මහජනතාව තමන් පාවිච්චියට ගන්නා සබන් කැටයේ, දත් බුරුසුවේ, බෙහෙත් පෙත්තේ සිට සෑම පාරිභෝගික භාණ්ඩයකටම රජයේ ආදායම් ලෙස ගෙවන බදු මුදල් හිතූ මනාපයට තම සුඛ විහරණය සඳහා ඉතා අමනෝඥ අයුරින් යොදාගැනීමක් පිළිබඳ සිහිපත් වන සිද්ධියක් ඉකුත් දා සිදු විය. ඒ , හිටපු ජනාධිපති මහින්ද රාජපක්ෂ මහතාගේ පාලන කාලයේ සිදු වූ විනිවිදභාවයෙන් තොර භාණ්ඩ හා සේවා මිලදී ගැනීම් සඳහා වියදම් දැරීමට පියවර ගත යුතුයැයි ඉකුත් ඇමැති මණ්ඩලයට ගෙන ආ යෝජනාවක් සමඟය.
මහින්ද රාජපක්ෂ මහතාගේ කාලයේ නිසි ක්‍රමවේදයක් හෝ පිළිවෙතක් නැතිව වැය කළ රුපියල් කෝටි හාරසිය හතළිහක මුදලක් ගෙවා දමන ලෙස ඉකුත් ඇමැති මණ්ඩලයට ගෙන ආ දැනුවත් කිරීමේ යෝජනාව පසුවට කල් තැබීමට සිදු විය. ඒ මුදල පියවනවාද? නැද්ද? යන්න පිළිබඳ ඉදිරියේ තීරණයක් ගනු ඇත.
| මහින්ද රාජපක්ෂ පාලන සමයේ ජනාධිපති ලේකම් කාර්යාලයට ආනයනය කළ භාණ්ඩ වෙනුවෙන් ශ්‍රී ලංකා රේගුවට රුපියල් කෝටි 200ක් ගෙවීමට සිදු වී තිබේ. ජනාධිපති ලේකම් කාර්යාලය භාවිත කළ වාහන 78ක් සඳහා ලීසිං සමාගමකට ගෙවිය යුතු රුපියල් කෝටි 150ක්ද වෙයි. ජනාධිපති ලේකම් කාර්යාලය විසින් ශ්‍රී ලංකන් ගුවන් සමාගම වෙත රුපියල් කෝටි 11ක්ද, තංගල්ල කාල්ටන් නි‍ෙවසේ පැවැති උත්සව සදහා වැය වූ රුපියල් කෝටි 2ක්ද පියවිය යුතුව ඇත. |
2005 නොවැම්බර් 17 වැනිදා පැවති ජනාධිපතිවරණයෙන් ජයගත් මහින්ද රාජපක්ෂ මහතා 2010 ජනාධිපතිවරණයෙන් ද ජයගෙන 2015-01-08 වැනි දා දක්වා ජනාධිපති ලෙස කටයුතු කළේය. ඒ කාලය තුළ ප්‍රශ්න මතු වන ආකාරයට සිදු කළ ගනුදෙනු පියවීම සම්බන්ධව ඉකුත් දා ඇමති මණ්ඩලයට විගණකාධිපතිවරයාගේ දැනුම් දීම මත දැනුවත් කිරීමේ යෝජනාව ගෙන ආවේ ජනාධිපති මෛත්‍රීපාල සිරිසේන මහතා විසිනි. ඒ සම්බන්ධයෙන් ඇමැති මණ්ඩලයේදී අමාත්‍යවරුන් ගණනාවක් විරෝධතාව දක්වා තිබේ.
මහින්ද රාජපක්ෂ මහතා ආණ්ඩු පාලනය ගෙන ගිය අවස්ථා දෙකේදීම වියදම් කරන ලදුව එහෙත් මෙතෙක් නොගෙවා ඇති මුදලක් පිළිබඳ ජනාධිපතිවරයා පසුගිය කැබිනට් රැස්වීමේදී තොරතුරු අනාවරණය කර තිබිණි.
