මහින්ද රාජපක්ෂ රජයේ හිටපු ආරක්ෂක ලේකම් මෙන්ම හිටපු ජනාධිපතිවරයාගේ බාල සොහොයුරා මේ වන විට ජනාධිපතිවරණයට පොදුජන එක්සත් පෙරමුණෙන් ඉදිරිපත් වන අපේක්ෂකයා ලෙස කලඑළි බැස සිටී.
ඔහු රට වටා යමින් මේ වන විට තම ප්‍රචාරක ව්‍යාපාරයේ මූලික අදියරට අවතීර්ණ වී සිටී. ශ්‍රි ලංකා යුද හමුදාවේ හිටපු ලුතිනන් කර්නල්වරයකු වන ඔහු 80 දශකයේදී ශ්‍රි ලංකා යුද හමුදාව හැර දා ඇමෙරිකාවට ගොස් එරට පුරවැසිභාවයද ලබාගෙන ඇත. දේශපාලන කරළිය සමඟ රාජපක්ෂ පවුල පෑහුණද ගෝඨාභය ඉතා නිහඬ ජීවිතයක් ඇමෙරිකාවේ ගෙන ගියේය. ඩි.ඒ රාජජක්ෂ මහතාගේ පුතුන් අතුරින් මහින්ද , ඔහුගේ වැඩිමහල් සොයුරු චමල් මෙන්ම බාල ම සොහොයුරා වන බැසිල් දේශපාපලනයට විවිධාකාරයෙන් සම්බන්ධ වුවද ගෝඨාභය සොයුරා මෙරට සෘජු දේශපාලනයට අවතිර්ණ වන්නේ 2005 වසරේ මහින්ද රාජපක්ෂ මහතාගේ ජනාධිපති අපෙක්ෂකත්වය සමඟය.
මහින්ද රාජපක්ෂ මහතාටද ශ්‍රි ලංකා නිදහස් පක්ෂය තුළ ජනාධිපති අපේක්ෂකත්වය දිනාගැනීම සඳහා දැඩි සටනක් කරන්නට සිදු වූ අතර ඔහු ඉතා සංවිධානාත්මකව විවිධ අදියර ඔස්සේ ප්‍රචාරණ වැඩපිළිවෙළ ගෙන ගියේය. 2001 වසරේදී එක්සත් ජාතික පක්ෂය බලයට පත් වූ අවස්ථාවේදී විපක්ෂ නායකත්වය ලබාගැනීමේදී ඔහු පක්ෂ නායකත්වයට අභියෝග කරන ආකාරයෙන් හැසිරුණේය. ඔහු මේ අයුරින් පක්ෂයේ බිම් මට්ටමේ සිට පළාත් පාලන පළාත් සභා නියෝජිතයන් හමුවෙමින් ආයාචනය කළේ විපක්ෂ නායකත්වය ඔහු වෙත ලබාදීමට කටයුතු කරන ලෙසය. ඒ වන විට හිටපු අගමැති රත්නසිරි වික්‍රමනායකට ඒ තනතුර ලබාදීමේ සූදානමක් පැවතුණු අතර මහින්ද රාජපක්ෂ මහතා එය වළක්වන්නේ ඊළඟ ජනාධිපතිවරණය ඉලක්ක කරගෙන බව කාටත් පැහැදිලි විය.
කෙසේ වුවද මහින්ද රාජපක්ෂ මහතා ඉදිරියට ආවත් රාජපක්ෂ පවුලේ සහෝදරයෝ ඔහුගේ ජනාධිපති සිහිනය පසුපස නිබඳවම සිටියහ. ඒ අයුරින් ජනාධිපති අපේක්ෂකත්වය ලබාගත් මහින්ද රාජපක්ෂ මහතා නාම යෝජනා දෙන්නට මත්තෙන් බැසිල් රාජපක්ෂ මෙන්ම ගෝඨාභය රාජපක්ෂ මහත්වරුද දේශපාලන කරළියට එන්නට පටන් ගත්හ. ඇමෙරිකානු පුරවැසි බව ලබාගෙන සිටි මේ සහෝදර දෙපළ අතුරින් වඩාත් අවධානයට ලක් වී ඇත්තේ ගෝඨාභය රාජපක්ෂ මහතාය. එහිදී වැඩි කතා බහකට හේතු වූයේ ගෝඨාභය රාජපක්ෂ මහතාගේ ඇමෙරිකානු පුරවැසිභාවය පිළිබඳ ප්‍රශ්නයයි. ගෝඨා බැසිල් සහෝදර දෙපළටම ශ්‍රි ලංකා ද්විත්ව පුරවැසි භාවය තිබුණද වඩාත් කතා බහට ලක් වූයේ ගෝඨාභය රාජපක්ෂ මහතාගේ ඇමෙරිකානු පුරවැසිභාවයයි. ඊට හේතුව ඔහුට ජනාධිපතිවරණයේ නාම යෝජනා ලබාදීමට නම් ඇමෙරිකානු පුරවැභාවය අත්හළ යුතු බව ප්‍රකාශ වීමය.
