2019 ජනාධිපතිවරණයට ඉදිරිපත්ව සිටින අපේක්ෂකයන්ගේ ප්‍රතිපත්ති සහ අදහස් ප්‍රකාශ කෙරෙන ‘මීට් කැන්ඩිඩේට්’ නම් විවෘත සංවාද මාලාවක් අමෙරිකානු වාණිජ මණ්ඩලය විසින් සංවිධානය කරනු ලබන අතර, පසුගියදා පැවති එහි ප්‍රථම වැඩසටහනට සහභාගි වූයේ නව ප්‍රජාතන්ත්‍රවාදි ජාතික පෙරමුණේ ජනාධිපති ධුර අපේක්ෂක සජිත් ප්‍රේමදාස මහතාය. ඒ සම්බන්ධව නිෂෙල් ප්‍රනාන්දු විසින් ඉංග්‍රීසි බසින් සම්පාදිත ලිපියක් පදනම් කරගෙන මේ ලිපිය සකස් කෙරිණි.
වර්තමානය වන විට අපට විවිධාකාර අවිධිමත් උපදෙස් ලැබෙනවා. මේවා බහුතරයක් ලැබෙන්නේ අදාළ අමාත්‍යවරුන්ගේ කැමැත්ත අනුකූලවයි. මේ සියල්ල සැලකිල්ලට ගනිමින් මා තව පියවරක් ඉදිරියට ගොස් උපදේශන ක්‍රියා පිළිවෙළ විධිමත් කර, ආර්ථික තීන්දු ගැනීමේ ක්‍රියාවලියේදී ඒවා සැලකිල්ලට ගන්නවා.
විද්‍යාත්මක සහ තාර්කානුකූල ආර්ථික ප්‍රතිපත්ති සකස් කිරීමේදී පෞද්ගලික අංශයේ උපදේශකත්වය කිසිසේත්ම බැහැර කරන්න බැහැ. ඒ නිසා මාගේ පාලනය යටතේ රටේ සංවර්ධනය ස්ථාවර සහ ශක්තිමත් කිරීම සඳහා මා පෞද්ගලික අංශයේ දායකත්වයත් ලබාගැනීමට විධිමත් පියවර ගන්නවා. 
මේ ක්‍රම පද්ධතිය සම්පූර්ණයෙන්ම නිර්දේශපාලනීකරණය කළ යුතුයි. යුක්තිය පසිඳලීම සම්පූර්ණයෙන්ම අධිකරණය මඟින් සිදු විය යුතු අතර, එය කිසිසේත්ම දේශපාලනඥයන් හරහා සිදු නොවිය යුතුයි. අපගේ විධිමත් ආණ්ඩුව යටතේ අලුත් පිරිසක් වෙත වගකීම පැවරෙන අතර, දූෂණය තුරන් කිරීමට අවශ්‍ය ක්‍රියාමාර්ග ගන්නවා.
වර්තමානයේ පවතින එක තැන පල් වන ක්‍රමවේදය ඉවත් කර, වැඩ කිරීමට හැකි කණ්ඩායමක් සම්බන්ධ කරගෙන මා විසින් බිහි කරන රජයේ වැඩ කටයුතු සිදු කරනවා. මගේ කණ්ඩායම වැඩ පටන් ගත් විට සම්පූර්ණ වෙනසක් ඇති වන බව මා ඔබට පවසන්න කැමැතියි.
තනතුරුවලට පත් කිරීමේදී පැරණි හිත-මිතුරු ක්‍රමවේදය, පෞද්ගලික සම්බන්ධතා ක්‍රමවේදය වෙනස් කළ යුතුයි. විවිධ ක්ෂේත්‍රවල සිටින වැඩ කළ හැකි, වැඩ පෙන්වා ඇති, හැකියා ඇති, කාල රාමුවක් ඇතුළත කාර්ය ඉටු කළ හැකි අය හඳුනාගෙන, ඔවුන්ට උපරිම ප්‍රමුඛතාව දී ඔවුන්ට අදාළ වගකීම් පැවරීමට මා කටයුතු කරනවා.මා තීන්දු-තීරණ ගන්නේ සාකච්ඡාවෙන් අනතුරුවයි. ඒහිදී වියදමට සාපේක්ෂව ප්‍රතිලාභ ලැබේ දැයි විමසා බලනවා. ව්‍යාපෘතියක වියදමට වඩා එහි ප්‍රතිලාභ වැඩි නම් අප ඒ වැඩසටහන නොපැකිළ ක්‍රියාත්මක කරනවා. අප ක්‍රියාත්මක කරන්නේ විනිවිද භාවයෙන් යුක්ත, සැඟවුණු න්‍යාය පත්‍රවලින් තොර විවෘත ක්‍රියාමාර්ගයි. ඉල්ලුම සහ සැපයුම මත පදනම් වූ නිදහස් ආර්ථිකයක් ඇති, මිශ්‍ර ආර්ථික ක්‍රමය මා අනුගමනය කරනවා.
