දෙවියන් ඉදිරියේ නිරුවත් වූ ත්රස්තවාදීන්ගේ අමානුෂික පළි ගැනීම් හමුවේ ජීවත් වීමේ වරම අහිමි වූ බැතිමතුන්ගේ ඛේදවාචකයට හෙටට (21) හරියට ම මාස හයක් පූර්ණය වේ. ජීවතුන් අතර නැත්තන් වෙනුවෙන් ජීවත්වන්නන් මුළු ජීවිත කාලය පුරාම දුක් සුසුම් හෙළනු ඇත. ඒ දුක් සුසුම් මුළුමනින් ම දරා ගන්නට සවියක් වීමට නොහැකි වුවත්, ඒ රිදුණු හිත් යම් තරමකට හෝ සුවපත් කරන්නට බොහෝ දෙනෙක් පෙළ ගැසෙමින් සිටිති. මේ ඒ අය පාස්කු ප්රහාරයෙන් ආධ්යාත්මික ව හා භෞතිකව නංවාලන්නට දායක වන්නන් ගේ කතාවයි.
පාස්කු ඉරිදා උදෑසන (අප්රේල් 21) ශ්රී ලාංකිකයන්ට අත් විඳින්නට සිදු වූයේ ඛේදජනක සිදුවීම් මාලාවකට ය. ජාතික ඛේදවාචකයක් වූ එදින ශ්රී ලාංකිකයන්ගේ හදවතින් කිසිසේත්ම ඈත් නොවන්නකි. මේ ම්ලේච්ජ ප්රහාරයේ බලපෑම තදබල ලෙස දැනුණේ මේ රටේ සමාන්ය ජන ජීවිත කෙරෙහි ය. ඔවුන්ගේ එදිනෙදා කටයුතු සාමාන්ය පරිදි සිදුකිරීමට ජනතාවට සති කිහිපයක් ගත විය. ඒ ප්රහාරයෙන් තිගැස්සී ගිය හදවත් හි වේදනාව තවමත් පහව ගොස් නැත. මේ ප්රහාරයත් සමඟ මෙරට සමාජයට මෙන්ම රජයට ද මුහුණ දෙන්නට වූ ප්රධාන ගැටලු අතර එයින් මියගිය හා තුවාල ලද වින්දිතයන් වෙනුවෙන් සමාජීය හා මනෝමය සහන ලබා දීමත් විනාශයට පත් වූ දේවස්ථාන ප්රතිසංස්කරණ කටයුතු සිදු කිරීමත් යන කරුණු මූලික විය. මේ ගැටලු විසඳීම උදෙසා රජය උත්සුක විය. ඒ අතර කතෝලික සභාවද සාමාන්ය ජනතාවද සාමුහිකව, ලොවටම ආදර්ශයක් වන ලෙස මේ සඳහා කටයුතු දියත් කළෝ ය. කෙසේ නමුත් මේ බිහිසුණු ත්රස්ත ප්රහාරය සිදු වී හෙට දිනට (21) හය මසක් සපිරෙයි.
හය මසක් ගත වූ දින මෙකී ත්රස්ත ප්රහාරයෙන් මියගිය හා තුවාල ලද වින්දිතයන් හා දැඩි සේ අලාභානි වූ දේවස්ථාන වෙනුවෙන් රාජ්ය අංශයෙන් මෙන්ම මෙරට කතෝලික සභාවෙන් ද පොදුජන සමාජයට සිදු වූ මෙහෙවර කෙසේද යන්න සොයා බැලීමට අපි උත්සුක වීමු. මන්ද මේ ප්රහාරයෙන් පීඩාවට පත් ජනතාවට සහන සලසත් දී ඒ වෙනුවෙන් අදාළ පාර්ශ්වයන් ලද පැසසුම්වලට වඩා ලද විවේචන හා විවරණ ද රාශියක් වූ බැවිනි.
