ඉකුත් 11 දා රාත්රි 11.15ට පමණ සේරුනුවර කඳවුරේ හමුදා නිලධාරීන් දෙදෙනකු විසින් ටී-56 අවියක් සමඟ එල්ටීටීඊයේ හිටපු සාමාජිකයෙක් සේරුනුවර පොලිස් ස්ථානයට රැගෙනවිත් භාර දෙනු ලැබීය. ඒ එල්ටීටීඊ සාමාජිකයා සූදානම්ව සිටියේ යැයි කියන්නේ එල්ටීටීඊයේ හිටපු සන්නද්ධ අංශ නායකයකු මෙන්ම නියෝජ්ය ඇමැතිවරයකුව සිටි විනයාගමුර්ති මුරලිදරන් නොහොත් කරුණා අම්මාන් මරාදැමීමටය.
මේ කියන එල්ටීටීඊ සාමාජිකයා කිලිනොච්චියේ අම්බාල්කුලම්හි පදිංචිකරුවෙකි. තිස් හය වියැති ඔහු ජෝෂප් පීටර් රොබින්සන්ය. ඔහුගේ එල්ටීටීඊ නාමය තීපන්ය. ඔහු පොලීසියට භාර දෙමින් හමුදා සාමාජිකයන් සඳහන් කරන්නේ කිලිවෙඩ්ඩි පාලම ආසන්නයේදී මේ සැකකරු රාත්රී 10.15ට පමණ අත්අඩංගුවට ගත් බවකි.
හමුදාව පාර්ශ්වයෙන් මේ අත්අඩංගුවට ගැනීමේ කථාව කියැවෙන්නේ තීපන් රැඳී සිට ඇත්තේ මාර්ගයේ සිට මී. 20ක් පමණ කැලෑබද ප්රදේශයට වන්නට බවය. ඔහු සමඟ තවත් අයකු සිටි බවද කියති. හමුදා සාමාජිකයන්ට ඔවුන් ගැන ඇති වන්නේ සැකයකි. පරීක්ෂා කිරීමට සූදානම් වන විට ඔවුන් දෙදෙනා පලා යන්නට වූ අතර හසු වන්නේ තීපන් පමණි. ඔහු සමග ටී-56 ගිනි අවියක් පොලීසියට භාර දෙනු ලැබීය. අවිය තිබුණේ යැයි කියන්නේ බිම වැටීය. ඒ තීපන් සහ පලාගිය පුද්ගලයා රැඳී සිටියේ යැයි කියන ස්ථානයේය. විශේෂත්වය එම ගිනි අවියේ අනුක්රමික අංකය මකා දමා තිබීමය.
තීපන් කියන කතාව
එහෙත් තීපන් පවසන්නේ වෙනස්ම ආකාරයේ කතාවකි. ඒ කතාව අනුව ඔහු හමුදාව විසින් අල්ලාගනු ලැබ ඇත්තේ එදින සවස 3ට පමණය. කිලිනොච්චියේ සිට ඔහු සේරුනුවරට එන්නේ කරුණා අම්මාන් ඝාතන සැලසුමකටය. ඒ සඳහා ඔහු මෙහෙයවා ඇතැයි කියැවෙන්නේ ප්රංසයෙනි. සියල්ල සිදු වන්නේ ජංගම දුරකතනය ඔස්සේය. ඒ වට්ස්ඇප් සහ වයිබර් ඇමතුම් මඟිනි. කරුණා අම්මාන් ඝාතන සැලසුමට ඔහු සම්බන්ධ වන්නේ යැයි කියන්නේ වයස අවුරුදු එකහාමාරක් වන සිය දරුවාගේ හදවත් සැත්කමට අවශ්ය ලක්ෂ පහක මුදල් පොරොන්දුවකටය.
