මත්කුඩු ජාවාරමේ ඒකාධිකාරිය වෙනුවෙන් මට්ටක්කුලියේ සමිට්පුර චූටි උක්කුංගේ කල්ලියේ සහ කුඩු රොෂාන්ගේ කල්ලියේ මරා ගැනිල්ලට තවමත් නැවතීමේ තිත තැබී නැත. දෙපාර්ශ්වයේම දහ පහළොස් දෙනෙකුගේ ජීවිත අහිමි වී ගොසිනි. ඒ අතර චූටි උක්කුන්ද සිටී. දැන් චූටි උක්කුංගේ කල්ලිය මෙයෙවන්නේ ඔහුගේ සහෝදරයාය. ඔහු සුද්දාය. මේ වන විට සුද්දා සිටින්නේ මත්කුඩු ජාවාරමකට අසුවී බන්ධනාගාරයේය.
රොෂාන්ගේ පියාගේ ඝාතනයට පොලිසිය චූටි උක්කුන් ඇතුළු කිහිප දෙනෙකු අත්අඩංගුවට ගත්තද ඔවුන් වැඩි කාලයක් බන්ධානාගාරයේ සිටියේ නැත. ඇප මත එළියට ආවෝය. මත්කුඩු ජාවාරම වෙනදාටත් වඩා සරුවට කරන්නට ගන්නේ රොෂාන්ට ද කොකා පෙන්වමිනි. රොෂාන්ගේ හයිය වූයේ දෙමටගොඩ චමින්දය. ඒ වන විට ඔහු සිටියේ භාරත ලක්ෂමන් ඝාතනයට බන්ධනාගරගතවය. ඒ නිසා රොෂාන්ගේ බලය හීන වී ඇතැයි චූටි උක්කුං සිතුවේය. රොෂාන්ගේ නිවස ඉදිරිපිටින් යන එන විට රොෂාන්ගේ නිවසට පස්ස පැත්ත පෙන්වමින් උසුළු විසුළු කරන්නට පවා චූටි උක්කුන් සහ ගෝල බාලයෝ වග බලාගත්හ. ඒවා නොරිස්සුවත් ඉවසාගෙන සිටින්නට රොෂාන්ට සිදු විය |
චූටි උක්කුන් මරා දමන්ගේ එක පොදියට ඔහුගේ ගෝලයන් සිවු දෙනෙක්ද සමඟිනි. ඒ 2016 වසරේ ඔක්තෝම්බර් 23 වැනිදාය. මට්ටක්කුලියේ සමිට්පුරදීය. එල්ලේ ක්රීඩා තරගයක ප්රධාන ආරාධිතයා ලෙස සහභාගි වී එමින් සිටියදී චූටි උක්කුන් ඇතුළු ඔහුගේ ගෝලබාලයන් එක පොදියට වෙඩි තබා මරා දමන්නේ කුඩු රොෂාන් ඔහුගේ ගෝලබාලයන් සමඟ එක්වය.
එදා එම පංච පුද්ගල ඝාතනයට කුඩු රොෂාන් සහ ඔහුගේ ගෝලන් 08 දෙනෙකු ගිනි අවි රැසක් සමඟ අත්අඩංගුවට ගන්නේ කොළඹ අපරාධ කොට්ඨාසයයි. නීතිපතිවරයා ඔවුන්ට එරෙහිව අධි චෝදනා පවා කොළඹ මහාධිකරණයේ ගොනු කරනු ලැබුවේය. ඒ මිනිස් ඝාතන ඇතුළු චෝදනා 15ක් යටතේය.
අවසානයේදී සිදු වන්නේ එල්ලුම් ගස් යනවා වෙනුවට ඔවුන්ට නිදහස ලැබීමය. ඒ නීතිපතිවරයා ඔවුන්ට එරෙහිව ගොනු කර තිබුණු චෝදනා සාධාරණ සැකයෙන් ඔබ්බට ඔප්පු කිරීමට නොහැකි වූ බව අධිකරණය තීරණය කිරීමෙනි. ඒ අනුව කුඩු රොෂන් ඇතුළු ගෝලයන් 09 දෙනා නිදහස ලබා එළියට එන්නේ ඉකුත් ජූනි 26 වැනිදාය.
