දියවැඩියාවට අලුත්ම හේතු මෙන්න | සිළුමිණ

දියවැඩියාවට අලුත්ම හේතු මෙන්න

කෘෂි රසායන, රසකාරක, එළවළු තෙල්

වෛද්‍ය නිරෝෂ් සමරවික්‍රම

සීනි අධික ආහාර අනුභව කරන විට “බලාගෙනයි ...දියවැඩියාව හැදෙයි” යනුවෙන් අනතුරු අඟවන බොහෝ දෙනකු අපට හමු වන්නේ සීනි ශරීරගත වී සීනි මට්ටම ඉහළ යෑමෙන් දියවැඩියාව හටගන්නා බව සමාජගත වී ඇති නිසා ය. ශරීරගත වී තිබෙන සීනි මට්ටම ඉහළ යෑමෙන් දියවැඩියාව හටගන්නා බවත් සීනි මට්ටම පහළ ගිය විට කෝමා තත්ත්වය ඇති වන බවත් අප කවුරුත් දන්නා කාරණයකි.

ඒ නිසා සීනි අධික ආහාර භාවිතයෙන් දියවැඩියාව ඇති වන බව පොදු පිළිගැනීමය. එහෙත් දියවැඩියාවට හේතුව සීනි සහ පිෂ්ටය අධික ආහාර භාවිතය නිසා පමණක් ම නොවේ. සීනි භාවිතයෙන් වැළකී සිටියත් දියවැඩියාවට ‍ගොදුරු වූ අය අපට හමු වන්නේ එබැවිනි. දියවැඩියාවට බලපාන එකී කරුණු කීපයක් ලොව පුරා සිදු කළ පර්යේෂණවලින් තහවුරු වී ඇත. එම හේතු මොනවාදැයි නිසි ලෙස හඳුනාගෙන ඒවා වළක්වා ගැනීමට පියවර ගත යුතුය.

අද වන විට දියවැඩියාව බරපතළ ප්‍රශ්නයක් වී තිබේ. කොළඹ හා නාගරික ප්‍රදේශවල දියවැඩියාව සහ පූර්ව දියවැඩියාව ඇති අය 59.3% . මෙය ඉතා ඉහළ අගයකි. ශ්‍රී ලංකාවේ ජනගහනයෙන් ආසන්න වශයෙන් 10% ක ප්‍රමාණයක් දියවැඩියා රෝගයට ගොදුරු වී ඇතැයි අනුමාන කෙරෙයි. දියවැඩියාව හේතුවෙන් අක්ෂි ආබාධ, ස්නායු ආබාධ, වකුගඩු ආබාධ, හෘදයාබාධ, පිළිකා වැනි බොහෝ රෝග ඇති විය හැකි බැවින් දියවැඩියා‍ව වළක්වා ගත යුතුමය.

අතීතයේ මෙන්ම වර්තමානයේදීත් බොහෝ දෙනකු විශ්වාස කරනු ලබන්නේ අධික සීනි භාවිතයෙන් දියවැඩියාව හටගන්නා බවය. එහෙත් එම කරුණු බැහැර කර, ඊ‍ට බලපාන වෙනස් වූ හේතු රාශියක් සාකච්ඡා කිරීම අද දවසේ අත්‍යවශ්‍ය කාරණයක් වී තිබේ.

කෘෂි රසායන භාවිතය

ආහාර භෝග වගාවට එකතු වන කෘෂි රසායනික ද්‍රව්‍ය දියවැඩියාව ඇති වීමට බලපාන බව නූතන පර්යේෂණ තහවුරු කර ගෙන තිබේ. කෘෂි රසායන යනු කෘමිනාශක, වල් නාශක, යුරියා වැනි රසායනික පොහොර යි. එම කෘෂි රසායනික ද්‍රව්‍යවල අන්තර්ගත ආසනික් හා වෙනත් විෂ වර්ග දියවැඩියාව ඇති වීමට සෘජුවම බලපාන බව මේ වන විට සොයා ගෙන තිබේ. ආසනික් එයින් ප්‍රධාන වේ. ආසනික් ප්‍රබල දියවැඩියා කාරකයක් බව නූතන පර්යේෂණවලින් සනාථ වී ඇත. ආසනික් අග්න්‍යාශයේ බීටා සෛලවලට හානි කර, ඉන්සියුලින් ස්‍රාවය දුර්වල කරයි. එසේම ආසනික්වලට ශරීරයේ ඇති ග්ලිටසෝන් අණු අක්‍රීය කරයි. ග්ලිටසෝන් ක්‍රියාකාරිත්වය අඩු වීම හේතුවෙන් දියවැඩියාව ඇති වන බව අනාවරණය කරගෙන තිබේ.

