පාස්කු ඉරිදා ප්‍රහාරයෙන් හරියටම මාස 3කුත් දින 5ක් ගත වූ දවසේ ෂැංග්‍රිලා හෝටලයේ අවහන්හලේ සේවය කළ විහඟ තේජාන් තරුණයාගේ අවසන් කටයුතු සිදු කළ බව මාධ්‍යයේ පළවිණි. එම තරුණයාගේ තුන්මාසේ දානයත් ලබාදීමෙන් පසුවයි, මෘත ශරීරයේ කොටස් දෙමාපියන්ට ලැබී තිබුණේ ෂැංග්‍රිලා බෝම්බයෙන් මියගිය අය අතර විහඟගේ සිරුර නොතිබූ අතර, ඔහු මියගිය බව අනුමාන කෙ‍රුණේ. ෂැංග්‍රිලා හෝටලයේ සී.සී.ටී.වී. දර්ශනවලිනි.
බෝම්බය පිපිරවීමට මොහොතකට කලින් විහඟ සහරාන්ගේ පිටට තට්ටු කර යමක් පවසන ආකාරය එම දර්ශනවල සටහන් වී තිබිණි. බෝම්බ ප්‍රහාරයෙන් විහඟගේ සිරුර කැබලිවලට වෙන් වූ අතර, ඔහුගේ සිරුරු කොටස් හඳුනා ගන්නා ලද්දේ ඩී.එන්.ඒ. පරීක්ෂණවලින් පසුවය.
 |
| අතිරේක රස පරීක්ෂක ඩී.එච්.එල්.ඩබ්ලිව්. ජයමාන්න |
එම ප්‍රහාරයේදී හඳුනාගැනීමට නොහැකි තරමට විකෘති වී තිබුණු දේශීය හා විදේශීය අයගේ මෘතශරීර සහ සිරුරු කොටස් හඳුනාගන්නා ලද්දේ ඩී.එන්.ඒ. පරීක්ෂණ මඟිනි. මේ වන විට එම සියලුම සිරුරු කොටස්වල ඩී.එන්.ඒ. පරීක්ෂණ සිදු කර අවසන් බවත් අතුරුදන් වූ පුද්ගලයන්ගෙන් කිහිපදෙනෙකුගේ පමණක් ඩී.එන්.ඒ. පරීක්ෂණ ප්‍රමාද වූ බවත් රජයේ රස පරීක්ෂක දෙපාර්තමේන්තුවේ අතිරේක රස පරීක්ෂක ඩී.එච්.එල්. ඩබ්ලිව් ජයමාන්න මහතා පැවසීය. මෘතශරීරවල කොටස්වල සාම්පල අපට ප්‍රහාරයෙන් සතියක් හමාරක් ඇතුළත ලැබුණා. මැයි 21 දා වන විට ඒ සියලු සාම්පල ඩී.එන්.ඒ. පරීක්ෂණවලට යොමු කර ප්‍රතිඵල ලබාදීමට හැකි වුණා. මියගිය විදේශිකයන්ගේ දෙමාපියන්, දරුවන්, ඥාතීන් පැමිණ රුධිර සාම්පල් ලබාදුන්නා. ඇතැම් රටවලින් අදාළ ඩී.එන්. ඒ. රටා එවලා තිබුණා. මේ සියල්ලටම අධිකරණ වෛද්‍ය නිලධාරිවරු, අපරාධ පරීක්ෂණ දෙපාර්තමේන්තුව, අධිකරණ නිලධාරීන්, SOCO නිලධාරීන් අපට සහාය වුණා. ඩී.එන්.ඒ. පරීක්ෂණ කටයුතු සිදු කළේ රජයේ රස පරීක්ෂක දෙපාර්තමේන්තුවයි. එවනු ලැබූ සිරුරු කොටස් සහිත සාම්පල්වල වාර්තා අපි දින 20කින් සියල්ල පරීක්ෂාකර යැව්වා. ඊට අමතරව හෝටල්වල අපරාධයට අදාළ පුද්ගලයන් සිටි කාමරවල තිබූ ඇඳුම්, ඔවුන් භාවිතා කළ උපකරණ, කෑමවල සාම්පල පසුව එවලා තිබුණා. එහි ඩී.එන්.ඒ. පරීක්ෂණ ටිකක් පහුවුණා. මඩකලපුවෙන් එවු කොටස්වල ඩී.එන්.ඒ. පරීක්ෂණත් මේ වන විට අවසන් කරලා තියෙන්නේ.