පෞද්ගලික ව්‍යවසායකයන්ට බාධාවලින් තොරව ක්‍රියාත්මක විය හැකි පරිසරයක් මා උදා කරනවා. උත්පාදනය කරන ධනය සමාජයේ සැමදෙනා වෙත පොදුවේ බෙදාහැරෙන ක්‍රමවේදයක් ඇති විය යුතු බව මා දැඩිව විශ්වාස කරන කාරණයක්. ටෙන්ඩර් ක්‍රියාවලිය ගැන කටයුතු කිරීමට බලතල සහිත බහු-පක්ෂ කමිටුවක් මා ස්ථාපිත කරනවා. මේ මඟින් යහපාලනයේ උසස්තම, යහපත් ලක්ෂණ ඇති කිරීමට පියවර ගන්නවා.
ණය සම්බන්ධව කටයුතු කිරීමේදී ජාතික ඵලදායිතාව නංවා ලමින් කෙටිකාලීන සහන උදා කරගැනීමට කටයුතු කරන අතර, ජාතික නිෂ්පාදන ක්‍රියාවලිය වේගවත් කිරීමට පියවර යොදනවා. මේ ආකාරයෙන් උත්පාදනය කරන ධනය මඟින් ණය ආපසු ගෙවීමට පුළුවනි.
දෙවනුව, අන්තර්ජාතික ණය දෙන ආයතන සමඟ ණය ආපසු ගෙවීම් නැවත සකස් කිරීමට සාකච්ඡා පැවැත්වීමට මා බලාපොරොත්තු වනවා. මේ මඟින් අපේ රටේ ආර්ථික වර්ධන වේගය කෙටිකාලීනව වර්ධනය කරගත හැකි වනු ඇති.
තුන්වනුව, මහජන මුදල් වැය කරන ඕනෑම අවස්ථාවකදී එහි ප්‍රතිඵලදායකත්වය සහ අගය එකතු වීම ගැන තක්සේරු කර බැලීමට මා කටයුතු කරනවා.
ණය ප්‍රශ්නය විසඳීමේදී සම්ප්‍රදායික කොටුවෙන් පිට, නව්‍ය විසඳුම් සොයා යෑමට මා කටයුතු කරනවා. ඒ වගේම මා විශ්වාස කරනවා වෛරී ප්‍රකාශන සහ වාර්ගික සහ ආගමික අන්තවාදය පදනම් කරගත් ප්‍රචණ්ඩත්වය පිටුදැකීමට නව නීති සකස් විය යුතුයි කියලා. එක්ව සිටීම, සහජීවනය සහ සාමකාමි අන්තර්-සම්බන්ධතා පවත්වමින් එකම ශ්‍රී ලාංකික ජාතියක් ලෙස එකට සිටීමේ වැදගත්කම ගැන රටේ වැසියන්ට දැනුවත් භාවයක් ලබා දීම වැදගත් වනවා. අප ත්‍රස්තවාදය විනාශ කරනවා; ඒ වගේම සියලු ආකාරයේ අන්තවාදයන්ද පරාජය කරනවා.
2015දී නිවාස අමාත්‍යාංශයේ වැඩ භාර ගන්නා විට, රටේ නිවාස අවශ්‍යතාව පිළිබඳ කිසිදු සමීක්ෂණයක් සිදු කොට තිබුණේ නෑ. ඒ නිසා අප මුලින්ම සිදු කළේ නිවාස සම්බන්ධ පරිපූර්ණ සමීක්ෂණයක් සිදු කිරීමයි. මේ සඳහා වසර එකහමාරක කාලයක් වැය වුණා. නිලධාරීවාදය පිටුදැක වැඩ කරන්නාට නිසි තැන හිමි වන ක්‍රමවේදයක් ඇති කිරීමට මා ඇප-කැප වනවා. වැඩ කිරීමේදී මට ‘ප්‍රේමදාස ජාන’ ඇති බව අමතක කරන්න එපා!
පරිවර්තනය - බුද්ධි කරුණාරත්න
