මේ ඇසෙන්නේ වෙනස් කතාවකි. කෞතුකාගාර ඉතිහාසයේ අලුත්ම සටහනක් තබන කතාවකි. ඒ සඳහන ලංකාවේ ප්‍රථම කාය ව්‍යවච්ඡේද කෞතුකාගාරය ගැනය.
ලංකාවේ ප්‍රථම වතාවට කාය ව්‍යවච්ඡේද කෞතුකාගාරය නිර්මාණය වන්නේ පේරාදෙණිය විශ්වවිද්‍යාලීය වෛද්‍යපීඨයේ ය. කාය ව්‍යවච්ඡේද විද්‍යාව යනු ජීවියාගේ ජීව ව්‍යුහය විද්‍යාත්මකව අධ්‍යයනය කරන්නා වූ විෂයයි. මෙම විද්‍යාව වසර තිස්දහසක් පමණ අතීතයට දිව යන්නකි.
මහාචාර්ය වෛද්‍ය මල්කාන්ති චන්ද්‍රසිරිගේ අදහසකින් බිහි වන කායව්‍යච්ඡේද කෞතුකාගාරය පහුගිය මැයි මාසයේ 28 වන දින පේරාදෙණිය විශ්වවිද්‍යාලයේ උපකුලපති අතින් විවෘත විය.
වෛද්‍යවරයකු හෝ වෛද්‍යවරියක වන්නට පෙරුම් පුරන සියල්ලන්ටම මෘත දේහයන් කපාකොටා අධ්‍යයනය කිරීමට සිදු වේ. ගුණාත්මක වෛද්‍ය දැනුමක් ලැබීමට මිනිස් සිරුරේ කොටස් ගැඹුරින් අධ්‍යයනය කරන්නට වෛද්‍ය සිසුන්ට වසර දෙක තුනක්ම කැප කරන්නට සිදුවේ.
ඒ නිසාම සැබෑ මෘතදේහ හා ශරීර අංග විද්‍යාත්මකව සංරක්ෂණය කොට අධ්‍යයනයට යොමු කරන්නට කාය ව්‍යවචඡේද කෞතුකාගාර ඉදි කිරීම ලෝකය පුරාම සිදුවේ.
එහෙත් ලංකාවේ එවැන්නක් බිහිවන්නේ ප්‍රථම වතාවටය.
වෛද්‍ය විද්‍යාව හදාරනු ලබන සිසුන්ට පමණක් නොව පාසල් සිසුන්ට පවා තමන්ගේ න්‍යායාත්මක දැනුම ප්‍රායෝගිකව අත්විඳින්නට මෙම කෞතුකාගාරය මහත් රුකුලක් ගෙනදෙනු ඇත. වෛද්‍ය පශ්චාත් වෛද්‍ය හා සෞඛ්‍ය කේෂ්ත්‍රයට සම්බන්ධ සියලූ වෘත්තිකයෝ තම වෘත්තීන් හි සාර්ථකත්වයට පත් වන්නට මෙම කෞතුකාගාරය පිටිවහලක් කර ගනිති. සාමාන්‍ය ජනතාව තම මිනිස් ශරීරය පිළිබඳ වන කුතුහලය සංසිඳවා ගනු ඇත.
සාමාන්‍යයෙන් ලංකාවේ ජනතාවට එලෙස මිනිස් සිරුරේ කොටස් හොඳින් දැකබලා ගැනීමට හැකි වන්නේ වසර ගණනකට වරක් පැවැත්වෙන වෛද්‍ය ප්‍රදර්ශනයකින් පමණයි. එහෙත් දැන් දැන් ලංකාවේ ඔනෑම අයෙකුට පැමිණ මෙම කෞතුකාගාරය නරඹා තම කුතුහලය සංසිඳවා ගත හැකිය.
පන්තියේ කළු ලෑල්ලට හුනුකූරට පෙළපොතෙහි ඇති පින්තූරයෙන් පමණක් උගනගන්නා සමාජයට මහා උපකාරයක් වූ මෙම කෞතුකාගාරය සැකසීමට පේරාදෙණි වෛද්‍ය පීඨයේ කායව්‍යවච්ඡේදන අංශයේ සියලු ගුරුසිසු සේවක පිරිස් එක්ව කටයුතු කර තිබිණි.
සියලූ නිර්මාණයන් ඔවුනොවුන්ගේම වෙහෙස මහන්සියේ ප්‍රතිඵලය. සීමාවාසික වෛද්‍යවරුන්ගේ වෙහෙස මහන්සිය මෙන්ම මහාචාර්ය වෛද්‍ය ජයම්පති දිසානායකයන් මෙන්ම මහාචාර්ය අජිත් සොමිනන්ද මෙන්ම පූර්ව සීමාවාසික වෛද්‍යවරුන්ගේ වෛද්‍ය ප්‍රශාන් එදිරිසිංහ ඇතුළු පිරිසත් අනධ්‍යයන සේවක පිරිසත් එහි කොටස්කරුවෝය.
