රගර් ක්රීඩා තරුවක් වූ වසීම් තාජුඩීන්ගේ අබිරහස් ඝාතනය ගැන පරීක්ෂණ රැසක්ම සිදු වූ බව අප රටේ කාටවත් රහසක් නොවේ. ඒ සුපිරි ක්රීඩකයාගේ මරණයට එවකට රටේ සිටි ප්රධාන පුරවැසියන්ගේ පවුලේ අයගේ සම්බන්ධයක් තිබූ බව කතා බහට ලක් විය. එම පවුලේ බලයට සමීපව සිටි ජ්යෙෂ්ඨ නියෝජ්ය පොලිස්පති අනුර සේනානායක මේ සිද්ධීන් ගැන වුවමනාවෙන් තොරතුර වසන් කළ බවට අධිචෝදනාවට ලක් විය.
වර්ෂ 2012 මැයි මස 17 වැනි දා මේ දක්ෂ රග්බි ක්රීඩකයා කොළඹ 05, නාරාහේන්පිට පාරේ ශාලිකා හෝටලය අසල පිලිස්සී ගිය තමන්ගේ මෝටර් රථයේ සිටියදී සොයා ගනු ලැබීය. ඒ කාලයේ සමාජය වසාගෙන පැතිරී තිබූ භීෂණය මේ සිද්ධියෙන් වඩාත් ඉස්මතු විය. බිහිසුණු සැකයට තුඩු දුන් තාජුඩීන්ගේ මරණය රිය අනතුරක් ලෙස නාරාහේන්පිට පොලිසිය වර්ගීකරණය කළේය. එහෙත් එම මරණය ගැන විවිධ කටකතා පැතිර ගියේ ය. පාලක රාජපක්ෂ පවුලේ පුතුන් තිදෙනාගේම ජනප්රියම ක්රීඩාව වූ රග්බි ක්රීඩාවේ තරුවක් වූ තාජුඩීන්ට අකල් මරණයක් පැමිණීම රටක් සැක කළ අබිරහසක් විය.
වසර තුනකට පසු රාජපක්ෂ පාලනය බිඳ වැටුණේය. ඒ පිළිබඳ පසුව කෙරුණු විධිමත් විද්යාත්මක පරීක්ෂණ වර්තා සහ අධිකරණයට ඉදිරිපත් වූ ශාක්ෂි මත එය මිනීමැරුමක් බව පෙනී යන්නේ යැයි මුල් වරට අධිකරණය තීරණය කළේය. ඒ 2016 වසරේ පෙබරවාරි මාසයේදීය. කොළඹ අතිරේක දිසා විනිසුරු නිශාන්ත පිරිස් ඒ තීන්දුව ප්රකාශ කළේය. ඒ අනුව ඔහු රහස් පොලිසියට නියෝග කළේ සිද්ධිය සම්බන්ධයෙන් අදාළ වන සියලුම සැකකරුවන් අත්අඩංගුවට ගෙන අධිකරණයට ඉදිරිපත් කරන ලෙසය. එහෙත්
පරීක්ෂණයෙන් වසර 4ක ඇවෑමෙන් සිද්ධිය ආවරණය කිරීමට උත්සාහ දැරූ එක් අයෙකුවත් නීතියට කොටු වී තිබුණේ නැත.
වර්ෂ 2012 සිදු වූ මේ ඝාතනය සම්බන්ධයෙන් චෝදනා එල්ල වූ පළමු තැනැත්තා ලෙස නීතිපතිවරයාගේ උපදෙස් පරිදි ජ්යෙෂ්ඨ පොලිස් අධිකාරි අනුර සේනානායක අධිචෝදනාවට ලක් විය.
වර්ෂ 2017 ජූනි 27 වැනි දා අධිචෝදනා ලැබූ ජ්යෙෂ්ඨ පොලිස් අධිකාරි සේනානායක දණ්ඩ නීති සංග්රහය යටතේ 198 වැනි වගන්තිය යටතේ කොළඹ ඉහළ අධිකරණයේදී චෝදනාවට ලක් විය. ඒ එම සුපිරි රග්බි ක්රීඩකයාගේ මරණය සම්බන්ධ සාක්ෂි සඟවා එම ඝාතනය රිය අනතුරක් ලෙස ව්යාජ තොරතුරුවලින් වසා දැමීමට උත්සාහ කිරීමේ චෝදනාවට ලක්වය. සේනානායකගේ නඩුව ඔක්තෝබරයේ ආරම්භ වීමට නියමිත ය.
සේනානායකගේ අධිචෝදනාව ගොනු කර තිබියදී, ජූනි 28 දා නීතිපති දෙපාර්තමේන්තුව මහේස්ත්රාත් අධිකරණයට කීවේ තාජුඩීන්ගේ මරණය ගැන තවදුරටත් පරීක්ෂණ කරගෙන යන බවය. අනතුරුව රගර් ක්රීඩකයාගේ මරණයට අධිචෝදනා ලැබූ තවත් අයකුගේ විස්තර කරළියට ආවේය.