වින්දිතයන් වෙනුවෙන් මූල්ය සහන
පාස්කු ප්රහාරයෙන් මියගිය හා තුවාල ලද වින්දිතයනට රජය ලබා දුන් සහන මොනවාද යන්න අප විමසා බැලුවේ රාජ්ය ප්රතිපත්ති හා ආර්ථික කටයුතු අමාත්යාංශය යටතේ ක්රියාත්මක වන හානි පූර්ණ ආයතනයෙනි. එහි අධ්යක්ෂ ආනන්ද විජේපාල මහතා සඳහන් කර සිටියේ මේ වන විට පාස්කු ප්රහාරයෙන් මියගිය සියලු ම වින්දිතයන් වෙනුවෙන් ලබා දිය යුතු මූල්යමය සහන ඔවුන්ගේ ළඟ ම ඥාතීන් වෙත ලබා දී අවසන් බවයි. ඔහු වැඩිදුරටත් මෙසේ පැවසීය.
'පාස්කු ප්රහාරය සිදු වූ අවස්ථාවේදී රජයේ විවිධ අමාත්යාංශ යටතේ මේ වින්දිතයන් වෙනුවෙන් විවිධ සේවා දියත් වුණා. ඒ අතර මේ මියගිය ජනතාවගේ අවමංගල්ය කටයුතු වෙනුවෙන් සහ තුවාල ලැබූවන්ගේ ප්රතිකාර කටයුතු වෙනුවෙන් මූල්ය සහන ලබා දීම සිදු වුණේ අප ආයතනය ඔස්සේයි. මේ ප්රහාරය නොසිතුව වෙලාවක සිදු වූ අතිශය වේදනාත්මක සිදු වීමක්. එදා යුද සමයේ දී වූ සිදුවීම් වගේ නෙවෙයි.
මෙහි දී අපි කටයුතු කළේ අමාත්ය මණ්ඩලය ලබා දුන් තීරණයක් මතයි. ඒ අනුව ප්රහාරයෙන් මියගිය පුද්ගලයන් වෙනුවෙන් මිලියනයක මුදලක් එක් පුද්ගලයකු වෙනුවෙන් පරිත්යාග කළා. ඒ වගේම තුවාල ලද පුද්ගලයන් වෙනුවෙන් ලක්ෂ පහක උපරිමයකට යටත්ව සහන ලබා දෙන්නට අපි කටයුතු කළා. මේ මුදල් තුවාල ලද්දන් වෙත ලබා දුන්නේ වෛද්ය නිර්දේශ පදනම් කරගෙනයි. අදාළ පුද්ගලයන්ගේ රෝගීභාවය දුබලතාව (මාස හයකට වැඩි කාලයක්) ඉපයීමේ ශක්තිය හානි වීම යන කාරණා එනම් දුබලතාව සියයට හැත්තෑවකට වැඩි සියල්ලන් සඳහා ලක්ෂ පහක මුදල ලබා දුන්නා. එය සියයට පනහක් බව වෛද්යවරුන් නිර්දේශ කළොත් එයින් භාගයක මුදල් ලබා දුන්නා. තුවාල සුව වීමට යන කාලය හා රෝගී භාවයේ ප්රතිශතය අඩංගු වෛද්ය නිර්දේශ මත තමයි මේ සියල්ල සිදු කළේ. ඒ වගේම බරපතළ තුවාල ලැබූවන් හෝ දැඩි සත්කාර ඒකකවල සිටින රෝගීන් මෙයින් අදහස් නොකළ බවත් කිව යුතුයි. ඔවුන් සඳහා අදටත් දෙවන අදියර යටතේ වෛද්ය නිර්දේශ මත අවශ්ය මූල්යධාර ලබා දෙන්න අපි කටයුතු කරනවා.
විදේශිකයන්ටත් වන්දි
මේ අනුව අපිට වාර්තා වුණු මියගිය 216ක් වෙනුවෙන් මිලියන 216ක් මුදලක් පරිත්යාග කර අවසන්. ඒ අතරම තුවාල ලද 416ක් වෙනුවෙන් මිලියන 78ක් ලබා දුන්නා.
