සිත් සුව­පත් කරන අපූරු ගීතයක සුල මුල සොයා ගියෙමි | සිළුමිණ

සිත් සුව­පත් කරන අපූරු ගීතයක සුල මුල සොයා ගියෙමි

පසුගිය දිනෙක මම ජාතික රූපවාහිනිය නරඹන අතරතුර අපූරු ගීතයක් විකාශය විය.

මේ අපේ දේශයයි භුමියයි උතුම් වූ .....

සුන්දරයි සැමදෙනා එක මවකගේ ....

ආදරෙයි අම්මා ඔබයි ලක්මෑණියේ.

භාතිය සංතුෂ්ගේ හඬින් මුලින්ම ඇසුණු මෙම ගීතයේ පද එකින් එක ඇසෙද්දී සිතට පිවිසියේ අපේ රටේ පුරවැසියකු ලෙස ආඩම්බරයකි. එසේම ඒ ගායනාව ඇසුණේ පසුගිය පාස්කු ඉරුදින මරාගෙන මැරෙන ත්‍රස්ත ප්‍රහාරයත් සමඟ අපේම සහෝදර ජනතාවට සිදුවූ විපත පිළිබඳව වික්ෂිප්තම සිටි අපේ මනස සුවපත් කරවන පණිවිඩයකි.

ඒ බව සිතට දැනුණේ එය අපේ රටේ ප්‍රවීණ සහ නවක ගායක ගායිකාවන් මාතෘ භූමිය පිළිබඳව සැබෑම ආදරයකින් කළ ගායනා වල ඇති ස්වරයන් නිසාය. කලාශූරී ලතා වල්පොළ, සුනිල් පෙරේරා, නිහාල් නෙල්සන්, නුවන් ගුණවර්ධන, සමන්ද සිල්වා, සොහාන්, කොරින් අල්මේදා, ධම්මිකා වල්පොළ, ඉෂාක් බෙග්, භාතිය සංතුෂ්, ළහිරු පෙරේරා, අශාන්ති ද අල්විස්, භාචි සුසාන්, නදිනි ප්‍රේමදාස, ශානිකා වනිගසේකර, උමාරා සිංහවංශ, තීක්ෂණ අනුරාධ, සංඛ දිනෙත්, සිවකුමාර්, නිලක්ෂි, මහින්ද කුමාර්, සාහිත්‍යා, නටාෂා, ඉෂිනි, ෂෙවාන් ඩැනියෙල්, රූනි, ගයාන් ගුණවර්ධන, දසුන්, අශාන්, ඕලු, රොවෙන්, සරිත්. සුරත් යන ගායක ගායිකාවෝ මෙම ගීතය ගායනා කරති.

සිංහල භාෂාවෙන් මෙන්ම ඉංග්‍රීසි සහ දමිළ භාෂාවෙන්ද එය ගැයුණු නිසා සැබැවින්ම සංහිඳියාවේ ගීතයක් ලෙසත් සිතට දැනුණි. සැබැවින්ම අපේ රටේ ජනතාව තුළ සැක බිය සංකා පවතින මේ මොහොතේ සිත් සතන් සුවපත් කරන්නට, එකාමෙන් නැගී සිට අපේ රට යළිත් දියුණුවේ මාවතට ගන්නට ධනාත්මකව සිතන්නට පොළඹවන මෙම ගීතය නිර්මාණය වීම පිළිබඳව තොරතුරු සොයන්නට සිත්වූයේ සැබැවින්ම මෙය අගය කළ යුතු නිර්මාණයක් නිසාය. ඒ අනුව මෙහි සිංහල පද රචනය කරමින් නිර්මාණය කරන්නට මූලික වූ ප්‍රවීණ කලාකරුවකු මෙන්ම මාධ්‍ය හිතවතකු වන සිඩ්නි චන්ද්‍රසේකර මහතා සම්බන්ධ කරගතිමි.

