මාතර නගර මධ්යයෙන් ගලා බසින නිල්වලා ගඟේ සිටින කිඹුලියගේ පැටියා මිනී නොකන අහිංසකයකු බව එදා ජනකවියා පෙන්වා දුන්නේ මිනිසුන් ගොදුරු කර ගන්නා කිඹුලන් පවා මාතර දී මිනී නොකන බව හුවා දැක්වීමට ය. සමහර විට මාතර වෙසෙන ජනතාව ද ඒ තරමටම අහිංසක බව කියාපෑමට කවියා උත්සාහ කළා විය යුතුය. එහි ඇත්ත නැත්ත කෙසේ වුවද මිනිසුන් ගොදුරට නොගන්නා කිඹුල් පැටවුන් සිටින මාතර නගරයේ මිනිසුන් ගොදුරු කර ගන්නා පිරිසක් මෑතක පටන් හැසිරෙන බව දැනගන්නට ලැබිණි.
ඔවුහු ලියෝ පිරිසක් වෙති. එහෙත් කිඹුලියෝ නම් නොවෙති. එම ලියෝ අබිසරුලියෝ වෙති. අට දෙනෙකුගෙන් පමණ සමන්විත කණ්ඩායමකි. ඉතා සුරූපි තරුණියන් වූ ඔවුන් දිවා කාලයේ වෙළෙඳ සහායකවරියන් ලෙස සේවය කරන අතර ගණිකා වෘත්තියේ යෙදෙන්නේ රාත්රී කාලයටය.
මෙම ගණිකා ව්යාපාරය ජංගම ව්යාපාරයක් ලෙසින් පවත්වා ගෙන යන බැවින් ඔවුන් නීතියේ රැහැනට හසු කර ගැනීමට පහසු නැත. මාතර නගරයට නුදුරුව පවත්වාගෙන යන භෝජන ශාලාවක හිමිකරුගේ මූලිකත්වයෙන් කෙරෙන එම ජාවාරම ඉතාම සුක්ෂම ආකාරයට සිදු වේ. මාතර නගරය ආවරණය වන පරිදි පවත්වාගෙන යන ව්යාපාරික ස්ථානවල සේවයේ යෙදී සිටින තරුණියන් එම භෝජන ශාලා හිමිකරුගේ ජංගම ගණිකා ව්යාපාරයට සම්බන්ධ කර ගන්නා අතර එම තරුණියන් සිය සේවා ආයතනයේ කීර්ති නාමය උපයෝගි කරගෙන පිරිමින් වසඟයට ගන්නා බව ප්රසිද්ධ රහසකි. එහෙත් මෙම ගණිකාවන්ගේ ප්රධාන ඉලක්කය බස් රථ රියැදුරන් සහ කොන්දොස්තරවරුන්ය. මෙම ගණිකාවන් මාතර බස් නැවතුම්පොළ ආසන්නයේ රැදී සිටින්නේ එම නිසාය.
රාත්රි දහය පසු වී ළඟා වන බස් රථ වෙනුවෙන් සැදී පැහැදී සිටින එම අබිසරුලියන් විසින් පුද්ගලයන්ගේ ස්වාභාවය අනුව මිල ගණන් තීරණය කරනු ලැබේ. දුර ගමන් බස් රථ නැවතුම්පොළේ නවතා තැබෙන්නේ පැය භාගයක් වැනි කාලයක් පමණි.
එබැවින් එවැනි බස් රථ රියැදුරන්ගේ සහ කොන්දොස්තරවරුන්ට සේවය ලබා ගැනීමට හැකි වන්නේ කෙටි කාලයකි. එවැනි සේවාදායකයන්ට “බජට් පැක්” ක්රමයකට සිය සේවාව සැපයීමට මෙම ගණිකාවෝ සූදානම් වී සිටිති.
ඉන් අදහස් වන්නේ එවැනි අඩු කාලයකට රුපියල් පන්සීයක් පමණ අය කරන බවය. ඒ හැරුණු විට ඔවුන්ගේ අය කිරීම් රු.2000 .00 සිට රු.5000.00 දක්වා පරාසයක් තුළ ක්රියාත්මක වේ. ඒ මිල නියම වන්නේ එක් එක් ක්රියාකාරකම් අනුවය. වලස්මුල්ල, දික්වැල්ල, තංගල්ල වැනි දුර බැහැර ප්රදේශවල මෙන්ම අගනුවර සිට මාතරට පැමිණි තරුණියන් මෙම ගණිකා ව්යාපාරයේ නිරත වී සිටින්නේ අමතර ආදායමක් උපයා ගැනීමේ අරමුණෙනි.
