සමීප රූප | සිළුමිණ

සමීප රූප

නොරිකො සං සොයා ගොසින්

නොරිකො සං ගේ සමීපරූපය ඉන්ද්‍රචාපගෙ සමීපරූප අතර ඇඳී ඇත්තෙ පණහෙ දශකයෙ අග භාගයේ සිට වගෙයි මතකය. මහාචාර්ය සරච්චන්ද්‍රගේ මළගිය ඇත්තෝ (1959) නවකතාව සමග අපේ සාහිත්‍යයට නොරිකො දෙවොන්දරා සං පෙම්වතුන් යුවළ එකතුවෙනවා. ජපානයේ ජීවත් වූ පෙම්වතෙක් හා පෙම්වතියක් වූවත් ඔවුන් දෙදෙනා අපේ සාහිත්‍ය වංශ කතාවෙ නවකතා, මළගිය ඇත්තෝ හා මළවුන්ගේ අවුරුදු දා (1965) අතර පළමු වරට හමු වී අදත් සිහිපත් කෙරෙන, ආදරයෙන් වැලඳ ගත් පෙම්වතුන් දෙදෙනකු වී හමාරයි. ගම්පෙරළියේ පියල් නන්දා, ගොළු හදවතේ සුගත් දම්මි වගේම නොරිකො දෙවොන්දරා සං අමරණීය පෙම් යුවළක් බවට පත් කරන්නේ මහාචාර්ය සරච්චන්ද්‍ර එතුමාගෙ රමණීය භාෂාවෙන්. මේ නවකතා පොත් තුළ ලියැවී ඇති බොහෝ සංවාද, ජපානයේ පරිසරය මැවුණු වර්ණනා, ඉන්ද්‍රචාපට මෙන්ම මෙරට බොහෝ පාඨකයන්ට ද කටපාඩමින් කියන්න පුළුවන් තරමට සමීපරූප බවට පත් වී සිතින් අපි මේ දෙදෙනා ජීවත් වූ ජපානයට, තෝකියෝවට ගමන් කරනා බවයි ඉන්ද්‍රචාපට දැනුණෙ. මේ අතර, පසුගිය දවසක, ඉන්ද්‍රචාපගේ සමීපරූපයට හසුවෙනවා, අපූරු , වෙනස් ආකාරයේ පොතක්. පොතේ නම, නොරිකො සං සොයා. රචකයගෙ සමීපරූපයෙ ඉන්නෙ නාරද විජයසූරිය. 2017 දි නාරද ලියූ මතක පොතේ සමීපරූපයකුත් ඉන්ද්‍රචාප දකිනවා. නොරිකො සං සොයා, නාරද හඳුන්වන්නේ චාරිකා සටහන් ලෙස.

මළගිය ඇත්තෝ හා මළවුන්ගේ අවුරුදු දා නවකතා තුළ අප කියවූ අපට හමු වූ නොරිකො දෙවොන්දරා පෙම්වතුන් ජීවත් වූ පරිසරය, ඔවුන් හමු වූ, වෙන් වූ ස්ථාන, අවන්හල්, රඟහල , මල් උයන් , දුම්රිය ස්ථාන, පන්සල් ආදී බොහෝ සැමරුම් අතරට නාරද පාඨකයා රැගෙන යන්නේ අපූරු වර්ණවත් ඡායාරූපාවලියක් ද සමගය. නොරිකො සංගේ නි‍ෙවස තිබී ඇත්තේ වකබයෂියෙහිය. නොරිකො එහි විසූවා යැයි කියැවෙන අංක 225 නිවෙස සොයන්නට රචකයා වෙහෙසුණු බව නාරද පවසන්නේ මෙසේය. "එදා වකබයෂි වෝ නම් වූ ඔවුන් විසූ පෙදෙස අද අර්ධ නාගරික පරිසරයක් බවට පත් වී 'චෝමේ' නම් කොටස්වලට බෙදා තිබේ. වකබයෂි වෝ හි තතමි පැදුරෙන් සහ ලී දොරෙන් යුත් අංක 225 නිවෙස සොයමින් වයස්ගත ගැහැනු පිරිමි බොහෝ දෙනෙක් නතර කළෙමි. අඩුම තරමේ වයස හැත්තෑ ගණන්වල ඔවුන් නොරිකොගේ තරුණ කාලයේ කුඩා දරුවන් විය යුතුය. නො එසේ නම් ඉපදී නොසිටිය යුතුය."

