සමයංගේ ඝාතනයත් සමඟ ඔහුගේ තැන ගන්නට ඌරු ජුවා, චමියා, ඉන්ද්‍ර සහ ගොත අසංක තරගයකට වැටුණාහ. ඌරු ජුවා සිය හයිය පෙන්වන්නේ පිඩලි තුෂාර තම ගෝලයන් කිහිප දෙනෙකු යොදා ඝාතනය කරවමිනි. පිඩලි තුෂාර යනු පිඩලි කැපීම හා ගෙවතු අලංකරණ කටයුතු සිය වෘත්තිය කරගත් අයෙකි. කඩුවෙල කොතලාවලදී ඔහු ඝාතනය කරන්නේ 2017 වසරේ සිංහල අලුත් අවුරුදු උදාවට හෝරා කිහිපයක් තිබියදීය. එම ඝාතනයට ඌරු ජුවා සමඟ චමියාද සම්බන්ධ වී සිටියේය. චමියා මුල් කාලයේ ඌරු ජුවාට එක් වී සිටියත් දැන් ඔහු සිටින්නේ ගොත අසංකගේ පැත්තේය. දැන් ගොත අසංක සිය එල්.ටී.ටී.ඊ වෙඩික්කරුවන් ජාලයද සමඟ මාකිංලගමුවේ සංජීව සමග එක් වී සිටී.
බන්ධනාගාරයේ රැඳෙමින් මත්කුඩු ජාවාරමත් පාතාල අපරාධත් මෙහෙයවමින් සිටින ගොත අසංකත් මාකිලංගමුවේ සංජීවත් දැන් සිටින්නේ කොළඹ අපරාධ කොට්ඨාස භාරයේය. ඒ ඔවුන් හිටපු එල්.ටී.ටී.ඊ. සාමාජිකයන් සමඟ එක්ව ආයුධ ජාවාම්වරම්වල නිරත වෙමින් ප්‍රභූ ඝාතනයකට කළ සැලසුමක් රාජ්‍ය බුද්ධි සේවය විසින් හෙළි කරගත් නිසාය.
සමයංගේ තැන ගන්නට දැන් ඌරු ජුවා සහ ඉන්ද්‍ර අතර සටනකි. ඉන්ද්‍ර සිය බලය හංවැල්ල කේන්ද්‍ර කරගනිමින් ගොඩ නඟන විට ඌරු ජුවා කඩුවෙල පැත්තේ බලය ඇල්ලුවේය.
ඌරු ජුවා සිය පාතාල බලය පතුරුවන්නේ දැඩිගමුව කේන්ද්‍ර කරගෙනය. ජුවා සිහින මවන්නේ පාතාලයේ ගෝඩ් ෆාදර්වරයෙකු වන්නටය. ඒ වෙනුවෙන් ඔහු වැඩි වැඩියෙන් ගෝල බාලයන් රැස් කළේය. එම ගෝලයන් රැක බලාගන්නට මුදල් උවමනා විය. ඒ නිසා ඉවක් බවක් නැතිව කප්පම් ගැනීමට පෙලඹුණේය.
ජුවාගේ කප්පම් ගැනිල්ලට එරෙහිවූ එකල නවගමුව පොලිස් ස්ථානාධිපතිවරයාව සිටි අහංගම පොලිසියේ වත්මන් ස්ථානාධිපති ප්‍රධාන පොලිස් පරීක්ෂක මංජුල ද සිල්වාට මරණිය තර්ජන එල්ල කරන්නට හයියක් ජුවාට තිබිණි. ජුවාගේ තර්ජනවලට ඔහු බිය වූයේ නැත. මංජුල ද සිල්වා විශේෂ කාර්ය බළකායේ පාතාල මර්දන ඒකකයේ සේවයේ නිරතව සිටි නිලධාරියෙකි. ඔහු ජුවාට කප්පම් ගන්නට ඉඩක් තැබුවේ නැත. එහෙත් නවගමුවෙන් පිටත පැතිවල ජුවා ජයටම කප්පම් ගත්තේය. ඒ නිසාම ඇතැම් පැතිවල වසා දැමූ කඩ සාප්පු ගණන බොහෝය.
කඩුවෙල, නවගමුව, රණාල සහ දැඩිගමුවේ සිය පාතාල කටයුතුවල නිරත වී සිටි ජුවා හංවැල්ල දක්වා සිය බල ව්‍යාප්තියට මුල පුරන්නේ හංවැල්ලේ ව්‍යාපාරිකයන්ටද මරණීය තර්ජන එල්ල කරමින් කප්පම් ඉල්ලමිනි. ඌරු ජුවා හංවැල්ලට රිංගා ව්‍යාපාරිකයන්ගෙන් කප්පම් ගැනීම ඉන්ද්‍රාට රිස්සුවේ නැත. සමයංටවත් හංවැල්ලෙන් කප්පම් ගැනීමට ඉඩ නුදුන් ඉන්ද්‍රා එය නවත්වන මෙන් ඌරුජුවාගෙන් ඉල්ලා සිටියේය. එම දැනුම් දීම ඌරු ජුවා තඹ සතේකට මායිම් කළේ නැත.
