ශ්‍රී ලංකා නිදහස් පක්ෂය වර්තමාන නායකයන් විසින් විනාශ කර දමන බවට දේශපාලන වේදිකාවේ කියැවෙනවා. ඇත්තක්ද මේ කතාව?
ඇත්තටම ශ්‍රී ලංකා නිදහස් පක්ෂය බොඳ වෙලා විනාශ වෙමින් තමයි තිබුණේ. අපි නැවත එය පෙර තිබූ තත්ත්වයට ගෙන එනවා. ඒ සඳහා මේ වන විටත් පක්ෂයේ නායකයන් විසින් ගම්මට්ටමේ සිට වැඩසටහන් ක්‍රියාත්මක කරගෙන යනවා.
ශ්‍රී ලංකා නිදහස් පක්ෂය කියන්නේ මේ රටේ සෑම තරාතිරමක ම පුද්ගලයන් නියෝජනය කරන ඕනෑ ම අයකුට විවෘත පක්ෂයක්. රට ගොඩ නඟපු රටට ආදරය කරන ජනාධිපතිවරුන් රැසක් බිහි කළ පක්ෂයක්.
වර්තමාන අපගේ පක්ෂය මේ තත්ත්වයට ඇද වැටීමට හේතු කාරණා කිහිපයක් ම තිබෙනවා. ඒ මේ අතට පනින දේශපාලන නායකයන් යැයි කියා ගන්නා අපගේ පක්ෂයේ හිටපු කිහිප දෙනෙක්ම මේකට වග කියන්න ඕන. අද පොදු ජන පෙරමුණ කියන පක්ෂය බිහිවෙලා තිබෙන්නෙත් ශ්‍රී ලංකා නිදහස් පක්ෂයේ හිටපු ප්‍රබලයන් පිරිසක් නිසායි.
පොදුජන පෙරමුණ සහ ශ්‍රී ලංකා නිදහස් පක්ෂය එකතු වී රට ගොඩ නඟන සන්ධානයක් පිළිබඳ ව දිගින් දිගට ම කතා බහ කළා. එහෙත් තවම පක්ෂ දෙක තීරණයක නැහැ. මේ එකමුතුව සිදු වන්නේ නැද්ද?
එකමුතු වීමට අප අපට පුළුවන් සෑම උත්සාහයක් දරමින් සිටිනවා. වාද විවාද ඇති වෙනවා. කිසි විටක අපි ශ්‍රී ලංකා නිදහස් පක්ෂය විනාශ කර ගනිමින් මේ ගමන යන්න ලෑස්ති නැහැ. ශ්‍රී ලංකා නිදහස් පක්ෂයේ අනන්‍යතාව රැක ගනිමින් තමයි ඉදිරි දේශපාලන ගමන යන්නේ.
තවමත් අප අපගේ උත්සාහය අත්හරින්නේ නැහැ. රටට යහපත් ප්‍රතිපත්තියක් ඉදිරිපත් කර ඒ වෙනුවෙන් වැඩ කිරීම සඳහායි අපගේ උත්සාහය. තව දුරටත් ජනාධිපතිවරණයට සහය ලබා දීම පිළිබඳව සාකච්ඡා සිදු කරනවා.
ඔබලාගේ සහය සජිත් ප්‍රේමදාස මහතාට ලබා දෙන බවට මාධ්‍ය වාර්තා කර තිබෙනවා. ඒ පිළිබඳ ව සාකච්ඡා පවත්වනවාද?
ඒක අසත්‍ය ප්‍රවෘත්තියක්. අප තවම එවැනි කිසිදු සාකච්ඡාවක් පවත්වා නැහැ. අනිත් කරුණ එක්සත් ජාතික පක්ෂය තවම තමන් ඉදිරිපත් කරන ජනාධිපති අපේක්ෂකයා පිළිබඳ ව කිසිදු තීරණයක් ගෙන නැහැ.