උසාවි නියෝග මගින් එවන ලද ඇතැම් සාම්පලවල ගැටලු සහගත බවක් තිබුණත්. එයිනුත් යම් ප්‍රමාණයක පරීක්ෂණ නිම කර අවසන්. අදාළ දිනවල ස්ථානීය පරීක්ෂණ දින 2-3 තුළ නිම කරන්න හැකිවුණා.
හඳුනාගැනීමට නොහැකි වූ මළ සිරුරු කොටස්වල ඥාතිත්වය තහවුරු කරගන්නේ කොහොමද?
“පුද්ගලයකුගේ අනන්‍යතාව, මිනීමැරුමක සත්‍ය අපරාධකරු වගේම ඥාතිත්වය තහවුරු කර ගැනීම සඳහා වර්තමාන ලෝකයේ භාවිතා කෙරෙන අති නවීන තාක්ෂණය ඩී.එන්.ඒ. පරීක්ෂාවයි. සෑම ජීවියකුගේම ජීව පටකවල සංවර්ධනය සහ ක්‍රියාකාරිත්වය සඳහා භාවිතයට ගන්නා ප්‍රවේණිමය උපදේශන ඇතුළත් නියුක්ලික් අම්ලය තුළ ඩී.එන්.ඒ. අම්ලයද අන්තර්ගතයි. ඩී.එන්.ඒ. අණුකවල ප්‍රධාන කාර්යභාරය වන්නේ තොරතුරු දීර්ඝ කාලයක් ගබඩා කර තබාගැනීමයි. ප්‍රවේණිමය තොරතුරු ගෙනයන ඩී.එන්.ඒ. සංඝටක හැඳින්වෙන්නේ ජාන නමින්. සෛල තුළ ඩී.එන්.ඒ. සකස් වී තිබෙන්නේ වර්ණ දේහ ලෙස හැඳින්වෙන පද්ධතියක් තුළයි. මවුපියන් සතු ගති ලක්ෂණ රැගෙන යන ඩී.එන්.ඒ. රසායනිකය මුළු ලෝකයේ ඒ පුද්ගලයාට පමණක් විශේෂිතයි. සම නිවුන් දරුවන් දෙදෙනෙකුගේ හැර වෙනත් කිසිම දෙදෙනෙකුගේ ඩී.එන්.ඒ. රටාව සමාන වෙන්නේ නැහැ. සම නිවුන් දරුවන් දෙදෙනෙකුගේවත් ඇඟිලි සලකුණු සමාන වෙන්නෙ නැහැ. දරුවාගේ ඩී.එන්.ඒ. වලින් සියයට 50කින් මාතෘත්වයත්, අනෙක් සියයට 50 න් පීතෘත්වයත් ඔප්පු කළ හැකි වෙනවා. මියගිය සහෝදර සහෝදරියගේ පවා එසේ නැතිනම් ඥාතිත්වය එමගින් තහවුරු කළ හැකියි.
