මැතිවරණය ඉක්මන් කරන්න කියලා වේදිකාවෙ කෑ මොර දෙන ජනතා විමුක්ති පෙරමුණ ඇයි සීමා නිර්ණය පනත සම්මත කිරීමේ දී පැනලා ගියේ.
අපි කවදාවත් පැනලා යන පක්ෂයක් නෙමෙයි. සීමා නිර්ණය පනතේ අඩුපාඩු තිබුණා. ඒක වෙනම එකක්. නමුත් ආණ්ඩුවට ඕන වුණේ පනත සම්මත නොකර මැතිවරණය කල් දාන්න. ආණ්ඩුවට මැතිවරණය මඟ හැර යන්න උදවු කරන්න අපට අවශ්‍ය නැහැ. අපට අවශ්‍ය මැතිවරණය පවත්වන්න. ආණ්ඩුවට ඕන කරපු සීමා නිර්ණය පනත පරද්දන්න ඒකට විරුද්ධව අත උස්සලා ආණ්ඩුවේ ගමනට සහාය දෙන්න අවශ්‍යතාවක් අපේ පක්ෂයට නැහැ. පනතට පක්ෂව හෝ විපක්ෂව හෝ ඡන්දෙ නොදෙන නිසා ජන්දය විමසන වේලාවෙ සභාවේ සිටීමේ අවශ්‍යතාවක් නැහැ
මුසම්මිල් මහතා පසුගිය දිනක කිව්වා මැතිවරණය කල් දාන්න ආණ්ඩුව ගන්නා උත්සාහයට සහාය දෙන්න ජවිපෙ මාරු වුණා කියලා. ජනතා විමුක්ති පෙරමුණත් මේ ක්‍රියාදාමයේ ඉත්තො වෙලා කිව්වා
අපි කාගෙවත් ඉත්තො වෙන්නෙ නැහැ. ඔය කියන උදවියත් එදා සීමා නිර්ණය පනත මඟ ඇරියනේ එයාලටනෙ ඕන කරන්නෙ මැතිවරණය කල් දාන්න. අපි හය දෙනාගෙ ඡන්දය ඔය තීරණය වෙනස් කරන්න බලපෑමක් වෙන්නෙ නැහැනෙ.
පසුගිය මැයි 31ට කලින් මැතිවරණය ගැන පොදු තීරණයක් ආණ්ඩුවත් සමග ඇති කරගෙන තිබෙන බවක් ජවිපෙ නායකයා කියපු බවක් එතුමාම කිව්වා. එතුමා අභියෝග කරලා ඇහුවා කෝ එකඟතාව කියලා.
අපි 25%ක කාන්තා නියෝජනය ගැන එකඟ වුණා. කොට්ඨාස ක්‍රමය ගැන එකඟ වුණා. ඒ එකඟතා මිසක් අපිට ආණ්ඩුව එක්ක ඩීල් නැහැ.
මැතිවරණය සම්බන්ධව දැන් ජනතා විමුක්ති පෙරමුණ සද්දයක් නැහැ වගේ.
මැතිවරණය කඩිනමින් පැවැත්විය යුතුයි යන මතයෙ අපි ඉන්නේ. කොට්ඨාස ක්‍රමයෙන් හෝ මනාප ක්‍රමයෙන් හෝ මැතිවරණය කඩිනම් කිරීමයි අපට අවශ්‍ය වන්නේ. මොන ක්‍රමයෙන් ආවත් අපි ඉදිරිපත් වෙනවා. කොට්ඨාස ක්‍රමයෙන් පවත්වනවා නම් වඩාත්ම හොඳයි. අපි ආණ්ඩුවට කියන්නෙ ඉක්මනින්ම මැතිවරණය පවත්වන්න කියලා. ආණ්ඩුව තේරුම් ගත යුතුයි මේ දක්වා මැතිවරණ කල් දාපු ආණ්ඩුවලට මොකද වුණේ කියලා. ඒ පාඩම දැන්වත් ආණ්ඩුව ඉගෙන ගත යුතුයි.
සීමා නිර්ණය පනත පාර්ලිමේන්තුවේ 3න් 2ක බලයක් නොමැතිව පරාජය වූවායින් පසුව අගමැතිවරයාගේ මූලිකත්වයෙන් යුක්ත කමිටුවක් මඟින් ලබා දෙන නිර්දේශය මඟින් එය සම්මත කරවා ගත හැකි බවක් කියනවා. නමුත් ඩලස් අලහප්පෙරුම මහතා පවසා තිබුණා එය පාර්ලිමේන්තුවේ පරාජයට පත් වූවායින් පසුව එසේ කිරීම වැරැද්දක් බව. ඔබ පක්ෂය ඒ ගැන දරන මතය කුමක්ද?
ඩලස්ගේ කතා ගැන මම දන්නේ නැහැ. එතුමා එහෙම ප්‍රකාශයක් කළා නම් ඒකට හේතුව එයාගෙන්ම අහන්න. අපේ පක්ෂය ඒ ගැන දරන මතය නෙමෙයි මෙතැනට අවශ්‍ය වෙන්නේ. නීත්‍යනුකූල තත්ත්වය ගැනයි අප අවධානය යොමු කළ යුත්තේ. 19 වන සංශෝධනයේ පැහැදිලිව තියෙනවා සීමා නිර්ණය පනත 3න් 2 කින් පරාජය වුණොත් කතානායකවරයා විසින් අගැමැතිවරයාගේ මූලිකත්වයෙන් සමන්විතව පත් කරනු ලබන කමිටුවක් හරහා එම පනත සම්මත කරවා ගත හැකි බව. පනතේ එසේ තිබිය දී ඒ ගැන නොදත් අය කියන කතා ගැන කතා කරන්න මම කැමැති නැහැ. සමහරු තමන්ගේ පක්ෂයේ අර්බුද වහගන්න මාතෘකා වෙනත් අතකට හරවන අවස්ථාත් තියෙනවා. ඒ, ඒ අයගේ දේශපාලනයනෙ.
