ක්‍රිකට් ක්‍රීඩකයන්ව පහසුවෙන් පොහොසත් කරමින් ඔවුන්ගේ ක්‍රීඩා දිවියට විලංගු දැමීමට ලොව පුරා බුකිකරුවෝ උත්සාහ කරමින් සිටිති. මේ වන විට ශ්‍රී ලංකාව තුළ ද මේ බුකි වෛරසය ශීඝ්‍රයෙන් ව්‍යාප්ත වෙමින් තිබේ. එය හෙළි වන්නේ බුකි ඒජන්තවරුන්ගේ සේවාදායකයන් මෙරට ක්‍රියාත්මක ප්‍රධානතම තරගාවලියක් වන අන්තර් පළාත් විස්සයි විස්ස තරගාවලිය ද නැරඹීමට පැමිණ ඇති ආකාරය හෙළිදරව් වීමත් සමඟිනි.
මේ සම්බන්ධව මුල්ම සැකය මතු වන්නේ ආර්.ප්‍රේමදාස ක්‍රීඩාංගණයේ පැවැති තරගවලදීය. එතැන දී දක්නට ලැබුණේ මුස්ලිම් හා දෙමළ ප්‍රේක්ෂකයන් පිරිසක් තරගය නරඹන ආකාරයය. මාලිගාවත්ත දෙමටගොඩ ප්‍රදේශ ඇසුරෙහි පවතින ආර්.ප්‍රේමදාස ක්‍රීඩාංගණයට මේ ප්‍රේක්ෂක සංයුතිය අමුත්තක් නොවුණත් ඔවුන්ගේ විජාතික පෙනුම සම්බන්ධව ක්‍රිකට් බලධාරීහු වැඩි අවධානයක් යොමු කළහ.
ඔවුන්ගේ සැකයට පදනමක් සහිත බව ඒත්තු යන්නේ දඹුල්ලේදීය. දඹුල්ලේ පැවැති තරග නැරඹීමට ශ්‍රී ලාංකිකයන්ට වඩා විජාතික පෙනුමක් සහිත පිරිසක් පැමිණ සිටිනු දක්නට ලැබිණි. පරීක්ෂා කරන විට ඔවුන් ඉන්දියා හා පකිස්තාන ජාතිකයන් බව හෙළි විය. මේ තත්ත්වය තහවුරු වූයේ මේ පිරිස පල්ලෙකැලේටත් පැමිණ සිටින බව දකින විටය. 
මෙවර පලාත් තරගාවලියට බුකිකරුවන්ගේ තරගාවලියක බවට පත්වී ඇත් දැයි සැකය මතුවන්නේ ඒ සමඟය. මේ පිරිස ක්‍රීඩාංගණවලින් ඉවත් කිරීමට සාධනීය පදනමක් කිසිවෙකුට තිබුණේ නැත. තිබුණේ අනුමානයන් පමණය. කෙසේ වෙතත් සැක කටයුතු විදේශික පුද්ගලයන් 15කගෙන් පමණ කටඋත්තර ලබා ගැනීමට ශ්‍රී ලංකා පොලිසිය කටයුතු කළේය. ඔවුන් පවසා තිබුණේ තමන් පැමිණ ඇත්තේ එල්.පී.එල්. තරගාවලිය නැරඹීමට බවය. එල්.පී.එල් යනු ලංකා ප්‍රිමියර් ලීග් ලෙස නම් කොට පවත්වන්නට සංවිධානය කර තිබූ 20 විස්ස ක්‍රිකට් තරගාවලිය ය. පැවැති ක්‍රිකට් පරිපාලනය මාරු වීමත් සමඟ එම තරගාවලිය සංවිධානය කරගැනීමට නව පරිපාලකයන්ට කල්වේලා මදි විය.
පළාත් තරගාවලිය ආරම්භ වන්නේ ඊට විකල්පයක් ලෙසය. එල්.පී.එල්. තරගාවලිය ලංකාවේ පැවැත්වූවා නම් ඊට සහභාගි වන විදෙස් ක්‍රීඩකයන් දැලේ දමාගැනීමට බුකීකරුවාට පහසුය.