මේ සිදුවීමෙන් පසුව අප ආයතනයේ කණ්ඩායම් පහක් මේ සිදුවීම් වාර්තා වූණු සෑම ප්රදේශයකට ම ගියා. ඒ නිවෙස්වල අය සමඟ කතාබහ කරලා සහන ලබා දීමේ කටයුතු වෙනුවෙන් අවශ්ය ලිපි ලේඛන දළ වශයෙන් හඳුනාගෙන හදිසියේ ම ලක්ෂ තුන බැගින් ඔවුන් වෙත ලබා දුන්නා; අවමංගල්ය කටයුතු වෙනුවෙන්. ඉන් පසුව අවශ්ය ලේඛන ලබාගෙන ඉතිරි මුදල් ලබාදීම සිදු කළා. තුවාල ලැබූවන් 9 දෙනකු හැර අපට අයදුම්පත් යොමු කළ සියල්ලන් වෙනුවෙන් මේ වන විට වන්දි මුදල් සියල්ල ලබා දී තිබෙනවා.' ඔහු පවසයි.
මේ අතර දේවස්ථානවලට දුර පළාත්වලින් පවා වන්දනාමාන සඳහා පැමිණ සිටි පිරිස් මිය ගොස් තිබුණි. ඒ අනුව නුවරඑළිය, මහනුවර, මොණරාගල, අක්මීමන, යාපනය, වවුනියාව වැනි ප්රදේශවලින් ද පැමිණි පුද්ගලයන්ගේ මරණ වාර්තා විය. ඔවුන් සඳහා ද ප්රාදේශීය ලේකම් කාර්යාල ඔස්සේ අවශ්ය සහන ලබා දීමට හානි පූර්ණ ආයතනය කටයුතු කර ඇත.
'මේ අයගේ සිරුරුත් කොළඹ සිට තමයි රැගෙන ගියේ. එවිට ඒ පුද්ගලයන් අයත් ප්රාදේශීය ලේකම් කාර්යාලවලින් ලක්ෂය බැගින් අවමංගල්ය කටයුතු සඳහා මුදල් ලබාදෙන්නට කටයුතු කළා. ' වැඩි දුරටත් ඔහු පවසයි.
මේ ප්රහාරයෙන් විදේශිකයන් 43 දෙනෙකුට ජීවිත අහිමි විය. ඒ අතරින් රටවල් දෙකක හත් දෙනෙකු වෙනුවෙන් ද රජය මිලියන හතක මුදලක් වන්දි ලෙස ලබා දී ඇත.
'මේ සිද්ධියෙන් මියගිය ජපාන ජාතිකයෙක් වගේම චීන ජාතිකයන් 6 දෙනෙකුට වන්දි ඉල්ලා තානාපති කාර්යාල හරහා අයැදුම් කර තිබුණා. ඒ අනුව අපි ඔවුන්ටත් වන්දි ලබා දුන්නා. නමුත් අනෙක් කිසිම රටකින් වන්දි ඉල්ලුම් කර තිබුණේ නැහැ.'
වින්දිතයන් ගැන සමීක්ෂණයක්
මෙහිදී සමහර පවුල්වල සියලු ම දෙනා මියගොස් තිබූ අවස්ථා වාර්තා විය. එවැනි පවුල් වෙනුවෙන් මුදල් ඔවුන්ගේ ළඟ ම ඥාතියා වෙත ලබා දීමට පියවර ගත් බව එනම් මව හෝ පියා, සහෝදර සහෝදරිය වෙත ලබා දීමට කටයුතු කළ බව හානි පූර්ණ ආයතනය පවසයි.
එලෙසම මූල්ය සහන ලබා දුන් පමණින් මේ වින්දිතයන්ට සිදු වූ හානිය පූර්ණය කළ නොහැකිය. ඔවුන් වෙත අධ්යාත්මික වශයෙන් ද සහන සැලැසිය යුතුය. මේ සඳහා ද හානිපූර්ණ ආයතනය කටයුතු කරමින් සිටියි.
