එන්ටර්ප්රයිස් ශ්රී ලංකා ජාතික ප්රදර්ශනයේ තුන්වැනි අදියර පසුගිය සතියේදී යාපනයේදී සාර්ථකව පැවැත්විණි. රාජ්ය සහ පෞද්ගලික අංශයේ ප්රදර්ශන කුටි ගණනාවකින් සමන්විත වූ මේ ප්රදර්ශනය යාපන අර්ධද්වීපයට නවමු අත්දැකීමක් ගෙන දෙන්නක් වූ අතර, අතිවිහාල ජනතාවක් මේ ප්රදර්ශනය දැක බලා ගැනීමට පැමිණියහ. මෙහිදී යාපන වැසියන්ට රජයේ ව්යවසායකයන් ලක්ෂයක් බිහි කරලීමේ යෝධ වැඩසටහන මඟින් ලැබෙන ප්රතිලාභ පිළිබඳ ජනතාවට දැනුවත් වීමට අවස්ථාවක් ලැබුණු අතර, ඔවුන්ට නූතන ලෝකයට ගැළපෙන නව ව්යවසාය අවස්ථා පිළිබඳ අවබෝධයක්ද ලබාගත හැකි විය.
අග්රමාත්ය රනිල් වික්රමසිංහ මහතා අතින් විවෘත වූ මේ ප්රදර්ශනය මුදල් අමාත්ය මංගල සමරවීර මහතාගේ මූලිකත්වයෙන් එම අමාත්යාංශය මඟින් සංවිධානය කළ අතර යාපනයේ ජනතාවගේ ජීවන රටාවට සහ ඒ පරිසරයට ගැළපෙන අයුරින් ප්රදර්ශනය සංවිධානය කිරීමට සංවිධායකයන් කටයුතු කර තිබිණි. ලක්ෂ හතරකට ආසන්න ජනතාවක් මේ ප්රදර්ශනය නැරඹිමට පැමිණි අතර තවත් දිනකින් හෝ දෙකකින් ප්රදර්ශනය දීර්ඝ කරන ලෙසද යාපනයේ ජනතාව ඉල්ලම් කොට තිබිණි. යාපනය දිස්ත්රික් ලේකම් කාර්යාලය මේ සඳහා විහේෂ සහයෝගයක් ලබා දුන්නේය.
එන්ටර්ප්රයිස් ශ්රී ලංකා රජයේ පොලී සහන ණය යෝජනා ක්රමය මඟින් දැනට නව ව්යවසායකයන් 53,000කට රු. මිලියන 90,000ක මුදලක් පිරිනමා ඇති අතර, එමඟින් තම ව්යාපාර සාර්ථක කරගත් ව්යවසායකයන් රැසක් දැකගත හැකිය. මේ ප්රදර්ශනයට කලක් එල්ටීටීඊ සංවිධානයට සම්බන්ධ වී ක්රියා කොට පුනරුත්ථාපනය වූ සාමාජිකයන් ගණනාවකට නව ව්යවසාය ආරම්භ කිරීමට ණය ලබා දුන් අතර, යුද්ධය නිසා වැන්දඹුවන් බවට පත් කාන්තාවන්ටද ණය ලබා දීමේ කටයුතු සිදු කෙරිණි.