මේ වන විට ශ්‍රී ලංකා ක්‍රිකට් ආයතනය ද විවිධ ආරක්ෂක ක්‍රියාමාර්ග ක්‍රියාත්මක කරමින් ක්‍රිකට් ක්‍රීඩකයන් ආරක්ෂා කරගැනීමේ මෙහෙයුමක් ආරම්භ කර ඇත. ශ්‍රී ලංකා ක්‍රිකට් ආයතනයට ක්‍රීඩකයන් ආරක්ෂා කරගැනීමේ වැඩපිළිවෙළක් ක්‍රියාත්මක කිරීමට සිදුව ඇත්තේ සමහර ශ්‍රී ලංකා ක්‍රීඩකයන් සහ ක්‍රිකට් ආයතනය වෙනුවෙන් විවිධ රාජකාරි උසුලන පිරිස් බුකීකරුවන් සමඟ තරග පාවාදීම්වලට සම්න්ධ වූ බවට සාක්‍ෂි ලැබීම හේතුවෙනි.
අවසන් වසර දෙක තුළ දී ශ්‍රී ලංකා ක්‍රිකට් පරාජයෙන් හෙම්බත් වෙද් දී බුකීකරුවන් විසින් මෙරට ක්‍රිකට් වැටලීමට උත්සාහ කරනු ලැබුවේ, ඒ පරාජයේ මුවාවෙන් ක්‍රීඩකයන්ව දැලේ දමා ගැනීම පහසු බව වටහා ගනිමිනි. නමුත් බුකීකරුවන් ‘ඩීල්’ දැමීමට උත්සහ කළ රංගන හේරත් සහ කුසල් පෙරේරා මීට වසර කිහිපයකට පෙර ගාල්ලේ පැවැති ටෙස්ට් තරගයක් අතරතුර දී තමන්ට කළ යෝජනාවක් පිළිබඳව ශ්‍රී ලංකා ක්‍රිකට් ආයතනයට සහ දුෂණ විමර්ශන ඒකකයට පැමිණිලි කළේය. මේ හේතුවෙන් බුකී කරුවන්ගේ උත්සහය ව්‍යර්ථ විය.
බුකීකරුවා එක් උත්සාහයක් අතහැරිය ද තවත් ක්‍රම කිහිපයක් මඟින් ක්‍රීඩකයන්, තණතිලි සකසන්නන්, නිලධාරීන් මෙන්ම ඇතැම් විට ක්‍රිකට් ක්‍රීඩකයන්ගේ ඒජන්තවරුන් ද මුදලට ගනිමින් තමන්ගේ ව්‍යාපෘතිය පවත්වාගැනීමට කටයුතු කරයි. මෙහි ප්‍රතිඵල ප්‍රකාශ වන්නේ අප නොසිතන ආකාරයෙනි. වරක් ශ්‍රී ලංකාවේ ක්‍රියාත්මක පළමු පෙළ ක්‍රිකට් තරගාවලියක් අතරතුර දී ප්‍රසාද ලකුණු ලබාගැනීමට පාණදුර ක්‍රීඩා සමාජය සහ කළුතර කායවර්ධන කවය ක්‍රීඩා සමාජ අතර 2016 වසරේ මග්ගොන සරේ පිටියේ පැවැති ක්‍රිකට් තරගයක දී තරග පාවාදීමක් සිදුවිය. එය සිදුවී තිබුණේ කණ්ඩායම්වල කලමණාකාරීත්වයේ සැලසුමක් ලෙසය. එහි තීන්දුව තවමත් ක්‍රිකට් ආයතනය විසින් සඟවා තබා ගනු ලබන්නේ විසිරුවා ඇති ක්‍රිකට් කමිටුවේ උපලේකම්වරයා පානදුර ක්‍රීඩා සමාජයේ ප්‍රබලයකු වූ නිසාය. එම තරගයේ දී පාණදුර කණ්ඩායමට නායකත්වය ලබාදුන්නේ චාමර සිල්වාය. ක්‍රීඩා කළ යුතු ආකාරය සම්බන්ධව නිලධාරීන් උපදෙස් වන විලාශයෙන්ම මේ තරගය යම් සැලසුමකට අනුව සිදු වන පාවාදීමක ලක්ෂණ චාමර දුටුවේය. නිලධාරීන්ට ඕනෑ ආකාරයට ක්‍රීඩා කිරීමට එරෙහිව ඔහු ගෙදර ගියේය. පසුව ඔහු පැවසුවේ බඩේ අමාරුවක් නිසා එසේ කළ බවය. ක්‍රිකට් ආයතනය නිසියාකාරව වරදකරුවන්ව රටට හඳුන්වා දුන්නේ නැත.
