මෙරට යුද සමයේ ආරක්ෂාව පතා විදේශ රටවලට සරණාගතයන් ලෙස ගිය අය බොහෝය. 2012 - 2013 අතර කාලයේ නඩේසලිංගම්ලාද, ප්රියාලාද සිය පවුල් සමඟ ගම්බිම් අතහැර ඔස්ට්රේලියා රජයේ ආරක්ෂාව පතා යන්නේ එවැනි පසුබිමකය. සරණාගතයන් ලෙස ඔස්ට්රේලියාවට බෝට්ටුවකින් ගිය මේ පවුල් කිහිපය ඉන් අනතුරුව ජිවත් වී ඇත්තේ ඔස්ට්රේලියාවේ ක්ව්නිස්ලන්ඩ් ප්රාන්තයේ 'බිලෝලා' නම් කුඩා නගරයේය.
ඒ කුඩා ගමේ ජීවත් වු ශ්රි ලාංකික දමිළ පවුල් අතර වු හිතවත්කම හේතුවෙන් නඩේසලිංගම් හා ප්රියා විවාහ වන අතර අවසානයේ මේ යුවළ 'ගෝපිකා' නම් වූ හතර හැවිරිදි දියණියකගේද, 'ධරුනිගා' නම් දෙහැවිරිදි දියණියකගේද මවුපියෝ වූහ. මේ දරු දෙදෙනාම උපත ලබාඇත්තේ ඔස්ට්රේලියාවේදීය.
සිය දරුවන් සමඟ නිදහසේ ජිවත් වී ඔස්ට්රේලියාවේ සරණාගතබව ඇයැදුම් කළ නඩේසලිංගම් යුවළට පසුගියදා අපේක්ෂා නොකළ සිද්ධියකට මුහුණ දෙන්නට සිදු විණි. ඔස්ට්රේලියා බලධාරීන් විසින් පිටුවහල් කරනු ලැබු නඩේසලිංගම් පවුල, ගමනාන්තයට සැතැපුම් 3000කට පෙර ඉහළ අහසේදී ලැබුණු හදිසි අධිකරණ නියෝගයකින් යළි ඔස්ට්රේලියාවට කැඳවාගැනීමට ඔවුන් වෙනුවෙන් පෙනී සිටි එරට නීතිවේදීහු මෙන්ම සමාජ ක්රියාකාරීහු සමත්වුහ.
ඒ කතා පුවත අතිශය හැඟූම්බර වන අතර, අධිකරණ ඉතිහාසයේ මෙතෙක් නොඇසූ සුවිශේෂි සිදු වීමක්ද වෙයි. ඔස්ට්රේලියාවේ 'ක්වීන්ස්ලන්ඩ්' ප්රාන්තයේ පදිංචිව සිටි එම පවුල පසුගිය මාර්තු මාසයේ බලහත්කාරයෙන් රැඳවුම් මධ්යස්ථානයකට ගෙන යනු ලැබීමත් සමඟ එම සිද්ධිය, ජාතික මට්ටමේ මහජන විරෝධයක් දක්වා විහිදී ගියේ ඒ පවුල කෙරේ එරට වැසියන් තුළ තිබු ආදරය නිසාත් එරට බලධාරින්ගේ අත්තනෝමතික ක්රියාවන්ට විරෝධය පෑමත් නිසාය. ඔවුන් ආපසු රැදවුම් මධ්යස්ථානය වෙත ගෙන එන මෙන් ඉදිරිපත් කෙරුණු මහජන පෙත්සමට එක් ලක්ෂ විසි දහසකට අධික අස්සන් ප්රමාණයක් එක් වී තිබිණි.
නඩේසලිංගම් පවුලේ සරණාගත අයැදුම්පත් පුළුල් සහ සවිතරාත්මක මට්ටමින් සලකා බලන ලද බවත්, ආගමන -විගමන නිලධාරීන් විසින් එම අයැදුම්පත් ප්රතික්ෂේප කරනු ලැබ ඇති බවත් එරට ඔස්ට්රේලියා ස්වදේශ කටයුතු භාර ඇමති පීටර් ඩට්න් එරට මාධ්යයට ප්රකාශ කරද්දි එරට වැසියන්ගෙන් බලධාරින්ට එල්ල වූයේ දැඩි විරෝධතාවකි.
සිය සරණාගත අයැදුම්පත් ප්රතික්ෂේප කරනු ලැබීමට එරෙහිව මවුපිය දෙපළ සහ වැඩිමහල් දරුවා විසින් වරින්වර ඉදිරිපත් කරන ලද නෛතික අභියාචනා ද මෑත අවස්ථා කීපයකදීම ප්රතික්ෂේප කෙරිණි. කෙසේ වෙතත් තදින් සිටි බලධාරීන් තීරණය කළේ එම දමිළ පවුල සරණාගතයන් නොවන හෙයින් ඔවුන් වහා පිටුවහල් කළ යුතු බවය.