එම කෞතුකාගාරය තුළ පවතින වස්තූන් අතර මිනිස් මළ සිරුරු මිනිස් ඇටසැකිලි කාය ව්‍යච්ඡේදන මූල ග්‍රන්ථ වෛද්‍ය විද්‍යාවේ පතාක යෝධයන්ගේ ඡායාරූප හා තොරතුරු මෙන්ම වෛද්‍ය විද්‍යාවේ විකාශය පැහැදිලි කරනා පුවරු සිංහල, දෙමළ, ඉංග්‍රීසි යන සියලූ භාෂාවන්ගෙන් සඳහන් කොට ප්‍රදර්ශනය කර ඇත.
මේ වන විට නොමිලේ ප්‍රදර්ශනය කරන කෞතුකාගාරය නුදුරේ දී එහි නඩත්තුව සඳහා ඉතා සුළු මුදලක් අය කොට ප්‍රදර්ශනය කිරීමට බලාපොරොත්තු වන බව ද මහාචාර්ය වෛද්‍ය අජිත් සොම්නාද මහතා විසින් දැනුම් දෙන ලදී.
අඟලේ තීරුවලට කැපූ සිරුර දශමෙන් දශමෙට වෛද්‍ය සිසුන්ට හඳුනාගැනීමට මෙන්ම ඩිජිටල්කරණය භාවිත කරමින් පැහැදිලි කිරීම්ද දැකගත හැකිය.
එසේම වෛද්‍ය පීඨය පවසන පරිදි තම ශරීරය මරණින් පසු පොළොවට පස්වීමට ඉඩ නො දී ලෝකයට වැඩදායී වන ලෙස වෛද්‍ය පීඨයට පරිත්‍යාග කළ හැකිය. ඒ සඳහා අවශ්‍ය තොරතුරු ද වෛද්‍ය පීඨය හා සම්බන්ධ වී දැනගත හැකිය. තවත් ජීවිත දහස් ගණන් ජීවත් කරවන්නට දැනුම දෙන්නට ඔබේ ශරීරය හේතුවනු ඇත. එසේ පරිත්‍යාග කරනු ලබන මළ සිරුරුවල මියගිය පිරිස් උදෙසා පින් පැමිණවීමට ආගමික වතාවත් කිරීමටද වෛද්‍ය පීඨය කෘතඥ පූර්වක වේ.
මෙම ලංකාවේ ප්‍රථම කායව්‍යවච්ඡේද කෞතුකාගාරය පිළිබඳ පේරාදෙණිය විශ්වවිද්‍යාලයේ උපකුලපති මහාචාර්ය උපුල් බී දිසානායක අදහස් දක්වමින් කියා සිටියේ “විශ්වවිද්‍යාලයක් සතුව ප්‍රධාන කාර්ය ත්‍රිත්වයක් පවතිනවා... පළමුවැන්න රටට අවශ්‍ය උපාධිධාරීන් බිහිකිරීම... දෙවැන්න රටට නව පර්යේෂණ මඟින් නව නිර්මාණ බිහිකිරීම...තෙවැන්න ජනතා මෙහෙවරක් සිදු කිරීම.අපගේ වගකීමක් යුතුකමක් තියනවා අපේ දැනුම ජනතාව අතර බෙදාදීම. මේ කෞතුකාගාරය එහි ප්‍රධාන පියවරක්. මෙහි දී විශේෂිතවම සඳහන් කළ යුතු වනවා.
මෙම කෞතුකාගාරය පාසල් දරුවන්ට අවශ්‍ය විෂයානුබද්ධ දැනුම ලබා දෙනවා. මෙවන් කෞතුකාගාරයක් නරඹන්න පාසල් අධ්‍යාපන චාරිකා සැලසුම් කරන්න පුළුවන්.
මෙම කෞතුකාගාරය මහජනතාවට සෙනසුරාදා ඉරිදා විවෘත කර තබන්න බලාපොරොත්තු වෙනවා. අපි හිතනවා එමඟින් පාසල් දරුවන්ට උසස් අධ්‍යාපනය ලබන්න විශ්වවිද්‍යාලයට ඇතුළු වෙන්න වෛද්‍ය විද්‍යාව හදාරන්න හොඳම උද්දීපනයක් පෙලඹවීමක් වෙයි කියලා.
සඳරැසී සුදුසිංහ
