අසීමිත තණ්හාවෙන් පෙළෙන මිනිසා සාධාරණව ඉටු කර ගත නොහැකි අවශ්යතා ඉටු කර ගන්නට විවිධ උපාය මාර්ග සොයති. ධනයෙන් බලයෙන් ලබාගත නොහැකි දේ දිනා ගන්නට නොපෙනෙන බලවේගවල පිහිට ද සොයා යති.
එවැන්නන්ගේ ඉල්ලුමට අනුව සැපයීම සඳහා සමහරු දෙවියන්ගේ නමින් දේවාල අටවාගෙන සිටිති. තමන්ගේ මළගිය ඥාති ප්රේතයන් ළං කරගෙන කටයුතු කරති. හොඳින් සාධාරණව දිනාගත නොහැකි දේ දිනා ගන්නට දේවාල කරා පැමිණෙන අය ද බොහෝමය. මහා උගතුන් බුද්ධිමතුන් සේ පෙනී සිටිමින් රටේත් ජනතාවගේත් වගකීම භාරගත් අය ද දේවාල පස්සේ යෑම ප්රසිද්ධ රහසකි. දේවාල කපුවන්ට රැවටී අමාරුවේ වැටෙන්නෝද බොහෝය.
පිළියන්දල චමිල හතළිස් හැවිරිදි ව්යාපාරිකයෙකි. ඔහුගේ බිරිය වාසූකී තිස් පස් හැවිරිදිය. ඔවුන්ගේ පුතා විරාජ් පහළොස් හැවිරිදි පාසල් සිසුවෙකි. එහෙත් දැන් ඔහු පාසල් යන්නේ නැත. හොඳින් කීකරුව ඉගෙනුම ලැබූ ඔහු දැන් හිතුවක්කාර වී ඇත. පාපමිත්ර සේවනයට යොමු වී සිගරට්, අරක්කු භාවිතා කරයි. මාස දෙක තුනක සිට කෑම අප්රියාවෙන් පෙළෙයි. මුහුණ සේදීම හා නෑම පිරිසුදු වීම අතහැර ඇත. ළඟින් දුගඳ හමයි. මවුපියන් නුරුස්සයි. ඔවුන්ට පහර දෙයි.
වෛද්ය ප්රතිකාර, මනෝ වෛද්ය ප්රතිකාර කළත් සුවයක් වෙනසක් නොවීය. මේ අතර අම්මා වාසුකීට තමන්ගේ මියගිය නැගණිය හීනෙන් පෙනෙන්නට විය. හීනෙන් පෙනී සිට පත්තිනි වරම ගන්නැයි බලකරයි. වාසුකී චමිලට හොරෙන් දේවාල ගාණේ යන්නට වූවාය. මීගොඩ ප්රදේශයේ දේවාලයකට ගොස් පත්තිනි වරම ගන්නට කටයුතු කරමින් සිටියදී දේවාල කපුවා සමඟ අනියම් සම්බන්ධයක් ද ඇති කර ගත්තාය. ඒ බව ආරංචි වූ චමිල බිරියට පහර දී දේවාලයට ගොස් කපුවාට බැණ වැදුණේය. කපුවා චමිලට තර්ජනය කර උඹට පුළුවන් නම් නතර කරපන් යැයි අභියෝග කළේය. ඉන් පසු වාසුකී පිස්සුවෙන් කපුවා සොයාගෙන ගියාය. එවර චමිල දේවාලයට ගොස් කපුවාට පහර දී පූජාසන පවා කඩා බිඳ ආවේය. වාසුකී නිවාස අඩස්සියේ තැබුවේය.
ඒ කිසිවක් නොදන්නා විරාජ් වෙනස්වන්නට වූයේ එතැන් සිටය. කපුවා හූනියමක් කළා දැයි දැනගන්නට චමිල බිරිය පුතාත් සමඟ ඇතුල් කොට්ටේ ගුප්ත ගවේෂණ මධ්යස්ථානය කරා ආවේය. අධ්යාත්මික උපදේශකවරයා මුණ ගැසී සියලු විස්තර අනාවරණය කළේය.