ආසනික් මූලික වශයෙන් ආහාර ‍භෝගවලට එකතු වන්නේ ඒවා වගා අවස්ථාවේ යොදන විටදීය. අප ආහාරයට ගන්නා සහල්, එළවළු, තිරිඟු ඇතුළු සියලු ධාන්‍ය ‍භෝගවලට ආසනික් එක් කරන නිසා සෑම ආහාරයකින් ම පාහේ එය ශරීරගත වීමේ අවදානමක් පවතී. කෘෂි රසායන එක් නොකරන අවස්ථාවල පමණක් එම අවදානම නැත. එසේම ආසනික් වකුගඩු රෝග ද ඇති කරයි. වර්තමානයේ රජරට ප්‍රදේශයේ වකුගඩු රෝග ඇති වීමට ප්‍රධාන හේතුව මෙයයි. ආනයනික ආහාරවල ආසනික් වැඩිපුර අඩංගු විය හැකිය. ඊ‍ට හේතුව ඉන්දියාව, පාකිස්තානය වැනි රටවල්වලින් ආනයනය කරනු ලබන සහල්වල ආසනික් වැඩි ප්‍රමාණයක් අඩංගු බව සොයා ගෙන තිබීමයි.

ප්‍රමිතියෙන් තොර එළවළු තෙල්

ප්‍රමිතියෙන් තොර එළවළු තෙල් දියවැඩියාව ඇති කිරීමට හේතු වේ. වර්තමාන වෙළෙඳ‍පොළේ විවිධාකාර නම්වලින් යුක්ත එළවළු තෙල් වර්ග දක්නට ලැබේ. එම එළවළු තෙල් වර්ග අර්ධ හයිඩ්‍රජනීයකරණය කළ එළවළු තෙල්ය. එම ක්‍රියාවලියේදී ට්‍රාන්ස්ෆැට් නමැති රසායනික සංයෝගය නිපදවේ. ට්‍රාන්ස්ෆැට් පැහැදිලිවම දියවැඩියාව ඇති කරයි. එයට අමතරව හෘදයාබාධ සහ අක්මා රෝග ඇති කිරීමට ට්‍රාන්ස්ෆැට් හේතුවේ.

එළවළු තෙල් යොදා පිළියෙල කරනු ලබන ආහාරවල නිපදවෙන ට්‍රාන්ස්ෆැට් ප්‍රමාණය ඉතා ඉහළ අගයක් ගනී. එම ට්‍රාන්ස්ෆැට් නිසා දියවැඩියාව ඇති වන බව බොහෝ දෙනෙකු නොදන්නා කරුණකි. එසේම එළවළු තෙල් අධික උෂ්ණත්වයෙන් රත් කිරීමේදී ඒවායේ ඔමේගා අම්ල අනුපාතය ද වෙනස් වෙයි ඔමේගා 6:3 අනුපාතය 25:1 ලෙස වෙනස් වෙයි. මෙය ද රෝග ඇති කිරීමට ප්‍රබල හේතුවකි. වර්තමාන වෙළෙඳපොළේ ඇති ප්‍රමිතියෙන් තොර ෆාම් ඔයිල් වර්ග සහ වෙනත් එළවළු තෙල් වර්ගවල ඒ තත්ත්වය දැක ගත හැකිය.

එම නිසා මෙම එළවළු තෙල්වලින් සකස් කරනු ලබන පාන්, බේකරි ආහාර, පේස්ට්‍රි වැනි ආහාර හරහා දියවැඩියාව ඇතිවිය හැකිය. එසේ ප්‍රමිතියෙන් තොර එළවළු තෙල් භාවිතය වැඩි වීම නිසා දියවැඩියාවට ගොදුරු වීමේ අවදානම ඉතා ශිඝ්‍රයෙන් ඉහළ ගොස් ඇත.

පිරිසිදු පොල්තෙල්වල මෙම සංකූලතා කිසිවක් නැත.

