මෑතකදී බලපෑ නියඟයෙන් පීඩාවට පත් උතුර, නැගෙනහිර හා උතුරු මැද පළාත් ඇතුළු ප්රදේශ කීපයක පීඩාවට පත් කාන්තාවන් විසින් ක්ෂුද්ර මූල්ය ආයතන වෙතින් ලබාගත් ණය රුපියල් ලක්ෂයක් හෝ ඒ දක්වා වන ණය සම්පූර්ණයෙන්ම කපා දැමීමට රජය තීරණය කර තිබේ.
ඒ අනුව නියඟයෙන් බලපෑම් ඇති වූ ත්රිකුණාමලය, අම්පාර, මඩකලපුව, යාපනය, මුලතිව්, කිලිනොච්චි, වව්නියාව, මන්නාරම, කුරුණෑගල, පුත්තලම, අනුරාධපුරය හා පොළොන්නරුව යන දිස්ත්රික්ක 12 තුළ පදිංචි කාන්තාවන්ට සහන සලසමින් ඔවුන් විසින් ලබාගෙන තිබුණු මෙම ක්ෂුද්ර මූල්ය ණය කපා හැරුණු ඇත.
පසුගිය කාලය පුරාම ක්ෂුද්ර මූල්ය සමාගම් මගින් ණය ලබා ගත් කාන්තාවන් එම ණය ලබා දුන් ආයතන ඒවා නැවත අයකර ගැනීමේ දී අනුගමනය කළ දරදඬු හා අවිධිමත් ක්රියාකාරකම් හමුවේ පත්වූ අසීරුතාව පිළිබඳ තොරතුරු රැසක්ම මාධ්ය මගින් වාර්තා කර තිබුණි. ලාභ ලැබීම අරමුණු කරගත් ඇතැම් ක්ෂුද්ර මූල්ය ආයතන තමන් ලබාදුන් ණය සඳහා සියයට තුන්සියයක් තරම් විශාල අගයක පොලියක් අය කරගත් අතර උහුලාගත නොහැකි ණය බර හමුවේ පවුල් ජීවිත රැසක් විනාශ වුණු බව ද, ණය ගෙවා ගත නොහැකි වුණු සමහරක් දෙනා ඒ වේදනාව, කලකිරීම හා ලැජ්ජාව නිසා සියදිවි නසා ගත් බව ද වාර්තා විය. ඉල්ලන පරක්කුවට ණය ලබා දුන්න ද එම ණය නැවත අයකර ගැනීමේ දී ක්ෂූද්ර මූල්ය ආයතන අනුගමනය කර තිබුණු ඇතැම් ක්රම ශිෂ්ට සමාජය කිසිලෙසකින් වත් අනුමත නොකරන බව පීඩාවට පත් වූවන්ගේ අදහසය.