ගවේෂකවරයාගේ රෝග පරීක්ෂාවේදී වාසුකීත් විරාත් පුතාත් ගැහෙන්නටත්, අඬන්නටත් වූහ. ඔවුන්ට අමනුෂ්ය දෝෂයක් ඇතැයි දැනගත් ගවේෂකවරයා දින 21ක් ගමේ පන්සලේ දී බෝධි පුජා පවත්වා නැවත එන්නැයි නියම කළේය.
බෝධි පුජා අවසන් කොට නැවත ප්රතිකාර සඳහා පැමිණි දිනයේ වාසුකීගේ ශරීරයට භූතාත්මයක් ආවිෂ්ට විය. ගවේෂකවරයා ඒ භූතාත්මය සමඟ සාකච්ඡා කළේය.
‘‘කව්ද මේ ශරීරයට ඇතුළුවෙලා ඉන්නේ?”ඇසීය.
‘‘නම දන්නේ නෑ භූතයා උත්තර දුන්නේය.
‘‘කවුද එව්වේ?
‘‘මේ පවුල අවුල් කර පළිගන්නÓ
‘‘මොන වරදක් කළාට ද පළිගන්නේ?”
‘‘මේ චමිල කපුවාට ගහපු පළිය ගන්න. මේ පවුල විනාශ කරන්න.”
‘‘කොහොමද මේ ගෙදරට ආවේ.”
‘‘මේ වාසුකී පිස්සුවෙන් දේවාලයට ගිය වේලාවක කපුවා කෑමක් දුන්නා. ඒ කෑම එක්ක වාසුකීගේ ශරීරයට ඇතුළු වුණා”. යි භූතයා කීවේය.
වාසුකී පියවි සිහියට පත් කළ ගවේෂකවරයා දේවාල කතාව කුමක්දැයි ඇසීය.
“මගේ අක්කා තමරා. අක්කා පත්තිනි මෑණියන් ඇදහුවා. පත්තිනි වරමක් ගන්න පුද පූජා කළා. පත්තිනි දේවිය ගැන බොහෝම විශ්වාසයෙන් කටයුතු කළ කෙනෙක්. මරණයෙන් පස්සේ පත්තිනි දේව පාර්ශ්වයේ දේවතාවියක් වෙන්න අධිෂ්ඨාන කරගෙන පින් දහම් කළා. ඒත් අක්කා හදිසියේ මැරුණා. මැරුණාට පස්සේ මට නිතර හීනෙන් පෙනිලා පත්තිනි වරමක් ගන්න කියලා බල කළා. මමත් පත්තිනි වරම ගන්න හිතාගෙන දේවාල ගානෙ ගිහින් පුද පූජා කළා. මීගොඩ දේවාලෙ කපුවා පත්තිනි වරම අරගෙන දෙනවාය කියලා මාව රැවටුවා. මට වශී ගුරුකමක් කරලා මගෙන් ප්රයෝජන ගත්තා. චමිල බුද්ධිමත්ව කටයුතු කළ නිසා මමත් අපේ පවුලත් යම්තම් බේරුණා යැයි වාසුකී කීවාය.
ගවේෂකවරයා ඊළඟට වාසුකීගේ මියගිය අක්කාගේ ප්රාණකාරිය ඇගේ ශරීරයට දිෂ්ටි ගැන්වීය.
“කවුද මේ” යැයි ඇසීය.
“මම වාසුකිගේ අක්කා තමරා”. යැයි භූතාත්මය කීවාය.
“ඔබට මොකද වුණේ.”
