දේශයේ නිදහස සහ ස්වෛරීත්වය වෙනුවෙන් නිරන්තරයෙන් පෙනී සිටින තමන් ඊට හානි වන කිසිදු කටයුත්තක නිරත නොවන බව ශ්‍රී ලංකා පොදුජන පෙරමුණේ ජනාධිපති අපේක්ෂක ගෝඨාභය රාජපක්ෂ මහතා ප්‍රකාශ කළේය. ගෝඨාභය රාජපක්ෂ මහතා එම අදහස් පළ කළේ කොළඹ ෂැංග්‍රිලා හෝටලයේ දී පසුගියදා පැවැති මාධ්‍ය හමුවකට සහභාගී වෙමිනි. එහිදී මාධ්‍යවේදීන් නැඟූ ප්‍රශ්න සහ ඒවාට ලැබුණු පිළිතුරු මෙසේය.
ප්‍රශ්නය - ශ්‍රී ලංකාව 2015 වසරේ දී එක්සත් ජාතීන්ගේ මානව හිමිකම් කොමිසමට පොරොන්දුවක් ලබා දී තිබෙනවා. ඔබගේ රජයක් යටතේ එම පොරොන්දුව සම්බන්ධයෙන් කටයුතු කරන්නේ කෙසේද?
ගෝඨාභය රාජපක්ෂ- අපි දන්නේ නැහැ ඒ අය වර්තමාන රජය සමඟ කිනම් එකඟතාවකට එළැඹිලා කියලා. කෙසේ නමුත් එක්සත් ජාතීන් ඇතුළු අනෙකුත් මානව හිමිකම් සංවිධාන සමඟ සුහදව කටයුතු කරන්නට සූදානම්.
ප්‍රශ්නය - ඔබගේ මැතිවරණ ප්‍රතිපත්ති ප්‍රකාශය තුළ ඉදිරිපත් කර ඇති ප්‍රතිපත්ති ක්‍රියාත්මක කිරීම සඳහා මුදල් සොයාගන්නා ආකාරය කුමක්ද?
මහින්ද රාජපක්ෂ - ඔය ප්‍රශ්නයම අපෙන් ඇහුවා 2005දීත්. අපි යුද්ධය පටන් ගන්නකොට ඇහුවා මුදල් කොහෙන්ද කියලා. අපට එහෙම ගැටලුවක් මතු වෙන්නේ නැහැ.
ප්‍රශ්නය - ඔබ යුද හමුදාවට නායකත්වය දෙන සමයේ හමුදාවට යටත් වුණු සිවිල් වැසියන් හට කුමක්ද වුණේ? ඔවුන් කොහෙද?
ගෝඨාභය රාජපක්ෂ - ඔබට වැරදීමක් වෙලා තියෙනවා. මම කවදාවත් යුද හමුදාවට නායකත්වය දුන්නේ නැහැ.
ප්‍රශ්නය - ආරක්ෂක ලේකම්වරයා ලෙස සිටියදී යටත් වුණු අයට මොකද වුණේ?
ගෝඨාභය රාජපක්ෂ- මම ආරක්ෂක ලේකම්වරයා ලෙස සිටියදී හමුදා භාරයට පත් වූ 13,784ක් පුනරුත්ථාපනය කොට නැවත සමාජයට මුදා හැර තිබෙනවා. එපමණක් නොවෙයි අපි ඔවුන්ට හමුදාවේ මෙන්ම සිවිල් ආරක්ෂක බළකායේ රැකියා පවා ලබාදුන්නා. මම හිතනවා අපි තමයි මේ ලෝකයේම සාර්ථකම පුනරුත්ථාපන වැඩසටහන ක්‍රියාත්මක කළේ කියලා.
ප්‍රශ්නය- එයින් කියැවෙන්නේ කිසිදු පුද්ගලයකු අතුරුදන් වී නැති බවද?
ගෝඨාභය රාජපක්ෂ - අතුරුදන් වූ පුද්ගලයන් සහ හමුදාවට යටත් වූ පුද්ගලයන් කියන්නේ කොට්ඨාස දෙකක්. හමුදාවේ පවා හාරදහසකට වැඩි පිරිසක් මෙහෙයුම්වල දී අතුරුදන් වී සිටිනවා. ඕනෑම යුද මෙහෙයුමක දී හඳුනාගත නොහැකි මෘත ශරීර සංඛ්‍යාවක් තිබෙන්නට පුළුවන්. මම ඇස් දෙකෙන් දැක තිබෙනවා යාපනයේ දී එවැනි තත්ත්වයන්. ඔවුන් අතුරුදන් වෙලා යැයි කියන්නේ ඔවුන්ගේ මවුපියන් ඇතුළු ඥාතීන්ට මෘත ශරීර දක්නට නොලැබීම නිසයි.