චාමර සිල්වා බඩේ අමාරුවක් නිසා ගෙදර ගිය බව පවසා ප්‍රශ්නය ගොඩින් බේරා ගැනීමට එදා උත්සහ කළ ද දිගින් දිගටම මෙම සිද්ධිය ප්‍රශ්නයක් වීම හේතුවෙන් නිලධාරීන් බේරා ක්‍රීඩකයන්ගේ කර මත වරද පැටවීමට කටයුතු යෙදිණි. තරගය මගහැරීමේ විනය විරෝධී හැසිරීම ඉදිරියට දමමින් චාමර ඇතුළු ක්‍රීඩකයන් කීපදෙනෙකුට තරග තහනමක් පැනවිණි. මාස කීපයකින්ම එම තහනම ඉවත් විය. දැන් චාමරලා ක්‍රිකට් පිටියට පැමිණ තිබේ.
අල් ජසීරා රූපවාහීනී නාලිකාව විසින් ගාලු ජාත්‍යන්තර ක්‍රීඩාංගණයේ තණතීරු සකසන්නා සහ එහි සහය කළමනාකරු වූ තරංග ඉන්දික සහ ජීවන් මෙන්ඩිස්ගේ සොහොයුරකු වන පළමු පෙළ ක්‍රිකට් ක්‍රීඩකයකු වන තරිඳු මෙන්ඩිස්, මෙන්ම හිටපු තවත් ක්‍රිකට් ක්‍රීඩකයකු වන ජීවන්ත කුලතුංග බුකී කරුවන්ගේ වුවමනාව මත තරග පාවාදුන් හැටි ජාත්‍යන්තරයටම විකාශය කළහ. ඔවුන්ට තහනමක් පැනවුවද ප්‍රශ්නය තවමත් ඔඩු දුවමින් තිබේ.
හිටපු ක්‍රිකට් සභාපති තිලංග සුමතිපාල පසුගිය දා අර්ජුන රණතුංග සහ අරවින්ද ද සිල්වා තරග පාවාදුන් බවට ප්‍රකාශ කළේය. ඒ සමඟ උත්තේජනය ලැබුවේ ශ්‍රී ලංකාවේ ක්‍රිකට්වලට ඇම දාන්නට කල් බලමින් සිටිනා බුකිකරුවෝය. කෙසේ වෙතත් එදා නීතිඥයෝ විස්සක් පමණ අර්ජුනලා වෙනුවෙන් පෙනී සිටිමින් එම චෝදනාවෙන් ඔවුන් නිදහස් කළහ. ඒ කතාව අර්ජුනලා මාධ්‍ය හමුවක් කැඳවමින් පවසා සිටියහ. මේ කරුණු කාරණා අනූව බුකිකරුවන් ශ්‍රී ලංකාව දෙසට වැඩි අවධානයක් යොමු කිරීමට පටන් ගෙන තිබේ.
වරදකාර ශ්‍රී ලාංකික ක්‍රීඩකයා
බංග්ලාදේශයේ ක්‍රියාත්මක බී.පී.එල්. තරගාවලියට මෙන්ම ඉන්දියාවේ ක්‍රියාත්මක අයි.පී.එල්. තරගාවලියට ද මේ බුකීකරුවන් නිතර සංචාරය කරනු ලබන බවට තොරතුරු ලැබී තිබේ. ප්‍රශ්න කළ පුද්ගලයන්ට අනුව ඔවුන් පැමිණ ඇත්තේ තරග නරඹන්නට ය. ඒ අනුව උත්තර ගෙන ප්‍රශ්නය විසඳා ඇත. මෙතරම් ක්‍රිකට් ‘ඇම්ම’ ඇති විදේශිකයන් ලංකාවේ පළාත් තරගාවලිය නැරැඹීමට පැමිණෙන්නේ ඇයි ද යන ප්‍රශ්නයට ශ්‍රී ලංකා දූෂණ විමර්ශන ඒකකය ඉක්මන් විසැඳුමක් සෙවිය යුතුය. පසුගිය කාලයේ ගාල්ලේ තරග පැවැත්වෙන විට බුකීකරුවන් කිහිප දෙනෙකුම ක්‍රීඩාංගණයෙන් ඉවත් කිරීමට ඔවුන් කටයුතු කළ ද තත්ත්වයට එය ස්ථිර විසඳුමක් නොවිණි.
එල්.පී.එල්. වෙනුවෙන් වීසා ලබාගත් බුකීකරුවන් අනතුරුව එළැඹෙන එංගලන්ත කණ්ඩායමේ ශ්‍රී ලංකා සංචාරය ද ඉලක්ක කරගෙන ඇත. ක්‍රීඩකයෝ බුකීකරුවන්ගේ පරෙස්සම් විය යුතු ආකාරය දැන් හොඳින් දනිති. පසුගිය දා ශ්‍රී ලංකා ක්‍රිකට් දූෂණ මර්දන ඒකකයේ ප්‍රධානියා විසින් පළාත් තරගාවලිය නියෝජනය කරන ක්‍රීඩකයන් 60 දෙනාටම විවිධ උපදෙස් දෙන ලදී. ඔවුහු ප්‍රශ්න කිරීම්වලට ලක් කරනු ලැබූහ. නමුත් එහි දී කිසිදු ක්‍රීඩකයකු විසින් තමන්ට බුකිකරුවන්ගේ යෝජනා ආ බවට පැමිණිලි කර නැත.