ජාතික රූපවාහිනි නාළිකාවේ නිෂ්පාදකවරයකු ලෙස මාධ්‍ය ජීවිතය ආරම්භ කර පසුව ස්වර්ණවාහිනයේ එච්. ඩී. ප්‍රේමරත්න මහතා සමඟ නියෝජ්‍ය අධ්‍යක්ෂ වැඩසටහන් ලෙස ඔහු කටයුතු කළේය. ලයිව් ඇට් 8 ප්‍රවෘත්ති විකාශය ඔහුගේ සංකල්පයකි.

මේ වනවිට සිරස මාධ්‍ය ජාලයේ නිව්ස් ෆස්ට් ජ්‍යෙෂ්ඨ උපදේශකවරයකු ලෙස කටයුතු කරයි. ජාතික රූපවාහිනියේ විකාශය වූ ‘නිදිකුම්බා මල්‘ ටෙලි නාට්‍යයෙන් ටෙලි නිර්මාණ ක්ෂේත්‍රයට පිවිසි ඔහු කුමාරයාණෙනි, පියාඹන අශ්වයා, A9 වැනි අතිශයින් ජනප්‍රිය ටෙලි නාට්‍ය ගණනාවක් නිර්මාණය කළේය. ගීත රචනයෙහි සුවිශේෂී දක්ෂතා දක්වන සිඩ්නි ලියා ඇති සියයක් තරම් වන ගීත සියල්ලම පාහේ බෙහෙවින් ජනප්‍රිය අතර ඇස්දෙක පියාන නිදාගන්න මට බැහැ. මමයි ඔබේ චංචලා, වෙන්වෙන තරමට, සඳහිරු තාරකා යන ගීත අතිශයින් ජනප්‍රියය.

“කැපිටල් මහාරාජා ආයතනය මාධ්‍ය හසුරුවන්නේත් කලාව හසුරුවන්නේත් කොයි වෙලාවේත් ජනතාවට වැඩි බරක් දීලා ඒ අයට අවශ්‍ය ආකාරයටයි. ඒ නිසා අපි හැම තිස්සේම ඉන්නේ ජනතාව සමඟයි. ජනතාවට කරදරයක් ව්‍යසනයක් ආව වෙලාවට අපි සිතනවා අපි කරන්න අවශ්‍ය දේ මොකක්ද කියලා. මීට වසර කිහිපයකට පෙර අපේ රටට සුනාමිය ආවා මතක ඇති. ඒක ස්වභාවයෙන් ආව විපතක්. කිසිම කෙනෙක් බලාපොරොත්තු නොවුණු වෙලාවක තමයි මේ විපත සිදුවුණේ. ජනතාවට මේ ස්වාභාවික විපත පිළිබඳව අදහාගන්නට බැරි තරම් වුණා. හැම දෙනාම වික්ෂිප්ත වෙලා සිටියේ. මොනවද කළ යුත්තේ කියලා කිසිම අවබෝධයක් ගොඩක් දෙනෙක් තුළ තිබුණේ නැහැ.

ඉතින් සිරස ආයතනය ජනතාව පිළිබඳව සිතලා ගීතයක් නිර්මාණය කළා. ඇත්තටම ඒ ගීතය ඇසුව බැලුව මිනිස්සු හිතන්න පටන් ගත්තා. මේ ස්වභාවික විපත වුණේ අපට. අපේ රටට. ඒ නිසා අපි දැන් මේ රට ගොඩ ගන්න ඕන. එතැනදී රට ගොඩ නැගීම පිළිබඳව ජනතාවට ඇති හැඟීම රජයට ඇතිවුණේ නැහැ. නමුත් අපිට අවශ්‍ය වුණේ රජය දිරිමත් කිරීම නෙමේ.

රජයවල් දිරිමත් කරන්න අපි කොතෙකුත් කතා කළත් වැඩක් නැහැ ඒ ගොල්ල ඒ ගොල්ලන්ගේ සැලසුම් වලට තමයි යන්නෙ. මේ හැම විපතක්ම වෙන්නේ ජනතාවටනෙ. ඒ නිසා අපිට අවශ්‍ය වුණේ ජනතාවට ඒ විපතින් ගොඩ එන්න අවශ්‍ය ශක්තිය ධෛර්යය දෙන්න. ඒ චිත්ත ධෛර්යය දෙන්න. අපිට ලැබුණු ප්‍රතිචාර වලින් ඒක සාර්ථක වුණ බව අපි අත්දැක්කා.