වැලි ව්‍යාපාරයේ නිරතව සිටින ඉන්ද්‍රාගේ හිතවතකු වන රාජුගෙන් කප්පම් ඉල්ලා උරු ජුවාගෙන් ඇමතුමක් ලැබෙන්නේ ඒ අතර තුරදීය. සෙසු ව්‍යාපාරිකයන් මෙන් මරණ බියෙන් ඌරු ජුවාට කප්පම් දෙන්නට රාජු සූදානම් වූයේ නැත. ඌරු ජුවා බන්ධනාගාරයේ සිට දුරකතනයෙන් ඉල්ලා සිටි කප්පම ලබාගැනීමට පැමිණි ජුවාගේ ගෝලයන් දෙදෙනෙකුට පන්න පන්නා රාජු පහරදුන්නේය. ඒ ඉන්ද්‍රාගේ හයියද ඇඟට ගෙනය.
ඊට ප්‍රතිප්‍රහාරයක් රාජුට එල්ල වන්නට එතරම් කාලයක් ගත නොවීය. ජුවාගේ ගෝලයන්ගෙන් ප්‍රහාරයක් එල්ල වන්නේ රාජුගේ හංවැල්ලේ හේන්පිට පිහිටි සුඛෝපභෝගී නිවසටය. එම පාතාලයේ මැර ප්‍රහාරය හමුවේ අනාරක්ෂිත වන වැලි රාජු සිය බිරිය සහ දරුවන්ද සමඟ සුවිසල් නිවස අතහැර හංවැල්ලෙන් පලා ගියේය.
එදා වැලි රාජු මරාදැමීමට නොහැකි වූ තැන එම පාතාල මැරයන් නිවසේ සිටි සුනඛයා මරා දැම්මේය. ඉන් නොනැවතුණු උරු ජුවා වැලි රාජුගේ බැකෝ යන්ත්‍රයේ ක්‍රියාකරු ලෙස කටයුතු කළ තාරක මධුසංක නැමැති විසි දෙහැවිරිදි අහිංසක තරුණයා ජල්තර වොලිබෝල් පිටිය ආසන්නයේදී සිය ගෝලයන් යොදා මරා දැමුවේය. ඒ ඉකුත් වසරේ ඔක්තෝම්බර් 28 වෙනිදා සවස 5.30 ට පමණය.
එම ඝාතනය ඉන්ද්‍රාට තදින්ම දැනිණි. ඔහු ඊට ප්‍රතිචාර දක්වන්නේ එදින රාත්‍රී 9.30ට පමණ හංවැල්ල ඇඹුල්ගම හන්දියේ පිහිටි හෝටලයකට සිය ගෝලයන් සමඟ කඩා වැදී එහි රැදී සිටි ඌරු ජුවාගේ ගෝලයෙකු බව කියන ජීවන් කුමාර නැමැත්තාව කපා කොටා මරා දමමිනි.
තාරකගේත් ජීවන්ගේත් ඝාතනවලට සැකපිට දෙපැත්තේම දහපහළොස් දෙනෙක් පොලිස් අත්අඩංගුවට පත් වූහ. ඒ අය අතර ඉන්ද්‍රාද සිටියේය. බන්ධනාගාර ගත කර සිටි ඉන්ද්‍රා ඇතුළු දෙපැත්තේම ගෝල බාලයන් ඇපමත නිදහස ලබන්නේ මෑතකදීය. ඌරු ජුවා ඇස යොමු වී තිබුණේ ඉන්ද්‍රා දෙසටය. ඉන්ද්‍රා මරා දැමීමට සැලසුම් කළ ජුවා ඒ වැඩේ පවරන්නේ තාරක මරා දැමුවාට බන්ධනාගාරගතව සිට ඇප ලැබූ සිය ගෝලයන්ටමය.
එදා සැප්තැම්බර් 15 වැනි දා ඉරිදාය. ඉන්ද්‍රා පෞද්ගලික කටයුත්තකට අවිස්සාවේල්ලට ගියේය. ඔහු ගමන්ගත් රථයේ රියදුරු අසුනේ සිටියේ ඉන්ද්‍රාය. ජීවන්ගේ ඝාතනයට ඉන්ද්‍රා සමඟ බන්ධනාගාරගතව සිට ඇප ලබා එළියට ආ සුරේෂ්ද ඔහු සමඟ සිටියේය. ඒ රියදුරු අසුනට යාබදය. පිටුපස ආසන දෙකේ තවත් දෙදෙනෙක් උන්හ. ඒ වන විටත් ඌරු ජුවාගේ ගෝලයන් සිටියේ ඉන්ද්‍රාට ඉව අල්ලමිනි.
