* කුඩා වැව් සියල්ල හිඳිලා
* වසර දෙකක් තිස්සේ පොළොවට දිය බිඳක පහස නෑ
* පවුල් ලක්ෂයකට වියළි ආහාර
* වතුර බෙදන්න බවුසර් සිය ගණනක්
බොරලු පාර අවුස්සමින් ඉදිරියට ඇදෙන වතුර බව්සරය දෙස මම බලාසිටියෙමි. ඇවිස්සුණු දුවිලි අනුකම්පා විරහිතව වියළුණු ගහකොළ වසා ගනී. දුඹුරු පැහැති පරිසරය මතින් නොසැලී හිඳින්න වෙර දරන ගහකොළ කඳුළු හෙළයි. පිනි බිඳක පහස නොලද තණකොළ අවපැහැ වී ගොසිනි. ඔබ මේ කියවන්නේ කෙටි කථාවක පරිසර වර්ණනාවක් නම් නොවේ. මේ වයඹ පළාතේ වර්තමාන තත්ත්වයයි. අවුරුදු දෙකකට අධික කාලයක් වැහි පොදක පහස නොලද ඇත්තන් පිපාසිත වග අමුතුවෙන් කිව යුතු නැත. වයඹ පළාතේ දුෂ්කර ගම්මානවලට අත්ව ඇති මේ ඉරණම කිසිවකු කිසි දිනක බලාපොරොත්තු වූවක් නම් නොවේ.
කුරුණෑගල දිස්ත්‍රිකයේ ප්රාදේශීය ලේකම් කොට්ඨාස හයක පවුල් 91677 ක ලක්ෂයකට අධික පිරිසක් නියඟයෙන් පීඩාවට පත්ව සිටිති. ගිරිබාව ප්රාදේශීය ලේකම් කොට්ඨාසය නියඟය උග්‍රම ප්රාදේශීය ලේකම් කොට්ඨාසය වන අතර අනෙක් කොට්ඨාස වනුයේ මහව, ගල්ගමුව, අඹන්පොළ, ඇහැටුවැව සහ බමුණා කොටුවයි. ගිරිබාව ප්‍රාදේශිය ලේකම් කොට්ඨාසයේ පමණක් පවුල් 2523 ක 7063 ක් පමණ නියඟයෙන් පීඩා විඳිති.
පුත්තලම දිස්ත්රික්කයේ ප්‍රාදේශිය ලේකම් කොට්ඨාසය හයක පවුල් 18836 ක පුද්ගලයින් 62528 ක් නියඟයෙන් බැට කති. එහි නියඟය උග්‍ර ප්රාදේශීය ලේකම් කොට්ඨාසය වන්නේ මහකුඹුක්කඩවලයි. පල්ලම, මුන්දලම, කරුවලගස්වැව, නවගත්තේගම සහ වනාතවිල්ලුව ද දැඩිලෙස නියඟයෙන් පීඩාවාට පත්ව ඇත්තේය. මහකුඹුක්කඩවල ප්රාදේශීය ලේකම් කොට්ඨාසයේ පවුල් 7197 ක පුද්ගලයෝ 22694 ක් පීඩාවට පත්ව සිටිති.
නියඟය නිසා මේ පළාත්වල කුඩා වැව් සියල්ලම පාහේ සිඳී ගොසිනි. ළිංවල ජලය නොමැත. අඩි පනහ හැට ගැඹුරට ළිං හෑරුවද ජලය නොමැත. මේ නිසාම බව්සර යොදාගෙන ගමින් ගමට පානීය ජලය බෙදා හැරීම ආරම්භ කර ඇත. මේ වෙනුවෙන් කුරුණෑගල දිස්ත්රික්කයේ ප්රාදේශීය ලේකම් කාර්යාල, ආපදා කළමනාකරණ මධ්‍යස්ථානය සහ ප්රාදේශීය සභා සතු බවුසර් 107 ක් පමණ යොදාගෙන ඇත. මහව ප්රාදේශීය ලේකම් කොට්ඨාසයේ පවුල් 2177 ක් ගල්ගමුව පවුල් 786 ක් අඹන්පොළ පවුල් 1687 ක් ගිරිබාවේ පවුල් 2523 ක් ඇහැටුවැව පවුල් 1335 ක් සහ බමුණාකොටුව කොට්ඨාසයේ පවුල් 248 ක් ඉන් පානීය ජලය ලබා ගනිති.