කිලිනොච්චියේ සිට ඔහු එන්නේ මඟී බස් රථයකිනි. ත්රිකුණාමලයට එන ඔහු සේරුනුවරට රැගෙන එන්නේ සැලසුමට සම්බන්ධ පුද්ගලයෙකි. ඒ යතුරුපැදියක නංවාගෙනය. අනතුරුව ඔහු භාර කෙරෙන්නේ ත්රිරෝද රථ රියැදුරකුටය. ත්රිරෝද රථයට නංවාගනු ලැබූ තීපන් ඔහු රැගෙන යන්නේ සේරුනුවර පිහිටි නිවෙසකටය. නැවතත් තීපන් ත්රිරෝද රථයක නංවාගෙන වාකරේ දෙසට රැගෙන යන්නේ ඔහුට ලද දුරකතන ඇමතුමකට අනුවය. හමුදා අත්අඩංගුවට ඔහුව පත් වන්නේ ඒ යන අතරතුරදීය.
තීපන් පවසන්නේ “උඹ ගාව ගංජායි කුඩුයි තියෙනව නේද?“ යැයි ප්රශ්න කරමින් ත්රිරෝද රථ රියැදුරු පන්නා තමා හමුදා සාමාජිකයන් විසින් අත්අඩංගුවට ගත් බවකි. අනතුරුව සිය දෑස් රෙදි කඩකින් බැඳ වාහනයක නංවාගෙන යම් ස්ථානයකට රැගෙන ගිය බවද තීපන් කියයි. තීපන් අනුමාන කරන්නේ ඒ තැන හමුදා කඳවුරක් වන්නට හැකි බවය. එහි සිටි හමුදා සාමාජිකයන් ඔහු සමඟ අදහස් හුවමාරු කරගෙන ඇත්තේ සුහදවය. ඒ කන්න බොන්න පවා දෙමිනි. එම කතාබහ අතරතුර පොහොර උරයක දැමූ ටී-56 අවියක් පෙන්වමින් “කරුණා අම්මාන් මරන්න නේද මේක ගෙනාවේ?“ යැයි විමසූ බවද තීපන් කියයි. ඒ අවිය තමාට අයත් එකක් නොවන බව පැවැසීමෙන් පසු නැවතත් ඔහුගේ දෑස් ගැටගැසෙන්නේ රෙදි පටියකිනි. ඒ රෙදි පටිය ඉවත් වන්නේ සේරුනුවර පොලීසියට කිට්ටුව-පාතකදීය.
තීපන් ත්රස්ත විමර්ශන කොට්ඨාසයට
තීපන් සේරුනුවර පොලිස් ස්ථානයට භාර දෙනවාත් සමඟ පොලිස් මූලස්ථානයෙන් නියෝගයක් ලැබෙන්නේ හමුදාව විසින් රැගෙන පැමිණි සැකකරු ත්රස්ත විමර්ශන කොට්ඨාසයට භාර දෙන ලෙසටය. ඒ අනුව මූලික සටහන් පමණක් පොලිස් පොත්වල තැබූ සේරුනුවර පොලීසියේ නිලධාරීන් ත්රස්ත විමර්ශන කොට්ඨාසයට තීපන් භාරදෙන්නේ ටී-56 අවියද සමඟිනි.
කොළඹින් සේරුනුවරට ගිය ත්රස්ත විමර්ශන කොට්ඨාසයේ නිලධාරීන් තීපන් කොළඹට රැගෙන එන අතරතුර කිලිනොච්චි පොලිස් ස්ථානයට දැනුම් දෙන්නේ අම්බාල්කුලම්හි පිහිටි තීපන්ගේ නිවෙස පරීක්ෂාවට ලක් කරන ලෙසටය. ඒ අනුව කිලිනොච්චිය පොලීසියේ නිලධාරීන් කිහිප දෙනකු තීපන්ගේ නිවෙස පරීක්ෂා කරන්න යන්නේ පොලිස් විශේෂ කාර්ය බළකායේ භට කණ්ඩායමක්ද සමඟිනි. ඒ වන විට නිවෙසේ සිටින්නේ තීපන්ගේ 23 වියැති බිරියත්, වයස අවුරුදු එකහමාරක දරුවාත්, බිරියගේ 28 හැවිරිදි සහෝදරියත් පමණි. ඒ අය සිය භාරයට ගත් කිලිනොච්චි පොලීසියේ නිලධාරීන් විශේෂ කාර්ය බළකායේ භටයන් සමඟ නිවෙස සෝදිසි කරන්න ගත්තේ ත්රස්ත විමර්ශන කොට්ඨාසයෙන් ලද උපදෙස් අනුවය. ඒ සෝදිසිය අතරතුර විශේෂ කාර්ය බළකායේ සෙබළකු තීපන්ගේ බිරියගේ අතෙහි වූ ජංගම දුරකතනය සියතට ගෙන පරීක්ෂා කරන්නේ අහඹු ලෙසිනි. රතු පැහැති කාපට්ටුවක් මත ඇතිරූ අවි ආයුධ තොගයක් සහිත ඡායාරූප පෙළක් දුරකතන තිරයෙන් මතු වන්නේ එවිටය. කොටි නායක වේලුපිල්ලේ ප්රභාකරන්ගේ රුව සහිත ටී-ෂර්ට් කිහිපයක්ද එහි දක්නට විය. ඒ එක් ඡායාරූපයක කොනක ඇගේ රුවද දක්නට ලැබිණි.