බියගම පැත්තේ ඇති වාහන කුලියට දෙන තැනකින් කුඩා වෑන් රථයක් එදා උදේ ඔවුන් කුලියට ගන්නේ රුපියල් තුන් දහසක දවසේ කුලියටය. ඒ රුපියල් දස දහසක අත්තිකාරමක් ගෙවාය. අවිස්සාවේල්ල පැත්තේ ඉන්ද්‍රා කරක් ගසන බව දැනගත් ඌරු ජුවාගේ ගෝලබාලයෝ වෑන් රථයට අමතරව යතුරු පැදි දෙකකද නැඟී ඉන්ද්‍රා ඝාතනයට පිටත් වූහ. ඌරු ජුවා ඔවුන්ට උපදෙස් දෙන්නේ ඉන්ද්‍රා වෙඩි තබා මරා ඔහුගේ හිස කඳින් වෙන් කර කඳ මත හිස තබන ලෙසය. ඒ භීෂණයක් ඇති කරවන්නටය.
ඌරු ජුවාගේ ගෝලයන්ට කොස්ගම පැත්තේදී ඉන්ද්‍රා ඝාතනයට අවස්ථාව උදා වුවත් ඔවුන් එය අතහරින්නේ ඉන්ද්‍රා හංවැල්ලේදීම ඝාතනය කිරීමේ අදහසිනි. මෝටර් රථයේ පිටුපස සිටි දෙදෙනා කොස්ගමට කිට්ටුව පාතකින් බැස යන විට ඉතිරි වන්නේ ඉන්ද්‍රාත් සුරේෂුත් පමණි. අතරමඟදී මෝටර් රථයේ රියැදුරු අසුන භාරගන්නේ සුරේෂ්ය.
එවිට වේලාව රාත්‍රී 9.00 පසු වී විනාඩි කිහිපයකි. වඩයක් කෑමේ අදහසින් දෙදෙනා මෝටර් රථය ඇඹුල්ගම පිහිටි වඩේ කරත්තයක් අසල නතර කළහ. ඒත් එක්කම මෝටර් රථය අසල යතුරුපැදියක් නතර කෙරිණි. යතුරුපැදිකරුවෙක් මෝටර් රථයේ රියැදුරු අසුන දෙසට වෙඩි වර්ෂාවක් එල්ල කළේය. ඒ රියැදුරු අසුනේ සිටින්නේ ඉන්ද්‍රායැයි සිතාය. ඉන්ද්‍රායැයි සිතා සුරේෂ්ට වෙඩි තබන විට ඉන්ද්‍රා මෝටර් රථයේ පැති දොර විවර කරගෙන වෙඩි කාගෙනම දිව ගියේය. ඒ පලායන්නේ ඉන්ද්‍රා බව නොදැන වෑන් රථයේ පැමිණි ජුවාගේ ගෝලයෝ සුරේෂ්ගේ බෙල්ලට මන්නාවලින් කොටා හිස කඳින් වෙන් කරන්නට උත්සාහ කළහ.
සුරේෂ් එතැනම මියගියේය. වඩේ වෙළෙන්දා සිටියේ වෙඩි කිහිපයක් වැදී බිම ඇද වැටීය. මද වේලාවකට පසු තමන්ගේ ඉලක්කය වැරදී ඇති බව වෑන් රථයෙන් පැමිණ සුරේෂ්ට මන්නයෙන් කෙටූ අපරාධකරුට තේරිණි. ඒ ඔහු ඉන්ද්‍රාව මුහුණින් දැන සිටි බැවිනි. ඉලක්කය වැරදුණු ඔවුහු පලාගියහ. නමුත් පැය විසි හතරක් යන්නට මත්තෙන් අපරාධකරුවෝ ගිනි අවි සහ මන්නා පිහි සමඟ පොලිසියට කොටු වූහ.
අපරාධකරුවන් කොටු වන්නේ වෑන් රථයේ අංකය යම් පුද්ගලයෙකු විසින් නවගමුව පොලිස් ස්ථානාධිපතිවරයාගේ කනේ තැබීමෙනි. එම අංකය ඔස්සේ කළ විමර්ශනයේදී හංවැල්ල පොලිසියට පෙනී යන්නේ වෑන් රථය කොලොන්නේ කාන්තාවකට අයත් එකක් බවකි. ඇය විසින් රුපියල් හතලිස් දහසක මාසික කුලියට බියගම වාහන කුලී ආයතනයට එම වෑන් රථය ලබා දී තිබිණි. කුලී ආයතනය රථයේ ආරක්ෂාවට රහසිගතව ජී.පී.එස්. සවි කර තිබිණි. ඒ බව දැනගන්නේ මහා රෑම පොලිසිය එම වාහන කුලී ආයතනයේ හිමිකරු සොයා ගිය විටදීය.