නමුත් ‘සෙල්ෆි’ ගසමින් ඔවුන් පුහුණුවීම් කරන අයුරු බලා සිටිමින් බුකිකරුවා ක්‍රීඩකයන්ට කිට්ටු වන ආකාරය වාර්තා විය. ශ්‍රී ලංකාවේ ජාතික මට්ටම නියෝජනය කරන තරුණ වමත් පිතිකරු යුගලක් සමඟ ද බුකීකරුවන් යැයි කියන පිරිසක් කතා කර ඇතැයි රාවයක් පැතිර ගියේය. ක්‍රීඩකයන් සමඟ පේ‍්‍රක්‍ෂකයකු කතා කරන විට බුකි කරුවකු යැයි ක්‍රීඩකයෝ නොදනිති. නමුත් බුකිකරුවා මාස ගණන් මෙහි ලැග සිට ක්‍රීඩකයා සමඟ සමීප වී සිනහවකින් පටන් ගන්නා මිතුදම අනතුරුව එකට තේ පානය කරන තැනට පැමිණෙයි. එතැනින් එහාට ඒ සම්බන්ධතාව දිවෙන්නේ මැච් ෆික්සින් තේමාව ඔස්සේය. ක්‍රීඩකයෝ ඉක්මනින් පොහොසත් වෙති. බුකීකරුවා මාස කිහිපයක් පෙරුම් පුරා ආදායම ද උපයා ගනිති.
ශ්‍රී ලංකාවේ සජීවී තරගයක් පවත්වන වන විට බුකීකරුවන් කාසියේ වාසියට ද ඔට්ටු දමන ආකාරය වාර්තා වී තිබේ. කාසියේ වාසිය තරගය ආරම්භ වීමට පැය භාගයකට පෙර උඩ දැමුවද එහි සජීවී විකාශය අරඹන්නේ ඊට විනාඩි විස්සකට පසුවය. ඒ අතරවාරයේ ක්‍රීඩාංගණයේ සිටින බුකීකරුවා දුරකථන මාර්ගයෙන් තවත් ඔට්ටුවක් දමයි.
කණ්ඩායමට ක්‍රීඩා කරන 11 දෙනා තේරීම, වැඩිම ලකුණු ලබා ගන්නා ක්‍රීඩකයා, තරගයේ වීරයා සහ වැඩිම කඩුලූ ලබා ගන්නා ක්‍රීඩකයා වශයෙන් විවිධ ඔට්ටු බුකියේ පවතී. ශ්‍රී ලංකාවේ ද ජාත්‍යන්තර හෝ පළාත් තරගාවලිවල දී මේ වෙනුවෙන් ඕනෑ තරම් ඔට්ටු දමයි. ඒ ඔවුන්ගේ රැකියාවයි.
කෞෂාල් ලොකුආරච්චි මෙරට සිටි තුන් ඉරියව් ක්‍රිකට් ක්‍රීඩකයකි. ඔහු බංග්ලාදේශයේ දී කළ තරග පාවාදීමක් අතේ මාට්ටු වීමෙන් තහනමකට ලක් විය. ඒ අනුව මාට්ටු වූ සහ මාට්ටු නොවූ ක්‍රීඩකයන් මෙරට තවත් සිටින බවට අයි.සී.සී.ය ශ්‍රී ලංකා ක්‍රිකට්වලට හෝඩුවාවක් දී තිබේ. ඉදිරියේ දී ඒ නම් හෙළි කිරීමට ද ජාත්‍යන්තර ක්‍රිකට් කවුන්සිලය සුදානම්ය. බුකීකරුවාට මාට්ටු නොවීමට දැන් සිටින ක්‍රිකට් ක්‍රීඩකයන්ට අතීතයේ ඕනෑ තරම් පාඩම් තිබේ. ක්‍රිකට් ආයතනය ද බුකීකරුවන් වෙනුවෙන් මීට වඩා සන්නද්ධ විය යුතුය. නැතහොත් මෙරට ඉතිරිවනු ඇත්තේ ක්‍රිකට් නොව සූදුවකි.