අප සමඟ එකට සිට මෑතකදී අපෙන් ඉවත් වූ පාර්ලිමේන්තු මන්ත්‍රීවරුන් කිහිප දෙනකු ශ්‍රී ලංකා නිදහස් පක්ෂයට විරුද්ධ ව නොයෙක් මාධ්‍ය ප්‍රචාර අසත්‍ය ප්‍රචාර සිදු කරනවා. ඔය කියන ප්‍රවෘත්තියත් මේ අයගේ ක්‍රියාවක් හැටියටයි මා දකින්නේ.
ජනාධිපතිවරණයට ශ්‍රී ලංකා නිදහස් පක්ෂය අපේක්ෂකයෙක් ඉදිරිපත් කරන්න සැලසුම් කරලා තිබෙනවාද?
වෙන කිසිම පක්ෂයකට නැති සුදුසු ම අපේක්ෂකයෙක් අප සතුව සිටිනවා. තවම අප තීරණය කරලා නැහැ. නමුත් අවශ්‍ය ඕනෑම මොහොතක අපට ඉදිරිපත් කළ හැකියි. පක්ෂයේ සමහර තීරණ අප විවෘතව කතා නොකළ යුතුයි කියන එක මගේ මතයයි.
එක්සත් ජාතික පක්ෂය ලොකු අර්බුදයකට පත්වෙලා තිබෙනවා. ඔවුන්ට ජනාධිපති අපේක්ෂකයා තෝරාගැනිමට නොහැකිව කණ්ඩායම් කිහිපයකට බෙදිලා ඔබ මේ තත්ත්වය දකින්නේ කොහොමද?
එක්සත් ජාතික පක්ෂයට ඔය තත්ත්වය අද ඊයේ අත්වුණු එකක් නොවෙයි. අගමැති රනිල් වික්‍රමසිංහ මහතා වසර විස්සකට වැඩි කාලයක් එක්සත් ජාතික පක්ෂයේ නායකත්වය තුළ සිටිමින් පක්ෂය මේ තත්ත්වයට පත් කර තිබෙනවා. මම මේක අලුත් තත්ත්වයක් හැටියට දකින්නේ නැහැ.
ජනාධිපතිවරණයට ඉදිරිපත් වීමට අපේක්ෂකයන් රැසක් සිටිනවා. මේ තත්ත්වය හොඳයි ද?
ප්‍රජාතන්ත්‍රවාදී රටක හොඳ ලක්ෂණයක්. තමන්ට කැමැති නියෝජිතයෙක් පත් කර ගැනීමේ අවස්ථාව තිබෙනවා. මෙය හොඳ ප්‍රවණතාවක් හැටියට පෙන්වා දිය හැකියි.
නෙලුම් කුලුන විවෘත කරන අවස්ථාවෙදී රුපියල් කෝටි 200ක් පසුගිය රජය සමයේ අස්ථාන ගත වූ බවට ජනාධිපති මෛත්‍රීපාල සිරිසේන මහතා එය විවෘත කරන අවස්ථාවේ ප්‍රකාශ කළා. මේ සම්බන්ධව නොයෙක් ප්‍රකාශන ඉදිරිපත් කෙරෙනවා. මේක ඇත්තක්ද?
මට හරියටම කියන්න බැහැ. ඒත් ජනාධිපතිවරයා මේ ගැන ඔහුට තිබුණු තොරතුරකට අනුව ප්‍රකාශ කළා. මේ ප්‍රකාශය ඇතැම් දේශපාලඥයන් වැරදි අර්ථකතන එක්කර මාධ්‍ය වෙත අදහස් ප්‍රකාශ කරනවා.
ශ්‍රී ලංකා නිදහස් පක්ෂයේ අනාගතය කුමක් වේද?
ශ්‍රී ලංකා නිදහස් පක්ෂය අතීතයේ තිබූ තත්ත්වයට ගෙන ඒම සඳහා සියලු කටයුතු කරමින් පවතින්නේ. මේ පක්ෂය විනාශ කර දැමීම සඳහා විශාල පිරිසක් උත්සාහ දරමින් සිටිනවා. එය ඔවුන්ගේ සිහිනයක් බව මා නොබියවම ප්‍රකාශ කරනවා.