“මම මොකුත් දන්නේ නැහැ. මහත්තයා තමයි හැම දෙයක්ම දන්නේ“ ඒ ආයුධ ගැන ප්රශ්න කරන විට ඇය බියෙන් වෙව්ලමින් පවසන්න වූවාය.
අස්සක් මුල්ලක් නෑර මුළු නිවෙසම නැවතත් විශේෂ කාර්ය බළකායේ සෝදිසියට ලක් වන්නේ ඒත් එක්කම ය. නිවෙසට පිටතින් වහලත් බිත්තියත් අතර කොන්ක්රීට් සිවිලිම අස්සෙන් ජංගම දුරකතනයේ සටහන්ව තිබුණු අවි-ආයුධ තොගය මතු වන්නේ ඒ සෝදිසියේදීය. ටී-56 අවියක්, දුර විදින අර්ධ ස්යංක්රීය රයිෆලයක්, අත්බෝම්බ 05 ක්, මිලි මීටර් 9 සහ මිලිමීටර් 7 වර්ගයේ අවි වලට යොදන පතොරම් 71ක්, ටී-56 අවිවලට යොදන පතොරම් 154 ක්, සී-04 වර්ගයේ පුපුරන ද්රව්ය ඇතුළු යුද උපකරණ රැසක් මෙන්ම ප්රභාකරන්ගේ රුව ඇතුළත් ටී-ෂර්ට් 04ක්ද ඒ අතර විය. මේ ගැන කිලිනොච්චි පොලීසිය ත්රස්ත විමර්ශන කොට්ඨාසයට දැනුම් දෙන විට තීපන් සිටින්නේ කොළඹට රැගෙනවිත්ය. ප්රශ්න කිරීම් හමුවේ ඔහු ඒ වන විට සිටියේ සියල්ල වමාරමිනි. යාපනය කොන්ඩාවිල් හී වලදමා තිබුණු ක්ලේමෝ බෝම්බ දෙකක් ත්රස්ත විමර්ශන කොට්ඨාසයේ නිලධාරීන් විසින් ගොඩ ගන්නේ ඒ අනුවය. ඒ එක් බෝම්බයක් කිලෝ ග්රෑම් 15ක් බරැති ය. බොම්බ දෙකේම බර කිලෝ 30කි. ඒවා යුද්ධය අවසන් වකවානුවේදී එල්ටීටීඊය විසින් සැඟවූ ඒවාය. තීපන් පවසන්නේ කිලිනොච්චියේ නිවෙසින් සොයාගත් ආයුධත් එසේ ගොඩගත් ඒවා බවය. ඒ ටී-56 අවිය හැරුණු කොටය. මේ ආයුධ ගොඩ ගන්නේ මුලතිව් කැලෑවෙනි. ඒ 2018 වසරේදීය. ඒ ආයුධ අතර ක්ලේමෝ බෝම්බ ඇතුළු ආයුධ ගොන්නක්ම තිබී ඇති බව සඳහන්ය. තීපන්ගේ කිලිනොච්චියේ නිවෙසින් සොයාගන්නේ එලෙස ගොඩගත් ආයුධවලින් කොටසකි. ඉතිරි කොටස ඇත්තේද පොලිස් භාරයේ ය.