කන්නනා දොරියේ පන්සල ද නොරිකො දෙවොන්දරා සං සමග නිතර ආ ගිය ස්ථානයකි. "මඳක් ඉහළට නැගුණු මාර්ගයේ දකුණුපස දැව තොරණක් යටින් ගල් පඩිපෙළ නැගුණු විට කන්නනා පන්සල හමු වේ. වරක් දෙවොන්දරා සං සහ නොරිකො පන්සලට ගිය විට මහත් භක්තියෙන් ඇය හඳුන්කූරු ගැසූ දෙවොන්දරා සං ඒ දෙස බලා සිටි භූමියේ මම සිටිමි. කුඩා පන්සලක් වූ එහි ගල්පඩිය මත මඳක් හිඳගෙන වසා තිබූ දොර දෙස බැලූවෙමි. එහි ඇතුළට යන්නට තිබුණා නම් යන හැඟීම පහළ විය. එසේ වී නම් දෙවොන්දරා සං නොරිකො දෙස බලා සිටි ඉරියව්වෙන් එතැනම සිට ඒ ගැන ඔබට කියන්නට තිබුණි." රචකයා මෙපරිද්දෙන් නොරිකො පිළිබඳ අප මතකය අවදි කරනු ලබන චිත්තරූප මවයි.

වැඩි කතා බහක් නැති අභ්‍යන්තරයට නැඹුරු වූ ගුප්ත මිනිසකු වූ නමුදු දෙවොන්දරා සං නොරිකෝගේ සමාගමයට බෙහෙවින් රුචි වීය. ඈ නො ආ විට හෝ අනෙකකු සමග කෝපි බීමට යන බවක් කී විට මුවින් නොබිණුව ද ඔහුගේ ඊර්ෂ්‍යාව ඉස්මතු විය. එවැනි මොහොතක ඉඳහිට ඈ රිදවන්නට ඔහු පෙලඹිණි. එහෙත් ඔහුගේ බලාපොරොත්තු නොසුන් කොට කොට ඈ එනවිට ළදරුවකු සේ සිත පහන් වෙයි. එවැනි සුන්දර මොහොතක ඔවුන් දෙදෙනා ඇවිද ගිය තැනකි 'ඉනොකෂිරා ' උද්‍යානය'. ඉනොකෂිරා උද්‍යානය පිළිබඳ මැවුණු අපූරු චිත්‍රයක සමීපරූපයක් ඉන්ද්‍රචාපට පෙනේ. ෂින්තෝ ආරාමය, බොන්සායි ගම්මානය, හිරොෂිමා බෝම්බයට හසු වූ සදකො සසිකි දැරිය මියයන විට ඔරිගාමි කොකුන් දහසක් තැනීමේ පුවත නොරිකො සං සොයා ගිය චාරිකා අතර ඉන්ද්‍රචාපගේ සමීපරූපයට හසු වූ තවත් මිහිරි මතක වේ. නොරිකො පිළිබඳ, දෙවොන්දරා සං හා ඇගේ ප්‍රේමය පිළිබඳ මතක මාවතේ අප ගෙන යෑමට නොරිකො සං සොයා උත්සාහ ගනී. ඊට අමතරව රචකයා ගේ යුරෝපයේ චාරිකා සටහන් ද මේ පොතටම ඇතුළු කිරීම මඟින් ජපානයෙන් එපිට ලොව සුන්දර හා වැදගත් ස්ථාන රැසක් කරා පාඨකයා රැගෙන යාමට ද නාරද විජයසූරිය සංචාරක රචකයා සමත් වී සිටී.

 

අදහස්