නිදහසින් පසු ශ්‍රී ලංකා ඉතිහාසයේ රාජ්‍ය සේවකයන්ට වැඩියෙන්ම වැටුප් වැඩි කළ රජය වත්මන් රජය බව මුදල් ඇමැති මංගල සමරවීර මහතා ප්‍රකාශ කළේය.
වසර 2015 බලයට පත් දා සිට ලබන වසරේ ජනවාරි මාසය වන විට රාජ්‍ය සේවක වැටුප් 107%කින් වැඩි කිරීමට තරම් ගණන් බලා තිබිණි. මේ ගණන් බැලීම් වසර 2015දී රජය පවසන විට විපක්ෂයේ පිරිස් ඇතැම් විට අවලාද නැඟූහ. ඒ එතරම් වැටුප් වැඩිකිරීමක් කිසිදාක රජයට කළ නොහැකි බව පවසමිනි. එනමුත් මේ වන විට රජය සිදු කොට තිබෙන රාජ්‍ය සේවක වැටුප් වැඩිකිරීම් සහ විශ්‍රාම වැටුප් දීමනා ඉහළ දැමීම් ප්‍රතිශතාත්මකව ගණන් බැලුව හොත් මුලින් කී ප්‍රමාණයටත් වඩා ඉහළ අගයක් ගන්නා බව මුදල් ඇමැතිවරයා පවසයි. රජය වර්ෂ 2015දී රාජ්‍ය සේවකයන්ට මාසිකව රු. 2500ක අතුරු දීමනාවක් වසර 4ක් පුරා ලබා දුනි. ඊට අමතරව 15% සහ 5% ක දීමනා 2ක් සෑම රාජ්‍ය සේවකයකුටම පසුගිය කාලය පුරා ලබා දී තිබේ. එලෙස වැටුප් වැඩි වීම 2015 පැවැති මට්ටමට සාපේක්ෂව 2020 වන විට 107%ක වැඩි වීමකි.
එහෙත් රජය රාජ්‍ය සේවයේ විශේෂ සේවාවන් සඳහා වරින් වර වැටුප් වැඩිකරන ලදි. ඒ අනුව විශේෂිත සේවා නොවන හා විශේෂිත සේවා අතර වැටුප් විසමතාවයක් පැනනැඟිණි. මෙසේ පැනනැඟි විසමතා දුරුකිරීමට ජනාධිපති මෛත්‍රීපාල සිරිසේන මහතා විසින් රාජ්‍ය සේවක විශේෂ වැටුප් විසමතා දුරුකිරීමේ නිර්දේශ රජයට ඉදිරිපත් කිරීමට ජනාධිපති කොමිසම පත්කරන ලදී. එම කොමිසමේ සභාපතීත්වය දැරූ එස්. රනුග්ගේ මහතා ප්‍රධාන සාමාජික පිරිසගේ නිර්දේශ පසුගිය මාසයේ රජයට ලබා දුනි. ඒ පිළිබඳ අවධානය යොමු කළ රජය එම නිර්දේශ මුලින් 2021 සිට ක්‍රියාත්මක කිරීමට තීරණය කර තිබුණද නැවත එය 2020 මැද පටන් ක්‍රියාවට නැංවීමට කටයුතු යොදා තිබිණි.
එවන් අවස්ථාවක රජයේ සේවාවන්හි සේවකයෝ විවිධ අවස්ථාවල විරෝධතා, උද්ඝෝෂණ පවත්වමින් රජයට වැටුප් වැඩිකරන ලෙස බලකර සිටියහ. මේවා පිළිබඳව සැලකිල්ලට ගත් රජය 2020 ජනවාරි මාසයේ සිට එස්. රනුග්ගේ වැටුප් කොමිසමේ නිර්දේශ වැටුප් වැඩිකිරීමට ඇමැති මණ්ඩලය අනුමැතිය ලබා දුනි. ඒ අනුව වසර 2020 වැටුප් වැඩිකිරීමට රජයට රු. බිලියන 120 ක අතිරේක මුදලක් වැයවනු ඇත. මෙම අතිරේක මුදල් වැඩිවීමත් සමඟ රජයේ රාජ්‍ය සේවක වැටුප් බිල රු. බිලියන 1000 ඉක්මවනු ඇත. මෙලෙස රු. බිලියන 1000ක් රාජ්‍ය සේවක වැටුප් සඳහා ලබා දුන් රජයක් නිදහස් ශ්‍රී ලංකා ඉතිහාසයේ පැවැතී නැත. වත්මන් රජය තරම් විශාල ලෙස රාජ්‍ය සේවක වැටුප් වැඩිකළ රජයක් මීට පෙර තිබුණේ නම් පෙන්වා දෙන ලෙස තමා විවේචකයින්ට අභියෝග කරන බව ද මංගල සමරවීර මහතා පවසයි.
වසර 2015 සිට වසර 2020 දක්වා රාජ්‍ය සේවක වැටුප් වැඩිවීම තුළ සාමාන්‍ය කාර්යාල කාර්ය සහායකයකුගේ සිට අමාත්‍යාංශ ලේකම්වරයා දක්වා විශාල ලෙස වැටුප් වැඩි වේ. එපමණක් නොව මූලික වැටුපට මේ දීමනා එක්කිරීම මත ඔවුන් ලබාගන්නා අනෙකුත් දීමනා, අනෙකුත් ණය මුදල් සහ අතිකාල දීමනා පවා ඉහළ යනු ඇත. මීට අමතරව සෞඛ්‍ය පහසුකම්, ප්‍රවාහන පහසුකම්, නිවාස පහසුකම් සඳහා ද රජය විශාල මුදලක් වැයකොට ඇත. දුම්රිය සේවය, තැපැල් සේවය, අධ්‍යාපන අංශ ප්‍රධාන සියලු ක්ෂේත්‍රයන්හි වැටුප් විසමතා දුරුකිරීමට නව වැටුප් ක්‍රම, විශ්‍රාමික දීමනා ඉහළ දැමීම් සිදුකළ රජය ආබාධිත රණවිරුවන්ගේ වැටුප් හා විශ්‍රාමික දීමනා ඔවුන්ටත්, ඔවුන්ගෙන් පසු යැපෙන්නන්ටත් විශාල ලෙස වැඩිකොට ලබාදීමට පියවර ගෙන ඇත.
පහත දැක්වෙනුයේ රාජ්‍ය සේවක වැටුප් වසර 2015 සිට 2020 දක්වා වැඩි වී ඇති ප්‍රමාණය සහ ප්‍රතිශතාත්මක විස්තරයකි.