ඉතින් පසුගිය පාස්කු ඉරුදින සිදුවුණු ව්‍යසනයත් සමඟ අපට දැනුණා අපගේ මාධ්‍ය මෙහෙවර පෙරසේම හැසිරවිය යුතුයි කියලා. හැබැයි මේක ස්වාභාවික විපතක් නොවෙයි. ස්වභාවික විපතක් වුණු වෙලාවක ජනතාවට යම් කිසි විදිහයකින් හිත් හදාගන්න පුළුවන් ස්වභාව ධර්මයට විරුද්ධව අපට යන්න බැහැ කියලා. නමුත් මේ පාර අපිත් එක්ක එකට ජීවත්වුණු අපිත් එක්ක එකට කතාබහ කරපු අපේම සහෝදර ජනතාවක් විසින් අපිට ඇතිකළ ව්‍යසනයක්. ඒක හරිම දරුණුයි. හරිම දුකයි.

මේ වගේ තත්වයකට පත්වුණාම ජනතාව ඊට මුහුණ දෙන ආකාරය හරිම ඛේදනීයයි. ජීවිතේට හිතන්නේ නැහැ අපේ ගමේ හිටපු අහවලා නේද මේ අපේ ම මිනිස්සු මැරුවේ. එතකොට ඒ ගොල්ලන්ගේ ජාතිය බැලුවේ නැහැ සිංහල ද දෙමළද කියලා බැලුවේ නැහැ දරුවෝද වැඩිහිටියෝද කියලා බැලුවේ නැහැ. ඉතින් කොහොමද මේක දරාගන්නේ. ඇත්තටම දරාගන්න බැහැ. ඒ අවස්ථාවේදී අපේ සභාපති තුමා රාජා මහේන්ද්‍රන් මහත්මයා මට කතා කරලා කිව්වා අපි මේ මිනිස්සුන්ගේ මානසිකත්වය උඩට ගන්න ඕන කියලා. ඒ අනුව තමයි මේ ගීතය යළි නිර්මාණය වුණේ.“

මේ ගීතයේ පද රචනාව ඔබේ.

ඇත්තටම මම මේ ගීතයෙන් කතා කරන්නේ අපේ රට ගැන. මොකද මේ විපත්තිය ඇති වුණේ ශ්‍රී ලංකාව කියන රටට. එහි ජිවත්වන ජනතාවට. රට ගැන දැන් අපි හිතමු. මෙහි පද පෙළක් තිබෙනවා ‘හිතමු අපි සැම එක දෙයක් පළමුව රටයි ශ්‍රී ලංකා. ඒ චිත්ත ස්වභාවය තමයි අපි හදන්න උත්සාහ කළේ. මේ වගේ විපත් අපට රටකට වෙනවා.

හැබැයි එයින් මිදෙන්න එයින් ගොඩඑන්න අපි එකමුතු වෙන්න ඕන කියන දේ. අපි රට ගැන හිතලා රට ආරක්ෂා කර ගත්තොත් අපට ඉදිරියේදී මේ වගේ ආක්‍රමණ වලින් මිදෙන්න පුළුවන්. එහෙම නැත්නම් අවම කරගන්න පුළුවන්. මොන තරම් ජාත්‍යන්තර බලපෑම් ආවත් ඒවට මුහුණ දෙන්න පුළුවන්. නමුත් මෙතැන තියෙන්නේ අසමගියනේ.

දේශපාලනමය වශයෙන් අසමගි වෙලා. දේශපාලනය නිසා පිල්වලට බෙදිලා ජනතාව අසමගි වෙලා. එතකොට මේ රට කොහොමද ආරක්ෂා වෙන්නෙ. සරල උදාහරණයක් ගත්තොත් අපේ පවුලේ, නැත්නම් ගෙදර ඇතුළේ අයියල, මල්ලිල, අම්මා, තාත්තා අතර ප්‍රශ්න තියෙනවා නම්, ඒ අය ගහගන්නවා නම් පිට කෙනෙකුට ඇවිත් ගෙදර කෙනකුට ගහලා යන්න ලේසියෙන් පුළුවන්. ඒ වගේ තත්ත්වයක් තමයි මේ වෙලා තියෙන්නේ.