සහරාන්ගේ දෙමවුපියන්ගේ ජීව සාම්පල සහරාන්ගේ සිරුරේ කොටස් හා සියයට සියයක් ගැළපුණු හෙයින් සහරාන් මියගිය බව ඔප්පු කරගැනීමට හැකි වුණා. විහඟ තේජාන්ගේ මව කලින් මියගිහින්. ඔහුගේ පියා ලබා දී තිබුණු ඩී.එන්.ඒ. සාම්පල්වලින් සියයට 50ක් තේජාන්ගේ සිරුරු කොටස් සමඟ ගැළපුණු නිසා, පීතෘත්වය ඔප්පු කරගැනීමෙන් ඒ සිරුරු කොටස් විහඟ තේජාන්ගේ බව ඔප්පු කරගැනීමට හැකි වුණා.
අම්මා තාත්තා දෙන්නාම නැති අයෙකුගේ ඥාතිත්වය තහවුරු කරගන්නේ හිබිලින් කැල්කියුලේෂන් මඟින්. එය ගණිතමය ක්‍රමයක්. අතුරුදහන් වූ අයගේ ඩී.එන්.ඒ. ලබාගන්නේ ඔවුන් පාවිච්චි කළ ඇඳුම්, පනා, දත් බුරුසුව, ඇඳ ඇතිරිලි, කොට්ට‍ා, තුවා, සපත්තු, ආභරණ ආදියෙන්. සාමාන්‍යයෙන් කෙනෙකුගේ ඩී.එන්.ඒ. රටාව සොයාගන්න ඔහුගේ රුධිරයම අවශ්‍ය නැහැ. ඔහු භාවිතා කරන ලද ඕනෑම ද්‍රව්‍යයකින් ඔහුගේ වමනය, ශුක්‍ර තරලය, කෙළ, අසූචි, සම, අස්ථි, සොටු, ලබාගත් ආහාර පාන, වලින් පවා ඩී.එන්.ඒ. රටාව හඳුනාගත හැකියි.
මළසිරුරුවලට අයිතිවාසිකම් කියන ඥාතීන් ලබාදෙන ජීවදත්ත පත්‍රිකාව ඩී.එන්.ඒ. පරීක්ෂණයේදී වැදගත්. එම ජීව දත්ත පත්‍රිකාවේ මියගිය පුද්ගලයාගේ ශරීර ලක්ෂණ, වයස, අවසන් වරට ගත් ආහාර, හැඳ සිටි ඇඳුම්, විශේෂ ශරීර සලකුණු, රෝගාබාධවලට ලබාගන්නා ප්‍රතිකාර කරන ලද ශල්‍යකර්ම ආදී තොරතුරු ගොන්නක් අන්තර්ගතයි.
මළ සිරුරක් බාහිරව නිරීක්ෂණය කර වයස, උස, ප්‍රමාණය තීරණය කළ නොහැකි විටක , කොඳුඇට පෙළේ දිග, අස්ථි වර්ධනය වී ඇති ප්‍රමාණය, අස්ථිවල උස, දත්වල වැඩීම, දත්වල ගෙවීයාම, හෘදය, පෙනහලු, ගර්භාෂයේ වර්ධනය අනුව සිරුරු හිමියන්ගේ වයස හා උස තීරණය කළ හැකියි.
පිළිස්සී ගොස් තිබූ මළ සිරුරු මතුපිටින් බලා ස්ත්‍රී පුරුෂ භාවය තීරණය කිරීමට නොහැකි වු අවස්ථාවක ඔවුන්ගේ ගර්භාෂය, ඩිම්බකෝෂය ඉතුරුවෙලා තිබුණොත් ලිංගිකත්වය තීරණය කරන්න පුළුවන්. දැඩි ලෙස පිළිස්සී ගිය මළ සිරුරු හඳුනා ගැනීමට දත් ඉතා වැදගත් සාධකයක්. කෘත්‍රීම දත් දත්වල පිහිටීම, ගෙවීයෑම, දත් දිරාගොස් ඇති අයුරු, එහි රසායන සංයුතිය අනුව මියගිය පුද්ගලයාගේ වයස නිර්ණය කරන්න පුළුවන්.