ප්රංස ඇමතුමකින් හසුරුවනු ලබන තීපන්ගේ ඉතිහාසය
ඒ ආයුධ කොටස පොලීසියට හසු වන්නේ ඒවා ගොඩ ගෙන කිලිනොච්චියට රැගෙන එන අතරතුරදීය. ඒ අතර වූයේ ක්ලේමෝ බෝම්බ ඇතුළු ආයුධ ගොන්නකි. ත්රිරෝද රථයක පටවාගත් ඒ ආයුධ මුලතිව් සිට රැගෙන එමින් සිටියදී පොලීසියට හසු වන්නේ ඔඩ්ඩුසුඩාන්හිදීය. ඒ රථ වාහන අංශයේ පොලිස් නිලධාරීන්ගේ හදිසි පරීක්ෂාවට ත්රිරෝද රථය ලක් වීමෙනි. එහිදී ත්රිරෝද රථ රියැදුරු ඇතුළු දෙදෙනකු පොලිස් අත්අඩංගුවට පත් වූවත් එහි සිටියෙක් පලායන්නේ පොලිස් ඇසට වැලි ගසමිනි. එදා ඒ පලා යන්නේ තීපන්ය. ඒ ගැන හෙළි වන්නේද තීපන්ගෙන් කළ ප්රශ්න කිරීම් හමුවේය.
තීපන් පවසන්නේ ඒ ආයුධ පවා ගොඩගත්තේ ප්රංසයේ සිට දුරකතනය ඔස්සේ ලැබෙන උපදෙස්වලට අනුව බවය. යාපනයෙන් ගොඩගත් ක්ලේමෝ බොම්බ දෙක ඇති තැන් පවා තමන් දැනගන්නේ යැයි තීපන් පවසන්නේ ප්රංස ඇමතුමෙනි.
විමර්ශන ඔස්සේ අනාවරණය වෙමින් ඇති ආකාරයට අනුව තීපන් හමුදා ඔත්තුකරුවෙකි. තීපන්ගෙන් හෙළි වී ඇති තොරතුරුවලට අනුව ඔහු එල්ටීටීඊයේ සන්නද්ධ අංශ සාමාජිකයකු ලෙස එක්ව ඇත්තේ 2007 වසරේදීය. ඔහුට එල්ටීටීඊ සාමාජිකයකු ලෙස එක් වීමට සිදුව ඇත්තේ එල්ටීටීඊ සාමාජිකාවක වූ වැඩිමහල් සහෝදරිය අසනීප තත්ත්වයක් නිසා සංවිධානයෙන් ඉවත් වීම හේතුකොට ගෙන ඒ හිදැස පුරවන්නටය. තීපන් සඳහන් කරන ආකාරයට අනුව ඔහු රැඳී සිට ඇත්තේ රාධා බලකායේ ය. අවසන් යුද සමයේ ඔහු රැඳී සිට ඇත්තේ යාපනයේ මුරුසිවිල් සහ වරණි ඉදිරි ආරක්ෂක වලල්ලේ ය. 2009 වසරේ යුද්ධය නිමාවීමත් සමග හමුදාවට භාර වන ඔහු පුනරුත්ථාපනය වීමකින් තොරව හමුදාවට සේවය කරන්නේ ඔත්තුකරුවකු ලෙසිනි. යුද්ධය නිමා වීමෙන් පසු සාමාන්ය ජනතාව අතර සැඟවී සිටි එල්ටිටීඊ සාමාජිකයන් හඳුනාගැනීමට පවා හමුදාව තමා යොදාගත් බවද තීපන් කියා ඇත.