ඉතින් සභාපති තුමා මට කතා කරලා කිව්වා මේ තත්ත්වයක් ඇතිවෙලා තියෙන්නේ අපි වහාම සිංදුවක් කරන්න ඕන. අර පරණ තනුව අරගෙන පළමු වචන පේළි දෙක තියලා ඉතිරි පද ටික ඉක්මනින් ලියලා අපි ගීතය කරමු. මොකද මේව ඇහෙනකොට මිනිස්සුන්ට යම් කිසි විදිහකට කලබල වෙන්න තියෙන මනස සන්සුන් කරන්න පුළුවන්.

කලාවත් එක්ක ජීවිත වලට ඉක්මනින් ළංවෙන්න පුළුවන්. අපිට මේකෙන් මේ රටේ කෝටි දෙකක් විතර වෙන ජනතාවකගේ මනස් සුවපත් කරන්න බැහැ. නමුත් යම්කිසි ප්‍රමාණයකගේ හෝ සිත් සුවපත් කරන්න පුළුවන්. ඒ කියන්නේ දශම ගණනකගේ හෝ මනස සන්සුන් කරගත්තොත් ඒක ජයග්‍රහණයක් වේවි. මොකද ඉස්සරහට එන්නෙ කලබල වුණොත් දරුණු ලේ වැගිරීමක් සිදුවිය හැකි වාතාවරණයක්. අපි ජනතාව එයින් මුදවා ගන්න ඕන.“

මේ වනවිට ගීතය ප්‍රචාරය වෙලා දින ගණනාවක් ගතවෙලා. ලැබෙන ප්‍රතිචාර කෙබඳුද?

ලැබෙන ප්‍රතිචාර ඉතාම හොඳයි. පළමු වතාවට ලංකා ඉතිහාසයේ පෞද්ගලික නාළිකාවක් විසින් නිර්මාණය කළ ගීතයක් ජාතික රූපවාහිනිය, ස්වාධීන රූපවාහිනිය, ටී එන් එල් වැනි නාළිකාවල විකාශය වනවා. මොකද ඒ අය මේක ගත්තේ අපිට මේක කොහේ කළත් කමක් නැහැ මේක වටිනා ගීතයක් මෙයින් රටට ජනතාවට විශාල පණිවිඩයක් දෙනවා ඒ නිසා මේක ජාතික අවශ්‍යතාවක් ලෙස සලකලා ප්‍රචාරය කරන්න දෙන්න කියලා ඉල්ලුවා.

ඒක හරිම වටිනවා. අපි බේද වෙලා හිටියොත් විනාශ වෙන්නේ මේ රට ඒ නිසා මේ රට ආරක්ෂා කරගන්න අපි එකමුතුව ඉම්මු. හැමෝම එක දෙයක් ගැන සිතුවොත් ඒක සාර්ථක වෙනවා කියන දේ තියෙනවා. මට හරිම සතුටුයි. මෙහි ගෞරවය යන්න ඕන අපේ සභාපති තුමාට. එතුමා මෙහි වචන එන්න ඕන විදිහ පවා මට කිව්වා.“

මේ තනුව පිළිබඳවත් විශේෂයෙන් කතා කළ හැකියි.

“මේ තනුව අපි සුනාමිය වෙනුවෙන් කළ ගීතය සඳහා යොදාගත් එකමයි. එදා ඒ ගීතය නිර්මාණය කළේ භාතිය සන්තුෂ් දෙදෙනා. මෙවර එය අශාන් ප්‍රනාන්දුට භාර දුන්නා. ඇත්තෙන්ම මේ මුල් තනුව අපේ සභාපති තුමා හවායන් රටෙන් ගෙනාව එකක්. සුනාමිය වෙලාවෙ අපිටම කියලා හදවලා මුදල් දීලා අවසර ඇතුව ගෙනාවේ.

