බිනර පොහොය ලබන්නට තිබුණේ දින දෙක තුනකි. පොහොය සඳ මෝදු වෙමින් තිබුණ මොහොතක බෞද්ධයන්ගේ පමණක් නොව සිත්-පිත් ඇති ඕනෑම අයෙකුගේ සිතට පිළිකුලක් දනවන ජුගුප්සාජනක සිදුවිමක් සමාජ මාධ්ය පුරා පැතිරි යෑමට ගත වූයේ කෙටි කාලයකි. ඒ කුඩා සාමණේර හිමි දෙනමකට අධම පුද්ගලයකු විසින් අනුකම්පා විරහිත ලෙස පහර දෙන තත්පර 60 ක වීඩියෝවකි. සමාජ මාධ්යයේ පළවී මඳ වේලාවක් ඉක්ම යද්දී පොලිස් මාධ්ය ප්රකාශක කාර්යාලය සඳහන් කර සිටියේ චමින්ද ගලබොඩ හෙවත් උටියා නමැති හොරොව්පොතානෙ මැදගම වෙසෙන පහර දීම සිදුකළ එම පුද්ගලයා අත්අඩංගුවට ගත් බවයි.
හොරොව්පොතානේ ශ්රී ස්වර්ණතිලකාරාමයේ, ශ්රී සිද්ධාර්ථෝදය පිරිවෙනේ ඉගෙනුම ලබන 10 හැවිරිදි සෝරත සහ 14 හැවිරිදි රේවත නමැති කුඩා සාමණේර හිමිවරු මෙසේ පහර කෑමට ලක්වූහ. මේ සාමණේර හිමි දෙනම පසුගිය හත්වැනිදා සවස් යාමයේ විහාරස්ථානය අසල පිහිටි 'ගමේ කඩේ' නමැති කුඩා වෙළෙඳසලට ගියේ යමක් මිලදී ගැනීමටයි. එම වෙළෙඳසල් හිමියා බෞද්ධයෙකු වුවද ගමේ කා අතරත් සිත්පිත් නැත්තෙකු සේ පිළිගන්නා මත්වතුර පානය කරමින් ජීවත්වන උටියාය.
උටියා |
“සාමණේර දෙනම රුපියල් සීයක් අරන් එදා කඩේට ගිහින්... ඒ යෝගට් එකකුයි කිරි පැකට් එකකුයි ගන්න. පස්සෙ එක් නමක් චොකලට් එකක් හොරකම් කළා කියලා තමයි කඩේ මිදුලේදීම ඔය පුද්ගලයා ගහලා තියෙන්නෙ. අපිට ඔය සිදුවීම ගැන එදාම දුරකතන ඇමැතුමක් ආවා. පස්සෙ මිනිහා අත්අඩංගුවට ගත්තා. ඒත් දායක සභාවේ ඉල්ලීම මත මුදාහැරියා. පස්සෙ සමාජ මාධ්යය හරහා රට තුළ කැලඹීමක් ඇතිකළ නිසා නැවතත් පහුගිය 10 වැනිදා අත්අඩංගුවට ගෙන අධිකරණයට ඉදිරිපත් කළා.“ එදින සිදුවී ඇත්තේ කුමක්ද යන්න පැවැසුවේ හොරොව්පොතාන පොලිසියේ ඉහළ නිලධාරියෙකි.
දරුවන් තිදෙනෙකුගේ පියෙකු වන 37 හැවිරිදි උටියාගේ බිරියද පිළිකාවකින් පෙළෙන්නීය. සාමණේර හිමි දෙනමට අමානුෂික ලෙස වෙළෙඳසල ඉදිරිපිට දීම පහර දෙන ආකාරය ජංගම දුරකතනයකින් වීඩියෝ ගත කර පසුව අන්තර්ජාලයට මුදාහැර තිබුණේ ඒ අසලම බලා සිටි පුද්ගලයෙකි. කුඩා සාමණේර හිමි දෙනම පොලිසියට කියා තිබුණේ, කිසිවක් හොරකම් නොකළ බවත්, එහෙත් කඩේ මාමා පහර දුන් බවත්ය.