ඒ වියදම්වල විනිවිදභාවය පිළිබඳ ප්‍රශ්න මතු වී ඇතැයිද ටෙන්ඩර් පටිපාටියකින් තොරව සිදු වී ඇති එකී ගනුදෙනු පියවීමට රජයට හැකියාවක් නැතැයිද මෙහිදී ඇතැම් ඇමැතිවරුන් පෙන්වා දී තිබේ. එලෙස සිදු වූ ගනුදෙනුවලට ගෙවිය යුතු මුදල් සම්බන්ධයෙන් මහාභාණ්ඩාගාරය සිය දැක්ම පැහැදිලි කර තිබෙන්නේ පවතින නීති රීති අකුරටම පිළිපදිමිනි. එ් අනුව එම මුදල් ගෙවනවාද? නැද්ද? යන්න පිළිබඳ තීරණයක් ගැනීමට ඉදිරියේදී සිදු වනු ඇත.
මහින්ද රාජපක්ෂ පාලන සමයේ ජනාධිපති ලේකම් කාර්යාලයට ආනයනය කළ භාණ්ඩ වෙනුවෙන් ශ්‍රී ලංකා රේගුවට රුපියල් කෝටි 200ක් ගෙවීමට සිදු වී තිබේ. ජනාධිපති ලේකම් කාර්යාලය භාවිත කළ වාහන 78ක් සඳහා ලීසිං සමාගමකට ගෙවිය යුතු රුපියල් කෝටි 150ක්ද වෙයි. ජනාධිපති ලේකම් කාර්යාලය විසින් ශ්‍රී ලංකන් ගුවන් සමාගම වෙත ගෙවිය යුතු රුපියල් කෝටි 11ක්ද, තංගල්ල කාල්ටන් නිවසේ පැවැති උත්සව සදහා වැය වූ රුපියල් කෝටි 2ක්ද පියවිය යුතුව ඇතැයි ජනාධිපතිවරයා විසින් ඉදිරිපත් කරන ලද ඇමැති මණ්ඩල පත්‍රිකාවේ සඳහන් වී ඇතැයි ද ඇතැම් ඇමැතිවරු පෙන්වා දී තිබේ.
හිතු මනාපයට සුපිරි වාහන ලබාගනිමින් ඒවාට ගෙවිය යුතු ලීසිං මුදල් හා පොලිය නොගෙවා තිබීම බරපතළ වරදකි. එපමණක් නොව ඒ සම්බන්ධයෙන් නිසි ක්‍රමවේදයක් අනුගමනය නොකිරීමද වරදකි. එවැනි තත්ත්වයක් යටතේ ලබාගෙන අතහැර දමා තිබූ ඒ ඇතැම් වාහන සම්බන්ධයෙන් නීතිමය ක්‍රියාමාර්ග ගැනීමට කිසිවකුටත් අවකාශ සැලසී නැත. ඇමැති මණ්ඩලය දැනුවත් කිරීම සම්බන්ධයෙන් ගෙන ආ ඒ යෝජනාව පිළිබඳ ඉදිරියට කටයුතු කිරීමට මුදල් අමාත්‍යාංශයේ මතය සලකා බැලිය යුතුමය. මුදල් අමාත්‍යාංශයේ ඉහළ නිලධාරියෙකු සඳහන් කළේ රජය සෑම වසරක් පාසාම සිදු කරනු ලබන වියදම් එම වසරේදීම ගෙවා දැමිය යුතු බවය. එසේ නැති නම් මුදල් චක්‍රලේඛ මුරය 115 යටතේ ඊළඟ වසරේ ගෙවීමට ඒ සඳහා ඉදිරියට පියවර ගත යුතුව ඇත. එහෙත් මහින්ද රාජපක්ෂ මහතාගේ පාලන කාලයේ සිදු වී තිබෙන දැනට ගෙවිය යුතු ඉහත මුදල සඳහා කිසිදු පියවරක් එම වකවානුවේ ගෙන නැත. ඒ වියදම් ගෙවා දැමීම පිළිබඳ ඉතිරි වී ඇත්තේ ප්‍රශ්නාර්ථයකි.
- සඳරුවන්