අඹන්පොළ අයි. ඇම්. පියදාස ගොවිතැන ජීවනෝපාය මාර්ගය කරගත් අයෙකි. නියඟය හේතුවෙන් ඔහුගේ සියලු බලාපොරොත්තු සුන්ව ඇත්තේය.
“එකම රටේ පැත්තක ගංවතුර තවත් පැත්තකට නියඟය. පාරෙ බැහැලා යනකොට ඇඟ පිච්චෙන තරමට අව්ව සැරයි. අවුරුදු තුනක විතර කාලයක හරිහැටි වැස්සක් නෑ. වගාවක් කරගන්ඩ තරම් වතුර වැව්වලට එකතු වුණේ නෑ. කන්න පහක් හයක් වගා නැතුව ආදායම් මාර්ග ඇහිරිලා. මේක නම් කරුමයක්. දැන් ඉතින් තැන තැන ගිහින් කුලී වැඩක් හොයා නොගත්තොත් පවුල් පිටින් මැරෙන්ඩයි වෙන්නෙ”
පල්ලම ප්රාදේශීය ලේකම් කොට්ඨාසයේ පවුල් 6967 ක් නියඟයෙන් පීඩාවට පත්ව ඇති අතර මුන්දලම කොට්ඨාසයේ මෙම පවුල් සංඛ්‍යාව 4165 කි. කරුවලගස්වැව කොට්ඨාසයේ පවුල් 320ක්, නවගත්තේගම කොට්ඨාසයේ පවුල් 122 ක් සහ වනාත විල්ලුවේ පවුල් 65 ක් නියඟයෙන් පීඩාවට පත්ව සිටිති.
නියඟයෙන් පීඩාවට පත් ජනතාව වෙත නියං සහනාධාර ලෙස වියළි ආහාර ද්‍රව්‍ය ලබාදීම සිදු කෙරේ. සාමාජිකයින් දෙදෙනකු හෝ ඊට අඩු පවුල් සඳහා රුපියල් 4000 ක වියළි ආහාර ද්‍රව්‍ය සහ සාමාජිකයින් තුන හෝ ඊට වැඩි පවුල් සඳහා රුපියල් 5000 ක වියළි ආහාර ද්‍රව්‍ය බෙදා දීම සිදු කෙරෙයි. මේ වන විට වට හයක් (06) එසේ නියන් සහනාධාර බෙදා හැරීම සිදු කර ඇත. පුත්තලම දිස්ත්රික්කයේ පවුල් 45000කට සහ කුරුණෑගල දිස්ත්රික්කයේ පවුල් 92000 කට මීළඟ අදියරේ නියන් සහනාධාර ලබාදීමට සැලසුම්කර ඇත.
නවගත්තේගම ඒ. සී. කරුණාරත්න මහතා ගොවිකම රජකම ලෙස සලකමින් වසර පනහකට අධික කාලයක් තිස්සේ වගා කටයුතුවල යෙදෙමින් පවුලේ සමෘද්ධිය උදාකර ගත්තේය. ජල හිඟය දැන් ඔහුගේ ගොවිතැන් කටයුතුවලට මහත් බාධාවක්ව පවතී.
“අවුරුදු අසූවකට ආසන්න කාලයක් අපි අත් විදපු ලොකුම නියං කාලය මේක. වැව් සේරම හිඳිලා. ළිංවල ජලය නෑ. මුළු පරිසරයම කරවෙලා ගිහින්. ලොකු ලොකු ගස් ටික නොතිබ්බ නම් කාන්තාරයක් වගේ. වගාවලට, නාගන්ඩ, බොන්ඩ මේ කිසි දේකට වතුර නෑ. බොන වතුර බව්සරවලින් ගෙනත් දෙන එක අපට ලොකු සහනයක්. පවුල් තිහ හතළිහකට එක බැරල් එකයි. පැය බාගෙන් ඒ වතුර බැරලය ඉවර වෙනවා. ඒ තැන්වලත් පෝලිම්. දවස් දෙක තුනකට වරක්වත් වතුර ගෙනත් දෙනවා නම් හොඳයි. වතුර දෙන්ඩ ගතවන කාලය හොඳටම වැඩියි.”