ක්ෂුද්ර මූල්ය ණය ගෙවා ගත නොහැකිව නියඟයෙන් පීඩාවට පත් ප්රදේශ වල පදිංචි කාන්තාවන් පත්වූ අසීරුතාවයන් පිළිබඳව මාධ්ය ඔස්සේ තොරතුරු ඉදිරිපත් වීමත් සමඟ ඒ පිළිබඳ ජනාධිපතිතුමා, අගමැතිතුමා, මුදල් ඇමතිතුමා ප්රමුඛ සමස්ත රජයේ අවධානය යොමුවිය. ඒ අනුව මෙම කාන්තාවන්ට සහන සැලසිය හැකි ආකාරය පිළිබඳව සොයා බලන්නැයි ජනාධිපතිතුමා හා අගමැතිතුමා මුදල් අමාත්යතුමා ප්රමුඛ මුදල් අමාත්යාංශ බලධාරීන්ට උපදෙස් ලබා දුන් අතර එම උපදෙස් අනුව ක්රියාත්මක වූ ශ්රී ලංකා මහ බැංකුව මෙම ණය ලබාගත් කාන්තාවන්ට සහන සැලසිය හැකි ආකාරය පිළිබඳ රජයට කරුණු ඉදිරිපත් කරන ලදී. එම කරුණු පිළිබඳ විශේෂ අවධානය යොමුකර නියගයෙන් පීඩාවට පත් දිස්ත්රික්කවල පදිංචි කාන්තාවන් විසින් ශ්රී ලංකා මහ බැංකුවේ ලියාපදිංචි වී ඇති මූල්ය සමාගම් හා ලංකා ක්ෂුද්ර මූල්ය සංගමයේ ලියාපදිංචි වී ඇති ක්ෂුද්ර මූල්ය ආයතන වෙතින් ලබාගත් උපරිම රුපියල් ලක්ෂය දක්වා වූ ක්ෂුද්ර මූල්ය ණය මුදලින් 2018 ජුනි 30 දින වන විට අවම වශයෙන් අඛණ්ඩව මාස තුනක කාලයක් හිඟව ඇති ණය ශේෂයන් හා හිඟ පොලී ප්රමාණයන් කපාහැරීමට කැබිනට් මණ්ඩලය පසුගියදා අනුමැතිය ලබා දුන්නේය.
රජය ගත් මෙම තීරණය ක්රියාත්මක වන ආකාරය පිළිබඳව “සිළුමිණ“ කළ විමසීමේදී එහි උසස් නිලධාරියෙකු සඳහන් කර සිටියේ කපා හැරීමට අපේක්ෂිත හිඟ ණය ශේෂයන් හා හිඟ පොලී ප්රමාණයක් අදාළ මූල්ය සමාගම් හා ක්ෂුද්ර මූල්ය ආයතන විසින් 2018 අගෝස්තු 31 වන දිනට පෙර මහා භාණ්ඩාගාරය වෙත ඉදිරිපත් කළ යුතු බවට එම සමාගම් හා ආයතන දැනටමත් දැනුවත් කර ඇති බවයි . ඒ අනුව හිඟව ඇති ණය ශේෂයන් හා හිඟ පොලී ප්රමාණයන් කපා දැමීමේ දී සිදුවන අලාභය පිළිවෙළින් මහා භාණ්ඩාගාරය හා මූල්ය සමාගම් හෝ ක්ෂුද්ර මූල්ය ආයතන විසින් දරන බවද පැහැදිලි කළ එම නිලධාරියා එසේ කපා හරින ලද හිඟව ඇති ණය ශේෂයන් මහා භාණ්ඩාගාරය විසින් මූල්ය සමාගම් හා ක්ෂුද්ර මූල්ය ආයතන වෙත වසර තුනක් තුළ සමාන වාරික 6 කින් ගෙවා දමන බවද සඳහන් කළේය.
කෙසේ වුවද ණය ගැනුම්කරුවකු විසින් රුපියල් ලක්ෂයක් හෝ ඊට අඩු ණය කිහිපයක් එක් ආයතනයකින් හෝ ආයතන කීපයකින් ලබාගෙන ඇති විට උපරිම හිඟ මුදල සහිත එක් ණය මුදලක් පමණක් කපා දැමීමට මහ බැංකුව කටයුතු යොදා තිබේ. ඒ අනුව මෙම ණය සහන වැඩසටහන මගින් එක් ණය ගැනුම්කරුවෙකුට ප්රතිලාභ ලැබිය හැක්කේ එක් හිඟ ණය මුදලක් සඳහා පමණි. ණය හා හිඟ පොලී පිළිබඳ විස්තර අදාළ මූල්ය සමාගම් හා ක්ෂුද්ර මූල්ය ආයතන විසින් අගෝස්තු 31 වන දින වන විට භාණ්ඩාගාරය වෙත ඉදිරිපත් කළ පසු මේ සම්බන්ධව අදාළ මූල්ය සමාගම් හා ක්ෂුද්ර මූල්ය ආයතන සමඟ අවබෝධතා ගිවිසුමකට එළැඹීමට ද මහා භාණ්ඩාගාරය බලාපොරොත්තු වේ. එම අවබෝධතා ගිවිසුම අත්සන් කළ පසු මූල්ය සමාගම් හෝ ක්ෂුද්ර මූල්ය ආයතන විසින් හිඟ පොලී මුදල කපා ඉවත් කළ යුතු අතර එහිදී සිදුවන අලාභය එකී සමාගම් හෝ ආයතන මගින් දැරිය යුතුවේ. එමෙන්ම එසේ පොලි මුදල් කපා හැරීමේ දී තම සමාගම් හෝ ආයතන වෙත සිදුවූ අලාභය සම්බන්ධයෙන් ඉන් අනතුරුව කිසිදු ඉල්ලීමක් රජය වෙත හෝ ණය ගැනුම්කරුවන් වෙත ඉදිරිපත් නොකළ යුතු බවට ද කොන්දේසියක් පනවා ඇත.
