ප්ලේටෝ පත්‍රිකා | සිළුමිණ

ප්ලේටෝ පත්‍රිකා

ප්ලේටෝ පත්‍රිකා යනු බ්‍රිතාන්‍ය ලේඛක පීටර් ඇක්‍රොයිඩ් විසින් 1999 වසරේ එළි දක්වන ලද Plato Papers නම් නවකතාවේ සිංහල පරිවර්තනයයි.

ප්ලේටෝ යනු කිපූ 428 - 348 දක්වා ග්‍රීසියේ විසූ මහා දාර්ශනිකයන් තිදෙනාගෙන් මධ්‍යයට ගැනෙන පඬිවරයා ය. ඔහු සොක්‍රටීස් (ක්‍රිපූ 470 -329) ගේ අන්තේවාසිකයා වූ අතර ඇරිස්ටොටල්ගේ (ක්‍රිපූ 384 - 322) ආචාර්යවරයා ය. සොක්‍රටීස් කිසිදු ග්‍රන්ථයක් රචනා කොට නොමැති අතර ඔහුගේ දෙසුම් පවා ලේඛනගත කොට ඇත්තේ ප්ලේටෝ විසිනි. පසුව රාජ්‍ය නිලධාරියකු වූ ප්ලේටෝ විසින් රචනා කරන ලද ‘ජනරජය’ නමැති කෘතිය අදටත් නැවුම් අදහස්වලින් සපිරි ය. ඊට අමතරව ප්ලේටෝ විසින් සංවාද 35ක් සහ ලේඛ්‍ය පත්‍ර 13ක් රචනා කරන ලද බව සඳහන් ය.

කෙසේවෙතත් මේ කෘතියේ එන ප්ලේටෝ එ් දාර්ශනික ප්ලේටෝ යැයි වරදවා ගත යුතු නැත. මේ ප්ලේටෝ දිවි ගෙවන්නේ ක්‍රිව 3500 වැනි කාල සිමාවක නිසා ය.

ඇක්‍රොයිඩ් මේ කෘතියේ දී පෘථිවිය යුග පහකට බෙදයි. ඒවා නම් 1. ක්‍රිපූ 3500 සිට 300 දක්වා ඔර්පියස් යුගය, 2. ක්‍රිපූ 300 සිට 1500 දක්වා අපොස්තුලු යුගය 3. ක්‍රිව 1500 සිට 2300 දක්වා මෝල්ඩ්වර්ප් යුගය 4. ක්‍රිව 2300 සිට 3400 දක්වා විට්ස්පෙල් යුගය සහ 5. ක්‍රිව 3700 වර්තමානය

මේ කෘතියේ පෙරවදනේ මෙසේ දැක්වෙයි:

‘ලන්ඩන් නුවර මහා කථිකයා වශයෙන් සේවය කරන ප්ලේටෝ නම් චරිතයක් සිය පුරවැසියන්ට ඉතිහාසය කියා දෙයි.

ක්‍රිව 1500 - 2500 අතර පැවැතියා යැයි විශ්වාස කෙරෙන මෝල්ඩ්වර්ප් යුගයෙන් ඉතිරි වී ඇති ඓතිහාසික නටබුන් මෙහි දී ඔහු සිය සේවයට යොදා ගනියි. ඒ අනුව චාල්ස් ඩිකන්ස් සහ චාල්ස් ඩාවින් අතර පටලැවිල්ල, එඩ්ගා ඇලන් පෝ යනු කීර්තිමත් අමෙරිකානු කවියකු වශයෙන් වරද්දා ගැනීම, ප්‍රොයිඩ්ගේ මනෝ විශ්ලේෂණ සහ මාක්ස්ගේ ආර්ථික නියාමයන් කණපිට හැරවීම මඟින් අතීතයේ යථාර්ථය අතපත ගෑමට යත්න දැරීම මොන තරම් හාස්‍යජනක දැයි කතුවරයා අපට පෙන්වා දෙයි.’

ක්‍රිව 3700 දී ප්ලේටෝ දේශනා පවත්වන්නේ පෘථිවියේ අතීතය ගැන ය. අප දැන් මේ සිටින ලෝකය ඔවුන්ට අනුව දුරාතීතයකි.

දැන් අප නොයෙක් නටබුන් යනාදිය පිරික්සමින් අපේ අතීතය ගැන මත ප්‍රකාශ කරනවා සේ ප්ලේටෝ ද අතීතය - එනම් අපේ වර්තමානය - ගන්නේ අනුමානයෙනි. මෙහි දී භාෂාව ඉතා වැදගත් ය.

