උතුරුමැද පළාතේ සිය ආධිපත්‍ය පතුරුවාගෙන සිටි දොස්තර ඇල්ෆ්‍රඩ් සොයිසා සිය සහචරයන් යොදාගෙන සිදු කළ කලැත්තෑවේ ද්විත්ව මිනීමැරුම් හැටේ දශකයේ රටම කතා වූවකි.
එම අපරාධය ඇසින් දුටු කිසිවෙකු නොවූවත් එකිනෙකට සම්බන්ධ වන විද්‍යාත්මක සාක්ෂි හෙවත් පරවේෂණීය සාක්ෂි පදනම් කරගෙන දුන් තීන්දුව මත ඇල්ෆ්‍රඩ් සොයිසා සහ ඔහුගේ සහචරයෙක් එල්ලා මරා දමනු ලැබූහ.
ඉන් වසර 45කට පසු මෑත කාලයේ මහත් ආන්දෝලනයකට තුඩු දුන් රත්නපුර, කොටකෙතන පළමු ද්විත්ව ඝාතනයට අදාළ නඩුවේ තීන්දුව ප්‍රකාශයට පත් කෙරුණේ පසුගිය 15 වැනිදාය.එය කලැත්තෑවේ නඩුවේ තීන්දුව සිහිගන්වයි. කොටකෙතන පන්සල මාවතේ විසූ 52 හැවිරිදි නයනා නිල්මිණි සහ ඇගේ දියණිය වූ 17 හැවිරිදි කාවින්ද්‍යා චතුරංගි සෙල්ලහේවා දෙදෙනාගේ ඝාතකයා වූ ලොකුගමහේවගේ දර්ශන හෙවත් රාජු නමැත්තාට එදින කොළඹ මහාධිකරණ විනිසුරුවරයා මරණ දඬුවම නියම කළේ දීර්ඝ නඩු විභාගයකින් පසුවය. ඇසින් දුටු කිසිදු සාක්ෂියක් නැතිව පරවේෂණීය සාක්ෂි සහ ඩීඑන්ඒ සාක්ෂි සටහන්වලින් ලැබුණු තොරතුරු මත විත්තිකරුට මරණ දඬුවම නියම කරනු ලැබීය. 
රත්නපුරේ, කොටකෙතන, පන්සල පාරේ සුරම්‍ය නිවෙසේ විසූ නයනා නිල්මිණි සහ රෝහිත සෙල්ලහේවා දෙදෙනාට දරුවෝ දෙදෙනෙකි. වැඩිමහල් පුත්‍රයා කුසල් සෙල්ලහේවා කොළඹ රැකියාවක නිරතව සිටියේය. රෝහිතද කොළඹ ප්‍රදේශයේ ආරක්ෂක අංශයේ රැකියාවක නිරත වූයේය. ඔවුන් දෙදෙනා නිවෙසට ගියේ සතියකට දෙකකට වරකි. එහෙත් නිවෙසේ විසූවන් පිළිබඳ රෝහිත සහ කුසල් නිතරම පාහේ දුරකතන ඇමැතුම් දෙමින් සොයා බැලුවේය. නිවෙසේ විසුවේ නයනා සහ දියණිය කාවින්ද්‍යා පමණි. කාවින්ද්‍යා රත්නපුර ෆර්ගියුසන් බාලිකාවේ උසස්පෙළ පන්තියේ ඉගෙනුම ලබමින් සිටියාය.
දියණියගේ විවාහ උත්සවය
2008 වසරේ ජුලි 21 වැනි දා කොටකෙතන විසූ පනස් හයවැනි වියේ පසුවූ සෙල්ලයියා මාරියානම් කාන්තාව කපාකොටා ඝාතනය කෙරිණි. එම ඝාතනයෙන් පසු කහවත්ත ප්‍රදේශයේ අමානුෂික කාන්තා ඝාතන වැලක්ම සිදු විණි. 2012 වසර වන විට අබිරහස් ලෙස සිදුවූ එවැනි කාන්තා ඝාතන සංඛ්‍යාව අට දක්වා ඉහළ ගියේය. ඒ ගැන නොයෙකුත් කටකතා පැතිරිණි. ඒ ඝාතන භූතයෙකු සිදු කරන බවට බොහෝ දෙනෙක් පවසන්නට වූහ.