'මේ වන විට මේ ප්රහාරයෙන් වින්දිතයන් බවට පත් වූ 709 දෙනා ගැනම අපි සමීක්ෂණයක් සිදු කර තිබෙනවා. ඒ අය හට අවශ්ය ඉදිරි කටයුතු සඳහා උපකාර කිරීමට හානි පූර්ණ ආයතනය ලෙස අපි ඉදිරියේ දී අවශ්ය වන ප්රතිපත්ති මාලාවක් මේ වන විට සකසා තිබෙනවා. ඒ අනුව ඉදිරියේදී ඒ ඔස්සේ ඔවුන්ගේ මනෝ සමාජ අවශ්යතා වෙනුවෙන් කටයුතු කරන්න අපි සූදානම්.'අධ්යක්ෂවරයා පවසයි.
අග්රාමත්ය කාර්යාලයෙන් අරමුදලක්
මේ ප්රහාරයෙන් විපතට පත් වූවන්ට සහන සැලැසීම සඳහා අග්රාමාත්ය කාර්යාලයෙන් ද මිලියන පන්සීයක අරමුදලක් පිහිටුවීමට කටයුතු කොට ඇත. රජයෙන් මිලියන සීයක මුදලක් ද අනෙකුත් පෞද්ගලික අධාර මඟින් ද මේ අරමුදල අරඹා ඇත. ඒ අනුව මෙමඟින් විපතට පත් වින්දිතයන් උදෙසා විදේශීය ප්රතිකාර ලබාගැනීමට මේ ඔස්සේ උපකාර කර ඇත.
කතෝලික සභාවෙන් ආධ්යාත්මික හා මනෝ උපකාර
කතෝලික සභාව ද මේ අරභයා විශාල දායකත්වයක් දැක්වීය. අදටත් මෙයින් පීඩාවට පත් වින්දිතයන් වෙනුවෙන් කතෝලික සභාවේ විවිධ ව්යාපෘති, වැඩසටහන් රැසක් මැල්කම් රංජිත් කාදිනල් අගරදගුරු හිමිපාණන්ගේ උපදේශකත්වයෙන් යුතුව සිදු වේ. කතෝලික සභාවේ කරීටාස් සෙත් සරණ කොළඹ අගරදගුරු පදවි සමාජ සේවා ආයතනයේ අධ්යක්ෂ ලෝරන්ස් රාමනායක පියතුමන් මේ පිළිබඳ අප විමසූ අවස්ථාවේ පවසා සිටියේ මෙවැන්නකි.
'පාස්කු ප්රහාරයෙන් කටුවාපිටිය හා කොච්චිකඩේ දේවස්ථානවලින් පුද්ගලයන් එකසිය පනහකට වැඩි පිරිසක් මිය ගියා. ඒවගේම හාරසීයකට වැඩි පිරිසක් තුවාල ලැබුවා. ඒ ප්රහාරය වූ වෙලාවේ තුවාල ලැබූවන්ට කාදිනල් පියතුමාගේ උපදෙස් මත රුපියල් පනස්දහස බැගින් ප්රතිකාර සඳහා අපි ලබා දුන්නා. මියගිය පවුල්වලටත් ලක්ෂය බැගින් අපට තිබෙන හැටියට අපි අවමංගල්ය කටයුතු වෙනුවෙන් ලබා දුන්නා. ඉන්පසුව දෙවැනි අදියරේදී සෙත් සරණ ආයතනයෙන් ඒ ප්රදේශවල නිවෙස්වලට අපේ පියතුමන්ලා සහ කන්යා සොහොයුරියන් ගොස් මුදල් පරිත්යාග සහ අනෙකුත් අවශ්යතා සොයා බලා සිදු කරන්න කටයුතු කළා. ඒ අතරම මේ විපතට පත් පවුල් වෙනුවෙන් මනෝ සමාජීය උපකාර, අධ්යාත්මික පෝෂණ වැඩසටහන් රැසක් දියත් කරන්නට කටයුතු කළා.' ලෝරන්ස් පියතුමන් පවසයි.