ඒ නිසා ඇමෙරිකානු පුරවැසිභාවය ගැන බොහෝ සේ කතා බහ ඇති විය. ඒ කතා බහ තීරණාත්මක වූයේ මාසයකට අධික කාලයක් සිංගප්පූරුවේ හෘද සැත්කමක් සඳහා ගොස් සිටි ගෝඨාභය රාජපක්ෂ මහතා යළි දිවයිනට පැමිණිමත් සමඟය. ගෝඨාභය රාජපක්ෂ මහතාගේ පුරවැසිභාවය අත්හළ බව ප්‍රචාරය කිරීමේ පළමු පියවර තබන්නේ ඔහු සමඟ ඉතා සමීප සම්බන්ධතාවක් නඩත්තු කරගෙන යන මාධ්‍ය ජාල සහ දැන්වීම් ප්‍රචාරක ආයතන හිමියෙකි. ඔහු තමන්ට සමීප සම්බන්ධතා ඔස්සේ මුලින්ම රාජපක්ෂ මහතාගේ පුරවැසි බව අත්හැරීම පිළිබඳ ලියවිල්ල මුදාහළේය.
එහෙත් මෙරට කරුණු සෙවීමේ විශේෂඥතාවක් ඇති පිරිස්වලට මේ ප්‍රචාරය කළ ලියවිල්ල ව්‍යාජ එකක් බව තහවුරු කරගන්නට ගියේ පැය කිහිපයකි. එයින් ඔවුන්ට තරමක් පසු බාන්නට සිදු වූ අතර පසුදා ගෝඨාභය රාජපක්ෂ මහතා ඇමෙරිකානු පුරවැසි බව අත්හළ බවට එක්තරා ජාතික පුවත් පතක්ද තම ප්‍රධාන පුවත ලෙසින් වාර්තා කළේ තවත් එවැනිම ලිපියක් සහ රාජපක්ෂ මහතාගේ අවලංගු කළ ඇමෙරිකානු ගුවන් ගමන් බලපත්‍රයේ ඡායාරූපයක්ද සමඟිනි. එම ලියවිල්ලේ සත්‍ය අසත්‍යතාව පිළිබඳ තවමත් අභියෝගයක් එල්ල වී නැත.
එසේ වුවද ඇමෙරිකානු රාජ්‍ය දෙපාර්තමේන්තුව තම පුරවැසි භාවය අහෝසි කළ පුද්ගලයන්ගේ නම් ලයිස්තුව සහිත ෆෙඩරල් නාම ලේඛනය අවසන් වරට ප්‍රකාශයට පත් කළේ පසුගියදාය. ඉහත කී ජාතික පුවත් පත ගෝඨාභය රාජපක්ෂ මහතාගේ පුරවැසි බව අහෝසි වීමේ දිනය ලෙසට තම මුල් පුවතේ පළ කළ ඡායාරූපයේ සඳහන් වුවද පසුගිය සතියේ නිකුත් කළ ලයිස්තුවේ පවා නන්දසේන ගෝඨාභය රාජපක්ෂ මහතාගේ නම ඇතුළත් වී තිබුණේ නැත. පොදුජන එක්සත් පෙරමුණ මේ වන විට තම ජනාධිපතිවරණ අපේක්ෂකයා ලෙස ගෝඨාභය රාජපක්ෂ මහතා ඉදිරිපත් වන බවට ප්‍රකාශ කොට ඇත්තේ එවන් පසුබිමකය. කෙසේ වුවද ආරංචි මාර්ගවලට අනුව ඔහුගේ ඇමෙරිකානු පුරවැසි භාවය අත්හැරීම කෙසේ වෙතත් ඔහුට නව හැඳුනුම්පතක් සහ නව ශ්‍රි ලංකා ගුවන් ගමන් බලපත්‍රයක් ලැබී ඇත. එය ලබාගත්තේ කෙසේද යන්න පිළිබඳ ආගමන විගමන දෙපාර්තමේන්තුවේ නිලධාරීන්ටද ඇත්තේ ප්‍රශ්නයකි.
