළ වී ඇත. අන්නාසි අලෙවියෙන් කොළඹ ජීවත් වු ඔහු මේ වන විට මත් ද්රව්ය ජාවාරමට සම්බන්ධ වී ඇති බවට අනාවරණය වී ඇත.
මෙසේ නාවික හමුදා අත් අඩංගුවට පත් වූ සැකකරුවන් අතර සිටින පස් දෙනා වන්නේ මාරවිල, උතුරු තොඩුවාවේ පදිංචි චමින්ද ප්රනාන්දු (50), හලාවත, අඹකඳවල ඇන්ටනි ක්රිෂාන්ත (29) හා හලාවත, අඹකඳවලම දුලාජ් රවීන්ද්ර, මාරවිල, උතුරු තොඩුවාවේ සුරංග එරංග, මාරවිල ඉරණවිල පාරේ තරිඳු ජයමාල් (32) යන අය වන අතර ඩිංගි බෝට්ටුවේ සිට පැමිණ අත් අඩංගුවට පත් වූ දෙදෙනා වන්නේ මාරවිල තොඩුවාව පදිංචි සසිඳු ලක්ෂාන් (32) හා කොච්චිකඩේ, පෝරේහි පදිංචි ජූඩ් ලක්ෂාන් (52) යන අය වෙති වෙති. බහුදින යාත්රාව හලාවත පදිංචිකරුවකුට අයත් වූවකි. ඒ සම්බන්ධයෙන්ද දැන් පරීක්ෂණ සිදු කෙරේ.
මේ සම්බන්ධව අදහස් දක්වමින් නාවික හමුදාපති වයිස් අද්මිරාල් පියල් ද සිල්වා මහතා පැවසුවේ ධීවරයින්ගේ මුවාවෙන් නිරතුරුවම මේ අයුරින් මත් කුඩු ප්රවාහනය කරනු ලබන බවට තොරතුරු ලැබෙන බවත් එම නිසා නාවික හමුදාව මහ සයුරේ සීරුවෙන් තබා ඇති බවත්ය. පසුගිය 1 වැනිදා සිට මේ ප්රදේශයේ සෝදිසි මෙහෙයුම් වැඩි කළ බවත් ඒ අනුව මේ මතු කුඩු තොගය අත් අඩංගුවට ගැනීමට හැකි වූ බවද නාවික හමුදාපතිවරයා පවසයි.
ඇතැම් ධීවරයින් මත් කුඩු ජාවාරම්කරුවන්ගේ උපායන්ට අසුවී මේ සඳහා උපකාර කරනු ලබන බවත් ඒ හරහා ඔවුනට මරණ දඩුවම පවා ලැබීමට ඉඩ ඇති බවද ඔහු පෙන්වා දෙයි. සුළු ලාභයක් පතා නීති විරෝධී කටයුතුවල නියැළීමෙන් වළකින ලෙස සියලු ධීවරයින්ට තමන් අවවාද කරනු ලබන බවද නාවික හමුදාපතිවරයා පවසයි. මත් කුඩු ජාවරම්කරුවන්ට කිසිදු සමාවක් ලබා නොදෙන බවත් ඔහු පෙන්වා දෙයි. නාවික හමුදාව නිරතුරුවම මේ සියලු පරීක්ෂණ කටයුතුවල නියැළෙන බවත් නීතිය රැකීම වෙනුවෙන් මත් උවදුරින් ජාතිය රැක ගැනීම පිණිස අවශ්ය ඕනෑම පියවරක් ගැනීමට තමන් පසුබට නොවන බවද නාවික හමුදාපතිවරයා කීය.
ඉදිරියේදී සමුදුර ආශ්රිතව සිදු කරනු ලබන මෙහෙයුම් තව දුරටත් වැඩි කරනු ලබව බවද නාවික හමුදාපතිවරයා කීය.
මේ වන විට අත් අඩංගුවට ගෙන ඇති සියලු දෙනා ධීවරයින් වන අතර එක්වරම වැඩි මුදල් ඉපැයීමට යාම නිසා ඔවුහු මේ තත්ත්වයට ඔවුහු පත් වූහ. ධීවර සහාය නොමැතිව කිසිදු විටෙක මත් කුඩු ප්රවාහනය කළ නොහැකි බවද නාවික හමුදාව පෙන්වා දෙයි.
එසේ නොවුවහොත් සිදු වන්නේ රට ජාතිය සමස්ත විනාශයක් කරා යොමු වන බව ද පෙන්වා දුන් හමුදාපතිවරයා පවසන්නේ ඉක්මනින් ධනවත් වීමට මෙවන් අපරාධ හරහා මුදල් ඉපැයීමට යාමෙන් තමාත් තමන්ගේ යැපෙන්නන් ද අනාරක්ෂිත තත්ත්වයට පත් වන බවයි.
අත් අඩංගුවට ගත් පුද්ගලයින් වැරැදිකරුවන් වුවහොත් ශ්රී ලංකාවේ නීතිය අනුව ඔවුන්ට අනිවාර්යෙන්ම මරණ නියම වනු ඇත. මත් ද්රව්ය මෙහෙයුම් වැටලීමේ සඳහා අන්තර්ජාතික සබඳතාද නාවික හමුදාව විසින් මේ වන විට යොදා ගෙන ඇති අතර අන්තර්ජාතිකව ලැබෙන රහස්ය තොරතුරු නිසා මෙසේ වැටලීම් සිදු කිරීමට හැකියාව ලැබී ඇත. ඒ හරහා ඉතාමත් පුළුල් ලෙස මෙම මෙහෙයුම් දියත් කරමින් සාර්ථක වැටලීම් සිදුකිරීමට නාවික හමුදාවට හැකි වී ඇත. එමෙන්ම, ශ්රී ලංකාවට අයත් සාගර කලාපයේ සහ රට තුළ සිදු කරනු ලබන නීති විරෝධී මත්ද්රව්ය ජාවාරම් කටයුතු මැඬලීමේ ජාතික මෙහෙවර සඳහා නාවික හමුදාව ඉදිරියටත් මෙහෙයුම් ක්රියාත්මක කරනු ඇත.