අගෝස්තු 29 වැනිදා රාත්රිය මෙල්බෝර්න් ගුවන් තොටුපොළ තරමක් උණුසුම් විය. ඔවුන්ගේ පිටුවහල් කිරීමට විරෝධය පාමින් ඒ වන විටත් විරෝධතාකරුවෝ ගුවන් තොටුපළට එක් වෙමින් සිටියහ. මෙහිදි නඩේසලිංගම්ගේ පවුල ගුවන් තොටුපළට ගෙනැවිත් ඇත්තේ වෑන් රථ දෙකකිනි. නඩේසලිංගම් හා දරු දෙදෙනා ගුවන් යානය තුළට ගෙන ආවත් මව ඊට ගොඩ වීම ප්රතික්ෂේප කර ඇත. දරුවන් දෙදෙනා හඬමින් ගුවන් යානයේ අසුන් ගත් පසු මව ඊට නංවා ඇත්තේ බලහත්කාරයෙනි.
ඔස්ට්රේලියා වේලාවෙන් 29 වැනිදා රාත්රි 11ට නඩේසලිංගම් පවුල රැගත් ගුවන් යානය ගුවන්ගත විය. එහෙත් සියල්ල කණපිට පෙරළෙන්නට වුයේ සුළු මෙහෙතෙකි. නඩේසලිංගම් පවුල රැගත් ගුවන් යානය ගුවන්ගත වී කිලෝ මීටර් 3000 සිමාව ඉක්ම විය. ගුවන් යානයට වඩා වැඩි වෙගයෙන් ක්රියාත්මක වූ ෆෙඩරල් අධිකරණය සිය තීන්දුව ප්රකාශයට පත් කළා පමණක් නොව කිලෝ මිටර් 3000 ක් දුර ඉහළ අහසේ පියාසර කරමින් තිබූ යානය වහාම ගොඩ බැස්සවීමට විනිසුරුවරයා නියෝග කළේය. ඒ දෙහැවිරිදි 'ධරුනිගා' දියණිය පිටුවහල් කරනු ලැබීම සම්බන්ධයෙන් එරට නීතිවේදින් නීතිමය කරුණු උපක්රමශීලිව අධිකරණයේ ගොනු කර තිබීමය.
ඔස්ට්රේලියා වේලාවෙන් පාන්දර 3ට පමණ යානය නැඟෙනහිර ඔස්ට්රේලියාවේ ඩාර්වින් (Darwin) නගරයට ගොඩබස්වනු ලැබීය. අධිකරණ ඉතිහාසයේ පමණක් නොව ගුවන් සේවා ඉතිහාසයේද එවැනි පුවතක් අසන්නට ලැබුණු ප්රථම අවස්ථාව මෙය වෙයි.
ඔස්ට්රේලියා අධිකරණය ඒ තහනම් ආඥාව ලබාදෙන ලද්දේ ඔවුන්ගේ කුඩා දියණිය 'ධරුනිගා' වෙනුවෙනි. පිටුවහල්බව තාවකාලිකව ඉවත් වුවද ඒ පවුලට තවමත් සහනයක් ලැබී නැත. එම අධිකරණ නියෝගය ඇයගේ පවුලේ සෙසු අයටත් අදාළ කිරීමට අධිකරණය ක්රියා කරාවිද? එසේ නොවුවහොත් 'ධරුනිගා' දියණියට මවගෙන් හා පියාගෙන් වෙන් වී ඔස්ට්රේලියාවේ තනි වීමට සිදු වේද? එරට නීතිවේදින් පෙන්වා දෙන්නේ එසේ සිදුවුවහොත් එය ඉතා අමානුෂික ක්රියාවක් වන බවයි.
මේ අවස්ථාවේ අධිකරණය නඩේසලිංගම් පවුල වෙනුවෙන් මානුෂික තීන්දුවක් දෙනු ඇතැයි එරට වැසියන්ගේ බලාපොරොත්තුව වෙයි. ඇයගේ පවුලේ සෙසු සාමාජිකයන්ටත් ඔස්ට්රේලියාවේ ජීවත් වීමේ අවස්ථාව ලබාදෙනු ඇතැයි තවත් පිරිසක් අපේක්ෂා කරති. මේ වන විට නඩේසලිංගම් පවුලවෙනුවෙන් එරට හිත්පිත් ඇත්තන්ගේ සිත් බොහෝ උණු වී ඇත. එරට විපක්ෂයේ මන්ත්රීවරුන් මෙන්ම සංක්රමණ භාර ඇමැති ඩේවිඩ් කෝල්මන් පවා ආයාචනා කර ඇත්තේ ඒ පවුල වෙනුවෙන් සානුකම්පිත වන ලෙසයි.
(තොරතුරු, ඡායාරූප බී.බී.සී පුවත් ඇසුරෙනි)