ගෝඨාභය රාජපක්ෂ මහතාගේ පුරවැසිභාවය සම්බන්ධයෙන් පවතින ඉතිහාසයම යම් ආකාරයක අබිරහස් ක්‍රියාදාමයක් බව ඒ පිළිබඳව විශේෂාංග ලිපියක් පළ කළ අප සහෝදර පුවත් පත වන සන්ඩේ ඔබ්සර්වර් පුවත් පත සඳහන් කර තිබිණි. එහි දැක්වුණේ ගෝඨාභය රාජපක්ෂ මහතාගේ මුළු ඉතිහාසයම මේ ආකාරයේ පාස්පෝට් අබිරහස්වලින් යුක්ත වී ඇති බවය. ඇමෙරිකාවේ සිටි ගෝඨාභය මහතා ශ්‍රි ලංකාවට එන්නේ 2005 වසරේ සැප්තැම්බර් මස 04 වැනිදාය. ඔහු එලෙස එන්නේ ඇමෙරිකානු පුරවැසියකු ලෙස දින 30ක සංචාරක වීසා පහසුකම් යටතේය. තනිකරම සංචාරක අරමුණින් එන ඔහු එසේ පැමිණ මහින්ද රාජපක්ෂ මහතාගේ ජනාධිපතිවරණ ප්‍රචාරක ව්‍යාපාරයේ මූලික කටයුතුවලට සම්බන්ධ වුයේය. කෙසේ වුවද සංචාරකයකුට වීසා ලද දින 30කට එහා රැඳී සිටීම මෙරට ආගමන විගමන නීතිවලට අනුව වසරත් වසර පහත් අතර කාලයක සිර දඬුවමකට යටත් විමේ ඉඩක් පවතී. ඒ නිසා ගෝඨාභය රාජපක්ෂ මහතා එම දින 30 සම්පූර්ණ වෙද්දී රටින් පිටවෙයි. ඒ 2005 වසරේ ඔක්තෝබර් 04 වැනි දාය. එහෙත් ඔහු යන්නේ ඉන්දියාවටය. ඉන්දියාවේ දින දෙකක් ගත කරන ඔහු 06 වැනිදා යළි පැමිණෙයි. මහින්ද රාජපක්ෂ මහතා 2005 වසරේ ජනාධිපති ධුරය සඳහා නාම යෝජනා ලබා දෙන්නේ ඊට පසුදාය.
නොවැම්බර් මස 18 වැනි දා ජනාධිපතිවරණයෙන් මහින්ද රාජපක්ෂ මහතා ජයග්‍රහණය කරන අතර එයින් පසුව ගෝඨාභය රාජපක්ෂ මහතා ඇමෙරිකානු පුරවැසිභාවයට අමතරව ශ්‍රි ලංකාවේ ද්විත්ව පුරවැසි භාවය සඳහා ඉල්ලුම් කොට ඇතත් එය ලබාගෙන ඇති ආකාරය පිළිබඳ අත්තේ පැහැදිලි තත්ත්වයක් නොවේ. ඔහු 2005 වසරේ නොවැම්බර් 21 වැනිදා ද්විත්ව පුරවැසිභාවය සදහා ඉල්ලිම් කළ බවට වාර්තා වුවද ඒ සඳහා අනුගමනය කළ යුතු අනුමත කරවා ගැනීම් ඇතුළු දිර්ඝ පියවර සම්පූර්ණ කොට නැති බව ආගමන විගමන දෙපාර්තමේන්තු වාර්තා හෙළි කරයි.