ඒ කොළඹ හිටපු ප්රධාන වෛද්ය නිලධාරි මහාචාර්ය ආනන්ද සමරසේකරය.
කලක් රජයේ වෛද්ය නිලධාරී සංගමයේ සභාපතිවරයා ලෙසින් ද කටයුතු කළ ඔහු මෙරට වෛද්ය ප්රජාව වෙනුවෙන් වාත්තීය නියෝජනයක් කළ චරිතයකි. පසුව රජයේ වෛද්ය නිලධාරී සංගමයේ දැඩි දෝෂ දර්ශනයට ලක්වූ මාලඹේ සයිටම් පෞද්ගලික වෛද්ය විද්යාලයයේ උපකුලපති තනතුරට පත් වන්නේද ඔහුය. වර්ෂ 2017 දී අපරාධ පරීක්ෂණ දෙපාර්තමේන්තුව විසින් ඔහු අත්අඩංගුවට ගනු ලැබුවේය. තාජුඩීන්ගේ මරණ පරීක්ෂණය සිදු කරන අතර සාක්ෂි විනාශ කිරීම ගැන ඔහුට චෝදනා එල්ල විය.
හැව්ලොක් රග්බි නායකයාගේ මරණය සිදු වන විට සමරසේකර කොළඹ ප්රධාන අධිකරණ වෛද්ය නිලධාරියා ලෙස සේවය කළේ ය. ඔහු පරීක්ෂණ සිදු කරන අතරතුර තාජුඩීන්ගේ ඇතැම් ශරීර කොටස් වුවමනාවෙන්ම ඉවත් කර මාලඹේ පිහිටි සයිටම් පෞද්ගලික වෛද්ය විද්යාලයට රැගෙන ගොස් ඇති බව අනාවරණය විය. 2015 වසරේදී තාජුඩීන් ඝාතනය කර ඇති බව නිවේදනය කිරීමෙන් අනතුරුව වෝහාරික විශේෂඥයන් තිදෙනකු සහභාගි කරගෙන තාජුඩීන්ගේ මරණය පිළිබඳ නව පශ්චාත් මරණ පරීක්ෂණයක් සිදු කරන ලෙස විනිසුරුවරයා නියම කළේ ය. ඒ පරීක්ෂණයේදී වින්දිතයාගේ පපු පෙදෙසේ අස්ථි කොටසක්, උගුරු දණ්ඩ සහ තවත් අස්ථි කොටස් දෙකක් ශිල්පීය ක්රමයකට ශරීරයෙන් කොටස්වලින් ඉවත් කර අතුරුදන් කර තිබිණි.
දෙවැනි වරට පැවැත්වූ මරණ පරීක්ෂණයේදී ද අනාවරණය වූයේ තාජුඩීන් මරා දැමීමට පෙර ඔහුට දරුණු වධහිංසා සහ පහරදීම්වලට ලක් කර ඇති බවය. ඔහුගේ සිරුරේ ගැඹුරු සහ තියුණු කැපීම් සහ හිසේ කකුල්වල, පපුව ආශ්රිත ප්රදේශවල බහුවිධ තුවාල දක්නට ලැබිණැයි වාර්තා විය.
එසේ වුවද මේ සුපිරි රගර් ක්රීඩකයාගේ මරණය ගැන නිකුත් කර ඇති වාර්තාවේ විසංවාදයන් බහුලව දක්නට ලැබේ. සමරසේකරගේ වාර්තාවට අනුව ක්රීඩකයාගේ මරණයට හේතු වී ඇත්තේ කාබන් මොනොක්සයිඩ් විෂ වීමය. රිය අනතුරකදී වාහනයක් ඇතුළත කොටු වූ අයෙකුට නම් මේ කාරණාව සත්යයකි. කෙසේ වෙතත් දෙවැනි මරණ පරීක්ෂණයේදී මරණයට හේතුව මොට ආයුධවලින් පහරදීම නිසා ඇති වූ බහුවිධ තුවාල සහ ගින්නේ බලපෑම බවට නිගමනය කෙරිණි. මේ සියලු විද්යාත්මක සාක්ෂි තහවුරු කරන්නේ තාජුඩීන්ට පහරදී ඝාතනය කර ඇති බවය.
දෙවැනි වරට පැවැත්වූ පශ්චාත් මරණ පරීක්ෂණයේදී සිදු කෙරුණු නිරීක්ෂණ මෙසේ දක්වා තිබිණි. “ඉහත දක්වා ඇති සියලු නිරීක්ෂණ සහ අදහස් සලකා බලන විට මරණය සිදු වී ඇත්තේ ඒ කියන පරිදි වාහනය පදවා ගෙන යන විටදී නොවේ. දුබලතාවට පත් කරන ලද අයකු වෙනත් කෙනෙකු විසින් මඟී ආසනයේ සිටුවන්නට ඇති බව පෙනී යයි.”