ප්‍රශ්නය - සමහරුන් කියනවා යටත් වුණු ඇතැම් පුද්ගලයන් ආපසු නොපැමිණි බව? ඔබ කියන්නේ ඔවුන් බොරු කියනවා කියලද?
ගෝඨාභය රාජපක්ෂ - ඕනෑ කෙනකුට ඕනෑ දෙයක් කියන්න පුළුවන්. ඒවා අනුමාන පමණයි. අපි පුද්ගලයාගෙන් පුද්ගලයාට හොයා බලා තිබෙනවා. එවැනි කිසිම සිද්ධියක් වාර්තා වී නැහැ.
ප්‍රශ්නය- මේ ප්‍රශ්නය මහින්ද රාජපක්ෂ මහතාට, ඔබ මෙතෙක් දෙමළ ජාතික සන්ධානය සමඟ සාකච්ඡාවක් කර තිබෙනවාද?
මහින්ද රාජපක්ෂ - තවම නැහැ.
ප්‍රශ්නය- ආර්. සම්බන්ධන් මහතා ප්‍රකාශ කර තිබෙනවා ඔවුන්ගේ සහයෝගය නැත්නම් ප්‍රශ්නයක් ඇති වෙයි කියලා. ඔබ තීරණයක් අරගෙන තිබෙනවාද දෙමළ ජාතික සන්ධානය සමඟ සාකච්ඡාවක් කරන්න?
මහින්ද රාජපක්ෂ - අපිත් එක්ක සාකච්ඡා කරන්න කැමැති ඕනෑම පක්ෂයක් සමඟ සාකච්ඡා කරන්න අපි සූදානම්.
ප්‍රශ්නය - 2015 ජනාධිපතිවරණයෙන් පසුව අගමැති මාරු කළා. එවැන්නක් සිදු වූයේ ඉතිහාසයේ පළමු වතාවටයි. ඔබ ජනාධිපති වුවහොත් එසේ අගමැති මාරු වෙන්න අවස්ථාවක් තිබෙනවාද?
මහින්ද රාජපක්ෂ - ජනාධිපතිවරයා දිවුරුම් දුන් වහාම අගමැති ප්‍රමුඛ කැබිනට් මණ්ඩලය අහෝසි වෙනවා.
ප්‍රශ්නය - මේ ප්‍රශ්නය මහින්ද රාජපක්ෂ මහතාට. ශ්‍රි ලංකා නිදහස් පක්ෂය ප්‍රකාශ කර තිබෙනවා ඔවුන්ගේ සහාය ගෝඨාභය රාජපක්ෂ මහතාට හිමි වන බවට. නමුත් මැතිවරණ ව්‍යාපාරයේ දී නිදහස් පක්ෂයේ නායකයා වන මෛත්‍රිපාල සිරිසේන මහතා දකින්නට නැහැ.
මහින්ද රාජපක්ෂ -ඒක එතුමාගේ පෞද්ගලික තීරණයක්. එතුමා කියලා තියෙනවා නිර්පාක්ෂිකව ඉන්නවා කියලා. ජනාධිපතිවරයා යටතේ තමයි පොලීසිය සහ ආරක්ෂක අමාත්‍යාංශය තියෙන්නේ. එතුමා කල්පනා කරනවා ස්වාධීන මැතිවරණයක් පැවැත්විය යුතු බවට. ඒ නිසා තමයි එතුමා නිර්පාක්ෂිකව ඉන්නේ.
ප්‍රශ්නය - මෙතැන සිටින දෙමළ, මුස්ලිම් නායකයන් ඔබට සහයෝගය දෙන්නේ කුමන කොන්දේසි මතද?
ගෝඨාභය රාජපක්ෂ - මම මේ නායකයන් සමඟ කතා කරන විට ඔවුන් කතා කළේ ඔවුන්ගේ පළාත් දියුණු කිරීමට අප ගන්නා ක්‍රියාමාර්ග ගැන පමණයි. උතුරේ සහ වතුකරයේ ගැටලු සම්බන්ධයෙන් අපි කතා කළා. ඒ ගැටලුවලට මම ඉදිරිපත් කළ මතය ගැන ඔවුන් බොහොම සතුටු වුණා.
ප්‍රශ්නය - අපි දැක්කා ඔබගේ එක රැස්වීමක දී මහින්ද රාජපක්ෂ මහතා ප්‍රකාශ කළා පොහොර නිකම් දෙනවා කියලා. එහෙම දෙන්න පුළුවන්ද?
