ශ්රී ලාංකිකයන් වන අපට තරමක් දුරස්ත කලාවක් වුව ද අන්තර්ජාතික වශයෙන් සලකා බලන කල්හි දැඩි ඉල්ලුමක් හා ඉහළ ප්රේක්ෂක රුචිකත්වයක් වනජීවි කලා මාධ්ය සම්බන්ධයෙන් නිර්මාණය වෙමින් පවතී. වනජීවින් සහ වනාන්තර හි අසිරිය රස විඳින්නන් උදෙසාම මේ වන විට එම විෂය කර්මාන්තයක් ලෙස ගොඩනැඟී තිබේ.
ශ්රී ලංකාවේ පවතින සිනමාව වෘතාන්ත චිත්රපට වශයෙන් පටු සීමාවකට ලඝු කර ඇති නමුත් එකී සාම්ප්රදායික සීමා බිඳහෙළමින් ශ්රි ලාංකික තරුණ සිනමාකරුවෙක් වනජීවි සිනමාකරුවකු ලෙස අන්තර්ජාතික සිනමාව තුළ ස්වකීය අනන්යතාව සලකුණු කිරීමට සමත් වී සිටී.
ඔහු තිවංක රුක්ෂාන් පෙරේරාය. හෙතෙම කොළඹ ශාන්ත ජෝසප් විද්යාලයේ ආදි ශිෂ්යෙයකි. තිවංක සිනමාකරුවෙකු ලෙස ගොඩනැඟෙන්නේ ඇමරිකා එක්සත් ජනපදයේ සෑන් ෆ්රැන්සිස්කෝ හි පිහිටි Academy of Art University of Creative Arts නමැති විශ්වවිද්යාලය මඟින් ද, මැලේසියාවේ පිහිටි Limkokwing University Creative Arts නමැති විශ්වවිද්යාලය මඟින් ද සිය උසස් අධ්යාපන කටයුතු සාර්ථකව නිම කිරීමෙන් අනතුරුවය. තිවංක මේ වන විට වෘත්තීමය වශයෙන් සිය පූර්ණ කාලයම වැය කරන්නේ වන ජීවි සිනමා කෘති වෙනුවෙනි.
ඔහු විසින් Big-Four Sri Lanka, Wild Sri - Lanka Realm of the Leopard, The Devil Birds of Sri Lanka, Brown Wood Owl- Juvenile’s Journey යන සිනමාපට නිර්මාණය කර ඇත. ඒ අතරින් Big-Four Sri Lanka, යන චිත්රපටය 2019 වර්ෂයේ දී 12th ECO Film Festival හීදි ප්රදර්ශනය කරන ලදී. තව ද ශ්රී ලංකාවට ආවේණික වූ 'උලමා' නැමැති කුරුලු විශේෂය සම්බන්ධයෙන් තිවංක විසින් නිර්මාණය කරනු ලැබූ The Devil Birds of Sri Lanka යන සිනමා නිර්මාණය කැනඩාවේ Daily Plant මඟින් ද විකාශනය කරන ලදී.
තිවංක සිනමාකරුවකු වශයෙන් පමණක් නොව තිර පිටපත් රචකයෙකු වශයෙන් ද සිය දායකත්වය නොමසුරුව ලබාදී තිබේ. “Sanctuary”තිර නාටකය සඳහා World Series of script writing ලෙස 2010 වර්ෂයේදී ද, Black Leopard තිර රචනය සඳහා 4th Annual Screen Craft Screen Writing Fellowship සහ Bird Pray තිර රචනය සඳහා Screen craft Horror Screen Play Contest ලෙස 2017 වර්ෂයේ දී ද, Writers for Writers - MichellCollyar Screen Writing ලෙස නිර්දේශ වීමෙන් ද අන්තර්ජාතික වශයෙන් විවිධ ඇගයීම්වලට ලක් වී සිටී.
ඔහු විසින් නිර්මාණය කරන ලද Wild Sri Lanka - Realm of the Leopard නැමැති ශ්රී ලංකාවේ වනාන්තර සිය වාසභුමිය කරගත් දිවියන්ගේ තොරතුරු අනාවරණය කරන මිනිත්තු 50ක් පුරා දිවෙන සිනමා පටය Discovery Asia නමැති සුප්රසිද්ධ වනජීවි සිනමා නාලිකාව විසින් ආසියාව පුරා විකාශනය කිරීම සඳහා මිලදී ගෙන තිබේ. එම නිර්මාණය ප්රංසය, ඉතාලිය, ජපානය සහ වෙනත් යුරෝපීය සහ ඇමරිකානු රටවල් විසින් ද විකාශනය කිරීමට බලාපොරොත්තු වේ.
Discovery Asia නාලිකාව 2019 අගෝස්තු 21 වන දා සිට අගෝස්තු 29 වන දින දක්වා සතියකට ආසන්න කාලයක් සිය ගුවන් කාලය තිවංකගේ Wild Sri Lanka - Realm of the Leopard වෙනුවෙන් වෙන් කිරීමට නියමිතව ඇත.
වනජීවි සිනමාකරුවෙකු වීම පහසු කටයුත්තක් නොවේ. සිනමාකරුවෙකු වශයෙන් ස්ථාවර වීමට හෝ කිසිදු විධිමත් ක්රමවේදයක් නැති රටක තිවංක වනජීවි සිනමාකරුවෙකු ලෙස ජාත්යන්තරය දිනාගැනීම අරුමයකි. ශ්රී ලංකාව හා ජාත්යන්තරය ප්රබල හුයකින් බැඳ තබන තිවංක වැනි තරුණයන්ගේ නිර්මාණශීලී හැකියා කෙරෙහි බලධාරීන්ගේ අවධානය යොමු විය යුතු කාලය එළඹ ඇත.