ඒ අධිකරණ ක්රියාවලියෙන් අනතුරුව ශ්රී ලංකා වෛද්ය සභාව මහාචාර්ය සමරසේකරගේ පුහුණු කිරීමේ වෛද්ය බලපත්රය අවලංගු කෙරුවේය. ගැටලුවේ තත්ත්වය සලකා බැලූ ශ්රී ලංකා වෛද්ය සභාව මේ සම්බන්ධ පරීක්ෂණයක් සිදු කිරීමට තීරණය කළේ ය.
තාජුඩීන්ගේ පශ්චාත් මරණ පරීක්ෂණය සිදු කරන අවස්ථාවේදී එය කළ බව කියන වෘත්තිකයන් ඒ සඳහා අනුගමනය කළ යුතු සහ කලින් එවැනි අවස්ථාවක භාවිත කර ඇති කිසිදු ආකාරයක විද්යාත්මක ක්රමවේදයක් අනුගමනය කර නැති බව එම කමිටුව තීරණය කළේ ය.
දීර්ඝ පරීක්ෂණයකින් අනතුරුව ශ්රි ලංකා වෛද්ය සංගමය වෙනුවෙන් පෙනී සිටිමින් කොළඹ අතිරේක මහේස්ත්රාත් හමුවේ වරක් කරුණු ඉදිරිපත් කළ නීතිඥවරිය තාජුඩීන්ගේ ඝාතනය සම්බන්ධයෙන් සිදු කළ යුතු අධිකරණ වෛද්ය විද්යා පරීක්ෂණයේදී රටේ පළපුරුදු සහ ප්රවීණ වෛද්යවරයකු ලෙසින් නමක් දිනාගෙන සිටි වෛද්ය සමරසේකර නිසි ක්රමවේදයකින් තොරව පශ්චාත් මරණ පරීක්ෂණය සිදු කිරීම, එම මළ සිරුරේ අස්ථි කොටස් අස්ථානගත කිරීම සහ වගකීමෙන් තොරව ක්රියා කොට සේවය පැහැර හැරීම කර ඇති බව ප්රකාශ කළාය. තාජුඩීන්ගේ ප්රශ්නයේදී ශ්රී ලංකා වෛද්ය සභාව සමඟ ලියාපදිංචි වී සිටින සියලුම වෛද්යවරුන් සහ දන්ත වෛද්යවරුන් අනුගමනය කරන ආචාර ධර්ම මහාචාර්ය සමරසේකර විසින් අනුගමනය කර නැතැයි ද හෙළි විය. සිය වෘත්තීය සගයන්ගෙන් ලැබුණු සහාය ද ඇතිව මිනීමැරුමක් ආවරණය කිරීමේ සිද්ධිය සම්බන්ධයෙන් මෙහිදී බරපතළ ගැටලු නිර්මාණය විය. තාජුඩීන්ගේ මිනීමැරුම් නඩුවේ දෙවැනි විත්තිකරු ලෙස මහාචාර්ය සමරසේකර නඩුවට මුහුණදෙන බව නඩුව භාරව කටයුතු කරන නියෝජ්ය සොලිසිටර් ජනරාල් ඩිලාන් රත්නායක කොළඹ අතිරේක මහේස්ත්රාත් වෙත ප්රකාශ කරන්නේ එසේය.
පසුගියදා අධි චෝදනා එල්ල වූ වෛද්ය සමරසේකර තාජුඩීන්ගේ සිරුරේ බාහිර සහ අභ්යන්තර අස්ථි කැඩීම් සිදු වූයේ කෙසේද යන්නත්, වීදුරු සිරුරට ඇනී තිබූ ආකාරය පිළිබඳව අධිකරණ වෛද්ය වාර්තාවේ සඳහන් නොවීමත්, රගර් ක්රිඩකයා ගමන් කළ WP KG6543 වාහනයේ නිරීක්ෂණ සටහන් සහිත වාර්තා විමර්ශන නිලධාරියාට ලබා දී තිබුණද ඒවා අධිකරණයට ඉදිරිපත් නොකිරීමත්, පශ්චාත් මරණ පරීක්ෂණය සිදු කළ සෙසු අධිකරණ වෛද්ය නිලධාරීන්ට බලපෑම් සහ තර්ජනය කර සටහන් යොදා ගනීමත්, ඥාතීන්ට දැනුම් නොදී මෘත දේහ කොටස් ඉවත් කිරීම සහ දණ්ඩ නීති සංග්රහයේ 198 වැනි වගන්ති ප්රකාරව සාක්ෂි වෙනස් කිරීම හා සාක්ෂි විනාශ කිරීමේ වරදත් සිදු කර ඇති බවට ඔහු චෝදනා ලබා ඇත. පරීක්ෂණ සිදු වන ආකාරයට හත් අවුරුද්දකට පසුව හෝ තාජුඩීන් ඝාතනයට විසඳුමක් ලැබෙනු ඇතැයි රටේ ජනතාව බලාපොරොත්තු වෙති.