ඔබෙ හදට පිදු මගේ ප්‍රේමය ඔහේ තිබු­ණාවේ | සිළුමිණ

ඔබෙ හදට පිදු මගේ ප්‍රේමය ඔහේ තිබු­ණාවේ

ඔබෙ හදට පිදු මගේ ප්‍රේමය
ඔහේ තිබු­ණාවේ
හදේ ඉපදී හද රිදුම් දී
හැඟුම් විසිරී ගියාවේ
ඔබෙ හදට පිදු මගේ ප්‍රේමය
ඔහේ තිබු­ණාවේ...
නෙතින් වත් නොහ­ඟවා ඔබ හට
උපන් තැන් ගැන මගේ ප්‍රේමය
ළඟින් හිඳ ඔබ නොරි­දවා තව
සුසුම් හෙළුවා ඔබට නොදැ­නෙන
ඔහේ තිබු­ණාවේ ප්‍රේමය
ඔහේ තිබු­ණාවේ...
පව­සන්න නොහැ­කිව නොවේ මා
ළතැ­වෙන්නෙ අද මේ ලෙසේ
නුඹ අහිමි සුව­ඳකි ළ‍ඳේ මා
සුසුම් සඟ­වමි ඔබට නොදැ­නම
ඔහේ තිබු­ණාවේ ප්‍රේමය
ඔහේ තිබු­ණාවේ...

පද රච­නය - උවිඳු ඉසංක ජය­සිංහ
ගාය­නය හා තනු නිර්මා­ණය - විශා­රද තරිඳු ජය­සිංහ

හිත හිස් වී ගිය මොහොතක යූ-ටියුබයෙන් ගීයක් අසන්නට හිත බල කළේය. දැන් දැන් අන්තර්ජාලයේ බොහෝ ගී ඇත. එමෙන්ම ‘ගීයක අරුමය’ ලියන්නට පටන්ගත් දා සිට අපට යම් යම් ඉල්ලීම්ද එන්නේය. බොහෝ තරුණ නිර්මාණකරුවන් තම අලුත් නිර්මාණ අප වෙත ලබාදෙන්නට උනන්දු වීම සතුටකි. කෙසේ වුවත් අහම්බෙන් ලැබුණු මේ ගීතය පළමු මොහොතේ ඇසූ විට හිත, මොහොතකට නතර විණි. ගීතයේ පද නැවත නැවත සිතින් මුමුනන්නට වීමි. එහි ගැබ්ව ඇති සැබෑව කොතරම්දැයි දැනෙන්නට විය.

අපට එදිනෙදා ජීවිතයේ බොහෝ ගැහැනු මිනිස්සු හමුවෙති. මේ හමුවන හැම දෙනා අතරම හිත නතර නොවේ. එනමුදු විශේෂ හේතු නිසා හිත බැඳගන්නෝද මේ අතර වෙති. එය ප්‍රේමය නොවන නමුදු යළි යළිත් හමු වේ නම් හොඳයැයි සිතෙන, ළඟින් ඉන්න තිබේ නම් හොඳයැයි කියා සිතෙන, මගේම කරගන්න තිබුණා නම්යැයි සිතෙන බැඳීම්ද නැතුවා නොවේ.

ළංව ඉන්නට බැරි දා හිත උපන් ප්‍රේමය කියාගන්නට බැරි දා සිතින් විඳිමින් විඳවන ජීවිත අනන්තවත් අපට මේ සමාජයේදී හමු වේ.

‘‘අපිට කවදාවත් එක් වෙන්න බැහැ. මං ඒක හොඳටම දන්නවා. ඒත් මගෙ හිත එයා ගැන වද වෙනවා. එයා මට හමු වෙනවා. කතා කරනවා. අවුරුදු ගාණක් අපි ඇසින් දැක දැක, හිතෙන් විඳවිඳ මම විඳවමින් ඉන්නවා. එයා දන්නවද දන්නේ නැහැ මගෙ හිතේ ආදරයක් තියෙන බව. ඇය විවාහ වුණා. මට ඉස්සර වෙන්න බැරි වුණා. මගෙ හිත තාමත් රිදවිල්ලක තියෙන්නේ...”

