අහසේ පාවී නොගිය සුනිල් වලා
1966 වර්ෂයේදී මමත් මිතුරෝ තිදෙනෙකුත් වව්නියා දිස්ත්රික්කයේ අති දුෂ්කර වූ සිංහල පාසලකට පත්වීම් ලදිමු. මගේ ප්රධාන විෂය සිංහල නොවුවද අදාළ ගුරුවරුන් නොපැමිණි අවස්ථාවලදී විදුහල්පතිවරයා ඉහළ පන්තිවල සිංහල ඉගැන්වීමට මා යැවීය. මෙම පන්තිවල සිසුහු මගේ පැමිණීම සැමවිටම අගය කළහ. 11 පන්තියෙහි සුනිල් නමින් සිසුන් දෙදෙනෙකු සිටි හෙයින් ඔවුන්ගෙන් එක් අයෙකු “වලි සුනිල්” සහ අනෙකා “වල් සුනිල්” යනුවෙන් ද සෙසු සිසුහු හැඳින්වූහ. වලි සුනිල් නිතර දබරයට බරය. වල් සුනිල් ගැහැනු ළමයින් අතර ගැවසීමට ප්රිය කළ අයෙකි. ඒ නිසා ගැහැනු ළමයි රහසින් ඔහු ‘සුනිල් වලා’ යැයි හඳුන්වති.
දිනක් මෙම පන්තියේ සිංහල සාහිත්ය සඳහා මා යොමු කළෙන් සැලළිහිණි සංදේශයේ කැලණි පුර ළඳුන් වර්ණනාවේ කවි පැහැදිලි කරන ලෙස සිසුහු මගෙන් ඉල්ලා සිටියහ. එම කවිවලින් “සුනිල් වලා නව සඳ නිලුපුල් පබළු...” යන කවිය විස්තර කරමින් මම සුනිල් වලා යනු තද නිල් පැහැති වලාකුළු මිස අන් අරුතක් නොවන බවත් අතිශයින් නිල් වලාකුළු වැනි කෙස් කළඹ සහ අඬසඳ වැනි පටු නළල්වලින් යුත් කැලණිපුර ළඳුන් මෙහි වර්ණනා කරන බවත් පැහැදිලි කළෙමි.
පාඩම ගැන එතරම් අවධානයක් නොමැතිව වලි සුනිල් සිටින බව මට පෙනිණි. මම ඒ සමඟම ඔහුගෙන් සුනිල් වලා වැඩිපුර දකින්නට ලැබෙන්නේ කොහි දැයි විමසිමි. කලබලයෙන් නැගී සිටි ඔහු “සර්, සුනිල් වලා වැඩිපුරම දකින්නට ඉන්නේ ගැහැනු ළමයි අතරෙනෙ” යැයි පිළිතුරු දුන්නේය. පන්තියේ සිසුන්ට මෙන්ම මට ද මෙම පිළිතුරෙන් මහත් සිනහා පහළ වුණි.
විශ්රාමික ආචාර්ය එඩ්වඩ්. බී. ගුණවර්ධන
අවිස්සාවේල්ල.
බාගෙට පිස්සු අයියා
පාසල්වල කෙරෙන ඉගැන්වීම් කටයුතු පිළිබඳ සොයා බැලීමට පරීක්ෂකවරු වරින් වර පැමිණෙති. එක්තරා පාසලකට දිනක් පරීක්ෂකවරයෙක් පැමිණියේය. සිසුන්ගේ කුමක් හෝ වැරැද්දක් සොයා ගෙන එයට බැණ වැදීම ඔහුගේ සිරිත විය.
පැසල පරීක්ෂා කර බැලූ විට එහි වැරැද්දක් පෙනෙන්නට තිබුණේ නැත. ඔහු පන්තියකට ගියේය. එහි සිටි සිසුන්ගෙන් පාඩම් පිළිබඳ ප්රශ්න කිහිපයක් ඇසුවේය. ඒ සියල්ලටම සිසුහු නිවැරදිව පිළිතුරු දුන්හ. පරීක්ෂකවරයාගේ සිතට මෙය මහත් අසහනයක් විය. ටික වේලාවක් කල්පනා කරමින් සිට ඔහු මෙසේ කීවේය.
“ හා එහෙනම් කියනව බලන්න මගෙ වයස කීයද කියලා” එක් ළමයෙක් වහාම නැගිට “අවුරුදු පනස් හයයි” කීවේය. එයද නිවැරදිය. ඔහුට පුදුම සිතුණේය. ඔහු ළමයා කැඳවා එය දැන ගත්තේ කෙසේ දැයි ඇසීය.
“සර්, අපේ අයියා කෙනෙක් ඉන්නවා. එයාගෙ වයස අවුරුදු විසි අටයි. එයාට බාගෙට පිස්සු” යැයි කීවේය. පරීක්ෂකවරයාට තරු පෙනුණි. එවේලේම පන්තියෙන් පිට වී ගියේය. ඉන්පසු කිසිම දිනක ඔහු එම පාසලට පැමිණියේ නැත.
චන්ද්රානී චිත්රලතා ජයකොඩි
ඉංගිරිය