එච්. එම්. ප්‍රියන්ත මහතා අපට මුණ ගැසුණේ පානීය ජලය මිලට ගෙන යමින් සිටියදීය.
“ගම්මාන හත අටක්ම බොන්ඩ වතුර ගන්නේ නාකොලගහේ නල ළි‍ඳෙන්. වෙන නොමිලේ බොන්ඩ වතුර ටිකක් ගන්ඩ තැනක් නෑ. ෆිල්ටර් වතුර ලීටරයක් රුපියල් තුන්දාහසක් විතර වැය වෙනවා. කිසිම ආදායමක් නැතුව කොහොමද බොන වතුරට රුපියල් තුන්දහසක් වැය කරන්නේ. පාසල් යන දරුවන්ට පවා පාසලේ බොන්ඩ හොඳ වතුර ටිකක් නෑ. ඇතැම් දිනවල පාසල්වලට බවුසර් මගින් පානීය ජලය බෙදා දෙනවා. ඒක අපට ලොකු සහනයක්. ඒත් නියඟය ඉදිරියටත් තිබුණොත් කන්ඩත් නැතුව බොන්ඩන් නැතුව මැරෙන්ඩ තමයි වෙන්නේ”
නියඟයෙන් පීඩා විදින ජනයාට යම් සහනයක් හෝ සැලසීමට අඹන්පොළ ප්රාදේශීය ලේකම් එච්.එම් සී. ජේ. හේරත් මෙනවිය දරන්නේ දැඩි ප්‍රයන්නයකි.
“අඹන්පොළ කොට්ඨාසයට නියඟය උග්‍රයි. වැව් ළිං මේ සියල්ලම පාහේ හිදිලා අපට හැකි උපරිමයෙන් මේ සඳහා පිළියම් යොදනවා. අඹන්පොළ කොට්ඨාසයේ වසම් 24 ක ජනතාවට අවශ්‍ය පානීය ජලය බෙදාහැරීම මේ වන විටත් සිදු කරනවා. ඊට අමතරව ආගමික ස්ථාන, පාසල්, රෝහල, ආයුර්වේද රෝහල, සංස්කෘතික මධ්‍යස්ථානය, ගොවිජන සේවා මධ්‍යස්ථානය ඇතුළු ආයතනවලටත් ජලය බෙදා දීම සිදු කරනවා. පවුල් හත අටකට එක බැරල් එක බැගින් ලබා දී සතියකට වාර දෙකක් විතර පානීය ජලය ගම්වලටම ගෙනිහින් දෙනවා. පැමිණිලි කිසිවක් නෑ. ජනතා‍වගේ අවශ්‍යතා සලකා බලා ඔවුන්ගේ ඉල්ලීම්වලට අනුව හැකි උපරිම සහන සලසනවා”
කුරුණෑගල දිස්ත්‍රික් ආපදා කළමනාකරණ මධ්‍යස්ථානයේ සහකාර අධ්‍යක්ෂ විරාජ් දිසානායක මහතා ද විපතට පත්වූවන්ට සහන සැලසීමේ නිරතව සිටී.
“නියඟයෙන් පීඩාවට පත් ජනතාව වෙත පානීය ජලය සහ සහනාධාර බෙදා හැරීම විධිමත්ව සිදු කරනවා. ප්රාදේශීය ලේකම් කොට්ඨාස හයක පුද්ගලයින් 25001 ක් සඳහා පානීය ජලය ලබා දෙනවා. වට හයක් නියන් සහනාධාර ලබා දී තිබෙන අතර හත්වන වටයට බෙදා දීමටත් අනුමැතිය ඉල්ලා තිබෙනවා. පානීය ජලය ලබාදීම සඳහා පමණක් මේ වන විට රුපියල් මිලියන පහකට අධික මුදලක් වැයකර තිබෙනවා. දිස්ත්‍රික් ලේකම්තුමාගේ උපදෙස්මත ප්රාදේශීය ලේකම් කාර්යාලවල සහයෝගයෙන් මෙම සහන සැලසීම අඛණ්ඩව කරගෙන යනවා”
අනිල් ගාමිණී විජේරත්න