මේ වන විට පාස්කු ප්රහාරයෙන් තුවාල ලද බොහෝ දෙනෙකු සුවය ලබා ඇත. ශල්ය කර්ම සඳහා බඳුන් වූවන්ද සුවය ලබමින් සිටියි. හිස් කබල ගලවා ශල්යකර්ම සිදු කළ කුඩා දරුවන් ද මේ වන විට සුවය ලබමින් සිටියි. ඉන් දරුවන් හතර දෙනෙකු ම මේ වන විට නැවත පාසල් ගමන අරඹා ඇත.
'ඒත් තවමත් කිහිප දෙනෙක් දැඩි සත්කාර ඒකකවල ප්රතිකාර ලබනවා. ඒ අතර අංශයක් පණ නැතිව, අබාධිත ව දිවිගෙවන කිහිප දෙනෙකුත් ඉන්නවා. ඔවුන් වෙනුවෙන් තවදුරටත් ප්රතිකාර අවශ්යයි.' සෙත් සරණ ආයතනයේ සම්න්ධීකරණ නිලධාරිනී රෝෂේල් පෙරේරා පවසයි.
ලෝරන්ස් පියතුමන් පවසන පරිදි මේ වන විට මෙලෙස මියගිය හා තුවාල ලද ජනතාවට මේ වන විට සෙත් සරණ පදනම ඔස්සේ, රුපියල් මිලියන දෙසීයකට ආසන්න ප්රමාණයක මුදලක් වින්දිතයන්ගේ සුබසාධන හා සහන කටයුතු වෙනුවෙන් ලබා දී තිබේ.
එලෙසම කටුවාපිටිය ප්රහාරය හමුවේ අසරණ වූ වින්දිතයන් වෙනුවෙන් (කුලී නිවෙස්වල ජීවත් වූ ප්රහාරයෙන් පූර්ණ කාලීන ආබාධිත වූවන් වෙනුවෙන්) නිවාස ඉදිකිරීමේ ව්යාපෘතියක් ආරම්භ කිරීමට මේ වන විට පියවර ගෙන තිබේ. එය නාගරික ජනාවාස සංවර්ධන අධිකාරිය හා නිවාස සංවර්ධන අධිකාරිය එක්ව සිදු වෙයි. මේ සඳහා අවශ්ය ඉඩම් මිල දී ගැනීම වෙනුවෙන් මිලියන පනස්තුනක මුදලක් කතෝලික සභාව වෙන් කර තිබේ. මෙහි ඉදිකිරීම් කටයුතු සියල්ල රජය මඟින් සිදු වේ.
' මෙහි පළමු අදියර ලෙස නිවාස 14ක් ඉදිකරන්න සැලැසුම් කර තිබෙනවා. මේ එක් නිවාසයක් සකස් කරන්න රජයට ලක්ෂ විසි එකක් පමණ වැය වෙනවා. එය අදියර කිහිපයකින් නිමවීමට නියමිතයි.' ලෝරන්ස් පියතුමා පවසයි.
මේ ප්රහාරයෙන් කඩා වැටුණු ජීවිත නැවත නඟා සිටුවීමටත් ආර්ථික වශයෙන් වගේම අධ්යාත්මික වශයෙන් ඔවුන් ශක්තිමත් කිරීමටත් අප කටයුතු කර තිබෙනවා. ඒ සියල්ල සිදු වන්නේ කතෝලික සභාවේ අාධ්යාත්මික අංශයෙන්. එහි පියතුමන්ලා සහ කන්යා සොහොයුරියන් නිතරම මේ ප්රහාරයට මුහුණ දී දිවි ගලවාගත් අය අතරට කණ්ඩායම් ලෙස ගොස් විවිධ වැඩසටහන් කරනවා. ඒ වගේම මොවුන් මඩු පල්ලි වන්දනා සඳහාත් අපි රැගෙන යනවා. ඒ අතරතුර ඔවුනගේ සිත් සුවපත් වන විවිධ සාකච්ජා හා විවිධ වැඩසටහන්වලට ඔවුන් යොමු කරනවා...' පියතුමන් වැඩි දුරටත් පවසයි.