ඒ වන විට චූටි උක්කුංගේ සහෝදරයන් දෙදෙනා සිටින්නේ බලවත්වය. කුඩු රොෂාන්ගේ මත්කුඩු ඒකාධිකාරය බිඳදමමින් චූටි උක්කුංගේ බාල සහෝදරයා වන සුද්දා සිටියේ මත්කුඩු ජාවාරමේ ජයටම නිරත වෙමිනි. සිය සහෝදරයාගේ කල්ලිය ඔහු නඩත්තු කළේ මත්කුඩු ජාවාරම ඔස්සේය. චූටි උක්කුන්ගේ සහෝදරයා ඔළුව උස්සාගෙන සිටීම කුඩු රොෂාන්ට එතරම් රිස්සුවේ නැත. ඒ නිසාම චූටි උක්කුංගේ කල්ලියේ බලය බිඳීමට කුඩු රොෂාන් නිදහස ලැබීමෙන් පසු කල්යල් බලා වැඩ අල්ලන්නේ ඉකුත් 15 වැනිදාය. ඒ අවමඟුලකට සහභාගි වීමට මාදම්පිටිය සුසාන භුමියට ගොස් සිටි චූටි උක්කුන්ගේ කල්ලියේ වැඩ්ඩෙකු වන ආනමාළු රංග සහ ඔහුගේ සගයෙකු මන්නා පිහිවලින් කපා ඝාතනය කරමිනි. ත්රී රෝද රථයකින් සිය සගයන් සමඟ මාදම්පිටිය සුසාන භුමියට කඩා වදින කුඩු රොෂාන් සිය ගෝලයන් සමඟ එක් වී ඔවුන් දෙදෙනා මරා දමන්නේ දෙනෝ දහක් දෙනා බලාසිටියදීය.
කුඩු රොෂාන් සහ ගෝලයන් සිය ඉලක්කය ලබාගැනීමෙන් පසු පලා යන්නේ ඔවුන් පැමිණි ත්රී රෝද රථයද සුසාන භුමියේ අතහැර දමාය. කුඩු රොෂාන් පස්සෙන් පැන්නීමට පොලිසියට එහි ඉතිරි වන ප්රබලම සාක්ෂිය වන්නේ එයය. එම සාක්ෂිය පස්සේ පන්නන්නේ පොලිස් විශේෂ කාර්ය බළකායේ සංවිධානාත්මක අපරාධ විමර්ශන ඒකකයේ නිලධාරීහුය. පැය කිහිපයක් ඇතුළත ඔවුහු ත්රිරොද රථයේ ලියාපදිංචි හිමිකරු කවුරුන්දැයි අනාවරණය කර ගත්හ. බැලින්නම් එම රථයේ හිමිකරු කුඩු රොෂාන්ගේ බිරිය නිරෝෂනීය.
ඒත් එක්කම විශේෂ කාර්ය බළකායේ සෙබළු කුඩු රොෂාන්ගේ සමිට්පුර පිහිටි නිවාස හතරක්ම වැටලූහ. කුඩු රොෂාන්ගේ බිරිය පදිංචිව සිටියේ තෙමහල් සුවිසල් නිවසකය. එ් වන විට කුඩු රොෂාන් සිටින්නේ පලාගොස් සැඟවය. සෙසු නිවාස සෝදිසි කිරීමේදී කුඩු රොෂාන්ගේ ගෝලයන් තිදෙනෙකු කොටු වන්නේ කඩු දෙකක්ද සමඟිනි. ඒ අය අතර කැලණිය වරාගොඩ පදිංචිව සිටින කුඩු රොෂාන්ගේ සහෝදරයාද සිටියේය. ඔහු කෝලිතය.
එම ඝාතන දැම්වැල් පුරුක් මෙන් ඇත්තේ එකිනෙකට බැඳීය . චුටී උක්කුන් ඇතුළු පස් දෙනාගේ ඝාතනයට කුඩු රොෂාන් බන්ධනාගාර ගත වන විට චූටි උක්කුංගේ වැඩිමහල් සහෝදරයාගේ මෙහෙයැවීමෙන් ප්රතිප්රහාර එල්ල වන්නේ කුඩු රොෂාන්ගේ ගෝලයන් ඉලක්ක කරගෙනය. වැඩි කල් ඔහුට සෙල්ලම් දමන්නට ඉඩක් නොවීය. පොලිසිය ඔහු අත්අඩංගුවට ගෙන බන්ධනාගාර ගත කරන්නේ කාලයක් එළියට එන්නට නොහැකි වන ලෙසිනි.