එහෙත් ඔවුන්ගේ ආදායම සරු වන විට පිරිමින්ගේ ආදායම නිසරු වීම කනගාටුදායකය. එමෙන්ම පසුගිය දිනවල උසස් පෙළ සිසුවකු ද ගණිකාවන්ගේ ගොදුරක් බවට පත් වී තිබේ. ඉන් අනතුරුව මාතර නගරයේ සැරි සරන වීදි ළඳුන් සහ එම ව්යාපාරය පිටුපස සිටින ව්යාපාරිකයා පිළිබඳව ද සමාජ ජාලවල පැතිරිණි.
මාතර නගරයේ අරක් ගත් ගණිකා ව්යාපාරය මැඬලීමට නොහැකි වී තිබෙන්නේ මෙකී ව්යාපාරිකයා සමාජයේ ඉහළ තලයේ ප්රබල පුද්ගයන් ඇසුරු කිරීමයි. ගණිකා ව්යාපාරය මෙහෙයවන ව්යාපාරිකයාට අයිති ලැගුම්හල් කීපයක් ද තිබේ.
වෙනත් පාරිභෝගිකයන්ට ලැගුම්හල්වල කාමර කුලියට දුන් නමුදු ව්යාපාරිකයා යටතේ සේවය කරන ගණිකාවන්ට මෙම ලැගුම්හල්වල කාමර කුලියට ලැබෙන්නේ නැත.
මීට වසර දහයකට පමණ පෙර ඉතා සුළුවෙන් ඇරඹි මෙම ගණිකා ව්යාපාරය අද මාතර නගරය වසා ගත් පිළිලයක් වී හමාරය. එහෙත් බලධාරින් නිහඬය. මෙම කාන්තා ගණිකා ව්යාපාරයට අමතරව රාත්රී කාලයේ මාතර වෙරළ තීරය තවත් එවැනිම කටයුත්තකට තෝතැන්නක් වී තිබේ. ඒ සඳහා යොමු වී සිටින්නේ කාන්තාවන් නොව පිරිමින් කීප දෙනෙකි.
කුඩා බෑගයක් අතට ගත් ඔවුන් රාත්රියේ වෙරළ උද්යානයේ බංකු මතට වී සුසුම් හෙළමින් බලා සිටින්නේ ගනුදෙනු කරුවකු පැමිණෙන තුරු ය.
ඇතැම් රියැදුරෝ සහ කොන්දොස්තරවරු මොවුන්ගේ පාරිභෝගිකයෝ වී සිටිති. නැත හොත් ජංගම වෙළඳුන් ඔවුන්ගේ පාරිභෝගිකයෝ ය.
මෙම සම ලිංගික සේවය රාත්රී කාලයේ පමණක් නොව දිවා කාලයේද ලබා ගත හැකිය. ඔවුහු පැය 24 පුරා ඊට සූදානමින් සිටිති.
මාතර වෙරළ තීරයේ එක් කොනක සිට අනෙක් කෙළවර දක්වා පා ගමනින් යන මොවුන් කෙසේ හෝ බඩ වියත රැක ගැනීමටත් ගංජා වැනි මත්ද්රව්ය පාවිච්චියටත් කීයක් හෝ සොයා ගැනීමට සම ලිංගික සේවයේ යෙදීම සැබැවින්ම ඛේදජනකය. මොවුන්ගෙන් ඇතැම් අය දිවා කාලයේ පෞද්ගලික බස් රථවලට මගීන් නැංවීම සඳහා කෑගසන අය බවට වාර්තා වී තිබේ. මෑතකදී එවැනි පුද්ගලයන් දෙදෙනකු රාත්රී 12.00 ට පමණ මාතර වෙරළ තීරයේ අඩදබර කර ගත්තේ උපයා ගත් මුදල් බෙදා ගැනීමේදී අර්බුදයක් මතු වූ නිසාය. ඒ නිසාම ඔවුන් එකිනෙකාට චෝදනා කරගන්නා තත්ත්වයක් ඇති විය. මාතර නගරයේ ව්යාප්ත වී තිබෙන ගණිකා සහ සම ලිංගික ව්යාපාරය නිසා දකුණු ප්රදේශයේ පැතිරෙන්නේ අයහපත් කල දසාවකි.
එක් අතකින් සංස්කෘතික සෝදාපාළුවයි. තවත් පැත්තකින් ඒඩ්ස් වැනි මාරාන්තික රෝග ඇතුළු විවිධ සමාජ රෝග බෝවීමෙන් රටට සිදු වන අනර්ථයයි. ඒ සමඟම විවාහකයන්ගේ පවුල් ජීවිත බිඳ වැටේ.
උපයන ආදායම අබිසරුලියන්ට වියදම් කිරීමෙන් පසුව අග හිඟකම් පවුල් ජීවිත වසා ගනී. ඉන්පසුව ඇති වන්නේ ගැටුම්ය.
මෙම ජාවාරම් මැඬලීමට අදාළ බලධාරින් පියවර නොගැනීමෙන් රට තුළ ඇති වී තිබෙන ඛේදවාචකය සුළු පටු නැත.