ඔත්තුකරුවකු ලෙස දීමනාවක්ද ලබමින් වසර තුනකට ආසන්න කාලයක් හමුදාවට සේවය කළ තීපන් කටාර්හි රැකියාවක් සඳහා පිටත්ව යන්නේ ඔහු මෙහෙයවූ හමුදා නිලධාරීන්ගේ ආශීර්වාදයද ඇතිවය. එල්ටීටීඊයේ හිටපු සාමාජිකයන් සැලකිය යුතු පිරිසක් එකල කටාර්හි සේවයට ගොස් සිට ඇති අතර, ඒ අය අතරද සිටි වැඩි දෙනෙක් හමුදා ඔත්තුකරුවෝය. තීපන් එරට රැකියාවේ නිරත වන්නේ විදුලි කාර්මිකයකු ලෙසිනි. වසර කිහිපයක් කටාර්හි රැකියාවේ නිරත වූ තීපන් නැවත මෙරටට එන්නේ 2014 වසරේය. විවාහයක් කරගන්නේ ඒ පැමිණි පසුවය. විදුලි කාර්මිකයකු ලෙස සාමාන්ය දිවි පෙවතක් ගත කළ තීපන් තමාට හිතවත් හමුදා නිලධාරීන් සමඟ පැවැති සම්බන්ධකම්ද දිගටම පවත්වාගෙන ගියේය.
තීපන් දැන් එක්දරු පියෙකි. වයස අවුරුදු එකහාමාරක් වන ඒ දරුවා හදවත් රෝගියෙකි. වෛද්ය නිර්දේශය වී ඇත්තේ ශල්යකර්මයකි. ඒ වෙනුවෙන් රුපියල් ලක්ෂ පහක මුදලක් ඔහු සූදානම් කරගත යුතුය. විදුලි කාර්මිකයකු වූ තීපන්ට ඒ මුදල සොයාගැනීම යනු සිහිනයකි. කටාර්හි තමා සමඟ එකට සේවයේ නිරතව සිටි මිතුරකුට ඔහු සිය දරුවාගේ ශල්යකර්මය ගැන කියා උදවු ඉල්ලන්නේ එබැවිනි. ඒ මිතුරාද තීපන් මෙන් එල්ටීටීඊයේ හිටපු සාමාජිකයෙකි. ප්රංසයෙන් තීපන්ට දුරකතන ඇමතුමක් ලැබෙන්නේ ඒත් එක්කමය. ඒ පුද්ගලයා පෙනී සිටින්නේ එල්ටීටීඊ ඩයස්පෝරාවේ සාමාජිකයකු ලෙසිනි. දරුවාගේ ශල්යකර්මයට අවශ්ය මුදල් ලබාදීමට පොරොන්දු වන ඔහු ඒත් සමඟම තීපන් මෙහෙයවන්ට ගත්තේය. ඔඩ්ඩුසුඩාන්හිදී පොලීසියට හසු වන ආයුධ පවා ඔහු ඇලැක්ස් නමැති හිටපු එල්ටීටීඊ සාමාජිකයා සමඟ එක්ව මුලතිව් සිට ඔඩ්ඩුඩාන් වෙත රැගෙන එන්නේද ප්රංසයෙන් ලද උපදෙස්වලට අනුවය. කිලිනොච්චියේ පිහිටි තීපන්ගේ නිවෙසේ සිවිලිම අස්සේ සඟවා තිබියදී සොයාගත් ආයුධ උතුරේ තැන තැන වළදමා තිබියදී ගොඩගත් ඒවාය. තීපන්ගේ බිරියගේ අත වූ ජංගම දුරකතනයෙන් හමු වන ඡායාරූප ලබාගෙන ඇත්තේ ඒ ආයුධ තොරතුරු ප්රංසයට යවන්නටය. ඒ එවන් ඡායාරූප කිහිපයක් තමාට එවන ලෙස ප්රංසයෙන් ලද ඉල්ලීමකට අනුවය.
ත්රස්ත විමර්ශන කොට්ඨාසයේ නිලධාරීන්ගේ ප්රශ්න කිරීම් හමුවේ තීපන් පවසා ඇත්තේ අනුක්රමික අංක මකා දැමූ ටී-56 අවිය මෝටර් රථයකින් පැමිණි අයකු තමාට දුන් බවකි. ඒ පුද්ගලයා කවුරුන්දැයි තීපන් අදටත් දන්නේ නැත. ඒ පිටුපසද සිටින්නේ ප්රංසයේ සිට ඔහු මෙහෙයවන පුද්ගලයාය. ඔහු තීපන්ට වරින් වර මුදල් දී තිබිණි. වැඩිම මුදල වන්නේ රු. 50,000කි. ඒ මුදල ලැබෙන්නේ ගිනි අවිවල ඡායාරූප වෙනුවෙනි.
