එක්සත් ජාතික පෙරමුණෙන් ඉදිරිපත් වන අපේක්ෂකයා තෝරා ගැනීමේ තීරණය පක්ෂයේ නායක රනිල් වික්‍රමසිංහ මහතාට හා නියෝජ්‍ය නායක සජිත් ප්‍රේමදාස මහතාට පැවරීමට එක්සත් ජාතික පෙරමුණ තීරණය කර තිබේ. පසුගිය සිකුරාදා අරලිය ගහ මන්දිරියේදී පැවැති සාකච්ඡාවේදී ඒ පිළිබඳ තීරණයකට එළැඹ ඇත.
ඒ අනුව අපේක්ෂකයා නම් කිරීමේ අවසන් තීරණය සඳහා නායකයා හා නියෝජ්‍ය නායකයා අද (08) හමු වී ඒ පිළිබඳව තීරණයක් ගැනීමට නියමිතය. ඒ අනුව අද පැවැත්වෙන සාකච්ඡාව තීරණාත්මක වනු ඇතැයි ද වාර්තා වේ.
පක්ෂයේ විනය හා එකමුතුකම රඳවා ගෙන ජනාධිපතිවරණය ජය ගැන්මට අවශ්‍ය බව අගමැති රනිල් වික්‍රමසිංහ මහතා විසින් මෙහිදී පවසා ඇති අතර එසේ නොවුවහොත් පක්ෂයට ඡන්ද අහිමි වීමේ අවදානමක් පවතින බවද අගමැතිවරයා පවසා ඇත. අද (08) පැවැත්වෙන තීරණාත්මක සාකච්ඡාව පක්ෂයේ නායකයාට හා නියෝජ්‍ය නායකයාට පැවරීමට එජාප ජ්‍යෙෂ්ඨයින් ප්‍රමුඛ එක්සත් ජාතික පක්ෂයේ ඇමැතිවරුන් විසින් තීරණය කර ඇත්තේ එයින් පසුවය.
අපේක්ෂකයා කවුරුන් වුවත් පක්ෂයේ සහාය ලබා දීම ගැනද මෙහිදී සාකච්ඡාවට ලක්ව ඇති අතර ඉදිරිපත් වන අපේක්ෂකයා නම් කිරීමෙන් පසුව එක්සත් ජාතික පෙරමුණට සම්බන්ධ සෙසු පක්ෂ සමඟ ඉදිරි පියවර ගැනීමට නියමිතය.
