මහනුවර නගරයේ ජීවත් වන හා එයට පිටතින් යන-එන පුද්ගලයන් ලක්ෂ 2කට සෙත සැලසෙන මහනුවර නාගරික අප-ජල කළමනාකරණ ව්‍යාපෘතිය දැන් ඉදි කිරීම් නිම වෙමින් පවතී.
ජල සම්පාදන හා ජලාපවහන ඇමැති රවුෆ් හකීම් මහතාගේ උපදෙස් මත ජාතික ජලසම්පාදන හා ජලාපවහන මණ්ඩලය රු. කෝටි 2,200කින් ක්‍රියාත්මක කරන මේ අප-ජල ව්‍යාපෘතිය මඟින් මහනුවර වැවේ හා මහවැලි ග‍ඟේත්, මහනුවර මැද ඇළේත් පරිසර දූෂණය වළක්වා සුපිරිසුදු තත්ත්වයට පත් කරන බව මණ්ඩලයේ නියෝජ්‍ය සාමාන්‍යධිකාරි ධනේෂ් ගුණතිලක මහතා පවසයි.
ග්‍රාම නිලධාරි වසම් 26කට සෙත සලසන මේ ව්‍යාපෘතිය 2022දී අවසන් වීමට නියමිතය.
ව්‍යාපෘතිය මගින් නිවාස 10,000ක අපද්‍රව්‍ය හා ව්‍යාපාර හා ගොඩනැඟිලි 12,600ක අපද්‍රව්‍ය ප්‍රධාන පොම්පාගාර 9කට එකතු කර ගන්නොරුවේ ප්‍රධාන පවිත්‍රගාර මඟින් පිරිසුදු කරනු ලැබේ. විශේෂයෙන් මෙහිදී නගරයේ සියලු ආගමික ස්ථාන, පාසල් ආදියද මීට සම්බන්ධ කෙරේ. ප්‍රධාන පවිත්‍රගාරය මඟින් දිනකට අප ජලය හා කළු ජලය ඝන මීටර් 14,000ක් පිරිසුදු කරන අතර, ව්‍යාපෘතිය සඳහා කි.මී. 232ක් අප-ජල නළ නගරය තුළ එළමින් පවතින බව ව්‍යාපෘති අධ්‍යක්ෂ ඉංජිනේරු ඒ.එම්.ඒ. රෆික් මහතා පවසයි.