මම ජීවත්ව ඉන්දිද්දී පත්තිනි වරමක් ගන්න පුද පුජා පැවැත්වුවා. ඒත් මම හදිසියේ මැරුණා. ඊට පස්සේ මට වුවමනා වුණා පත්තිනි මෑණියන් ළඟ දේවිතාවියක් වෙන්න. ඒක මේ නංගි වාසුකී ලවා ඉෂ්ට කරවා ගන්න උත්සාහ කළා. නංගි පත්තිනි වරම ගන්න දේවාලයට ගියාම ඒ දේවාලයේ කපුවා නංගිව යාළු කර ගත්තා. අන්තිමට ඌ මට ගහලා පන්නලා නංගිගේ ඇඟට රිංගුවා. යි ප්රේතිය කීවාය.
“හිතන හිතන හැටියට දේවතාවියන් වෙන්න බැහැ. ඔබ ජීවත්ව ඉන්න කොට මිත්යාවකට රැවටිලා. ඒ මනෝභාවයෙන් මැරිලා අක්කා ලවා දේවත්වයකට යන්න උත්සාහ කළා. ඒවා හරියන්නේ නෑ. මිත්යාවෙන් වැඳ වැඳ පුද පුද යැද යැද දිව්ය ලෝකයට යන්න බැහැ. ත්රිහේතුක කුසල චිත්තයක් මරණාසන්න චුති සිතට පහළ වෙන්න ඕනෑ. ඔබේ හීනය යථාර්ථයක් කර ගන්න ගිහින් ඔබේ උගුලට අහුවෙලා මේ පවුල අවුල් වෙලා චමිල බුද්ධිමත් කෙනෙක් නිසා යම්තම් බේරුණා. ඔබ දැන් ප්රේතියක්. දැන් කරුණාකර මේ අය අත හැර යන්න ඕනෑ. දේවතාවියක් වෙන්න නම් පින් දහම් කරන තැනකට යන්න” යැයි ගවේෂකවරයා පැවසීය. “දැනුයි මට ඇත්ත වැටහුණේ. ඒ වගේ හොඳ තැනකට මාව යවන්නැයි” ප්රේතිය කීවාය. ඊළඟට නැවතත් කපුවා එවු ප්රේතයා වාසුකීට දිෂ්ටි ගැන්වීය.
“තමනුත් දැන් ඉවත් වෙලා යන්න ඕනෑ” යි ගවේෂක වරයා භූතයාට කීවේය.
“බැහැ....බැහැ.. මට යන්න බැහැ. මට පවරපු කටයුත්ත ඉෂ්ට කරලා මිසක් මට යන්න බැහැ”
“මොකක්ද පවරපු කටයුත්ත”.
“මේ ගෑනි කපුවා දීපු කෑම කෑවා. කපුවාගේ කීමට කොටසක් පුතාටත් කන්න දුන්නා. මම දැන් මේකිවත් මරලා ඒ කොලුවත් මරනවා. ඒක ඉටු නොකෙළාත් කපුවා මට දඬුවම් කරනවා. මේ වැඩේ වැරදි බව මටත් තේරෙනවා. ඒත් කරන්න දෙයක් නෑ. කපුවාගේ කීම ඉෂ්ට නොකළොත් ඌ පන්දමෙන් මාව පුච්චනවා”. ප්රේතයා කීවේය.
ප්රේතයා අවනත නොවන බව වටහාගත් ගවේෂකවරයා ශක්ති කිරණ එල්ල කොට ප්රේතයා දවා පුළුස්සා දුර්වල කොට ශරීරයෙන් එළියට ඇද පන්නා දැම්මේය. අක්කාගේ භූතාත්මය පලතුරු වට්ටියකට සම්බන්ධ කොට පත්තිනි දේවාලයකට ඔවුන් අතම යැවීය. අසීමිත අවශ්යතා ඉටු කැර ගන්නට දේවාල ගණනේ යන අය ප්රවේශම් විය යුතුය. කපටින්ට අසු වී පවුල් අවුල් වන බව නුවණින් සිහි කටයුතුය.