නයනා නිල්මිණිගේ නිවෙසට යාබද මීටර් දහයක පහළොවක දුරින් විසුවේ දර්ශන හෙවත් රාජුය. පතල් රැකියාවේ නිරතව සිටියත් රාජු ගමේ ප්‍රකටව සිටියේ කසිප්පු ජාවාරම්කාරයෙකු ලෙසයි. මිරිස්ස ප්‍රදේශයෙන් කොටකෙතනට සංක්‍රමණය වීම නිසා මිරිස්ස ගෙදර නමින් ප්‍රකටව සිටි රාජුලාගේ පවුලේ සහෝදර සහෝදරියෝ විශාල පිරිසකි. නයනාගේ පවුලේ අයත් රාජුගේ පවුලේ උදවියත් කුලුපග මිතුරන් ලෙස ජීවත් වූහ.
රාජුගේ වැඩිමහල් සහෝදරයා හේවාගමගේ ධර්මසිරිය. එවක ධර්මසිරි එක්සත් ජනතා නිදහස් සන්ධානයේ ගොඩකවෙල ප්‍රාදේශීය සභාවේ මන්ත්‍රීවරයෙකි. ඔහු එසමයේ රත්නපුර දිස්ත්‍රික්කයේ ප්‍රබල දේශපාලනඥයෙකු වන ජෝන් සෙනෙවිරත්නගේ සම්බන්ධීකරණ නිලධාරියෙකු ලෙසද කටයුතු කරමින් සිටියේය. වත්මන් රජයට පෙර පැවැති රජය සමයේ ධර්මසිරි සහ ඔහුගේ සහෝදරයන් කොටකෙතන ප්‍රදේශයේ වෙනමම බලපරාක්‍රමයක් ස්ථාපිත කරගෙන සිටියේ දේශපාලන හයියෙනි.
මුලින් ධර්මසිරි කොටකෙතන රාජු වෙසෙන නිවෙසේ විසුවත් පසුව ඔහු එම නිවෙස රාජුට දී කොළඹ ප්‍රදේශයේ පදිංචියට ගියේය. ධර්මසිරිගේ පවුලේ උදවිය එම නිවෙසින් ගිය පසු රාජු සමඟ ඔහුගේ බිරිය මොරපිටියගේ රසිකා චාන්දනී හෙවත් බට්ටි සහ දරුවන් සිවුදෙනා එම නිවෙසේ වාසය කළහ.
2011 ඔක්තෝබර් මාසයේ රාජුගේ අයියා, ධර්මසිරිගේ දියණියගේ විවාහ උත්සවයට රාජු විසූ නිවෙස ලකලැහැස්ති වෙමින් තිබිණි. ඊට අසල්වැසි නිවෙසේ වූ නයනා සහ කාවින්ද්‍යා ද බොහෝ සේ උදවු උපකාර කෙරුවේ නිවෙස් අස්පස් කරමින් සෑම කටයුත්තකටම එක් වෙමිනි. එසේම ධර්මසිරි සමඟද නයනලාගේ පවුලේ උදවියට දැඩි මිත්‍රත්වයක් තිබූ හෙයින් දියණියගේ විවාහයේ දෙවන මනාලිය වූයේද ඝාතනයට ලක් වූ කාවින්ද්‍යා දියණියය.