ඔහුගේ බිරිය වන අයෝමා රාජපක්ෂ මහත්මිය මෙන්ම සොයුරු බැසිල් රාජපක්ෂ මහතාද විධිමත් පිරිවිතර සම්පූර්ණ කිරීමෙන් නියමිත ක්‍රියාවලියට අනුකූලව ද්විත්ව පුරවැසිභාවය ලබාගත්තද ගෝඨාභය රාජපක්ෂ මහතා යම් අදෘෂ්‍ය සහායක් මත එය ලබාගත් බව එම වාර්තා මඟින් නිරීක්ෂණය වන බව සන්ඩේ ඔබ්සවර් පුවත් පත සඳහන් කරයි. ද්විත්ව පුරවැසිභාවය පිරිනමන ලද පත්‍රිකාවේ දිනය පැහැදිලි නොවන අතර ඔහුගේ උපන් දිනය පවතින කොටුවද හිස් වී ඇත. ද්විත්ව පුරවැසිභාවය ලබාගැනීමටත් පෙර ඔහු ආරක්ෂක ලේකම්වරයා ලෙසින් පත් කෙරෙන අතර ඒ ගැන කිසිදු අයකුගෙන් විරෝධයක් ඒ වන විට එල්ල වී නැත.
එපමණක්ද නොව 2005 මැතිවරණයේදී ඒ වන විටත් ශ්‍රි ලාංකිකයකු නොවන ගෝඨාභය රාජපක්ෂ මහතා තම නම මැදමූලන නිවසේ ඡන්ද හිමි නාම ලේඛනයේද ඇතුළත් කරගෙන ඇත. ඔහු එම ඡන්දයේදී එය පාවිච්චි කළත් නැතත් ඔහුගේ නම ඡන්ද හිමි නාම ලේඛනයට ඇතුළත් වීමද නීතිවිරෝධී වෙයි.
නීත්‍යනුකූලව ද්විත්ව පුරවැසිභාවය ලබාගන්නටත් පෙර ශ්‍රි ලංකාවේ ආරක්ෂක ලේකම්වරයා ලෙසින් පත් වන ගෝඨාභය රාජපක්ෂ මහතාගේ පරස්පර ක්‍රියාවක් වූයේ ඔහු ආරක්ෂක ලේකම්වරයා ලෙස පත් වී මාසයක් යන්නටත් පෙර ශ්‍රි ලංකාවේ නීතිවිරෝධි ආගමන සහ පුරවැසිභාවය ලබාදීම් අත්හිටුවීමයි.
ආරක්ෂක ලේකම්වරයා ලෙසින් පත් වුවද ඔහුටද රාජ්‍ය තාන්ත්‍රික ගුවන් ගමන් බලපත්‍රයක් ලබාගැනීමේදී රාජ්‍ය නිලධාරියකු ලෙස අනුගමනය කළ යුතු ක්‍රියා පිළිවෙතක් ඇත. එහෙත් මෛත්‍රීපාල සිරිසේන ජනාධිපතිවරයාගේ පළමු ජනාධිපති ලේකම් ලෙස කටයුතු කළ පි.බී අබේකෝන් මහතා ආගමන විගමන පාලකවරයා ලෙස කටයතු කළ කාලයේ දී එනම් 2009 වසරේදී ගෝඨාභය රාජපක්ෂ මහතාට රාජ්‍ය තාන්ත්‍රික බලපත්‍රය ලබාදෙන්නේ අනුගමනය කළ යුතු විධිමත් ක්‍රියා පාටිපාටියට පිටින් බව වාර්තා වෙයි. එ් අනුව ගෝඨාභය රාජපක්ෂ මහතා තමා විසින් ලබාගන්නා ලද චරිත සහතිකයකින් ද තොරව එම රාජ්‍ය තාන්ත්‍රික ගමන් බලපත්‍රය ඉල්ලුම් කිරීම සඳහා යොමු කරන ලද අතර එම කොටස සම්පූර්ණ කරන්නේ ආගමන විගමන පාලකවරයායමය.
ඔහු තමන් වසර 6ක් තිස්සේ හොඳින් දන්නා පුද්ගලයකු ලෙස හිටපු ආරක්ෂක ලේකම්වරයා වෙත චරිත සහතික දෙන අතර ඔහුගේම අනුමැතියක් යටතේ රාජ්‍ය තාන්ත්‍රික ගුවන් ගමන් බලපත්‍රය ලබා දී ඇත. ගෝඨාභය රාජපපක්ෂ මහතාගේ මේ ගමන් බිමන් ගුවන් බලපත්‍ර පිළිබඳ තොරතුරු මාධ්‍ය‍වේදින් සොයන්නට ගත්තේ ඔහුගේ විවාදිත ඇමෙරිකානු පුරවැසිභාවය අත්හැරීම පිළිබඳ සිදු කෙරුණු විමසුම්වලදීය. ඒ සෙවීම් බැලීම්වලට තවත් කරුණක් වුයේ මෙරට සිවිල් ක්‍රියාකාරීන් දෙදෙනකු වන ගාමිණී වියන්ගොඩ සහ මහාචාර්ය චන්ද්‍රගුප්ත තේනුවර මහතා වෙන් වෙන්ව කොළඹ පොලිස් මූලස්ථානයේ සිදු කළ පැමිණිල්ලකි.
