බොරලැස්ගමුව මංසන්ධියටත්, රත්තණ පිටිය මංසන්ධියටත් අතර පිහිටි ජී.එච්. පෙරේරා මාවත ආසන්නයෙන් පාර හරහා මාරුවෙන ජනතාව ලක්වන්නේ දැඩි තැති ගැනීමටය. කොළඹ හා ඒ අවට පාසල් කරා පියනඟන සිසු සිසුවියන්ද අගනගරයේ හා තදාසන්න නගරවලට දෛනික රාජකාරි කටයුතු සඳහා පිවිසෙන්නද මෙම මඟ ප්රයෝජනයට ගනිති.
පිළියන්දල දෙස සිට කොළඹ දෙසට ගමන් ගන්නා බස් රථ නැවතුමද ඇත්තේ මෙම ස්ථානයේමය. බස් රථවලින් බැසයන මගී ජනතාවට පාර හරහා මාරු වීමට සිදු වී ඇත්තේ මර බියෙනි. මේ ස්ථානයේ කහ ඉරක් ගසා තිබුණද. ඒ ආසන්නයේ ඇති වංගුව ගැන නොසලකන එකිනෙකා පරයා රථ වාහන පදවන්නන් නිසා, මිනිස් ජීවිත අනතුරට ලක්විය හැකි ස්වභාවයක් දැක ගන්නට ඇත.
මෙයට පිළියමක් ලෙස මෙම ස්ථානයේ “මාර්ග සංඥා පද්ධතියක්” සවි කිරීමට ඉක්මන් ක්රියා මාර්ගයක් ගන්නා ලෙස මහ මාර්ග බලධාරීන්ගෙන් ඉතා ඕනෑකමින් ඉල්ලා සිටිමු.
ඩබ්ලිව්. පී. සුනන්ද හිමිදිරි
රත්තණපිටිය , බොරලැස්ගමුව