ගෝඨාභය රාජපක්ෂ - අපි ප්‍රශ්නය දෙස බැලිය යුත්තේ දැනී තිබෙන ආකාරයටම නොවෙයි. එතැනදී අපි කල්පනා කරන්නේ අපි කොහොමද ආහාර නිෂ්පාදනයෙන් ස්වයංපෝෂිත වෙන්නේ කියන කාරණයයි. මැදපෙරදිගට පමණක් ඩොලර් බිලියන 160 එළවළු ආසියාවෙන් ගේනවා. ඇයි අපට ඒකට සම්බන්ධ වෙන්න බැරි. අපි මේ සියල්ල පදනම් කරගත්තේ යම් කාරණයක් මුල් කරගෙන.
ප්‍රශ්නය - ශ්‍රී ලංකාව සහ අනෙකුත් රටවල් අතර අස්සන් තබා තිබෙන සහ අස්සන් තබන්නට තිබෙන ගිවිසුම් සම්බන්ධයෙන් ඔබ අනුගමනය කරන ක්‍රියාමාර්ගය කුමක්ද? විශේෂයෙන් ඇක්සා සහ සෝෆා වැනි ගිවිසුම්?
ගෝඨාභය රාජපක්ෂ - ඇක්සා ගිවිසුම ගතහොත් අපි අත්සන් තැබුවේ අද ඉදිරිපත්ව තිබෙන ගිවිසුමට වඩා වෙනස් ගිවිසුමක්. මම කිසිදු ගිවිසුමකට අස්සන් තබා නැහැ. මම නිතරම පෙනී සිටින්නේ නිදහස් හා ස්වෛරී ජාතියක් වෙනුවෙන්. මම ඊට එරෙහි කිසිදු කටයුත්තක් කරන්නේ නැහැ.
ප්‍රශ්නය - ඔබගේ මාධ්‍ය අංශය නිවේදනයක් නිකුත් කර තිබෙනවා අන්තවාදීන්ට සහයෝගය ලබා දෙන්නේ නැහැ කියලා. අන්තවාදය සම්බන්ධයෙන් ඔබ දරන මතය කුමක්ද?
ගෝඨාභය රාජපක්ෂ - අන්තවාදියෙක් කියන්නේ ආගමික හෝ වෙනත් හේතුවක් මත සාමාන්‍ය වැඩපිළිවෙළට විරුද්ධව එක් අන්තයක් ගෙන කටයුතු කරන අය. නමුත් ජාතිකවාදින් කියන්නේ තමන්ගේ ජාතිය වෙනුවෙන් පෙනී සිටින අය.
ප්‍රශ්නය - වතුකරුවන්ගේ වැටුප් ප්‍රශ්නය පිළිබඳ දකින්නේ කොහොමද?
ගෝඨාභය රාජපක්ෂ- අපි ඇත්තටම විශ්වාස කරනවා වතුකරයේ ජනතාවගේ වැටුප් වැඩි කළ යුතු බව. වතු කම්කරුවාට ජීවත් වෙන්න පුළුවන් වේතනයක් ලැබිය යුතුයි. එපමණක් නොවෙයි ඔවුන්ගේ අධ්‍යාපනය ඇතුළු අනෙකුත් පහසුකම් දියුණු කිරීම සම්බන්ධයෙනුත් අපි අවධානය යොමු කළ යුතුයි.
ප්‍රශ්නය - ඔබට සහයෝගය පළ කළ ශ්‍රී ලංකා නිදහස් පක්ෂයේ අයට ජනතාවගෙන් විරෝධයක් මතු වෙන ආකාරය අපි දැක්කා. එය ඔබගේ වැඩපිළිවෙළ සමඟ සැසඳෙන්නේ කොහොමද?
මහින්ද රාජපක්ෂ - අපි ඒ අයට අවවාද කළා. ආසන සංවිධායකවරුන් මාර්ගයෙන් අපි ඒ සඳහා සුදුසු ක්‍රියාමාර්ග ගන්නවා.
ප්‍රශ්නය - බැසිල් රාජපක්ෂ මහතා හින්දු පුවත්පතට කියා තිබුණා කවුරු ජනාධිපති වුවත් ආණ්ඩුවේ ප්‍රධානියා වන්නේ මහින්ද රාජපක්ෂ මහතා බව. ඔබ ඉන්නෙත් ඒ මතයේද?
මහින්ද රාජපක්ෂ - ඒක අපට බෙදාගන්න පුළුවන්.