එහෙත් දරුවාගේ ශල්යකර්මයට අවශ්ය රු. ලක්ෂ පහක මුදල නම් එකවර ඔහු අතට පත් වූයේ නැත. ප්රංස ඇමතුම්කරු ලක්ෂ 5 වෙනුවෙන් තීපන්ගෙන් ඉල්ලා සිටින්නේ කරුණා අම්මාන් මරාදැමීම ය. ඉකුත් 11 වෙනිදා කිලිනොච්චියේ සිට ඔහු ත්රිකුණාමලයට එන්නේ ඒ වෙනුවෙනි.
ඔත්තුකරුවෝ
එදා නාලක සිල්වා යටතේ ක්රියාත්මක වූ ත්රස්ත විමර්ශන කොට්ඨාසයේ නිලධාරීහු තවත් සුවිශේෂ කාරණාවක් හෙළි කළහ. ඒ හමුදා ඔත්තුකරුවන් ලෙස කටයුතු කරන හිටපු එල්ටීටීඊ සාමාජිකයන් වළදැමූ අවි-ආයුධ ගොඩ ගැනීම් පිටුපස සිටින බවකි. ඔවුන් මෙහෙයවනු ලැබුවේ ප්රංසයේ සහ ස්විට්සර්ලන්තයේ සිටය. ඒ හෙළි කිරීම් නිසාම හමුදාවේ බුද්ධි අංශ සහ නාලක සිල්වා අතර ගැටුම් හටගත් බව ප්රසිද්ධ රහසකි. ජනාධිපති මෛත්රීපාල සිරිසේන සහ හිටපු ආරක්ෂක ලේකම් ගෝඨාභය රාජපක්ෂ මහත්වරුන් ඝාතන කුමන්ත්රණයකට නාලක සිල්වාගේ නම ඈඳමින් නාමල් කුමාර නමැත්තා හෙළිදරවුවක් කරන්නේත්, නාලක අනිවාර්ය නිවාඩු යැවෙන්නේත් ඒත් එක්කමය.
ඔඩ්ඩුසුඩාන්වලින් පසු නැවතත් එල්ටීටීඊයේ හිටපු සාමාජිකයන් ආවි-ආයුධ රැස් කිරීමක් ගැන වාර්තා වන්නේ මෙවසරේ ජනවාරි 1දා අලුයම වව්නියාව පුලියන්කුලමේ පූතූර් කෝවිල අසලදී පොලිස් පරීක්ෂාවකදී පුද්ගලයකු ආයුධ මල්ලක් අතහැර පලායෑමක් සම්බන්ධයෙන් කෙරෙන විමර්ශනයකදීය. ඒ මල්ලේ අත්බෝම්බ හතරක් සහ මයික්රෝ වර්ගයේ පිස්තෝලයක් විය.
මල්ලෙහි තිබුණු ජංගම දුරකතන දෙකක් ඔස්සේ පරීක්ෂණ පැවැත්වූ පොලීසිය සැකපිට අට දෙනකුම අත්අඩංගුවට ගත්තේය. වැඩි දෙනෙක් හිටපු එල්ටීටීඊ සාමාජිකයෝය. ඔවුන්ව මෙහෙයවා තිබුණේ ප්රංසයේ සහ ස්විට්සර්ලන්තයේ සිටය. විමර්ශනවලින් හෙළි වන්නේ පොලීසිය දැක ආයුධ පාර්සලය අතහැර පලායන්නේ ආනන්ද රාසා නැමැති එල්ටීටීඊයේ හිටපු ප්රබල සාමාජිකයකු බවයි. ආනන්ද රාසා ගැන මතකය නැවතත් අලුත් වන්නේ ඊට මාස කිහිපයකට පසු රාජ්ය බුද්ධි සේවයේ තොරතුරකට අනුව කොළඹ අපරාධ කොට්ඨාසයේ නිලධාරීන් කණ්ඩායමක් පාතාලයට සම්බන්ධ වී මත්ද්රව්ය සහ අවි ජාවාරම්වල නිරතව සිටි එල්ටීටීඊයේ හිටපු සාමාජිකයන් පිරිසක් වේයන්ගොඩදී අත්අඩංගුවට ගැනීමත් සමඟිනි. එදා ආනන්ද රාසා අතහැර යන ආයුධ පර්සලය පාතාලයට දෙන්නට රැගෙන එමින් සිටි එකක් බව හෙළි වන්නේ එවිටය.