ඒ පැමිණිල්ලට පසුබිම් වූයේ 2006 වසරේ ගෝඨාභය රාජපක්ෂ මහතා ඇමෙරිකානු පුරවැසියකු ලෙස මහින්ද රාජපක්ෂ මහතාගේ මැතිවරණ ව්‍යාපාරවලට සම්බන්ධ වීම සහ තම ද්විත්ව පුරවැසි භාවය ලබාගැනීම සම්බන්ධයෙන් යම් අක්‍රමිකතා සිදු වූ බවට කරන ලද පැමිණිලි ද්විත්වයකි. ඔවුන්ගේ අරමුණ එහිදී යම් නීති විරෝධී ක්‍රියාවලියක් සිදු වී ඇත්නම් ඒ සම්බන්ධයෙන් නෛතික පියවර වෙත යොමු කිරිමය.
මේ ලිපියේ මුලින් සඳහන් කරන ලද ආකාරයට ගෝඨාභය රාජපක්ෂ මහතාගේ පුරවැසිකම පිළිබඳ තවත් විවාදිත කරුණක් මේ අතරේ මතු විය. ඒ තමන් ශ්‍රි ලාංකික ගුවන් ගමන් බලපත්‍රයක් ලබාගත් බව ඔහු විසින්ම වරක් ප්‍රකාශ කිරීමය. තමන් සිංගප්පූරුව බලා ගියේ එම ගුවන් බලපත්‍රයෙන් බව අනාවරණය කළේද ඔහුමය. එසේ ගුවන් ගමන් බලපත්‍රයක් ලබාගැනීමද මේ වන විට අතිශය විවාදිත කරුණක් වී තිබේ.
ආගමන විගමන ගවේෂකයන්ට අනුව ඔහු එම ගුවන් බලපත්‍රය ලබා ගෙන ඇත්තේ අලුතින් ලබාගන්නා ලද ජාතික හැඳුනුම්පතක්ද භාවිත කරමිනි. එම ක්‍රියාවලියට යම් දේශපාලනික හස්තයක් පසුපස සිට උදව් කරන්නට ඇති බවට දැඩි විශ්වාසයක් ඔවුන් තුළ පවතී. ඒ පිළිබඳ තවදුරටත් ඉදිරියේදි සොය බැලෙනු ඇත. එසේ තිබියදී පසුගියදා ඇමෙරිකානු පුරවැසිභාවය ඉවත් කළ පුද්ගලයන්ගේ නම් සහිතව ඇමෙරිකානු රාජ්‍ය දෙපාර්තමේන්තුව විසින් නිකුත් කරන ලද ෆෙඩරල් නාමාවලියේ ගෝඨාභය රාජපක්ෂ මහතාගේ නම සඳහන් වූයේ නැත. කෙසේ වුවද මේ සම්බන්ධයෙන් සමාජ මාධ්‍ය ජාලා ඔස්සේ රාජපක්ෂ හිතවාදී කඳවුර එය සමනය කිරීම සඳහා විවිධ ප්‍රචාර ගෙන ගියද, නිල වශයෙන් ඔහුගේ මාධ්‍ය ප්‍රකාශක මිලින්ද රාජපක්ෂ මහතා හෝ පොදු ජන පෙරමුණ බොහෝ ප්‍රශ්න සම්බන්ධයෙන් ඉක්මන් ප්‍රතිචාර දැක්වුවද මේ සම්බන්ධයෙන් සෘජුව ප්‍රතිචාර දැක්වීමෙන් වැළකී සිටී.
(2019. 08. 11වැනි දින සන්ඩේ ඔබ්සර්වර් පුවත්පතේ පළවූ ලිපියක් ඇසුරින් සැකසිණි)
