ආහාර රසවත් කිරීමට හා ආහාර මත වර්ධනය වන අහිතකර බැක්ටීරියා වර්ග විනාශ කිරීමෙන් ආහාර සංරක්ෂණය කිරීමට උපකාරී වන වියළි බීජ වර්ග,පළතුරක් හෝ මුල් වර්ගයක් වශයෙන් කුළු බඩු, සරලව නිර්වචනය කළ හැකිය.අතීතයේදී ශ්‍රී ලංකාව කුළු බඩු දිවයින ලෙසද හැදින්වී ඇති අතර මේ වන විට මෙරට තුළ නිෂ්පාදනය වන කුළු බඩු අතර කරාබු නැටි,කුරුඳු,කරඳමුංගු,සාදික්කා,වසාවාසි,ගම්මිරිස් යන සුළු අපනයන බෝග සදහා විශේෂ පිළිගැනීමක් හිමිව තිබේ .මීට අමතරව වැනිලා,කරපිංචා,කොත්තමල්ලි, සූදුරු,මහදුරු,කහ,උළුහාල්,අබ,ඉඟුරු,සේර,ගොරකා වැනි කුළු බඩු ද දේශිය වශයෙන් මෙන්ම විදේශීය වශයෙන්ද පිළිගත් ස්වභාවික ආහාර රසකාරකයන් ලෙස හදුන්වා දිය හැකිය. 
මේ වන විට මෙරට නිෂ්පාදනය වන කුළු බඩු විදේශ රටවල් රැසක අතිශය ජනප්‍රිය වී ඇති අතර එකී කුළු බඩු නිෂ්පාදනයන්හී ප්‍රමිතිය හා ගුණාත්මක බව තවදුරටත් ඉහළ නංවමින්“ශ්‍රී ලාංකීය කුළුබඩු“ Ceylon Spices වෙළඳ නාමය යොදා ගනිමින් ජාත්‍යන්තර වෙළඳපොළට හඳුන්වා දීමට ශ්‍රී ලංකා අපනයන සංවර්ධන මණ්ඩලය පියවර ගෙන තිබේ .
ශ්‍රී ලංකා අපනයන සංවර්ධන මණ්ඩලය කුළුබඩු අංශය ශ්‍රී ලාංකීය සම්භවය සහතික කෙරෙන වෙ‍ෙළඳ ලකුණක් ජාත්‍යන්තරවෛ‍ෙළඳපොළට හඳුන්වා දීමේ පළමු අදියර “සිලෝන් කුළුබඩු” සන්නාමය නිල වශයෙන් දියත් කිරීම පසුගියදා කොළඔ ජයික් හිල්ටන් හිදී සිදු කරන ලදී. ශ්‍රී ලාංකේය සම්භවය ජාත්‍යන්තර වෙළඳපොළ තුළ සහතික කිරීම තුළින් ශ්‍රී ලාංකීය කුළුබඩු සඳහා ඇති ජාත්‍යන්තර කීර්තිය ආරක්ෂා කර ගැනීමටත් අවභාවිතය වළක්වා ගැනීමත් අපේක්ෂා කෙරේ.
මෙම අවස්ථාව සදහා සංවර්ධන උපායමාර්ග හා ජාත්‍යන්තර වෙළඳ අමාත්‍ය, මලික් සමරවික‍්‍රම , ප්‍රාථමික කර්මාන්ත හා සමාජ සවිබල ගැන්වීම් අමාත්‍ය, දයා ගමගේ , අපනයන සංවර්ධන මණ්ඩලයේ සභාපති සහ ප්‍ර‍ධාන විධායිකා ඉන්දිරා මල්වත්ත මහත්මිය ඇතුළු ආරාධිතයන් රැසක් සහභාගී විය.
“Ceylon Spices” වෙළෙඳ ලකුණෙහි හිමිකරු ශ්‍රී ලංකා අපනයන සංවර්ධන මණ්ඩලයයි.මෙම වෙළෙද ලකුණ යොදා ගන්නා කුළු බඩු අපනයනකරුවන් අපනයන සංවර්ධන මණ්ඩලය විසින් නිකුත් කරන මාර්ගෝපදේශවලට අනුකූල විය යුතු අතර මෙම වෙළඳ ලකුණ පරිපාලනය කිරීමද අපනයන සංවර්ධන මණ්ඩලය විසින්ම සිදු කෙරේ.ජාත්‍යන්තර වෙළඳපොළ තුළ ශ්‍රී ලාංකේය නිෂ්පාදන ප්‍ර‍මිතිකරණය උපාය මාර්ගික වැඩපිළිවෙළෙහි කොටසක් ලෙසද මෙම සුවිශේෂ කටයුත්ත හදුන්වා දිය හැකි වේ.