පාතාලය සමඟ එක්ව සිටි ඒ එල්ටීටීඊ සාමාජිකයන් මෙහෙයවා තිබුණේ ස්විට්සර්ලන්තයෙන් සහ ප්රංසයෙනි. ඒ එල්ටීටීඊ ඩයස්පෝරාව විසිනි. දෙමළ ජාතික සන්ධානයේ පාර්ලිමේන්තු මන්ත්රී එම්ඒ සුමන්තිරන් මහතා ඝාතන සැලසුමක් ගැනද එහිදී හෙළි විය. ඒ ඝාතන සැලසුමට යොදාගැනීමට සඟවා තිබුණු ක්ලේමෝ බෝම්බයක් කොළඹ අපරාධ කොට්ඨාසය විසින් සොයාගන්නේ අත්අඩංගුවට ගත් එල්ටීටීඊ සැකකරුවන්ගේ තොරතුරු ඔස්සේය.
සිවරූබන්
පුලියන්කුලමේ අවි බෑගයේ කථාව එසේ විසඳෙන විට පලෙයි රෝහලේ අධිකරණ වෛද්ය සින්නයියා සිවරූබන්ව අත්අඩංගුවට ගන්නේ නැවතත් එල්ටීටීඊයේ නැඟිටීමක් ගැන කතාවක් එළියට එමිනි. ඔහුව අත්අඩංගුවට ගනු ලබන්නේ යුද හමුදාව විසිනි. වැඩිදුර විමර්ශන සිදු වන්නේ ත්රස්ත විමර්ශන කොට්ඨාසය යටතේය. එහිදී වෛද්ය සිවරූබන්ගෙන් ප්රශ්න කොට අවි ආයුධ රැසක්ද සොයාගැනීමට ත්රස්ත විමර්ශන කොට්ඨාසය සමත් විය. ඒ ආයුධ අතර ඒකේ-47 වර්ගයේ ගිනි අවියක්ද අත්බෝම්බ 11ක්ද පතරොම් සහ පුපුරන ද්රව්ය විශාල ප්රමාණයක්ද විය. ඒ පුපුරන ද්රව්ය සහ ආයුධ ඔහුට ලැබෙන්නේ හිටපු එල්ටීටීඊ සාමාජිකයන්ගෙනි. ත්රස්ත විමර්ශන කොට්ඨාසයේ නිලධාරීහු ඒ අයද අත්අඩංගුවට ගත්හ. මේ සියලු දෙනාම මෙහෙයවන බව ත්රස්ත විමර්ශන කොට්ඨාසයට පෙනී ගියේ ස්විට්සර්ලන්තයෙනි. උග්ර ජාතිවාදියකු මෙන්ම එල්ටීටීඊ හිතවාදියකුද වන වෛද්ය සිවරූබන් සංවිධානාත්මකව යම් පිරිසක් විසින් මෙහෙයවා ඇති බවද පෙනී ගියේය. සිවරූබන්ට ගිනි අවි ලබාදෙන්නේද ඔහුව මෙහෙයවමින් සිටි අයමය. ඒ අවිවල අනුක්රමික අංකය තිබෙන්නේ මකා දමාය.