හවායන්වල ඇතිවුණු දරුණු ගංවතුරක් නිසා ඇතිවුණු ව්‍යසනයකදී මේ තනුවට තමයි ඔවුන් මෝටිවේෂන් ගීතය හදලා තියෙන්නේ. අපි ඒක අපේ රටට ගැළපෙන ලෙස අපේ දේශීය සංගීත භාණ්ඩ උපයෝගී කරගෙන වෙනස් කළා. ඒක හරිම සාර්ථකයි කියලා විශ්වාස කරනවා.“

මෙහි ප්‍රවිණයන් මෙන්ම නවකයින් රැසක්ම ගීත ගායනයෙන් දායක වී තිබෙනවා.

“ඇත්තටම ඒ ගැන විශේෂයෙන් සඳහන් කරන්න ඕන. මෙයට ගායනයෙන් දායක වෙන ගායක ගායිකාවන් වැඩි දෙනෙක් වෘත්තිය මට්ටමේ අය. ඔවුන් ගීත ගායනා කරන්න මුදල් අය කරනවා. ඒත් ඔවුන් කවුරුවත් මේ ගීතය ගායනා කරන්න සතයක් වත් මුදල් අය කළේ නැහැ. තව විසි දෙනෙක් විතර ගීතය ගායනා කරන්න හිටියා. මෙහි පද බෙදා ගැනීමේ ගැටලුව නිසා ඒ අය සීමා කරන්න සිදුවුණා. සමහර ප්‍රවීණ ගායකයෝ ගායනා කරන්නේ වචන කීපයයි. නමුත් ඔවුන් ඉතාම කැමැත්තෙන්, පුදුම හැඟීමකින් ඒ පේළිය ගායනා කළා. ඒ වගේම අපි මේක රෙකෝඩ් කළේ ඇඳිරි නීතිය දාපු වෙලාවක.

සමහර ශිල්පීන් ආවේ ඇඳිරි නීතිය තියෙද්දී පාස් අරගෙන.ලතා වල්පොල මහත්මිය හිටියේ ලෙඩ ඇඳේ. ඒත් අසනීප ගැන හිතන්නේ නැතුව දුවගෙන ආවා. ඒ නිසා මම මහාරාජා සංවිධානය වෙනුවෙන් ස්තූති වන්ත වෙනවා මෙහෙම දෙයකට කලාකරුවන් එකතු වීම ගැන. මොකද කලාකරුවන්ගේ යුතුකමක් තිබෙනවා ජනතාවගේ දුකකදී පිහිට වෙන්න.

නමුත් ඒ අයට බැහැනෙ ගිහිල්ල ඔයගොල්ලන්ගේ දෙමව්පෙියො නැතිවුණා නේද මම මේ දරුවා හදා ගන්නම් අධ්‍යාපනය දෙන්නම් මම මේ ගේ හදලා දෙන්නම් වැනි දේ කරන්න. ඒ අයත් එදිනෙදා ජීවත් වෙන කලාකරුවො. නමුත් ඒ අයට පුළුවන් ඒ අයගේ මාධ්‍ය තුළින් ඇවිත් දායකත්වය දෙන්න ඒක තමයි ඒ අය කළේ.

මේ තනුව තබ්ලා ඩෝල උඩැක්කි වැනි දේශීය සංගීත භාණ්ඩ යොදාගෙන අපිට ගැළපෙන ලෙස නිර්මාණය කිරීමේ වගකීම මම භාරදුන්නේ නව පරපුරේ දක්ෂ සංගීතඥයකු වන අශාන් ප්‍රනාන්දුට. ඒ වගේම මේ නිර්මාණයේදී මගේ පිටුපස සිටියේ සිරස ටී වී ප්‍රධාන විධායක නිලධාරී සුසාර දිනාල් මහතා සහ නිව්ස් ෆස්ට් සමුහ අධ්‍යක්ෂ ෂෙවාන් ඩැනියෙල් මහතා. ෂෙවාන් තමයි මෙහි ඉංග්‍රිසි පද ලිව්වේ දෙමළ භාෂාවෙන් පද ලිව්වේ අයියතුරෙයි ගජමුගන්. ඔහු ශක්ති ටි වි හි කළමනාකාරවරයෙක්.