ඒ අතර කුඩු රොෂාන් ඇතුළේ සිට ප්රියංකරට දැනෙන්නට ඔහුගේ බිරියට කොකා ගස්සන්නේ ගෝලයෙකු යොදවාය. ඒ ඇයව මරා දැමීමටය. එහෙත් ඇයට ජීවත් වීමේ වාසනාව තිබිණි. සිය නෑනාට තැබූ වෙඩිල්ලට පළිගැනීමට ඉදිරිපත් වන්නේ චූටි උක්කුංගේ බාල සහෝදරයා වන චාමරය. සුද්දා යැයි කියන්නේ ඔහුටය. සුද්දා කල්යල් බලා කොකා ගස්සන්නේ කුඩු රොෂාන්ගේ දකුණු අත බදු ගෝලයාටය. ඔහු නමින් ගල් සම්පත්ය. රටේම අවධානයට යොමු වූ එම ඝාතනය සිදු වන්නේ මෝදර අලුත් මාවතේදීය. සිය බිරිද සහ දරුවා සමඟ ත්රි රෝද රථයකින් ගමන් කරමින් සිටි ගල්සම්පත්ට වෙඩි තැබන්නේ දකුණෙන් ගෙන්වන ලද කුලී ඝාතකයෙකු යොදාගෙනය. එදා ගල්සම්පත් වෙඩි කා අවසන් හුස්ම පොද මහා පාර මැද හෙළන්නේ සිය පෙර පාසල් වයසේ පසු වන දරුවා ඒ දෙස බලා සිටියදීය.
ගල්සම්පත්ගේ ඝාතනයෙන් වැඩි කාලයක් සුද්දාට නිදහසේ සිටින්නට ඉඩක් නොවීය. පොලිසිය ඔහුව අල්ලා හිරේට යැව්වේය. මාස හයක්ම ඔහු සිටියේ වැලිකඩ බන්ධනාගාරයේය. ඇප මත එළියට එන්නේ ඉකුත් වසරේදීය. ඒ පැමිණි ඔහු සමිට්පුර මත්කුඩු ජාවාරමේ ඒකාධිකාරය සියතට ගත්තේය. ඒ කුඩු රොෂාන්ගේ ගෝලයන් පන්නා දමමිනි. ඊට කුඩු රොෂාන්ගෙන් සුද්දාට ප්රතිප්රහාරයක් එල්ල වන්නේ ගල් සම්පත්තේ ඝාතන නඩුවට පෙනී සිට අලුත් කඩේ අධිකරණයේ සිට සමිට්පුර බලා යන අතරය. එම ප්රහරය ගැන කල්තියාම ඉව වැටුණු නිසාම ඔහු ආරක්ෂා වන්නට වග බලා ගත්තේය. ඔහුගේ ආරක්ෂාවට අධිකරණයට පැමිණ සිටි පවුලේ උදවිය ත්රී රෝද රථයක නංවා පිටත් කර හරින ඔහු යතුරු පැදියක නැඟී කාටත් හොරා පැනගත්තේය.
ඒ බවක් නොදත් කුඩු රොෂාන් යොදවනු ලබූ වෙඩික්කරු ඉලක්ක කරන්තේ සුද්දාගේ පවුලේ උදවිය ගමන් කරමින් සිටි ත්රිරෝද රථයයි. කිසිවෙකුගේත් ජීවිතයට හානියක් එම ප්රහාරයෙන් සිදු නොවූවත් සුද්දාගේ මාමාත්, මස්සිනාත්, නැඟණියත් ඇතුළු පස් දෙනෙක්ම වෙඩි කෑවෝය.
මේ අකාරයට එකිනෙකා මරාගන්නා චූටි උක්කුංගේ සහ කුඩු රොෂාන්ගේ නොනවතින ගැටුමේ මුල වසර පහ හයක් ඈතකට දිව යන්නෙකි. එකම ගමේ එකට හැදී වැඩුණු චූටි උක්කුන් සහ කුඩු රොෂාන් අතර විරසිකයට මුල මත්කුඩු ජාවාරමයි. චූටි උක්කුන්ට මත්කුඩු සපයන ලද්දේ පාතාල කල්ලි නායක බ්ලූමැන්ඩල් සංඛය. ඔහු දැන් සිටින්නේ ඉන්දියාවට පලාගොසිනි. ඉන්දාවේ රාමේෂ්වරන් හීදී මෑතකදී එරට පොලිසියට හසුවූයේ යැයි සඳහන් වූයේ සංඛවය. කුඩු රොෂාන්ට මත්කුඩු සපයන ලද්දේ සංඛගේ ප්රධානතම ප්රතිවාදියෙකු වන දෙමටගොඩ චමින්දය. භාරත ලක්ෂමන් ඝාතනයට වරදකරු වෙමින් චමින්ද දැන් සිටින්නේ මරණීය දන්ඩනය නියම වූ සිරකරුවකු ලෙසිනි.