Ceylon Spice වෙළෙඳ ලකුණ නිකුත් කිරීම, අධීක්ෂණය හා පාලනය සදහා අපනයන සංවර්ධන මණ්ඩලය මෙන්ම කුළු බඩු හා සම්බන්ධ රජයේ අනෙකුත් පාර්ශ්වකරුවන් වන ශ්‍රී ලංකා ප්රමිති ආයතනය, අපනයන කෘෂිකර්ම දෙපාර්තමේන්තුව, කාර්මික තාක්ෂණ ආයතනය හා ශ්‍රී ලංකා ප්‍ර‍තීතන මණ්ඩලයද අත්වැල් බැද ගෙන ඇත. අපනයන නිෂ්පාදිතයේ ඇසුරුමෙහි “Ceylon Spices” ලාංඡනය භාවිතා කිරීම සඳහා GAP හා GMP සහතික අනිවාර්ය කර තිබේ. “Ceylon Spices” සන්නාමය සදහා සුවිශේෂි තත්වයක්, පෞරුෂයක්, පොරොන්දුවක් හා දෘෂ්‍ය හා වාචික ප්‍රකාශනයක් ඇති අතර සුදුසුකම් ලබන සියලුම කුළුබඩු එකම ලාංජනය, වර්ණය, හා ‘Born in Sri Lanka’ යන තේමා පාඨය යටතේ ලෝක වෙ‍ෙළඳපොළට හඳුන්වා දීමටද මේ කටයුත්ත අනුව දැන් හැකියාව ලැබී තිබේ.
ඉහළ ප්‍රමිතියකින් හා ගුණාත්මක භාවයෙන් යුතු අනර්ඝතම ශ්‍රී ලාංකීය කුළු බඩු“Ceylon Spices” වෙළඳ සන්නාමය යොදා ගනිමින් 2019 ඔක්තෝබර් මාසයේ දී ජර්මනියේදී පැවැත්වෙන ලොව විශාලතම ආහාර පාන ප්‍ර‍දර්ශනය වන “අනුගා“ හීදී හදුන්වා දීමට නියමිත අතර නියමිත ප්‍රමිතියකින් යුතු කුළු බඩු නිෂ්පාදනයේ යෙදෙන අපනයනකරුවන්ට අපනයන වෙළඳපොළ තුළ මෙම වෙ‍ෙළඳ ලකුණ භාවිතයට උනන්දු කිරීමද අපනයන සංවර්ධන මණ්ඩලය මැදිහත්ව සිදු කරනු ඇත.
කුළුබඩු හා සාන්ද්‍රිත අංශය, ජාතික අපනයන ප්‍ර‍තිපත්තිය හරහා අපනයන ප්‍ර‍වර්ධනය සඳහා හඳුනා ගත් ප්‍ර‍මුඛතා අංශයකි. ජාත්‍යන්තර කුළුබඩු වෙ‍ෙළඳපොළ තුළ, නිරතුරුව නවෝත්පාදනය තුළින් අගය එකතු කළ කුළුබඩු නිෂ්පාදනයේ යෙදෙන රටක් ලෙස ගෝලීයව පිලිගැනීමට ලක්වීම එහි එක් උපායමාර්ගික අරමුණයි.
ශ්‍රී ලාංකේය කුළුබඩු සන්නාමය ලෝක වෙ‍ෙළඳපොළට හඳුන්වා දීම එහි හඳුනාගත් ක්‍රියාකාරකමක් වන අතර එමගින් කුළුබඩු හා සාන්ද්‍රිත අංශය සඳහා 2022 වසර සඳහා වන ජාතික අපනයන ඉලක්කය වන ඇ.ඩො.මි. 880 ළඟා වීම තවත් දිරිමත් කරනු ඇත.