මට මෙයින් කියන්න ඕන වුණේ රට පළමුව කියන එකයි. ඉස්සෙල්ලා හිතමු රට ගැන, රට ගැන හිතලා අපි එකමුතු වෙමු. අපිට මොන දේ කරන්නත් රටක් තියෙන්න ඕනනෙ. ඒක මම දේශපාලනඥයන්ටත් මම දෙන ඉඟියක්. උඹලත් එකතු වෙයල්ලා. අපි විතරක් එකතුවුණාට වැඩක් නැහැ. රට පාලනය කරන්නේ ඒ ගොල්ලොනේ. මේ වෙලාවේ දේශපාලනඥයොයි ජනතාවයි එක දෙයක් හිතන්න ඕන. ඒ තමයි රට පළමුව කියන දේ. එහෙම හිතුවොතින් අනිත් වැඩ ටික ඉතාම හොදට සිදුවේවි. රට පෙරමුණට ගෙන වැඩ කරද්දී මිනිස්සුත් දියුණු වෙනවා. “ 


 මේ අපේ දේශයයි භුමියයි උතුම් වූ .....

සුන්දරයි සැමදෙනා එක මවකගේ ....

ආදරෙයි අම්මා ඔබයි ලක්මෑණියේ....

නැවතත් බලමු නෙත් පිසදා කඳුළට ඉඩ නොතබා

එකට එක් වී ජාති, ආගම්, කුලය නොතකා

එක්ව එක පවුලක් ලෙසින් සමඟියේ අභිමානයෙන්

රකිමු අපේ අම්මා අපගේ අම්මා ශ්‍රී ලංකා

මේ අපේ දේශයයි භුමියයි උතුම් වූ .....

සුන්දරයි සැමදෙනා එක මවකගේ ....

ආදරෙයි අම්මා ඔබයි ලක්මෑණියේ....

නැවතත් බලමු නෙත් පිසදා කඳුළට ඉඩ නොතබා

එකට එක්වී ජාති, ආගම්, කුලය නොතකා

එක්ව එක පවුලක් ලෙසින් සමඟියේ අභිමානයෙන්

රකිමු අපේ අම්මා අපගේ අම්මා ශ්‍රී ලංකා

චණ්ඩ මහා සුනාමියෙන් අප ගොඩගත් දේශයයි...

කුරිරු මහ ඝන යුද්ධයෙන් අපි දිනූ පින් භූමියයි... භූමියයි

එලෙස එක්වී අපි සියලු බාධක දිනුවේ සමඟියෙන්

නැවත එක්වී පෙරට පය ගෙන වෙනස් ධජයක් යට ඉඳන්

සිතමු අපි සැම එක දෙයක් පළමුව රටයි ශ්‍රී ලංකා...

නැවතත් බලමු නෙත් පිසදා කඳුළට ඉඩ නොතබා

එකට එක්වී ජාති ආගම් කුලය නොතකා

එක්ව එක පවුලක් ලෙසින් සමගියේ අභිමානයෙන්

සිතමු අපි සැම එක දෙයක් පළමුම රටයි.. ශ්‍රී ලංකා

 

This is our land

Our precious, blessed nation

We are one and we belong to our beautiful Motherland

We love you, Sri lanka, we love you

This is our land

Our precious, blessed land

United as one,we belong to our beautiful nation

We love you, Sri lanka, we love you

Let's wipe away our tears, and look again, with renewed eyes, towards a brighter future,

United as one, no room for difference

United, as one family

The pride of togetherness

Let's protect our Motherland

Our motherland, Sri Lanka

We overcame the destruction of the Tsunami

We are a blessed nation that overcame the ravages of a war

We overcame, when we united as one!

Let's come together again, step forward and change our nation

There's no need to think too much

United under a single banner

Let's unite under asingle thought

Our Country First!

Comments