සංඛ සහ දෙමටගොඩ චමින්ද අතර ඇත්තේ නයි මුගටි වෛරයකි. වරක් දෙමටගොඩ චමින්ද රැගත් බන්ධනාගාර බස් රථයකට පවා දෙමටගොඩදී වෙඩි ප්රහාරයක් එල්ල කරන්නේ සංඛගේ සැලසුමකට අනුවය. චූටි උක්කුන් සහ කුඩු රොෂාන් අතර මත්කුඩු ඒකාධිකාරයට ඇති වන ගැටුමටද මුල සංඛ සහ දෙමටගොඩ චමින්ද අතර ඇති ඒ බල අරගලයයි.
මරාගැනීම්වලින් තොරව අතපයේ හයියෙන් පමණක් සිය ශක්තිය පෙන්වනු ලැබූ චූටි උක්කුන් සහ කුඩු රොෂාන් අතර පැවැති ගැටුම් වෙඩි තබා ගැනීම් දක්වා වර්ධනය වන්නේ 2014 වසරේ ජූලි 12 වැනිදා කුඩු රොෂාන්ගේ පියා ඝාතනය වීමත් සමඟිනි. චූටි උක්කුන් ඇතුළු පිරිසක් එදා ඒ එල්ල කළ ප්රහාරයෙන් රොෂාන්ද බරපතළ තුවල ලැබුවේය. සිය පියා ඝාතනයට රොෂාන් පළිය ගන්නේ ඊට පසු දින චූටි උක්කුන්ගේ මව ඝාතනය කරවමිනි. එම ඝාතනය ඔහු මෙහෙයවන්නේ කොළඹ ජාතික රෝහලේ ඇඳක් මත සිටිමිනි.
රොෂාන්ගේ පියාගේ ඝාතනයට පොලිසිය චූටි උක්කුන් ඇතුළු කිහිප දෙනෙකු අත්අඩංගුවට ගත්තද ඔවුන් වැඩි කාලයක් බන්ධානාගාරයේ සිටියේ නැත. ඇප මත එළියට ආවෝය. මත්කුඩු ජාවාරම වෙනදාටත් වඩා සරුවට කරන්නට ගන්නේ රොෂාන්ට ද කොකා පෙන්වමිනි. රොෂාන්ගේ හයිය වූයේ දෙමටගොඩ චමින්දය. ඒ වන විට ඔහු සිටියේ භාරත ලක්ෂමන් ඝාතනයට බන්ධනාගරගතවය. ඒ නිසා රොෂාන්ගේ බලය හීන වී ඇතැයි චූටි උක්කුං සිතුවේය. රොෂාන්ගේ නිවස ඉදිරිපිටින් යන එන විට රොෂාන්ගේ නිවසට පස්ස පැත්ත පෙන්වමින් උසුළු විසුළු කරන්නට පවා චූටි උක්කුන් සහ ගෝල බාලයෝ වග බලාගත්හ. ඒවා නොරිස්සුවත් ඉවසාගෙන සිටින්නට රොෂාන්ට සිදු විය.
රොෂාන්ගේ එම නිහඬතාව හමුවේ දිනෙන් දින ශක්තිමත් වන්නේ චූටි උක්කුන්ය. රොෂාන් ළඟ සිටි ගෝල බාලයෝද චූටි උක්කුන් වටා රොක් වන්නට වූහ.
තමා තනි වෙමින් සිටින බව රොෂාන්ට දැනිණි. චූටි උක්කුන් අතින් වැඩි කල් යන්නට මත්තෙන් මැරුම්කන්නට පවා සිදු වන බව රොෂාන්ට වැටහිණි. ඊට පෙර තමා ඉස්සර විය යුතු යැයි රොෂාන් කල්පනා කළේය.
ඔහු ඉස්සර වන්නේ 2016 වසරේ ඔක්තෝම්බර් 23 වැනිදා චූටි උක්කුන් ඇතුළු පස් දෙනෙකු එක පොදියට ඝාතනය කරමිනි.
චූටි උක්කුන්ගේ මරණින් පසු සියල්ල නිමා වේවි යැයි සමිට්පුර වැසියන් විශ්වාස කළත් ඒ විශ්වාසය මාදම්පිටිය කනත්තේ ඝාතනයත් සමඟ බිඳ වැටී ඇත.