විශේෂයෙන් ෆ්‍රයිඩ් රයිස්, කොත්තු, වෙනත් බැදුම් වර්ග පිළියෙල කිරීමේදී අද බහුලව භාවිත වන්නේ එළවළු තෙල් මිස පිරිසිදු පොල්තෙල් නොවේ. එවැනි ප්‍රමිතියෙන් තොර එළවළු තෙල් යොදා සකස් කරනු ලබන ආහාර භාවිතයෙන් දියවැඩියාවට ගොදුරු වීමේ අවදානම ඉහළ ගොස් තිබේ.

කෘත්‍රීම රසකාරක සහ වර්ණකාරක

කෘත්‍රීම රසකාරක සහ වර්ණක මගින් දියවැඩියාව ඇති වන බව තහවුරු වී තිබේ. අජිනමොටො ස්නායු ආබාධ ඇති කරන අතර දීර්ඝකාලිනව ආහාරයට එකතු වීම නිසා දියවැඩියාව ඇති වේ. විශේෂයෙන් අග්න්‍යාශයේ බීටා සෛලවලට හානි සිදු වේ. වෙළෙඳපොළේ ඇති කේක්, බීම වර්ග, බිස්කට් වර්ග වැනි ආහාර බොහෝමයක් කල් තබා ගැනීමට භාවිත කරන කෘත්‍රීම සංඝටක දියවැඩියාව ඇති කරයි. එම කෘත්‍රීම වර්ණක හා රසකාරක අග්න්‍යාශයට හානිකර ය. වර්තමානයේ ආහාර රස ගැන්වීමට මේවා භාවිත කරන නමුත් බොහෝ දෙනකුට එම රස අහිතකර රසයක් බව හඳුනාගත නොහැකිය.

ඉතා සරලව පවසනවා නම් කෘත්‍රීම සංඝටක අඩංගු ආහාර කොතෙකුත් අනුභව කළ ද කුසගින්න දුරු වන්නේ නැත. එහෙත් සාමාන්‍ය ආහාර වේලක් ගත් විට උත්තේජනයක් ඇති නොවී ස්වාභාවිකව පාලනය වනු ඇත. එය ආහාරවල කෘත්‍රීම සංඝටක අඩංගුදැයි දැන ගැනීමේ ප්‍රායෝගික පරීක්ෂණයක් වශයෙන් යොදා ගත හැකිය. එසේම ආහාරයක හෝ දවටනයක INS හෝ E යනුවෙන් සඳහන් වී තිබේ නම් එම ආහාරවල ඉහත සංඝටක අඩංගු වී ඇත. එබැවින් එසේ සඳහන් වී තිබෙන ආහාර භාවිතය සීමා කිරීමට හෝ වැළකී සිටීමට හැකියාව ලැබේ.

පාන්පිටි ආහාර භාවිතය

දියවැඩියාවට ගොදුරු වීමට බලපාන ප්‍රබල කාරණයක් ලෙස පාන්පිටි ආහාර භාවිතය යන කාරණය දැක්විය හැකිය. අද පාන්පිටි ලෙස පරිභෝජනය කෙරෙන්නේ පිරිසිදු කළ පාන්පිටිය. එහිදී තයමින්, කැල්සියම්, මැග්නීසියම්, යකඩ වැනි අත්‍යවශ්‍ය සංඝටක බොහෝමයක් ඉවත්‍ වේ. මෙම සියලු සංඝටක දියවැඩියාව වළක්වන ඒවා වන අතර දියවැඩියාව වැළැක්වීමට තුඩු දෙන තන්තු ද එහිදී ඉවත් වේ.

එසේම පාන්පිටිවල අඩංගු ග්ලුටන් ද විවිධාකාර රෝග ඇති කිරීමට හේතුවේ. ග්ලුටන් ආහාර මාර්ගයේ රෝග ඇති කරන අතර එමඟින් ද්විතියකව ඇති වන රෝගවලින් දියවැඩියාව ඇති කරයි. අද වෙළෙඳපොළේ ඇති පාන්පිටි වලින් සකස් කරනු ලබන පාන් සහ පේස්ට්‍රි වැනි පාන්පිටිවලින් සැකසෙන ආහාර දියවැඩියාව ඇති කිරීමට බලපායි.

සටහන - හර්ෂා සුගතදාස

අදහස්