කලකට පෙර මිත්‍රයකු කීවේ ඔහුගේ හිතේ ළතැවිල්ලය. ඔහු තවමත් තනිකඩය.

නොකියූ ප්‍රේමයක් වෙනුවෙන් ජීවිත කාලයම කැප කළ හැකිදැයි යන්න මම දැනුදු මගෙන් විමසමි.

‘‘හදේ ඉපදී හද රිදුම් දී

හැඟුම් විසිරී ගියාවේ

ඔබෙ හදට පිදු මගේ ප්‍රේමය

ඔහේ තිබුණාවේ...”

ගී පද ඇසූ මොහොතේ සිහි වූයේ මගේ මිත්‍රයාය. තරුණ නිර්මාණකරුවන් දෙදෙනකු වන උවිඳු හා තරිඳු සොහොයුරෝය. ‘හදේ ඉපදී’ ගීයේ පද රචනය පිළිබඳ විමසුවේ උවිඳුගෙන්.

‘‘මම මේ පද ටික රචනා කළේ පාසල් කාලයේ... දොළහ වසර පන්තියේ ඉගෙනුම ලබන කාලයේ. ඒ කියන්නේ අපේ තරුණ හිත්වලට ආදරය සෙනෙහස මුලින්ම දැනෙන්න ගත්ත කාලේ. මම මට දැනුණ දේ මම ලිව්වා. මේ පද ටික නිරායාසයෙන්මයි ලියැවුණේ. මම විශ්වාස කරන දේ තමයි ආදරය කියන්නේ අයිතිකරගන්නා, අත්පත් කරගන්නා දෙයක් නොවන බව. මම ඒ පදනමේ ඉඳගෙන තමයි මේ ගීතය ලිව්වේ. අයියා මේ පද ටික දැකලා එයා ගයන්න තෝරාගත්තා.”

උවිඳු ඉසංක ජයසිංහ සොහොයුරා ලියූ පද ටිකට තනුව නිර්මාණය කළ තරිඳු එය ගයන්නටද සිතාගත්තේය. මේ දිනවල හිරු FM ගුවන්විදුලි නාළිකාවේ විකාශය වන ශ්‍රී සිද්ධාර්ථ ගෞතම රේඩියෝ නාට්‍යයේ තේමා ගීතය ගයන්නේද විශාරද තරිඳු වීරසිංහය.

‘‘මල්ලි ලියූ පදවැල මගෙ හිතට තදින් දැනුණා. මම සෑහෙන කාලයක් තිස්සේ තනුව නිර්මාණය කළා. මට ඉඩක් ලැබෙන හැම විටම මම මේ ගීතයේ තනුවයි පදවැලයි අතර හිටියේ. ඒ තරමට ගීතය මගේ හිතේ රැඳිලා තිබුණා. ඒක පාර්ශ්වික ප්‍රේමයක් ගැන කියැවෙන මේ ගීතයට අපට හොඳ ප්‍රතිචාර ලැබෙනවා. මේ ගීය පටිගත කිරීමේදී දර්ශන වික්‍රමතුංග අයියාගෙන් අපට ලැබුණේ විශාල සහායක්. අපට උදවු කළ සැමට බොහෝම ස්තුතියි!”

තරිඳු පවසන්නේ එලෙසිනි.

ජීවිතය පුදුමාකාරය! එකිනෙකා කෙරෙහි බැඳෙන ඒ බැඳීම කියාගන්නට බැරිව ළතැවෙන, ජීවිත කාලයම ඒ වෙනුවෙන් විඳවන හිත් ඊටත් වඩා පුදුමාකාරය! එසේ විඳවන්නා වූ, විඳවාගන්නා වූ කාටත් කියන්නට සිදුව ඇත්තේ,

‘ඔබෙ හදට පිදු මගේ ප්‍රේමය

ඔහේ තිබුණාවේ...’ කියා නොවේද?

Comments