මෙරට අධිකරණ කටයුතුවලට ඩී.එන්.ඒ. සියලුම වාර්තා ලබාදෙන්නේ බත්තරමුල්ල, පැලවත්තේ පිහිටි රජයේ රස පරීක්ෂක දෙපාර්තමේන්තුවයි. ඒ සඳහා අති නවීන ඩී.එන්.ඒ. විද්‍යාගාර පිහිටා ඇති අතර එහි පරීක්ෂණ ක්‍රියාදාමය පිළිබඳව ආණ්ඩුවේ ජ්‍යෙෂ්ඨ සහකාර රස පරීක්ෂක වී.ජේ. බණ්ඩාරනායක මහත්මිය සිළුමිණට අදහස් දැක්වුවාය.
“පුද්ගලයකුගේ මාංශ කොටස්, ශුක්‍ර තරලය, රුධිරය, ඇටකටු ආදී ඕනෑම ජීව විද්‍යාත්මක දෙයකින් ඩී.එන්.ඒ. පරීක්ෂණය කළ හැකියි. පාස්කු ප්‍රහාරයෙන් මිය ගිය පුද්ගලයන්ගේ ඩී.එන්.ඒ. වාර්තා කඩිනමින් ලබාදෙන්න අප ප්‍රමුඛත්වය ලබාදුන්නා.
ඒ පරීක්ෂණ මිනිස් මාංශ කොටස් වලින් සිදුකිරීමේ අපහසුතාවක් තිබුණු නිසා ඇටකටුවලින් තමයි පරීක්ෂණ ගණනාවක්ම සිදු කළේ ඩී.එන්.ඒ. පරීක්ෂණ සඳහා යොදා ගන්නා රසායනික ද්‍රව්‍ය මිල අධිකයි. ඒ රසායනික ගෙන්වන්නේ විදේශවලින් එක් පරීක්ෂණයක් සඳහා රුපියල් 5000ක් අප පොලිස් දෙපාර්තමේන්තුවෙන් අය කළා.
ඩී.එන්.ඒ. පරීක්ෂණයක් සිදු කරන්නේ පියවර ගණනාවකින්.
එක පරීක්ෂණයක් දවස පුරාම එක දිගටම කරන්නත් බැහැ. අදියරෙන් අදියර තමයි පරීක්ෂණ කරන්නේ. එක පරීක්ෂණයක් සම්පූර්ණ කරන්න සති 2,3ක් යනවා. වාර්තා ලබාදීමට පෙරත් නැවතත් පරීක්ෂා කරනවා. සමහර පරීක්ෂණවලට සාම්පල් 10,12 එවනවා. ඇටකටු පරීක්ෂාවට වැඩිපුර කාලයක් ගත වෙනවා. අප විද්‍යාගාරය මඟින් රජයේ පරීෂණ පමණක් නොව පෞද්ගලික පරීක්ෂණත් සිදු කරනවා.
කාලයේ වැලිතලාවෙන් වැසී ගිය අබිරහස් මිනීමැරුම්වල සත්‍ය අපරාධකරු සොයා ගැනීමට ද ඩී.එන්.ඒ. පරීක්ෂණ බොහෝ ඉවහල් වේ. පුද්ගලයකුගේ අනන්‍යතාව ඔප්පු කරගැනීමට ඩී.එන්.ඒ. මෙතරම්ම වැදගත් සාධකයක් වන්නේ සමාන ඩී.එන්.ඒ. රටාවක් ඇති පුද්ගලයකු සොයාගැනීමට අවම වශයෙන් පුද්ගලයන් බිලියනයක සිට ට්‍රිලියන සියය ප්‍රමාණයකගේ රුධිරය පරීක්ෂාවට ලක්කළ යුතු වීමයි ඉන් ගම්‍ය වන්නේ කෙනෙකුගේ ඩී.එන්.ඒ. රටාව ඔහුගේ අනන්‍යතාවය බවයි.