ජී.පී.එස්. උපකරණ ඔස්සේ වෑන් රථය ඒ වන විට ඇති ස්ථානය හඳුනාගත් හංවැල්ල පොලිසිය ඒ ඔස්සේ වැටලීමක් කළේය. එය නවතා තිබුණේ තලංගම කුමාරගේ වත්තේ පිහිටි ඉදි කරමින් ඇති ගොඩනැගිලි සංකීර්ණයකය. පොලිසිය ඒ තැන වටලන විට එහි සිටි පස් දෙනෙක් පොලිස් ඇසටද වැලි ගසමින් පලා ගියහ. පොලිස් අත්අඩංගුවට පත් වන්නේ දෙදෙනෙකු පමණි. ඒ එක් අයෙක් ඉන්ද්‍රාට වෙඩි තැබූ කල්ලියේ සිටියෙකි. අනෙකා එම වැඩ බිමේ සිටි පෙදරේරුවෙකි. ඔවුන් දෙදෙනාම රණාලේ ජල්තර පදිංචිකරුවෝය.
පලා ගිය පස් දෙනාගෙන් සිවු දෙනෙකුටද වැඩි කාලයක් සැඟවී සිටින්නට ඉඩක් නොලැබිණි. පොලිස් විශේෂ කාර්ය බළකායේ සංවිධානාත්මක අපරාධ විමර්ශන ඒකකයට ඔවුන්ගෙන් දෙදෙනෙක් 16 වෙනිදා සවස කොටු වූහ. ඒ කඩුවෙල නගර සභාව ආසන්නයේ ඇති පෙරේරා පටුමඟේදීය. ඔවුන් දෙදෙනාද ජල්තර පැත්තේ පදිංචිකරුවෝය. ඔවුන් සතුව තිබී මෙරට නිෂ්පාදිත රිවොල්වරයක් මෙන්ම සුරේෂ්ට කෙටූ මන්නා පිහියද සොයා ගනු ලැබීය. අනතුරව සංවිධානාත්මක අපරාධ විමර්ශන ඒකකයේ ස්ථානාධිපති ප්‍රධාන පොලිස් පරීක්ෂක නදීක සිල්වා ඇතුළු නිලධාරීන් දැල එළන්නේ පලා ගිය සෙසු සැකකරුවන් වෙතය. ඒ අයගෙන් දෙදෙනෙකු අල්ලාගන්නේ දොම්පේ පාළුගම නිවසක සැඟවී සිටියදීය. ඔවුන්ද ජල්තර පැත්තේ පදිංචිකරුවෝය. ඒ අල්ලාගත් සිවු දෙනාම තාරක ඝාතනයට බන්ධනාගාරගතව ඊට සති දෙක තුනකට පෙර නිදහස ලැබූවෝය.
මේ අතර පොලිස් විශේෂ කාර්ය බළකායේ බුද්ධි අංශයේ උප පොලිස් පරීක්ෂක කේ.ඒ ප්‍රේමලාල්ට ලද තොරතුරකට අනුව බුද්ධි අංශ ස්ථානාධිපති ප්‍රධාන පොලිස් පරීක්ෂක ඊ.එස්.ධර්මප්‍රිය ඇතුළු නිලධාරීන් කණ්ඩායමක් නවගමුවේ දැඩිගම ජයමාවතේ පිහිටි බුදු මැඳුරක් පිටුපසින් හංවැල්ලේ වෙඩි ප්‍රහාරයට යොදාගත් මයික්‍රෝ වර්ගයේ ගිනි අවියක් සොයාගත්තේය. ඉන්ද්‍රාට වෙඩි තැබූ අවිය මෙන්ම ඊට සම්බන්ධ වූ ඌරු ජුවාගේ ගෝලයන් කොතරම් අත්අඩංගුවට ගත්තද මේ දෙදෙනා අතර ඇති ගැටුමට ඉන් නැවතීමේ තිත තැබෙන්නේ නැත. තමා මරා දැමීමට සූදානම් වූ ඌරු ජුවා ඝාතනයට තැත් නොකර ඉන්ද්‍රා අත් බඳගෙන ඉන්නේ නැත. අපේක්ෂා කළ හැකි වන්නේ නිමක් නැති පාතාලයේ ඝාතන වැලක ආරම්භයක් පමණි.