දිනක් නයනා සහ කාවින්ද්‍යා විවාහ උත්සවයට එම නිවෙස අස්පස් කරමින් සිටින අතරේ කාවින්ද්‍යාට පිටි වැනි කුඩක් සහිත කුඩා පැකැට්ටුවක් හමු විය. ඇය එය මවට පෙන්වූවාය. ඇගේ දෙලෝ රත් වුණේ එය මත්කුඩු පැකැට්ටුවක් බව දැනුණු විටයි. ඒ වන විටත් රාජුලාට ගමේ බොහෝ දෙනෙකුගෙන් දෝෂාරෝපණය එල්ල වෙමින් තිබුණේ මත්කුඩු ජාවාරම් කරන බවටයි. ගම්මුන් පවසන දෑ ඇත්ත බව සිතූ නයනා, කුඩු පැකැට්ටුව ඒ මොහොතේම රාජුගේ බිරියට දෙමින් දොස් කීවේ ගමේ අය කියන කතා සත්‍ය පවසමිනි. එදින ඇතිවූ නෝක්කාඩුව දිගින් දිගටම පැවැතිණි. ඒ අතර සිදුවූ නෝක්කාඩුව හේතුවෙන් දිනක් රාජු නයනාට මරණ තර්ජනද එල්ල කර ඇත. එසේ කාලය ගතවෙද්දී නයනාගේ නිවෙසට සුපුරුදු පරිදි කොළඹ සිටින ස්වාමියාගෙන් සහ පුත්‍රයාගෙන් ඇමැතුම් ලැබිණි. 2012 ජනවාරි 31 දිනද රාත්‍රියේ ඇමතුම් ගන්නා රෝහිතට සහ කුසල්ට නිවෙසේ වූ දෙදෙනාගෙන් කිසිදු පිළිතුරක් නොලැබිණි. අනතුරුව පෙබරවාරි 02 වැනිදා රාත්‍රියේ නිවෙසට එන රෝහිතට දක්නට ලැබුණේ තම බිරිය නිවෙසේ කාමරයක ඇඳක් මත ක්‍රෑර ලෙස ඝාතනය කර තිබූ ආකාරයයි. දියණිය කාවින්ද්‍යා ගැන සොයා බැලුවත් ඇයද නිවෙසේ නොවූවාය.
පළමු ද්විත්ව ඝාතනය
දෙවැනිදා දහවලේ රෝහිතගේ නිවෙසට කිලෝමීටර් හතරකට පමණ ඈතින් වූ ඕපාතවත්තේ තිබී තරුණියකගේ මළසිරුරක් හමුවිණි. එය හඳුනා නීම සඳහා රත්නපුර රෝහලට යවා තිබිණි. එම තරුණියගේ සිරුර ගැන සොයා බලද්දී එදින රාත්‍රියේම රෝහිතට දැනගන්නට ලැබුණේ එසේ ඕපාතවත්තෙ ඝාතනය කර සිටියේ තම දියණිය බවයි.
එම ද්විත්ව ඝාතනය ගැන මුලින්ම විමර්ශන ආරම්භ කළේ කහවත්ත පොලිසියයි. දින කිහිපයක් ගත වෙද්දීම ගම්වාසීන්ගෙන් චෝදනා එල්ල වූයේ අපරාධයට සම්බන්ධ සැකකරුවන් නිදැල්ලේ සැරිසරන බවත් කහවත්ත පොලිසිය සැකකරුවන් අත්අඩංගුවට ගැනීමට උනන්දුවක් නොදක්වන බවටයි. එම ඝාතන දෙකත් සමඟ කහවත්තෙන් එක දිගට වාර්තා වූ කාන්තා ඝාතන ප්‍රමාණයද 10 දක්වා ඉහළ ගියේය. පසුව එම ඝාතනය සංඛ්‍යාව 19 දක්වා ඉහළ ගොස් නතර වූයේ 2015 වසරේයි.