වර්තමානයේ අප බ්‍රාහ්මී අක්ෂර යනාදිය වත්මන් බසට පරිවර්තනය කරනවා සේ ප්ලේටෝ ද මෝල්ඩ්වර්ප් යුගයේ ඉංගිරිසි බස විශ්ලේෂණය කරයි.

මේ කෘතිය රචනා කිරීමේ දී ඇක්‍රොයිඩ්, ප්ලේටෝ නම් අතීත ග්‍රීක දාර්ශනිකයා විසින් කෘති දෙකක ඇසුර ලබා ඇති බව පෙනේ. මුලින් සඳහන් කෘතිය සොක්‍රටීස් සහ ඔහුගේ අනුගාමිකයකු අතර ඇති වූ සංවාද කිහිපයකි. සොක්‍රටීස් ඒ වනවිට සිටින්නේ මරණ දඬුවමට නියම කරන ලදුව මරණය අපේක්‍ෂාවෙනි. දෙවැනි කෘතිය රාජ්‍ය පාලනය පිළිබඳ ප්ලේටෝගේ ම අදහස් ය. එසමයේ දේශන පවත්වා ඇත්තේ සොක්‍රටීස් ය.

මරණ දඬුවම නියම කරනු ලැබ ඇත්තේ ඔහු තරුණ පරපුර නොමඟ යැව්වේ ය යන චෝදනාවට ය. ප්ලේටෝ සිය දර්ශනය ලේඛන ගත කොට ඇත. මේ කෘතියේ දී ඇක්‍රොඩයිට්ගේ ප්ලේටෝ දේශකයෙක් පමණි; හරියට සොක්‍රටීස් මෙනි. එහෙත් ප්ලේටෝගේ ගුහාව පිළිබඳ සංකල්පය මෙහිදී උපයෝගී කැර ගැනේ.

එ් ගුහාවෙන් මේ ප්ලේටෝ අතීතයට හෙවත් මෝල්ඩ්වර්ප් යුගයට යයි. එහි දී ඔහුට හමු වන්නේ කාලය සමඟ සටනක් දෙන මිනිසුන් සමූහයකි.

ඔවුන් වහරන බස ද අමුතු ය. ආපසු එන ඔහු ඒ ගැන වත්මන් ලන්ඩන් නුවර තරුණ පෙළට දේශනා කරයි. එහෙත් තමන් කියන කාරණා ගැන ඔහුට ද නිච්චියක් නොමැත.

තරුණ පෙළ නොමඟ යැව්වේ ය කියා ඔහුට නඩු පැවරේ. නඩු විභාගයේ දී ඔහු ද සොක්‍රටීස් වැනිව හරබර කරුණු ඉදිරිපත් කරයි. ඒවා අසා සිටින විනිසුරෝ ඔහු උන්මත්කයකු යැයි තීරණය කොට ඔහු නිදහස් කරති. එහෙත් ප්ලේටෝ කියන්නේ තමා ඇත්තට ම වරදක් කළ බවයි. මන්ද තමා කීවේ බොරු බව තමා දන්නා හෙයිනි. ඒ නිසා තමා පිටුවහල් කරනු ලැබිය යුතු ය. එහෙත් විනිසුරන්ගේ මතය වන්නේ මේ වනවිට නඩු විභාගය අවසන් වී ඇති බැවින් එය තමන්ට අදාළ කාරණයක් නොවන බවයි. ඒ අනුව ස්වයං දණ්ඩනයක් පනවා ගන්නා ප්ලේටෝ පිටුවහල් වෙයි.

Plato Papers ඉතා කෙටි නවකතාවකි.

එහෙත් එහි යටි පෙළ ඉතා බැරෑරුම් බව කියවන විට පසක් වනු ඇත. මෙය කියවා රස විඳ පසෙක තබන්නට ලියුවක් නොවන බව ඇක්‍රොයිඩ් පවසා ඇති බව පසු පිට කවරයේ සටහනේ දැක්වේ. එය ඇත්තකි.

මෙය කියවා පසෙක තැබීමෙන් පසු ඒ ගැන සිතන්නට බොහෝ දේ තිබේ. එසේම මෙය එක දිගට කියවා ගෙන යාමට නොහැකි ය. මන්දයත් සෑම ඡේදයක ම ඒ ඡේදයේ පැවසෙන දැයට වඩා විශාල දෙයක් සිතන්නට ඇති හෙයිනි.

Plato Papers ප්ලේටෝ පත්‍රිකා නමින් ගාමිණී වියන්ගොඩ විසින් සිංහලට පර්වර්තනය කරන ලදුව 2001 වසරේ විජේසූරිය ග්‍රන්ථ කේන්ද්‍රය විසින් එළි දක්වන ලදී. පුනර්මුද්‍රණයක් ඇති බවක් දැන ගන්නට නැත.

Comments