ත්රස්ත විමර්ශන කොට්ඨාසයේ විමර්ශනවලින් හෙළිව ඇති ආකාරයට වෛද්ය සිවරූබන්ට ආයුධ ලබාදීම සම්බන්ධයෙන් සැකපිට අත්අඩංගුවට ගන්නා අය අතර හමුදා බුද්ධි අංශ සමඟ ඉතා කිට්ටුවෙන් සම්බන්ධකම් පවත්වන හිටපු එල්ටීටීඊ සාමාජිකයන්ද සිට ඇත. ඒ එක් සාමාජිකයකු ත්රස්ත විමර්ශන කොට්ඨාසය විසින් අත්අඩංගුවට ගන්නේ හමුදා බුද්ධි අංශය නොසන්සුන් කරමිනි. මේ අත්අඩංගුවට ගැනීම හමුදා බුද්ධි අංශයේ ඉහළ නිලධාරියකුට ඔහු දැරූ තනතුරද අහිමි වන තරමටම බලපෑවේය.
නැවත මතු වන කරුණා අම්මාන් ඝාතන කතාව
නැවතත් කරුණා අම්මාන් ඝාතන තැතක් ගැන කතාවක් මැතිවරණ උණුසුම අස්සේ මතු වන්නේය. ඒ වෛද්ය සිවරූබන් ත්රස්ත විමර්ශන ඔස්සේ වැදගැම්මකට නැති චරිතයක් බවට පත්ව තිබියදීය. එවර චරිතය තීපන්ය.
පසුගිය 11 දින ත්රිකුණාමලයට යන්නැයි කියා තීපන්ට දැනුම් දෙන්නේද ප්රංස ඇමතුම්කරුය. පොදු ප්රවාහන මඟී බස් රථයකින් ත්රිකුණාමලයට යන තීපන්ව පිළිගන්නේ යතුරුපැදියකින් පැමිණි අයෙකි. තීපන්වත් ඔහුවත් මුණගස්සන්නේද ප්රංස ඇමතුම්කරුය. ත්රිකුණාමලයේ බස් නැවතුම් පොළෙන් තීපන් යතුරුපැදියට ගොඩ කරගත් ඒ පුද්ගලයා ඔහු රැගෙන යන්නේ සේරුනුවරට ය. එහිදී ඔහු භාර කෙරෙන්නේ ත්රිරෝද රථයකින් පැමිණි අයකුටය. ඒ පුද්ගලයා තීපන් රැගෙන යන්නේ සේරුනුවර පැත්තේ ඇති නිවෙසකටය. මඳ වේලාවක් ඔවුන් දෙදෙනා ඒ නිවෙසේ රැඳීසිටියහ. ඒ, කරුණා අම්මාන් ඝාතන සැලසුම් සමඟ අවශ්ය ආයුධ රැගෙන එන පුද්ගලයාගෙන් ඇමතුමක් ලැබෙන තුරුය. ඇමතුම ලැබෙන්නේ ත්රිරෝද රථයෙන් තීපන් රැගෙන පැමිණි පුද්ගලයාටය.
ඒ ඇමතුමෙන් කලබල වන ඒ පුද්ගලයා “බඩු අරගෙන ඇවිල්ල. ඉක්මනට යමු“ යි පවසමින් තීපන් ත්රිරෝද රථයට ගොඩ කරගත්තේය. ඒ කලබලය නිසාම බැටරි ආරෝපණය කිරීමට නිවෙසේ විදුලිය හා සම්බන්ධ කර තිබුණු සිය ජංගම දුරකතන දෙක අතට ගන්නට තීපන්ට මතකයක් නොවීය. ඔහුට සිය ජංගම දුරකතන දෙක මතක් වන්නේ ඒ යන ගමනේදී හමුදාව විසින් ඔහු අල්ලාගෙන දෑස් බැඳ කඳවුරකට රැගෙන ගිය පසු ඒ ජංගම දුරකතන දෙක ඔහුගෙන් ප්රශ්න කළ හමුදා නිලධාරියකු අත තිබෙනු දුටු විටය. ඒ ජංගම දුරකතන දෙක දැන් ඇත්තේ ත්රස්ත විමර්ශන කොට්ඨාස භාරයේය.
මේ සියලු කාරණා සියුම්ව අධ්යයනය කළ විට පෙනී යන්නේ සැබෑ ලෙසම මේ සියල්ල සිදුව ඇත්තේ පිටපතකට අනුව බවකි. ත්රස්ත විමර්ශන කොට්ඨාසයේ විමර්ශන අවසානයේ ඒ සියල්ල නුදුරේදීම රටට හෙළි වනු ඇත.