දේශපාලන බලමහිමය
කාන්තා ඝාතන වැලේ පළමු වරට ද්විත්ව ඝාතනයක් ලෙස වාර්තා වූ එම ඝාතනයන්ද එම ප්‍රදේශයේ පැතිර ගිය 'භූතයා'ගේ ගිණුමට බැර කරමින් බොහෝ දෙනෙක් කතාන්දර කියන්නට වූහ.
එහෙත් එවකට පොලිස්පතිව සිටි එන්. කේ. ඉලංගකෝන් මහතා උපදෙස් මත මේ පරීක්ෂණ සඳහා රත්නපුර අවට පොලිස් ස්ථානවලින් විමර්ශන කණ්ඩායම් ඇතුළුව කොළඹ අපරාධ කොට්ඨාසය සහ අපරාධ පරීක්ෂණ දෙපාර්තමේන්තුවද විමර්ශනවලට එක් කළේය. ඒ ලංකා ඉතිහාසයේ එක් සිදුවීමකට වැඩිම පොලිස් කණ්ඩායම් ප්‍රමාණයක් එක් කළ අවස්ථාව ලෙස ඉතිහාසගත වෙමිනි. ඒ අනුව නයනාගේ සහ කාවින්ද්‍යාගේ ඝාතකයන් කොටු කරගැනීමට පොලිස් කණ්ඩායම් 15ක්ම යෙදවිණි. මුල සිටම ඝාතනයේ සැකය එල්ල වී තිබුණේ නයනාගේ නිවෙසට යාබද නිවෙසේ විසූ රාජු කෙරෙහිය. සිද්ධියෙන් දින හතරකට පසු කහවත්ත පොලිසිය රාජු අත්අඩංගුවට ගත්තද පසුව මුදාහළේය. රාජුගේ අත්අඩංගුවට ගැනීමට එරෙහිව ඔහුගේ සහෝදරයා ධර්මසිරි කහවත්ත පොලිස් ස්ථානාධිපතිවරයාට දැඩි වාග් ප්‍රහාරයක් එල්ල කර තිබිණි. ඒ ධර්මසිරිට තිබූ දේශපාලන බලමහිමය නිසායි.
කෙසේ හෝ සිවු වතාවක් පමණ වරින්වර පොලිසියට කැඳවමින් රාජුගේ ප්‍රකාශ ලබාගත්තේය. පසුව ඝාතනයෙන් දින 34කට පසු අපරාධ පරීක්ෂණ දෙපාර්තමේන්තුවට රාජු, ඔහුගේ බිරිය රසිකා සහ දරුවෝ කැඳවනු ලැබූහ. එහිදී රාජුගේ දියණිය ඇය දුටු සියල්ල එකින් එක පැවැසීය. රාජුගේ දියණිය පවසා තිබුණේ 31 වැනි දා රාත්‍රියේ ලේ පෙරාගෙන නිවෙසට පැමිණි තාත්තා එක්වරම සාලයේ පුටු සෙටියේ වාඩි වී මවගෙන් වතුර වීදුරුවක් ඉල්ලාගෙන බිවූ බවත් ඔහු පුටුවේ වාඩි වන විටදී ඇඟේ තිබූ ලේ පුටුවේ සහ බිත්තියේ ගෑවුණු බවයි. පසුව තාත්තා එම ලේ පැල්ලම් මැකීමට බිත්තියේ තීන්තද ආලේප කළ බවයි.
එම ප්‍රකාශය රාජු සහ ඇගේ බිරිය අත්අඩංගුවට ගැනීමට කදිම හෝඩුවාවක් වූයේය. ඒ අනුව සිදු කළ විමර්ශනවලදී රාජුට සහාය වූ ත්‍රිරෝද රථ රියැදුරෙකු වූ සනත් නන්දන හෙවත් චූටි සහ රාජුගේ සහෝදරයා වූ ප්‍රාදේශීය සභා මන්ත්‍රී ධර්මසිරිද මාතර ප්‍රදේශයේ සැඟවී සිටියදී අත්අඩංගුවට ගත්තේ ඝාතනයට අනුබල දීමේ චෝදනා මතයි.