ඒකාබද්ධ විපක්ෂය ලබන 5 වැනි දා කොළඹ අවහිර කරන්න දැවැන්ත ජනබලයක් ගෙන එන බව පවසා තිබෙනවා. ඔබ පක්ෂයත් මෙයට සම්බන්ධ වෙනවාද?
නැහැ, අපේ කිසිම සම්බන්ධයක් නැහැ.
එවන් ජන පෙළපාළියකින් ජන ජීවිතය අවුල් වීම ගැන ඔබ පක්ෂය දරන මතය කුමක්ද?
දැන් ජන ජීවිතය අවුල් වෙලා නැත්ද? ජනතාවට කන්න බොන්න පුළුවන් වාතාවරණයක්ද තියෙන්නෙ. බඩු මිල අහස උසල නැඟලා. හිතෙන හිතෙන වේලාවට බඩු මිල ඉහළ යනවා. ඉගෙන ගත්තාට රැකියා නැහැ. රටේ දැවැන්ත ණය වාරික ගෙවන ක්‍රමවේදයක් නැහැ. ණය ගන්න නිසි ක්‍රමවේදයක් නැහැ. රට අස්ථාවර වෙලා, අරාජික වෙලා. වාහන තදබදය නිසා ගමනක් යන්න එන්න බැහැ. හැම තැනම වර්ජන. ඒ ක්‍රියාවන් නිසා ජන ජීවිතය අවුල් වෙලා නැද්ද?
ඒ කියන්නෙ ඔබ මේ ජනබලයක් උපයෝගී කරගෙන කොළඹ සිදු කරන්න යන අවහිර ක්‍රියාදාමය අනුමත කරනවා ද?
ඔව් , ආණ්ඩුවට විරෝධය පාන්න කරන දේ අපි අනුමත කරනවා. ජනතාව අපහසු වෙන්නේ ආණ්ඩුවේ වැඩපිළිවෙළින්. ඒ ආණ්ඩුවට විරෝධය පෑම කළ යුතුමයි. ඒ විරෝධතා හමුවේ ජනතාවට අපහසුතා ඇති වෙයි. ආණ්ඩුවක අනිසි දූෂිත වැඩපිළිවෙළට විපක්ෂයට කරන්න පුළුවන් හැම දෙයක්ම කළ යුතුයි.
ඔබ පක්ෂය නිතරම කියන දෙයක් තමයි මේ රටේ ආර්ථිකය හදන්න ඔළු ගෙඩි මාරු කරල හරියන්නෙ නැහැ කියලා. ඒ මාරුකරන හෝ නොකරන ඔළු ගෙඩිවලට ඔබ පක්ෂයේ ඔළුත් අයිති වෙනවනේ
මේක පැහැදිලිව ජනතාව තේරුම් ගත යුත්තක්. අදත් අපි කියන්නේ ඒකම තමයි. මාරු කරන්නේ ඕන පක්ෂවල ඔළු ගෙඩි ටික නෙමෙයි. අපි රට හදන්න නම් මාරු කළ යුත්තේ ප්‍රතිපත්තියි. අද අපේ රටේ කිසිම ප්‍රතිපත්තියක් තියෙනවද? නිෂ්පාදන ආර්ථිකයක් තියෙනවද? සෞඛ්‍ය සේවාවට ප්‍රතිපත්තියක් නැහැ. අධ්‍යාපනයට නැහැ. ප්‍රවාහනයට නැහැ. අඩු ගණනේ කෘෂිකර්මාන්තයටවත් ප්‍රතිපත්තියක් තියෙනවද? ණය ගැනීම ගැන ප්‍රතිපත්ති නැහැ, අඩුම ගානේ ණය ගෙවන එක ගැනවත් ප්‍රතිපත්තියක් තියෙනවද?
ජනතාව කැමැති පක්ෂයක් පත් කර ගැනීම ප්‍රජාතන්ත්‍රවාදී රටක අයිතියක්. ඔබ ඒ අයිතියත් වැරැදි ලෙස ද දකින්නේ
අපේ අයිතිය අපි යොදා ගත යුත්තේ රටක සංවර්ධනයටයි. ඒ මඟින් අපටත් සංවර්ධනය නැත්නම් ආර්ථිකය යහපත් කර ගන්න පුළුවන්. ජනතාවයි මේ අය පත් කර ගන්නේ. ජනතාව තීරණය කරනවා නම් මේ දූෂිත ඔළු ටිකම එහාට මෙහාට මාරු කළ යුතුයි කියල, ඒ මාරු කිරීමේ කරුමය ගෙවන්න වෙන්නෙත් ජනතාවටමයි. තල වැපිරිරුවොත් තලම තමයි අස්වැන්න හැටියට ගන්න වෙන්නේ. ඒක ජනතාව හොඳින් මතක තබාගත යුතුමයි.
සංවාදය - තාරක වික්‍රමසේකර