මේ දුක්බර සිදුවීම සුනාමි ව්යසනයට වඩා වෙනස් ම අත්දැකීමක් වූ බව අප සමඟ කතාබහ කළ ආයතන ප්රධානීන්ගේ අදහසයි. එනිසා මෙයින් විපතට පත් වූ වින්දිතයන් සමඟ කටයුතු කිරීමට සිදු වූයේ වෙනස් ම ආකාරයකට බව ඔවුන් පවසයි.
සෙත් සරණ පදනම ඔස්සේ පරිත්යාග
' මේ ප්රහාරයට ලක් වූණේ සමාජයේ ඉතා ම හොඳින් ජීවත් වූ මිනිසුන්; ඔවුන් කාටවත් අතපාපු අය නෙවෙයි. ඉතා හොඳ සමාජ ආර්ථික මට්ටම් තිබූ අය. ඔවුන් අපෙන් දෙයක් ඉල්ලන අය කියලා හිතලා කටයුතු කරන්න කිසිසේත්ම අපට පුළුවන් කමක් නැහැ. අපිට ඔවුන්ට බඩුමළු උස්සගෙන ගිහින් දෙන්න බැහැ. ඔවුන් එ්කට කැමැති නැහැ. එනිසා මොවුන්ට උපකාර කිරීමේ දී අලුත් ක්රමවේද භාවිත කරමින් තමයි ඔවුන්ගේ අවශ්යතා ඉටුකර දෙන්නට අපිට සිදු වන්නේ. මේ නිසා බඩුමලු වෙනුවට අපි ඔවුන්ට වවුචර් ලබා දෙන්න කටයුතු කළා. ඒ වගේම අනෙක් පැත්තෙන් අනවශ්ය විදිහට මේ අධාර ලබා ගන්න සූදානම් වන පිරිසකුත් ඉන්න බව පෙනුණා. අපිට වගකීමක් තිබෙනවා; අපිට ලැබුණු පරිත්යාග හා මුදල් අවශ්ය කෙනාට නියමිත පරිදි අවශ්යතා හඳුනාගෙන ලබාදීමේ. කතෝලික සභාවට ලැබෙන සියලු පරිත්යාග මේ වින්දිතයන් වෙනුවෙන් බෙදාහදා දෙන්නේ සෙත් සරණ පදනම ඔස්සේයි.' ලෝරන්ස් පියතුමන් වැඩි දුරටත් පවසයි.
ප්රහාරයෙන් විනාශ වූ දේවස්ථාන ගොඩනැගීම ද රජය උපරිම අයුරින් මේ වන විට සිදු කර තිබේ. කටුවාපිටිය හා කොච්චිකඩේ දේවස්ථාන මේ වන විට යථාතත්වයට පත් කොට හමාර ය. මඩකළපුව සියොන් දේවස්ථානයේ කටයුතු මේ වන විට අවසන් වෙමින් පවතියි. මෙම දේවස්ථාන පිළිසකර කිරීම සඳහා රජය මේ වන විට මිලියන ගණනක මුදලක් වැය කොට ඇත.
භෞතික සම්පත් එසේ ගොඩනැඟුණ ද සිය ඥාතීන්, හිතවතුන් අහිමි වූ මිනිසුන්ගේ හදවතේ තුවාලය සුව වීමට බොහෝ කල් ගතවනු ඇත. ඒ අය වෙනුවෙන් කළයුතු කාර්යය අප ඉදිරියේ අදට ද ඉතිරි ව ඇති බැව් අපේ විශ්වාසයයි.