අවබෝධතා ගිවිසුම අත්සන් කර සතියක් ඇතුලත මූල්ය සමාගම් හෝ ක්ෂුද්ර මූල්ය ආයතන විසින් එක් එක් ණය ගැණුම්කරුවකු වෙත ගෙවිය යුතු ණය මුදලෙන් නීතිමය වශයෙන් නිදහස් කිරීමට අදාල ලිපි නිකුත් කිරීම සිදුකළ යුතු අතර “සිළුමිණ“ සමඟ අදහස් දැක්වූ ශ්රී ලංකා මහ බැංකුවේ උසස් නිලධාරියා එහිදී වැඩිදුරටත් පෙන්වා දුන්නේ මූල්ය සමාගම් හෝ ක්ෂුද්ර මූල්ය ආයතන තොරතුරු ඉදිරිපත් කරන තුරු කපා හැරෙන ණය හා පොලී මුදල් හී එකතුව පිළිබඳ නිශ්චිත අදහසක් ඉදිරිපත් කළ නොහැකි බවයි. පැහැදිලිවම මෙලෙස ණය මුදල් කපා හැරීම රජය එම ණය ලබා ගත් ජනතාවට ලබා දුන් අති දැවැන්ත ප්රතිලාභයක් බව ද හෙතෙම අවධාරණය කළේය.
මේ අතර මූල්ය සමාගම් හෝ ක්ෂුද්ර මූල්ය ආයතන සඳහා තවදුරටත් ගිනිපොලී අයකර ජනතාව සූරා කෑමට අවස්ථාව නොදී ක්ෂුද්ර මූල්ය ණය සඳහා අයකරනු ලබන වාර්ෂික පොලිය සියයට 35ක උපරිමයකින් පවත්වාගෙන යාමට අවශ්ය මාර්ගෝපදේශ නිකුත් කිරීමට ද ශ්රී ලංකා මහ බැංකුව බලාපොරොත්තුවේ. මහ බැංකුව සතු තොරතුරු වලට අනුව මේ වන විට ක්ෂුද්ර මූල්ය ණය සඳහා 40% සිට 300% ක් පමණ දක්වා අධික පොලියක් අය කෙරේ. මීට අමතරව මෙතෙක් තමන් වෙතින් ණය ලබා ගත් ගනුදෙනුකරුවන් වෙත උසුලාගත නොහැකි පීඩනයක් ලබා දුන් මෙම ක්ෂුද්ර මූල්ය සමාගම් පාලනය කිරීම සඳහා නව නීති රීති ද හඳුන්වාදීමට රජය කටයුතු යොදා ඇති අතර එම නීති රීති වලට අනුගතව කටයුතු කිරීමට එම සමාගම් හෝ ආයතන අපොහොසත් වන්නේ නම් ශ්රී ලංකා මහ බැංකුව මගින් එම මූල්ය සමාගම් හෝ ආයතන වෙත දැඩි පියවර ගැනීමට ද අපේක්ෂා කරන බව නිවේදනය කර තිබේ.