ඔවුන්ගේ පාපෝච්චාරණ මත එකී ඝාතනයේ සුල-මුල හෙළි කරගැනීමට පොලිසිය සමත් විය. ආසන්නම හේතුව වී තිබුණේ 2012 ජනවාරි 29 වැනි දා රාජුගේ සහෝදර ධර්මසිරිගේ පුත්‍රයා වන වැලිකඩ බන්ධනාගාරයේ සුබසාධක නිලධාරියකු ලෙස සේවය කළ මිහිලක නමැත්තා තිහගොඩ පොලිසිය අත්අඩංගුවට ගැනීමයි. මිහිලක අත්අඩංගුවට ගෙන තිබුණේ මාතර ප්‍රදේශයේ කෝටිපති ව්‍යාපාරිකයකුගෙන් කප්පම් ගැනීමේ සිද්ධියක් මුල් කරගෙනයි. එහෙත් මිහිලක සමඟ එක්ව මත්ද්‍රව්‍ය ජාවාරම් කළ රාජු ඇතුළු පවුලේ සැම සිතුවේ මිහිලක පොලිසියට අල්ලා දුන්නෙ නයනා බවටයි.
රාජු මිහිලක සමඟ එක්ව කලෙක සිටම ජාඇළ ප්‍රදේශයේ මහා පරිමාණ මත්ද්‍රව්‍ය ජාවාරම්කරුවකු සමඟ ජාවාරමක් කරගෙන ගොස් තිබූ බව පසුව පොලිසිය අනාවරණය කරගත්තේය. එම නිසා නයනා නුදුරේදීම තමාවද පොලිසියට අල්ලා දෙතැයි බිය වූ රාජු තම බිරිය සමඟ එක්ව ජනවාරි 31 වැනිදා රාත්‍රියේ නයනා සොයා ඇගේ නිවෙසට ගොස් ඇත. මත්ද්‍රව්‍ය පානයෙන් මත් වී සිටි රාජු, බිරිය ලවා නයනාට කතාකොට දොරගුළු හැර නිවෙසට ගොස් තම බිරිය ඉදිරියේදීම නයනා සහ කාවින්ද්‍යා දියණිය ඝාතනය කර ඇති බව හෙළිවිණි. පසුව හිතවතෙකු වූ සනත් සමඟ ත්‍රිරෝද රථයෙන් කාවින්ද්‍යාගේ සිරුර ඕපාතවත්තට රැගෙන ගොස් දූෂණයකොට කරාබු ජෝඩුවද ගලවාගෙන ගොස් තිබුණේ ඇය දූෂණයකොට ඝාතනය කළ අපරාධයක් බවට හැඟවීමටයි. එහෙත් සියල්ල හෙළි වීමෙන් පසු ඇසින් දුටු සාක්ෂි කිසිවක් නැති වුවත් පරවේෂණීය සාක්ෂි මත අධිකරණය රටම කතා කළ කොටකෙතන මුල්ම ද්විත්ව ඝාතනයේ මවට සහ දියණියට අත්වූ ඛේදනීය ඉරණමට යම් සාධාරණයක් ඉටුකළ බව පෙනේ.
එහෙත් රාජු මරණ දඬුවම ප්‍රකාශ කරන මොහොතේ විත්ති කූඩුවේ සිට පැවැසූවේ, “මේ සිද්ධියට මගේ සම්බන්ධයක් නැහැ. මේක සීඅයිඩීය ගොතපු කතාවක් “ යනුවෙනි.
එහෙත් එම කරුණ විත්තිකරු හෙවත් රාජුට මරණ දඬුවම නියම නොකිරීමට ප්‍රමාණවත් නොවන බව විනිසුරුවරයාගේ තීරණය විය.