“අපේ පිරිවෙනේ සාමණේර හිමිවරු 85ක් පමණ ඉගෙන ගන්නවා. ඔය මනුස්සයගේ කඩේ තියෙන්නෙ විහාරස්ථානය ඉදිරිපිට. ඒ පුද්ගලයා නිතරම මත්පැන් පානය කරනවා. මං සාමණේර හිමිවරුන්ට කියලා තියෙන්නෙ කිසිම අවස්ථාවක ඔය කඩේට යන්න එපා කියලා. ඔය සිද්ධිය වූ දිනයේත් මං දන්නෙ නැහැ මේ සාමණේර හිමිවරු දෙනම කඩේට ගිය බව. ඒ වගේම ඔය විදිහට පහර දුන් බවක් හෝ මම දැනන් හිටියේ නෑ. පොඩි දෙනමත් කිසිවෙකුට මේ විත්තියක් කියලා නෑ. ඒත් පහුවදා කවුරුහරි මේ ගැන කියලා පොලිසියට ඇමතුමක් දීලා. ඊට පස්සෙ පොලිසියෙන් මිනිහා අත්අඩංගුවට ගෙන තිබුණා. මම කියන්නෙ බෞද්ධ රටක් වන අපේ රටේ මෙවැනි දේවල් සිදු නොවිය යුතුයි. සංඝයා වහන්සේලාට අත උස්සන්න ගියොත් අපේ ජාතිය මහත් පිරිහීමකට ලක්වෙනවා. එම නිසා මේ ගැන සෑම වගකිවයුතු කෙනෙකුගේම අවධානය යොමු විය යුතුයි. ඒ වගේම මං රටේ සෑම බෞද්ධයෙක්ගෙන්ම මේ මොහොතේ ඉල්ලීමක් කරනවා “දානමාන දෙනකොට පොඩිඇත්තන්ට පැණි රස වැනි මොනවාහරිත් දෙනවානම් හොඳයි කියලා. මොකද ඔය කුඩා සාමණේවරුන් ටොෆි චොකලට් කෑමට ප්රියයි... ඒකයිනේ මේ ප්රශ්නෙ වුණෙත්...,, “ සාමණේර දෙනමට පහර දීම පිළිබඳව ස්වර්ණාතිලකරාම විහාරස්ථානයේ නායක වැලිමුවපොතානේ පියරතන හිමියන් පවසා සිටියේ ඒ අයුරිනි.
හොරොව්පොතාන පොලිස් ස්ථානාධිපති, පොලිස් පරීක්ෂක රොෂාන් සංජීව මහතාගේ ප්රධානත්වයෙන් සිදුකළ පරීක්ෂණ අනුව චමින්ද ගලබොඩ හෙවත් උටියා පසුගිය 11 වැනිදා පදවිය අධිකරණයට ඉදිරිපත් කිරීමෙන් පසු ලබන 24 වැනිදා දක්වා රක්ෂිත බන්ධනාගාරගත කෙරිණි. ඒ කැබිතිගොල්ලෑව මහේස්ත්රාත් මාලින්ද හර්ෂණ ද අල්විස් මහතාගේ නියෝගයක් අනුවයි.
ස්වර්ණාතිලකරාම විහාරස්ථානය |
මේ සිදුවීම සමාජ මාධ්යයන්හි පළවීමත් සමඟ විවිධ පුද්ගලයන් විසින් පහර දුන් නරුමයාගේ යැයි සඳහන් කරමින් චමින්ද ගලබොඩ නමැති මුහුණු පොතේ අයෙකුගේ ඡායාරූපයක් පළ කරමින් එම පුද්ගලයාට දෝෂාරෝපණය එල්ල කෙරිණි. එහෙත් මහනුවර වැසියෙකු වන එකී පුද්ගලයා වත්මනෙහි කටාර් රාජ්යයේ රැකියාවේ නිරත වන්නෙකි. ඔහු තමාට වූ අසාධාරණය ගැන කටාර්හි රැකියාව කරන අතරේම සමාජ මාධ්යයට වීඩියෝවක් නිකුත් කරමින් එම අවනඩුව පවසා සිටියේය.
මෙවැනි අමානුෂික සිදුවීම් රට දැන ගත්තේ සමාජ මාධ්ය වලට පින්සිදු වන්නටය. එහෙත් සමාජ මාධ්ය නිවැරදි පුද්ගලයින්ට හානියක් නොකරන්නටද වග බලා ගත යුතුය.